Bahan Sermon Evangelium HKBP Ressort Panai Hilir

Minggu XVI Dung Trinitatis, 02 Oktober 2022

NDANG MARPASOHOTAN ASI NI ROHA NI TUHAN
Andung 3:19-26
I. Patujolo
Ende andung sian si Jeremia ima marisihon rumang ni andung na manangisi huta Jerusalem di hadadabuna
tu halak Babel sahat ro di hasusuda ni bagas joro nang di natartaban pangisi ni huta Jerusalem tu Babel. Nang pe
didok ende andung si Jeremia on marisihon andung habot ni riha , alai mansai ampit do dibagasan andung i
haporseaon tu Debata dohot panghirimon di ari sogot na dumenggan (dipaimbaru Debata). Sebagian besar ende
andung on dipangke halak Jahudi di angka parningotan nang panombaon tu Debata marpardomuan diparningotan
ragam ni na masa dohot hamaolon naung niadopan nasida, isarana songon habuangan tu Babel. Di bindu 3:1-66
ima marisihon uhuman dohot panghirimon jala laos disi do disoarahon songon dia asi roha ni Debata na so
marhaujungan paihutihut bangsoNa atik pe ingkon manaon na porsuk jala marsitaonan nasida dihabuangan Babel.
On ma gombaran na so dung dipasombu Debata bangsoNa, alai sai tongtong do marpamuati rohaNa mida dosa
bangsoNa. Alani tapaihutihut ma hatorangan ni turpuk on laho patoguhon haporseaonta.

II. Hatorangan Ni Turpuk

1. Sai ingot ma Dangolhon Ale Tuhan (ay. 19-21)
Dibonai do turpuk on marhite pandohan di ayatr 19 I” sai ingot ma dangolhon dohot pangaleleon na tu ahu ro di
rursa dohot di rasun”. Na manggombarhon hinabernit ni sitaonon ni bangso I songon na pagukgukhon rasun dohot
hangaluton tu nasida. Pola nasida dilele sian huta hagodanganna jala angka sitaonon na diae nasida dibagasan
pangaleleon i. Alai saluhutna sitaonon I diingot ibana ndada asa mambahen mago haporseaonna. Alai justru
sitaonon I diingot ibana asa mambahen sabam manang togu rohana manjalo saluhutna i. jala laos porsea do nang
ibana songon dia asi ni roha ni Debata na tongtong dihilala ibana. dibagasan sitaonon si Jeremia dohot bangso ni
Debata alai tongtong do nasida hlan marpanghirimon tu Debata. Ndang dibaen ibana panghirimonna tu Debata
sileban manang mangalului haluaon sian bangso na asing. Tu Debata do saluhutna dipasahat ibana holso ni rohana.
Jala porsea do ibana diparoahon Debata do saluhut parniahapan na ni adopan ni ibana rap dohot bangso i. Laos on
do tudutudu tu hita songon halak na porsea hita tu Debata. Nang ragam pe hamaolon manang paet ni sitaonon na
masa dingolunta ingkon do marsihohot hita dihaporseaonta marhite na tongtong pasahathon dirinta tu adopan ni
Debata. Yeremia yang hidup dalam penderitaan yang begitu menyakitkan baginya dan bagi bangsa itu tetapi
harapannya hanya tertuju kepada Allah yang telah memilih bangsa itu. Nang songon I ma hita molo tung masa pe
sitaonon I naeng ma nian marhaporusan tu Debata hita.
2. Gok do Asi ni roha ni Debata (ay. 22-23)
Adong do sada haporseaon na hinangoluhon ni si Jeremia dohot bangso Israel ima pamotoan ni panurirang dohot
pangantusion nasida di hamamasa ni uhuman I. didok nasida ingkon masa do saluhutna I alani dosa dohot
hatangkangon ni roha ni bangso i. alai atik pe masa saluhutna haporsuhon, gabe hatoban nasida jala tartaban tu
Babel, disi do patuduhon jala dipatupa Debata pangurupionNa tu bangsoNa. Didok diayat 22 I, “Asiasi ni Jahowa
sambing do umbahen so haru sun siap hami, ai ndang marpansohotan asi ni rohaNa. Sian on boi idaonta
panindangion ni bangso I taringot tu asi ni roha ni Debata di bangso i. nang pe ingkon diuhum nasida alani dosa
nasida alai marpangulangi do roha ni Debata mida bangsoNa i. holan asi ni roha ni Debata do n apatupahon I di
nasida. Gabe dipatupa Debata ma pangapulion na gabe panghirimon di bangso I, ima: “mulak rata do bahenon ni
Jahowa na masa tu bangso I” (ay, 23). Lapatanna I, sai adong dope pangkirimon dipatudu Tuhan I dalan paluahon
bangsoNa. Laos on do na gabe ojahan di ngolunta sahat tu nuaeng, ia asi ni roha ni Debata hot do i jala ndang
mansohot tu angka na tinompaNa. Alani do dipaingot do i di ragam ni asi-asi naung pinasahat ni Debata tu hita na
patuduhon hasatiaon ni Debata tu hita.
