Minggu : Okuli 12 Maret 2023

Ev : Psalm 95:1-11

Ep: Johanes 4:20-26

Topik Minggu : Marsomba Sian Nasa Roha tu Debata / Menyembah Allah dengan sepenuh hati

Patujolo

Molo tapaihutihut ende sian parpsalm on, tangkas do ditogihon hita laho mamuji dohot marsomba tu
Jahowa sian nasa roha dohot dibagasan parsitutuon, boasa ingkon diondolhon parsitutuon marsomba tu
Jahowa? Ala adong do piga sian bangso ni Debata na so pola mangalehon rohana marsitutu marsomba
tu Jahowa, Nian disomba do Jahowa alai holan marhite pamanganna, ndada sian nasa roha ido umbahen
dihagigihon Debata do nasa parsombaon, pelean, pestapesta dohot tangiang ni bangso Israel I na so
siannasa roha(Jes 1:10-15).

Di partingkianta nuaeng pe, boi do jumpang pangalaho na sisongon I, ndada holan di parmingguon
manang di partangiangan, alai dibagasan ngolu siapari sai didok dirina siihuthon Kristus alai
panghataion dohot pangalahona maralo sian hatani Debata. Alanii mansai denggan do turpuk on Psalm
95:1-11 boi manogu angka huria songon dia do na marsomba tu Debata.

Hatorangan

1. Marsomba tu Debata marhite Mangolophon Jahowa

Hata parjolo didok: “Beta hamu itaendehon Jahowa” Joujou do I tu angka na porsea,
mangendehon pasahathon pujipujian, hamauliateon, huhut pabotohon las ni roha ala naung dipatupa
Jahowa angka parsaulian di parngoluon ni bangsoNA ima na di patorang di ayat 3-5. Molo taida di hata
Heber haroroan ni pandohan “ Mangolophon” (teru’a) sai dipaboa do sidalian na tangkas laho
mangolophon Jahowa, dung dipajojor dia na mambahen bangso I laho patubegehon
endena/olopolopna, dialusi ma dohot suara na gogo mangendehon pamabahenanNa. Jala mardongan
parhinaloan do nasida mangendehon (Psalm 33:3 , 47: 5)

Sada pinaboa ni ende olopolop I, ima taringot tu Jahowa na songkal, na mangatasi nasa na
adong jala na marmulia. Mansai balga do asi ni roha ni Jahowa tu jolma I umbahen na boi jolma i ro tu
adopan ni Debata, jala diloas Debata ro marsomba huhut laho patubegehon las ni rohana naung jinalona
sian Debata. Jala nunga didai nasida hinadenggan ni angka pambahenan ni Debata umbahen dipatau
nasida mandapothon Jahowa. Jala apala na tangkas songon inti ni ende I ima hagogoon ni Debata
songon batu mamak , sipalua na so hatudosan, jala hadirion I Jahowa ido na niendehon songon
hapataran ni olopolop dohot las ni roha nasida. Somalna molo marende las niroha halak naung tangkas
do adong panindangion di ngoluna taringot tu pambahenan ni Debata.

Dungi pangondolon ni hata “ MAngolophon JAhowa”ima na di ayat 6 i, Mangolophon Jahowa marhite

na marsomba, marsinggang tu jolo ni Jahowa. Hata Heber MArsomba “Shachah”marlapatan doi
berlutut, bersujud, membungkuk, merendahkandiri untuk menghormat, ima ciri I halak na mangolophon
Jahowa, nata pe hata manungkap dohot marsinggang di pake di ayat 6 I, laho mangondolhon hinarikot
ni na marsomba Ala di Jolo ni Debata

2. Marsomba tu Debata marhite na Tumangihon Soara ni JAhowa

Dung bongot punguan I tu bagas joro ni habadiaon ni Jahowa mardongan soarani ende pujipujian,
marsingang ma nasida di jolo ni sitompa nasa na adong. Manungkap huhut marsinggang nasida
patuduhuon hadirion na so talup ro mandapothon Jahowa. Di bagasa unduk dohot serep ni roha nasida
manangihon soarani Debata di hasangaphonNa. Ndada holan I , dipatuduhon do nang hagalehon nasida
di jolo ni Debata sitompa saluhut.

Di ayat 8 didok: Unang ma tangkangi hamu rohamuna songon na uju di Meriba, songon ari uju di masa
pangunjunan di halongonan” molo tajaha hata Meriba, diarahon do pikiranta laho marningot dia na
masa di tongatonga ni bangso Israel uju diuluhon siMusa bangso I mardalan di parhorsihan laho
mamongoti tano Kanaan. Ala soadong aek siinumon di Meriba(2 Musa 17:1-7) gabe dibadai bangso I ma
si Musa jala diunjuni JAhowa. Lomos do bangsoi dipangaramotion ni Jahowa dohot di pangondihonon ni
Jahowa jala dietong laho mate nama nasida ala soadong aek siinumon. Ndang togu nasida
marhaporseaon tu Jahowa hape sian mulana nunga didok Jahowa do manguluhon bangso i sahat tu na
tolhas bangso I tu Kanaan. Asa unang ma nian songon tangkang ni ompunasida I, gabe dipaboa parpsalm
I ma tu angka na ro mandapothon Jahowa ndang jadi nasida mangunjuni Jahowa songon na hea dibahen
Ompunasida di halongonan i.

