SERMON RESSORT HKBP SIPAHUTAR

JAMITA MINGGU 26 NOVEMBER 2023

(UJUNG TAON PARHURIAON) - EV. PANGUNGKAPON 21 : 1 - 4
TOPIK : MAIMAIMA DI LANGIT NAIMBARU DOHOT TANO NAIMBARU

I. PATUJOLO

Buku pangungkapon ni Jesus Kristus nanilehon marhite si Johanes on disurathon tu halak naporsea
manang na ginoaranna Huria na pitu (1:11), dinatongon huria i mangadopi ragam ni angka namasa na ro sian
tonga-tonga pamarentah ni romawi di masa pamarenta ni Domitianus, sian ragam ni nadiadopi huriai ima;
haporsuhon (1:9), parungkilon alani parjahat gabe madabu deba tu sikap namanadinghon holong (2:2,4),
panginsahion (2:9), na tarseat alani angka panghatindanghonon nasida di Debata (17:6; 18:24; 19:2; 20:4). Ala
ni haporsuhon manang parungkilon bolon i dipasahat Tuhan Debata ma pangapulion marhite pangungkaponna
tu si Johannes ditikki di pulo patmos ibana, aha di ida ibana disi? Ima hasadaon dohot hahotan ni angka
naporsea di jolo ni Debata jala pasahathon tumpal hangoluan tu angka naporsea na satia tu Debata, asa monang
maralohon angka namasai, Manahan sahat rodi ujungna, ai padirion-Na ma di ujungna tu angka na monangi
hundulan di habangsa-Na rap dohot Debata; songon Tuhan Jesus Kristus dung monang hundul rap dohot
Damang di habangsa-Na I (3:21). Jala inganan i do napinatorang dibagasan turpuk on, asa tusi idahon ni angka
huria i jala laos margogo mangadopi angka namasai.

II. HATORANGAN

Ayat 1-2. Banua ginjang dohot tano na imbaru

Dipatuduhon si Johannes do gombaran ni banua ginjang na imbaru dohot tano na imbaru dunghon salpu
banua ginjang dohot tano naparjolo i, ima:

1. Laut dang adong be

Di padan na Robi di gombarhon do i songon hadirion ni parjahat naso adong

hasoan/ketidaktenangan/kegelisahan (Job 38:11; Jes 57:20; Mzm 89:10), jala di padan na robi laut do
mangaripashon jala gabe tanoman ni angka parangan ni si Firaun (2 Musa 15), nang songoni ma di padan
naimbaru nunga digombarhon di pangungkapon on ia laut i martudutudu tu “sipanginsahi/ sada huaso na
marmusu dompak Debata” (13:1-8). Alani i pangungkapon ni si Johannes na mandok di banua ginjang dohot
tano naimbaru naso adong be laut, i ma tudosan na mangondolhon ia banua ginjang na imbaru i holan
hasonangan (kedamaian) nama na adong di dapot niangka naporsea i, nasotupa be adong hagurgaron. Alani i
banua ginjang na imbaru dohot tano na imbaru napinasahat ni si Johanes ndada manghatai fisik manang
keadaan geografis di turpuk on, alai baliksa keadaan do manang panghilalaan ni angka naporsea i do, na so
dibolus ilu be ala ndang adong be sitaonon, panahit, parporangan dohot hamatean. Langit dohot tano na imbaru
ima puncak ni hamonangan ni Debata sian angka huaso ni hajahaton. Antong isedo naboi menikmati banua
ginjang dohot tano na imbaru i? ima angka jolma na manginum aek hangoluan nanilehon ni Tuhan Jesus
Kristus, na monang manean angka hamaolon i dibagasan Kristus sahat ro di ujungna. Alai angka na mandele
jala naso porsea jala angka na ramun ro di angka pamunu dohot parmainan dohot nasumomba ajiajian ro
disaluhut hajahaton manjalo tihapna di laut na gor api dohot barerang, ima hamatean na paduahon i (21:6-7).