3. Jahowa do parjambaran ni halak na manghalungunhon Ibana (aya. 24-26)
Ragam angka na masa di ngolu ni bangso i alani dosa nasida, alai ndang adong nanggo sada na tuk
paluahon nasida sian hamaolon i. ndang adong dalan na asing sibahenon bangso I laho paluahon dirina. Ndang
tarpatupa nasida haluaon molo alani pambahenanna. Alani do, dihatindanghon dibagasan buku andung 3:24, “
Jahowa do parjambaranhu, ninna tondingku, dibahen I marhaposan tu Ibana ma ahu”. Holan marhite na
marhaposan tu Jahowa do dapot bangso I dalan haluaon. Jahowa do parjambaran ni halak na manghalungunhon asi
ni roha ni Debata. Boasa? Ala pardenggan basa do Tuhan I jala sai tongtong ditangihon halak na mangaluhon
holso dohot dokdok ni rohana tu Tuhan i. Ido umbahen didok diayat 26 “martua ma manang ise na hohom
manghalungunhon hatuaon ni Jahowa”. Lapatanna, ndada na mandok gabe ndang bergerak hita dingolunta on,
alai na naeng dohononna asa hot haporseaon dohot panghirimon holan tu Debata sambing, dungkon ni I ndang
adong dalan hangoluan. Ingkon marhaposan jala tahalungunhon ma Debata asa disi dapot hita parjambaran dohot
denggan basa na sian Tuhan i.
III. Panimpuli
Topik ni Mingguta ma mandok, “ Ndang marpasohotan asi ni roha ni Tuhan”, na patuduhon ma on, di hasatiaon ni
Debata dibagasan ngolu ni jolma na marhaposan tu Ibana. Songon syair di BE No. 765 na mandok, “nang pe
munsat angka dolok, nang humuntal pe robean I, ndang tagaman olo munsat asi ni roha ni Jahowa…. Hot do asi
ni rohaNa ro di saleleng ni lelengna”. On ma gabe ojahan dipardalanan ni ngolunta songon na manghaporseai jala
na manghulungon Debata hita. Alani, molo masa angka hapaeton, hangaluton, ingkon marpos ni roha do hita tu asi
ni roha ni Debata. Ala holan I do na hot ro di saleleng ni lelengna. Antong martua ma hita na tongtong marhaposan
tu asi ni roha ni Debata dohot tu habonaranNa jala tongtong manghalungunhon haluaonNa I dibagasan ngolunta.
Amen.
Cal. Bvr. Irma Gultom

Bahan sermon Evangelium HKBP Ressort Panai Hilir

Minggu, 09 Oktober 2022
Ev : Lukas 17 11 – 19 Ep: 2.Rajaraja 5 : 1 - 14
Tema Haporseaon Na Paluhaon
1.Dibaritahon Tuhan Jesus do angka panghobasionNa di namamaritahon Barita na Uli naung songgop harajaon ni
Debata. Didalani Ibana do angka luat dohot angka sosor (mat 9:36); songon na masa di turpuk on sian luat Samaria
dohot Galilea. Lauat Samaria i ma huta na niinganan ni halak Samaria na sai maralo dohot halak Jahudi. Halak
Jahudi nunga hurang hantus mangantusi halak Samaria na mandok ndang adong be partalihan nasida hape
sasintongna songon dongan sabangso di Debata do nasida. Luat Galilea i ma na niinganan ni halak Jahudi na
mandok diri nasida ma bangso ni Debata. Asa halak pardosa do halak Samaria rap dohot angka bangso na asing,
diparnidaan ni halak Jahudi. Nang pe masialoan do na dua bangso on, alai sai diparohai jala dihobasi Jesus do na
dua bangsoi.
