GEREJA METHODIST (GMI)

ACARA PARTANGIANGAN MALAM TAON BARU KELUARGA

PUKUL 00.00 WIB – 1 JANUARI 1017

1. Saat Teduh (Martangiang na hohom)

2. Votum: P = Pemimpin K = Keluarga
P: Taparade ma dirinta marsomba tu Debata laho manghamauliatehon sude
denggan ni basaNa naung tajalo di sataon bolon taon 2019 na salpu.
Amen!
3. Marende B.E.No.70: 1-2 Naung salpu Taon naburuk i
 Naung salpu taon na buruk i Ho ma hupuji Tuhanki
Ai di ramoti Ho tongtong tondingku dohot dagingkon (2x)
 Jesus sai asi roham, paian denggan ni basaM.
Muse di taon nam’baruon di nasa huriam tongtong (2x) Amen
4. Tangiang Pamuhai:
Ale Tuhan Debata. Sian asi ni rohaM do umbahen sahat hami tu taon
naimbaru on. Ho do na mangaramoti hami di bagasan taon na salpu i. Sai
asi ma rohaM, sai unang tulak hami nuaeng, sai dongani ma hami
dibagasan taon na imbaru on. Pasupasu hami ro di angka ulaon na
denggan, na huula hami marhitehite goarMu. Alai na gumodang,
pasupasuhon ma hataM na badia i tu rohanami, asa gabe na imbaru
rohanami. Jalo ma pamujion dohot mauliate ni rohanami marhitehite
Tuhan Jesus Kristus Tuhannami. Amen.
5. Responsoria/ Pujipujian : (Psalmen 103 : 1- 13)
P : Puji ma Jahowa, ale tondingku, jala nasa rohangku di bagasan
mamuji goarna na badia i. Puji ma Jahowa, ale tondingku, jala
unang tung halupahon denggan ni basana sudena. Ibana do
manesa dosam sudena, Ibana pamalum angka sahitmu sudena.
K : Ibana paluahon ngolum sian hamagoan, Ibana martumpalhon tu
ho denggan basa dohot asi ni roha.
P : Ibana pamahap roham marhitehite denggan basa, asa mulak poso
ho, songon pidong raja wali. Jahowa do patupahon angka
pambahenan hatigoran, jala dipatingkos uhum tu sude angka na
nirupa.
K : Ibana do pabotohon angka dalanna tu si Musa, tu angka anak ni
Israel angka pambahenna i.