2. Huta nabadia songon oroan nasinanggulan (Seperti pengantin perempuan yang berdandan)

Lasniroha dohot hauulion situtu do na digombarhon ni si Johanes di angka namangingani huta i, jala
marolopolop angka naporsea i dibagasan inganan manang huta na sian Debata, ala ni haulion ni huta i
napinature songon oroan nasinanggulan. Ndang be songon huta na pinaturena parjolo; na ingkon godang
pintupintu gerbang dohot tembok-tembok siala ni namanjaga sian angka musu, alai ianggo huta na imbaru i
tung mansai uli. Sian gombaran na pinatuduhon ni turpuk on patar do hape las ni roha, na marparbuehon
parolopolophon marhite banua ginjang dohot tano na imbaru i, ima Jerusalem na imbaru i. laos ido jaminan jala
sihirimon di halak na porsea na pinasahat ni Debata.
Ay. 3-4. Gabe saorma ma debata ditongatonga ni angka jolma.

“On do Joro ni Debata di tongatonga ni angka jolma; na maringanan ma ibana di tongatonga nasida, jala
nasida ma bangsona, jala debata sandiri saor tu nasida”.

Angka halak na porsea di Banua Ginjang na imbaru i do na gabe jambar di ibana, laos i do nagabe
bangsoNa. Ingkon tangkas situtu do pangantusion ni angka naporsea i marhite pandungkapon ni si Johanes on:
“ondo Joro ni Debata; namaringan ma Ibana ditongatonganasida, jala nasida ma bangsoNa. Naso tarsirang do
banua ginjang dohot tano na imbaru i sian angka Joro ni Debata dohot angka naporsea di tano naparjolo on,
tongon manang naso tongon pe dibagasan angka parungkilon huriana i. Sian gombaran naung pinatorang
ondeng, manosohon hita asa unang mandele di saluhutna na masa di ngolunta on. Parsatokinan do sude na masa
dingolunta di portibion. Molo pe ro las ni roha nang arsak ni roha di ngolunta saleleng di portibion ndada
manongtong i, adong be do tingki na. Holan sada do na manongtong ima Banua Ginjang dohot tano naimbaru
naung pinarade ni Debata i do na manongtong di hita. Holan on, ingkon porsea do hita tu Ibana naung
paradehon inganan na imbaru i, jala ndang adong be angka iluilu, arsak, hansit di si.

III. SIPAHUSORHUSORON

1. Di minggu ujung taon parhuriaonon, laos di ulahon hurianta do marningot angka

donganta/sisolhotta/keluarganta naung jumolo monding. Marhite pangungkapon ni Johanes on naung sian
mulana uju di padan narobi dope sahat tu hita ditingki on nunga sai di sosoi/ditaringoti banua ginjang dohot
tano naimbaru i, laos ima osososo tu hita paingothon hita naso manongtong on adong do hape hatongtongon ni
Debata sian mulana sahat ro di ujungna naboi parsigantunganta marsundutsundut. Jala hita dohot tano on na so
manongtong mauliate ma ta dok tu Tuhan i, ala nunga mananda hita di Debata na manongtong i nang dohot
angka donganta naung jumolo monding napinasahat huriana tu Debata asa ibana mangaramoti orbuk ni
bangkena paima ro ari parpudi, mauliate ma di Tuhan i tatanda ibana marhite Tuhan Jesus Kristus. Rade ma hita
maimaima langit dohot tano na imbaru na laho pasahathon ni Debata tu hita. Jala tangkas matongtong
panghirimonta gabe nian parsidohot hita di banua ginjang dohot tano na imbaru i. Laos alani i tarapul hita
marningot angka naung monding jala marbisuk hita mandalani ngolungolu dohot ulaonta diariari nanaeng ro.

2. Toho do tung godang parungkilonta, jala asing jolma, asing do tong parsorion na ro tu ibana. Sajabu
pe olo do tong marasingasing parsorionna. Tandi do parsorion na ro tu Ama dohot Ina, nang songoni sebagai
ianakhon. Jala, di parsorion na ro tu hita i, olo do pola sampe ro iluilu. Alai itaingot ma pargogoon ni Debata do
hita mamolus saluhutna i, laos marhite hagogoon na sian Ibana i, jumpangta ma las ni roha na manongtong i
molo ndang manimbil haporseaonta sian Debata. manahan ma hita ro di ujungna tanda ni panghirimonta di
langit dohot tano na imbaru i.

3. Asa parsidohot hita di banua ginjang dohot tano na imbaru i, jala gabe bangsoNa hita, tabereng ma
pardalananta dohot pangalahonta nasailaon tapadasip ma maniru pambahenan di holong ni roha ni Tuhan Jesus
Kristus. Amen