2.Mangihuthon tradisi ni halak Jahudi, halak na marsahit huliton (Kusta) ima halak na ramun manang na hona
toru. Huliton ima sahit sihabiaran jala sahit na so boi dipamalum. Halak na mangae sahit sisongoni sai dipabahir
do nasida di parsaoran ni huta. Dibalian ni huta nama nasida maringanan mandao sian parsaoran ni huta i. Di bagas
joro manang diparugamoon pe nasida ndang parsidohot be, ai halak na hona toru do nasida dihilala. Ai molo dais
nasida tu angka jolma na asing gabe ramun do nasida dihilala. Asa tung di duru ni parsaoran ni parhuriaon dohot
paradaton do nasida. Songon i do jotjot masa di portibi on sai jumpang hita dope sai adong do jolma na so tuk boi
bongot tu parsaoran ni angka adat, nang di tonga ni huria. Boi do masa pangalaho sisongoni di tingki on ala ni
hapogosan na maniala, boi doi masa ala ni sahit na so marnamalum, boi ala uhuman di tongatonga ni paradaton
manang huria manang ala korban politik dohot ekonomi gabe laos soi boi bongot tu parsaoran ni natorop. Gabe
ngolu na tarpunjung nama ibana. Ise ma tagamon na mangalehon roha ni angka jolma si songon i? Mandaodao do
angka na huliton i sian natorop i, ai dibalian ni parsaoran ni natorop do nasida.
3.Mangido asi ni roha ni Jesus do halak na huliton i, alani ma didok nasida “Jesus, Guru! Asi rohaM di hami,”
Nasida manjohuon Jesus sian sihadaoan do, ndang boi nasida jonok hombar tu adat naung dihangoluhon nasida.
Dijohun nasida pe Jesus tontu naung diboto nasida do adong harapan boi mangalehon las ni roha di nasida marhite
na malum sahitna umbahe na dijohuon nasida. Molo di angka natorop, songon na somal nunga pola so dibege
nasida i, alana molo diantoi natorop i nasida boi gabe sitihaan halak na mangantoi i. Gabe paholang diri nama
angka na torop i molo tung manjonok angka na huliton i. Nunga tung tangkas sirang nasida sian ngolu na torop i.
Alai anggo Jesus ditangihon do nasida jala Diantoi. Diantoi Jesus angka jolma na so patut antoan mangihuthon
ruhut ni paradaton dohot parugamoon, Maralo doi tu hasomalan. Asi ni roha ni Jesus ndada holan tu angka na tuk
marsaor di natorop dohot do tu angka halak na dipaduru sian parsaoran. Tung dihalomohon nasida ma nasida gabe
sahit huliton? Nda na ro do sahit i tu nasida? Disi ma patar asi ni roha ni Debata dilehon tu sude jolma.
4.Jesus merespon joujou nasida, didok ma tu nasida: “Laho ma hamu patuduhon dirim tu angka malim”. Tagamon
do jaloon ni malim nasida? Nda na hona bura do nasida? Nda dibalian ni huria do nasida na soi boi jonok tu bagas
joro i? Tung boha ma nasida laho tu malim? Ia parsuruan ni Jesus i, ima na manguba hasomalan tu parsaoran na
imbaru. Patuduhon hamu ma diri muna tu angka malim, dparsuruon i disi do Jesus paradehon hamalumon tu
nasida. Ganup na manjouhon sian sihol ni roha, serep ni roha, bulus ni roha tu asi ni roha ni Tuhan Jesus dapotan
tua dohot haluaon do. Molo tung pe ndang adong na parduli di nasida di na dijohon nasida Jesus manjalo
hamalumon disi do naeng dipapatarJesus na parsidohot do nasida di ngolu parugamoon. i ma hagogoon ni Tuhan
Jesus di nasida, alai naeng pasuangonna do hajolmaon nasida di tongatonga ni huria i dohot ditongatonga ni
natorop i. Nasida na dietong halak na hona bura i, halak na parohon haramunon i, ingkon mulak tu parsaoran di
huria, nang di adat pe. Pasuanghon hadirion nasida do na mansai arga naeng patupaon ni Jesus i, ndada holan
hamalumon sambing na rumingkot, alai tung arga ni hadirion nasida do songon jolma na hinaholongan ni Debata.