1
 P : Parasi roha jala pardengganbasa do Jahowa, lambat tarimas jala
parasi roha godang. Ndang tongtong Ibana manorui, jala ndang
gotos rohana saleleng ni lelengna.
K : Ndang dibahen tu hita hombar tu angka dosanta, jala ndang
dibaloshon tu hita hombar tu angka hajahatonta.
P : Ai songon dao ni langit sian tano on do gogo ni asi ni rohana di
angka na mangkabiari Ibana. Songon dao ni habinsaran sian
hasundutan dipadao Ibana sian hita angka pangalaosintai.
K : Songon asi ni amaama tu angka anakna asi ni roha ni Jahowa di
angka na mangkabiari Ibana. Amen
6. Marende BE No. 64: 1-2 NAUNG MORU DO MUSE SATAON
1. Naung moru do muse sataon, huhut lam suda bohalhi
Beha do ahu na sai laon, ture do pangalahongki?
Lam ganda haporseaonku, nang holong ni rohangku pe
Di Jesus dohot Debatangku, nang di donganku sasude.
2. Aut alusanku Debatangku, ra tung maila au disi,
Marningot salpu ni rohangku ro di sude ulaonki.
Ai dosa do binaen ni tangan, gok dosa nang rohangku pe;
Nang pat, nang mata, nang pamangan luhut marsala do hape. Amen
7. RENUNGAN: Psalmen 143 : 10
“Sai ajari ma ahu mangulahon lomo ni rohaM, ai Ho do Debatangku,
TondiM na denggan i ma manogihon ahu di tano na hornop.”
“Sai ajari ma ahu mangulahon lomo ni rohaM”
Pengalamanta di pardalanan ni ngoluon olo do jumpang
hita pangalaho ni jolma na sai jotjot merasa gumogo, lobi umpistar,
lobi hebat sian donganna. Olo sai manggogo mangatasi angka
parsoalan dingoluna marhite na mangasahon gogo dohot
pingkiranna. Olo muse nang patupahon sangkap siulaonna holan
marhite sian pingkiranna sandiri so padohot Debata. Hape
tahaporseai do di boto Debata do saluhut angka sangkap na
tasangkapi. Alani i do asa tangkas dipaingot Raja Salomo angka
halak ginomgomanna marhite poda na molo didok ibana :
“Marhaposan tu Jahowa ma ho sian nasa roham, jala unang
marpangusandean ho tu pingkiranmu sandiri”. (Poda 3: 5).
Sian pandohan i taantusi ma, lobi umbotoan do Debata
dipanarihononNa di jolma asa jolma i sandiri. Jala Laos marhite
sian i do antusanta jala sadaranta na gale do jolma. Ndang hea boi
2
taboto aha nanaeng masa tu marsogot, haduan dohot tingki
nanaeng ro dope. Alai anggo Debata nunga tangkas diboto
saluhutna, ai sumurung do hapistaran ni Ibana ido asa digoar
Ibana Maha Tahu (Omniscience). Alani mansai ringkot ma hita
marguru tu Ibana laho mangantusi dia do lomo ni roha ni Debata
sioloan dohot siulahononta.
Boi do masa nang dingolunta on, hita mangulahon ulaonta
marguru tu lomo ni rohanta sandiri so pola padohot lomo ni roha ni
Debata. Ingkon okuhononta do ia sangkapta i ndada pintor
mamboan parbue na pasti. Alai na pasti ima lomo ni roha ni Debata,
ido asa didok hata ni Debata : “Pasimpar do sangkapsangkap
dibagasan roha ni baoa, alai sangkap ni Jahowa do na marsihohot”.
Pangantusion na songon i do na lohot di roha ni Raja David
na di surat Psalmen on, ido alana asa di pahibul ibana rohana
martangiang tu Debata molo didok ibana : Sai ajari ma ahu
mangulahon lomo ni rohaM. Dibagasan haporseaona tu Debata ,
holan marhite pangajarion ni Debata do na boi patulushon ulaonna
na pinorsanna i. Panoguon ni Debata marhite TondiNa do na boi
pahothon langkana mardalan di dalan na hornop, atik pe ingkon
songon na marnangkok tuat do dalan sibolusonna dohot ragam ni
pangkilalan na hinilalana.
Nuaeng hita nunga sahat tu partingkian na imbaru ima sada
taon naimbaru di parade Debata, tangkas do taokuhon ndang
taboto dope aha nanaeng masa si idaonta tu jolo nang dohot
sihilalahononta di pardalanan ni ngolunta on dohot di keluarganta.
Hata ni Debata ma namungguli hita ombas on, asa saluhut hita na
sekeluarga rap martangiang tu Debata Mandok : “Sai ajari ma ahu
mangulahon lomo ni rohaM”.
Tangiang ni saluhut hita ma tu Debata, asa Tondi ni Debata
ma na manogihon hita mardalan di dalan na hornop, dalan na
mamboan las niroha di hita saluhutna dipardalanan taon 2017 on.
Tangiang ni hita saluhutna ma tu Debata na pataruhon pardalan ni
keluarganta dibagasan lomo ni roha ni Debata. Ala ndang boi malua
nang keluarganta sian angka na masa nang di humaliangta.
Marhite sunggul-sunggul ni Debata sian hataNa na sahat tu hita asa
tangkas jala torang di hita holan pangajarion dohot panogunoguon
ni Tondi ni Debata do asa margogo nang hita sekeluarga. Gabe

3
 keluarga na marsihohot di pangoloion tu Debata jala na pasangap
Debata. Amen.
8. Marende sian B.E No. 69: 1, 3: UNGKAP BAHAL NA UMMULI
1 .Jesus sai urupi hami, dohot di taon baru on
Paimbaru gogonami, mangihuthon Ho tongtong
Pasupasu ma muse,na porsea sasude
3. Taon parasinirohaon,baen di au sandok taon on
Lam pahot ma hasesaan ni dosangku di au on
Holan Ho do Jesuski, tuk pasaehon dosangki

9. Doa Syafaat/ Tangiang Pangondianan

10. Marende sian B.E. No. No. 66: 1,3 DEBATA BAEN DONGANMI
(Huhut papungu pelean sipasahaton tu huria)
1. Debata baen donganmi, lao mangula ulaonmu.
Baen Ibana haposanmu sai paserep rohami
Debata baen donganmi Debata baen donganmi
3. Debata baen donganmi sai na saut do ulaonmu,
Sai na tulus do sangkapmu jala sonang rohami
Debata baen donganmi Debata baen donganmi
11. Penutup: Ale Amanami + Tapuji Debata + Pasu-pasu, Amen.. 3X
12. Masitariparan hata (Mamungka sian ianakhon na umetmet sahat
tu natoras)
13. Masijalangan mandok SELAMAT TAON BARU: (Di mulai sian
ianakhon na ummetmet).
“ SELAMAT TAON BARU 2017 “