Angkup ni I Di jou JAhowa do bangsoNa I marhite Parpsalm asa unang dipatangkang rohana jala unang
ditutup rohana marhaporseaon, unang dijua laho marhasabamon, marholong niroha jala unang ma sai
marungutungut jala martangkang niroha, na so olo manangihon soara ni Jahowa, gabe tartait holan
mangoloi hagiot ni pardagingonna songon na didok di ayat 10 i: bangso parroha lilu do nasida, alai
ndang ditanda nasida angka dalanKu” marhite pandohan on lam tangkas do dipaboa songon dia
ompunasida ujui mangalo tu Jahowa jala ndang olo mananda dalan ni Jahowa, laos ido na dipaingot
nang tu hita, jolma na patangkang rohana boi do lalap mandiori na ringkot di dirina sambing, molo holan
dirina dipasarisari, gabe lupa ma di ragam ni pambahenan ni Jahowa di ngoluna, ndang berfokus be tu
Debata na talup mangalehon nasa na ringkot di ngoluna hombar tu asi ni roha ni Debata jala boi gabe
jolma na parroha lilu nasida na so mananda dalan ni JAhowa.

III. Panimpuli

“ Marsomba sian nasa roha tu Debata” ima sada joujou tu hita angka naung dipalua Debata marhite
haluaon na binoan ni Jesus. Parsombaon I ma na gabe dalan di hita asa lam marningot hita di ragam ni
angka pambahenan ni Debata tu hita dibagasan ngoluta ganup. Di jolo ni Debata do ia bongot tu
PArmingguon, partangiangan, nang ragam ni parsombaon, alanii somba ma Debata sian nasa roha di
bagasan tondi dohot hasintongan. Tapadao ma dirita sian pangalaho na so dihalomohon ni Debata ima
na holan mamuji sian pamangan alai ndang sian roha. Amen.
 Acara BonaTaon Punguan Ina HKBP CITRA RAYA

1. Joujou tu Parsaoran
U : Punguan na marlasniroha di bagasan Tuhan Jesus Kristus, nunga masuk hita tu taon
naimbaru na binasabasahon ni Tuhanta tu hita. Tontu tahilala do denggan basa nang
pandonganion ni Debata tu hita manipat ari dohot bulan, boi hita tolhas sahat tu sadarion.
Antong SELAMAT TAON BARU MA DI HITA SALUHUTNA
H: Selamat Tahun Baru!
U : Alani I, dibagasan lasniroha ma hita jala mandok mauliate tu Debata na mangalehon ari na
denggan tu hita boi hita marpungu di acara Bona Taon Punguan Ina HKBP Citra Raya di borngin
on. Songon tanda las ni rohanta, tapuji ma Tuhanta, marende ma hita BE NO 585: 1 Somba Ma
Jahowa Debatata”
2. Marende BE No. 585 : 1-2 “ Somba ma Jahowa ”
 Somba ma Jahowa Debatata. Amen haleluyah, Sigomgom langit, tano on ro di isina,
Amen Haleluyah. Beta hita laho marsinggang tu joloNa, amen haleluyah. Na songkal jala
na badia do Jahowa, Amen Haleluyah.
Reff: Endehon amen haleluyah, endehon amen haleluyah, endehon amen
haleluyah,endehon amen haleluyah.
3. Votum
U : Marhitehite Goar ni Debata Ama dohot Goar ni Anakna,Tuhan Jesus Kristus dohot Goar Ni
Tondi Parbadia , na tumompa langit dohot tano on.
H : Amen.
U : Songon on ninna Tuhan Jahowa, Hehe ma ho! Marsinondang ma ho! Ai na ro ma na
manondangi ho, jala Hamuliaon ni Jahowa binsar di atasmu.
H : Debata do haporusanta dohot hagogoonta, pangurupi situtu di hagogotan.
 U : Dibahen I, ndang mabiar be hita, nang pe balik tano on, jala lalolalo angka dolok, Laho
Marongrong tu tongatonga ni laut. Haleluyah martangiang ma Hita: ale Tuhan Debata , Ama na
marasiroha! Hudok hami mauliate tu Ho, sian nasa rohanami, ala dijou Ho hami sian haholomon
tu hatiuron, marhitehite AnakMu Tuhan Jesus Kristus. Sai dirajai TondiM na badia I ma hami asa
lam ganda haporseaon nami, jala lam badia parange nami, asa unang marlindang binahen ni
portibion, asa sahat hami rap dohot angka na porsea di GoarMu tu hangoluan na surasuda,
marhite Anak haholongan ni rohaM, Tuhan Jesus Kristus, Tuhannami. Amin.
4. Marende BE No. 574: 2 “ Pujima Debata”
 Olophon, olophon Tuhan I, hatindnaghon ma denggan basaNa I, sai arahon dongan mi,
ro tu Sipalua I, Olophon olophon Tuhan I, hatindanghon ma denggan basaNai.
5. Turpuk Sijahaonta songon PHD Ina di partangianganta Borngin on 2 Korint 4:7-13
6. Marende BE No. 70:1 “Naung salpu taon Naburuk i”
 Naung salpu taon na buruk I, Ho mahupuji Tuhan hi, ai di ramoti Ho tongtong, tondingku
dohot daging hon. Ai di ramoti Ho tongtong , tondinghu dohot daginghon.
7. Mandok Hata Selamat Tahun Baru
- Sian sopran
- Sian Meso
- Sian Alto
- Full Time
8. Marende BE No 66 : 1- “ Debata Baen DonganMi” P.Pel.
 Debata baen dongan mi,lao mangula ula on mu.baen ibana haposanmu,sai paserep
rohami. Debata baen donganmi, Debata baen donganmi.
 Debata baen donganmi, molo Debata donganmu,ndang tarbahen ho be lilu,sai ture do
langkami. debata baen donganmi.
9. Tangiang Penutup