5.Dilehon Jesus do hamalumon i tu na sampulu halaki, alai sahalak sian nasida ro mandapothon Tuhan Jesus,
dipagogo ma suarana jala dipuji ma Debata. Dipatungkap ma dirina tu Tuhan Jesus, didok ma mauliate. Nunga
didia na sia nari? Alai laos soro nasida mandok mauliate tu Tuhan Jesus na pamalumhon i. Dung boi sumuang
nasida rap dohot na torop dang di ingot nasida manghamauliatehon ima na nidokna “lupa kacang akan kulitnya”.
Naung las lalap do nasida marlas ni roha dohot malim nang na torop i? Nda tung tagamon nuaeng, nang natorop i
pe na laos dohot do nasida naung dao sian Tuhan Jesus i? Unang ma masa ala nuang dapotan jala denggan
parsaoran ni hajolmaonna, gabe laos di tadinghon Debata pardenggan basa silehon hangoluan i. Unang ma masa
diargahon jolma i silehonlehon ni Debata alai Debata na patupahon silehonlehon i, laos dihalupahon. Sia halak
naung manjalo denggan basa dohot asi ni roha patut ma ro manghamauliatehon tu Debata? Ndang boi hape
dohonon angka naung mian di tonga ni huria andul dumenggan ngoluna sian halak na di duru ni huria i. Halak na
manjalo asi ni roha ni Debata jala ro mandok mauliate jala pasangaphon Debata, manang sian tonga ni huria i
ibana, manang sian duru ni huria i ibana, i do na dihalomohon Debata.
6.Halak Samaria ima na somananda Debata, alai dung dipahisar sian sahit huliton i tubu ma haporseaon di ibana.
Alani ma diihuthon ibana laos parsuruan I diulahon jala dipatandahon ma dirina tu malim, laos di tingki imam
alum nasida. Jolma na tau mandok mauliate do halak Samaria on, dung malum dang lupa diri ibana. Dung I didok
Jesus ma tu halak Samaria i: “Hehe ma ho, laho ma! Haporseaonmi do paluahon ho”. Arga do di Jesus ngolu ni
halak Samaria on, nang pe ndang arga di parugamoon ni halak Israel uju i. Hehe ma ho marlapatan do i, hehe laho
marpanindangion di denggan basa naung jinalona, nunga bongot ibana tu parsaoran dohot Tuhan Jesus di bagasan
haporseaonna i, ndada holan haluaon na sian sahit huliton na nidok na, alai tung haluaon na gok do, ima haluaon
sian gomgoman ni dosa dohot hamataean. Ala nunga bongot ibana tu haluaon i dibagasan haporseon tu Tuhan
Jesus i, na nidokna disi ndada paradaton di natorop manang ruhut parugamoon i na paluahon alai tung haporseaon
di Tuhan Jesus i do. Manang ise naung manjalo denggan basa dohot asi ni roha patut ma manungkap di adopan
ni Tuhan Jesus mandok mauliate jala pasangap Debata di ngoluna.
Pendeta HKBP Resort Panai Hilir
Pdt. P. Manurung.

SERMON MINGGU XVIII DUNG TRINITATIS, 16 OKTOBER 2022

TOPIK: DISARIHON DEBATA DO GANUP NA MARUNGKIL (Nehemia 5:1-13)
I. Pamuhai
Boi dohonon ganup do hita mura madabu tu bagasan parungkilon. Jala nang pe naung jotjot hita
disonggopi ragam ni angka parungkilon sai nahurang dope hatauonta laho mangadopi parungkilon. Torop do halak
namabadu tu bagasan pandelean, rodi angka maporus tu angka ulaon naroa holan ala so tolap mangadopi ragam ni
angka parungkilon. Turpuk on ndada laho mangalusi nasa parungkilon na manonggopi hita, ndada laho manirang
ngolunta ari sogot sian parungkilon, alai dalan laho pabotohon tu saluhut halak na umbege jamita on, holan sasada
Debata do na tuk sumarihon hita mangadopi parungkilon.
Nunga tardok satonga dalan diulahi bangso ni Debata laho paulihon parik ni Jerusalem. Marragam do
parungkilon na ro sian duru ni nasida suang songoni nang parungkilon na tubu sian tongatonga ni bangsoi sandiri.
II. Hatorangan
Angka diama parungkilon ni bangso ni Tuhan i? Naparjolo, atik pe naung marpulu taon nasida dungkon
mulak nasida tu Jerusalem, boi dohonon ndang targohi dope angka na ringkot di bagasan ngolu ni nasida siganup
ari. Torop do nasida nang anaknasida dohot borunasida, naingkon marsali eme asa adong panganon nasida jala asa
tuk nasida mangolu (ay. 2).
Napaduahon, masa do nang haleon. Didok di ayat 3: “Ingkon lehononnami na ma haumanami, porlak
anggurnami dohot bagasnami bahen singkoram, asa tarbahen hami manuhor eme managam haleon”. Dia alana?
Nadeba mandok ala torop sian nasida na ingkon mangula laho patupahon parik ni Jerusalem sian namangula di
hauma.
Napatoluhon, ala ni rundo manang pajak na ro sian rajai. “Nunga huurang hami hepeng bahen garar ni
rundo tu rajai, haumanami dohot porlak anggurnami singkoramna" (ay. 4).
Napaopathon, angka partogi na mambuat pangomoan dohot paruntungan na egois, ndang ra mangurupi angka
nadangol (ay. 7).
Asa adong ma opat horong natarida di bagasan turpuk on, ima nasida na masitaonon laho manuhori
sipangananon, nasida na ingkon manggadis angka artana alani haleon, nasida na so adong artana jala terpaksa
manggadis dirina manang ianakhonna tumuhor sipanganon dohot manggarar pajak, jala napaopathon ima angka
partogi na mamusa rakyatna.
Ido alana umbahen na didok di ayat 1 on pola mangangguk badar ma situan na torop i ro di jolmanasida
dompak hahaangginasida, halak Jahudi. Sada gombaran taringot tu habot ni roha situtu. Boasa didok dompak
hahanggina, ai sasintongna sama nasida do na ingkon mardos ni roha alai baliksa sesama nasida do na mansegai
donganna.
Alani deba sian nasida naung mangula paturehon parik i, naeng martahi mulak laho mangalului dohot
mangalehon mangan keluarga nasida be. Nadeba nari sian nasida naeng manggadis angka tano nasida laho
tumuhor sipanganon lehononna tu keluarga nasida.
Adong muse ma na maminjam hepeng laho manggarar pajak tu pamarenta dohot manuhor sipanganon. Jala
na dumokdok sian i, deba sian nasida manggadis saudarana sandiri. Ima angka halak namangalului pangomoan
sian parungkilon dohot haleon namasa na diturpuk on.
Rade do panurirang Nehemia tumangihon anggukangguk ni angka natorop i. Sada sitiruon do on di hita,
asa unang holan alualu ni namora, najogi natatangihon, alai dohot do nang angka arsak, hoihoi ni angka nadangol,
napogos dohot nagale.
Alai dungkon i tarrimas situtu ma ibana. Dung dibege ibana angguhangguknasida dohot alualunasida i.
Ndang angka nadangol i dimuruhi ibana, alai nasa halak na manggosagosa donganna nagalae i do. Pola 3 hali
disungguli pandohan "na digadis manang naung targadis. Disolsoli rohana angka partogi ni bangsoi, naung
mamusa bangsona sandiri suman tu bangso na asing na mamusa nasida.
Ringkot situtu do nuaeng halak naolo muruk songon si Nehemia marnida angka halak naginosagosa, sian
halak namasisombu. Alai ndang mansohot di bagasan rimas i ibana. Marpingkir do ibana (ay. 7) di bagasan
rohana. Dipasuhar ibana ma sian pangalaho ni angka induk ni nasida i. Angka induk nai do namanuan jala
namangomo sian hapogoson ni bangsoi.
Ditogihon ibana ma manesa angka utang ni napogos i (ay. 10b). Ndada holan bunganai, alai dohot do nang
pokok ni pinjaman i. Ala diboto ibana do na pogos situtu do angka rakyat i, ndang pinjaman na ringkot di nasida
alai panesaan ni utang dohot roha na ra masilehonlehon. Disuru ibana paulakhon tano dohot bagas, songoni nang
paulakhon bunga ni hepeng naung jinalo nasida sian angka napogos i. Songoni ma panarihonon ni Debata di
parungkilon ni bangsoNa. Jala saleleno mangula panurirang Nehemia manguluhon bangso i di Jerusalem nda
dijalo ibana balanjona. Rade do ibana ndang manjalo hepeng. Jala sada na tung mansai gogo na mangonjar rohana
pasauthon angkai saluhutna ima roha: biar mida Jahowa.
III. PANIMPULI
Sian turpuk on boi ma guruhononta, disosoi hita laho gabe pananginangi na denggan, na rade tumangihon
angukangguk ni rakyat. Maminsang nasa dosa, paingothon angka partogi na manimbil sian lomo ni roha ni Debata,
na mamusa rakyatna. Jala na lumobi sian i ima manggorahon ringkot ni biar mida Jahowa.
Cal.Pdt.Frido Juniper Nainggolan

Bahan Sermon Jamita Minggu XIX Dung Trinitatis, 23 Oktober 2022

HKBP Ressort Panai Hilir
“MANAON NA PORSUK SONGON SIIHUTHON KRISTUS”
(2 Timoteus 2: 1-13)
Patujolo
Molo dihatai taringot tu sitaonon, tottu sude do naeng dao sian i, jala unang ma nian sahat i lumobi tu halak
na porsea, boi dohonon sai hira sude do hita naeng pasidinghon sitaonon i, ala dang adong jolma na lomo rohana
mangolu dihaliangi sitaonon, udut tusi na gabe sungkunsungkun di roha, na ingkon marsitaonon do ulaning naposo
ni Debata? Songoni do panjouon na ro tu angka parbarita nauli? Ima naeng idaonta marhite surat ni si Paulus tu si
Timoteus di turpukta on. Di bindu on dipasahat Apostel Paulus do angka poda nang pangajarion tu si Timoteus na
marimpola nang tu angka na porsea. Dibuhai Apostel Paulus do poda nang pangajarionna marhite motivasi
manang dorongan tu si Timoteus, asa di na marbarita nauli si Timoteus, nda holan asi ni roha ni Kristus Jesus do i.
Diuduti mai dohot na diparade ibana penerusna laho marbarita nauli, asa unang mate di ibana ulaon i jala asa
adong ma manguduti/manorushon.
Hatorangan
Paulus mendorong Timotius supaya teguh dan tekun dalam pekerjaannya, didok di ayat 1 “Margogo ma ho
marhitehite asi ni roha ni Kristus Jesus”. Sian ayat on boi idaonta angka halak na marnampuna tohonan/ulaon tu
Debata, ingkon motivasionna do dirina manang ingkon gogohononna do dirina laho mangulahon ulaon i. margogo
marhitehite asi ni roha ni Kristus Jesus boi do dilapati nang kerja keras, dimana ada kebenaran kasih karunia, di
situ harus ada kerja keras dengan kekuatan karena kasih karunia. Molo sai ro angka sitaonon manang molo lam
martambatamba angka hamaolon, ringkot do hita gabe halak na tahan uji (tidak mudah goyah), marhite haporseaon
na lam tang, tekad yang semakin kuat, holong marTuhan na lam balga. Jadi molo didok margogo marhite asi ni
roha, lapatanna ndang mangasahon haboionniba sandiri, ndang mangasahon gogoniba sandiri, manang
pingkiranniba sandiri, alai mangasahon asi ni roha ni Kristus Jesus i do.
Songon panosoion ni Apostel Paulus tu si Timoteus, songoni ma nang si Timoteus mamodahon tu angka na porsea
i, asa gabe dongan manaon haporsuhon ma songon parangan na denggan di Kristus Jesus (ayat 3). Lapatanna
Timoteus harus melatih orang lain untuk menjadi penerusnya dalam pelayanan injil, jala sadalan mai ingkon
ajarhononna do tu nasida ganup na binegena sian Apostel i, ndang adong sipasahaton ni si Timoteus dungkon
angka na binegena sian si Paulus dohot angka na jinalona sian Tuhan i. Jala angka na manjalo hatana i ima angka
halak na tau haposan (setia), yang dapat dipercaya dan yang cakap mengajar orang lain (ayat 2).
Sude do halak Kristen lumobi angka naposo ni Debata gabe prajurit-prajurit (parporang) ni Jesus, na
nilinggomanNa, ala Ibana do na mamboan hita tu haluaon i. Songon prajurit ni Jesus hita, ingkon pataridahononta
do dirinta gabe prajurit na burju, tau haposan tu na manggomgomi ibana, hot di ulaonna molo pe ro hamaolon jala
ndang mansadi berjuang laho patulushon ulaonna i. lapatanna diajari do hita marhite turpuk on asa manang ise pe
na naeng gabe prajurit ni Jesus (naposo ni Debata), ingkon adopanna do hamaolon/sitaonon i, nunga ingkon
taperkirahon manang taetong i hal na pasti di portibi on, jadi sahalak prajurit ni Jesus molo mangadopi
hamaolon/sitaonon i, tung so jadi doi gabe pamagohon hatulusonta tu Debata manang gabe dang haposan be ibana
di ulaonna.
Timotius tidak boleh memusingkan dirinya dengan urusan-urusan dunia ini (ayat 4), songoni ma nang hita molo
nunga gabe prajurit ni Jesus, ingkon paluaonta do na di portibi on, asa molo las rohani komandan mida prajuritna,
songoni ma nang las roha ni na marsuru hita molo taulahon ulaonta, ima Kristus Jesus i. dipodahon Apostel Paulus
do tu si Timoteus nang tu hita asa taparrohahon angka aturan-aturan parporangan, didok di ayat 5 “Nang na
marsiadu pe ndang dipartumpali, ia so tigor paraloonna i”. Lapatanna berjuang do hita asa monang maralohon
hisaphisap ni dagingta dohot angka hajahaton i, alai ndang boi arophononta hadiah molo so taihuthon angka aturan
i (seperti bertanding dalam olahraga tertentu, harus ada aturan mainnya). Jadi manungguli hita doi asa manat molo
pe taulahon angka ulaonta, asa unang lipe ulaonta i manang gabe batu partuktuhan di angka dongan jolma.
Poda gambaran na parpudi dipodahon Apostel Paulus tu si Timoteus nang tu hita ima perlunya kesabaran
menunggu imbalan, “Ingkon siula hauma i jumolo taruli di parbuena (ayat 6)”, lapatanna, jika kita mau menikmati
buah, kita harus bekerja keras dengan rajin dan sabar, dengan kata lain, kita harus melakukan kehendak Allah
sebelum menerima hal-hal yang dijanjikan itu (yang menjadi alasan kita perlu bersabar), ai lehonon ni Tuhan i do
tu ho roha mangarti saluhutna i, ima angka panimbangion di angka poda na jinalo dohot manimbangi (mencerna)
angka na ro sian Debata.
Panimpuli
Alani songon halak na porsea hita jala nampuna tohonan/ulaon tu Debata, margogo ma hita ala ni asi ni
roha ni Kristus Jesus i molo pe ro hamaolon manang sitaonon di ngolunta, di panghobasionta, naeng ma taadopi i
dibagasan gogo na sian Tuhan i, tuk do asi ni roha ni Debata tu ganup halak na mangasahon Ibana. Baliksa molo
tarimpu boi gogonta laho mangadopi hamaolon/sitaonon i, ido na mambahen angka na porsea i gabe mandele, ido
mambahen angka parbarita nauli i, gabe gale jala maheu, karena itu jadilah kuat karena kasih karunia dalam
Kristus Yesus.
Cal. Gr. Jerri B Sinambela

Bahan sermon Evangelium HKBP Ressort Panai Hilir

Minggu, 30 Oktober 2022
Guruhon Na Denggan, Pasohot Na Jat
Jesaya 1:16-20
I. Patujolo Ni Turpuk
Jesaya bindu 1 ima pangarimpunan ni sude panurirangon si Jesaya di tongatonga bangso Israel ima
hamubaon ni roha ni bangso i tu Debata. Dibagasan bindu sada on mansai tangkas do dipaboa panurirang Jesaya
taringot tu uhum dohot tu haluaon na sian Debata. Jala marhite sian i ragam na ingkon dihangoluhon bangso i
songon bangso na pinillit ni Debata nasida tarlumobi ma i di ulaon parsombaon nasida tu Debata. Diulahon bangso
I patupahon ruhut parugamaon marhite pelean situtungon tu adopan ni Debata alai holan ulaon rutinitas sambing
do. Mago do holong dingolu ni bangso i uju nunga sahat nasida di Tano Kanaan dung mulak sian parhatobanon
Mesir. Ragam angka pangalaho ni bangso i, na so marojahan tu lomo ni roha ni Debata. Alani, dipaingot si Jesaya
do bangso i asa paubahon roha nasida. Tapaihutihut ma hatorangan ni turpuk taringot tu hamuboan ni roha na
disuriranghon si Jesaya.
II. Hatorangan Ni Turpuk
1. Marburi ma hamu, urasi hamu dirimuna
Sada joujou do on tu bangso i, ala nunga lumlam haporseaon ni bangso i diadopan ni Debata. Nunga ramun
bangso i ala naung mardosa tu Debata. Ringgas do nian nasida ro marsomba, martangiang, dohot pasahathon
pelean hape parange nasida ndang hombar tu lomo ni roha ni Debata. Ndang sadalan parsombaon nasida dohot
parange siganup ari. Alani do, di jou nasida marhamubaon ni roha ndada holan di hata manang di panindangion
alai nunga ingkon dohot di pambahenan. Parsombaon nauli tu Debata ndang gabe singkat ni haunduhon mangoloi
parenta ni Debata. Alai parsombaon na sintong na marniula tu dongan jolma. Alani do, dijou bangso I asa marburi
jala mangurasi dirina. Boasa asong jou-jou on tu nasida? Ala nunga diulahon nasida angka na jat diadopan ni
Debata. Ingkon paiashon nasida do dirina na ramun i marhite na paholang diri sian hajahaton tarlumobi ma tu
angka ketidakadilan sosial na masa di bangso i. dipapeol nasida angka uhum laho menindas angka na metmet.
Dipangke nasida huaso i holan manarihon dirina dohot horongna. Alani do, asa unang masa rimas ni Debata
ingkon dibolongkon nasida do angka ulaon na jat i.
2. Marsihohot di angka ulaon na denggan. Dung diarahon bangso i mamuri jala paiashon dirina sian
hajahaton, diayat 17 diarahon panurirang Jesaya ma bangso i manghangoluhon ngolu na denggan maradophon
humaliang nasida. Angka dia ma i? ima patigor uhum tu angka na nirupa dohot na sopot so marama (yatim), jala
ondingi angka na mabalu (janda). Sada parsuruon do on tu bangso ni Debata asa manarihon ngolu ni angka na
metmet jala na dangol. Unang gabe dipangasahon nasida huaso, hamoraon nasida laho menekan angka na metmet i
tarlumobi ma I di angka dakdanak na so marama dohot na mabalu.
3. Disesa Jahowa do Dosa Molo Marhamubaon ni Roha
Sesa dosa ndang alani pambahenan ni jolma alai ala Debata sandiri do na manesa. Poda on do, apala unok
ni haporseaon di huria reformasi. Diayat 18 I tangkas do didok, “Tung sura rara dosamu, songon abit bunga na
dapdap, bontar do I bahenonku songon itak, nang pe rara songon abit hasumba, gabe songon hapas do muse”.
On do pataridahon haradeon ni Debata laho manjanghon angka pardosa na olo paubahon rohana. Dilehon Debata
do asi ni rohaNa i laho manesa dosa ni bangso i. Molo mardosa pe bangso diadopan ni Debata, ndang uhuman ni
Debata be nasida ala nungga marhamubaon ni roha. Hasesaan ni dosa i mambaen jolma I boi solhot tu Debata.
Ndang dijujur Debata dosa dohot pangalosion ni jolma i, ai umbalga do asi ni rohaNa sian rimasNa molo dipauba
rohaNa. Ngolu naimbaru do jumpang ni bangso molo nunga disesa Debata dosana. Jala on do parbue ni halak
naung manjalo hasesaan ni dosa sian Debata, ima taruli di hinadenggan ni gogo ni tano I na gabe
sipanganonnasida. Dung dipintori Debata jolma I, daionna ma angka na denggan sian gogo ni tano i. On do
hatuaon na jumpang bangso i nang hit ape molo nungga marhamubaon ni roha hita jala nunga disesa Debata
dosanta.
III. Panimpuli
Guruhon na denggan, pasohot na jat ima sada hata na jotjot tabege di sipareonta jala na mura
tahatindanghon. Alai baliksa do diangka pangalaho na masa di ngoluta ima sai jotjot dope taulahon hajahaton
tarlumobi ma i tu angka donganta na so mardihadiha. Alani do, dibagasan minggu on disoarahon do tu hita ganup
angka naung manjalo hasesaan ni dosa marhite mudar ni Kristus ndang be ulahononna na jat, alai marguru ma tu
angka ulaon na denggan. Ai ulaon na denggan i do parbue ni haluaon naung tajalo sian Debata. Ragam pe angka
na masa dipanggulmiton ni ngolunta, las ni roha manang arsak ni roha, kemakmuran manang hapogoson, punya
jabatan atau tidak, saluhutna I tabaen ma mangguruhon angka na denggan jala pasohot angka ulaon na jat. Amen.
Cal. Bvr. Irma Gultom