PARTORDING NI PARMINGGUON

TAON NA IMBARU

Ev. Psalmen 8 : 1-10 Ep. Epesus 3 : 14-21

TOPIK :
HASONGKALON DOHOT HOLONG NI ROHA NI DEBATA
DI GANUP JOLMA

HURIA KRISTEN BATAK PROTESTAN

MINGGU, 1 JANUARI 2023
01. Marende BE HKBP No. 70:1-3. “Naung salpu taon na buruk i”
BL. 36.
 Naung salpu taon na buruk i, Ho ma hupuji Tuhanhi. Ai diramoti Ho
tongtong tondingku dohot dagingkon. Ai diramoti Ho tongtong
tondingku dohot dagingkon.
 O Jesus sai asi rohaM, paian denggan ni basaM; muse di taon
na’mbaru on di nasa huriaM tongtong, muse di taon na’mbaru on di
nasa huriaM tongtong.
---Musik---
 (Jongjong) Sai tong paian hataMi na mangapuli roha i. Alai pangago
sasude padao ma sian hami be. Alai pangago sasude padao ma sian
hami be.

02. VOTUM – INTROITUS – TANGIANG :

U : Marhitehite Goar ni Debata Ama, dohot Goar ni AnakNa Tuhan Jesus
Kristus, dohot Goar ni Tondi Parbadia na tumompa langit dohot tano
on. Amen. Sai mangaranapi do matangku dompak angka dolok: Sian
dia do ulaning ro pangurupion tu ahu? Sian Jahowa Sitompa langit
dohot tano on sambing ro pangurupion ianggo tu ahu. Ndang tagamon
loasonNa tarsulandit patmu, ndang tagamon nok mata ni Sijaga ho. Sai
jagaon ni Jahowa do ho sian nasa parmaraan, sai jagaonNa do tondim.
Sai jagaon ni Jahowa do ho laho ruar dohot laho bongot olat ni on ro di
saleleng ni lelengna. Haleluya!
H : (Mangendehon): BE HKBP No. 852 : 1 “HALELUYA HKBP (3X)”
BL 852
 Haleluya, Haleluya, Haleluya!
U : Martangiang ma hita! Ale Amanami na di banua ginjang! Dibahen Ho
do Anak haholongan ni rohaM tu toru ni Patik, asa dipalua angka na
ginomgoman ni Patik. Urupi hami asa dohot hami dapotan haluaon i,
jala asa mian hami di bagasan harajaonMu marhitehite AnakMu Tuhan
Jesus Kristus, Tuhannami. Amen.

(Hundul)

1
03. Marende BE HKBP No. 69:1 + 3. “Jesus sai urupi hami” BL. 84

 Jesus sai urupi hami dohot di taon baru on. Paimbaru gogonami
mangihuthon Ho tongtong. Pasupasu ma muse na porsea sasude.
 Taon parasinirohaon baen di au sandok taon on. Lam pahot ma
hasesaan ni dosangku di au on. Holan Ho do Jesuski, tuk pasaehon
dosangki.

04. PATIK: Patik I - X

U : Tatangihon ma Patik ni Debata di minggu taon baru sadari on ima
patik parjolo sahat ro di patik pasampuluhon! Patik Parjolo: Ahu do
Jahowa Debatam, ninna Debatanta. Ndang jadi marangkup Ahu
bahenonmu Debatam.
H : Patik Paduahon: Ndang jadi ganaonmu jala ndang jadi
sumanonmu manang aha na di banua ginjang dohot na di banua
tonga on, ro di na di bagasan aek na di toru ni tano, ianggo tung
gabe sisombaon manang sioloan.
U : Patik Patoluhon: Ndang jadi dohonon Goar ni Debata, ianggo so ture
dalanna, ai hona uhumNa do sogot angka na marsineang di GoarNa.
H : Patik Paopathon: Ingot hamu ma pabadiahon ari Minggu i! Di na
onom ari ma ula hamu nasa siulaonmu; alai anggo ari papituhon
i, ari paradianan ni Jahowa Debatam do i. Ndang jadi ho mangula
anggo di na sadari i, manang anakmu pe manang borum manang
naposom lahilahi manang naposom boruboru, ro di pinahanmu,
ro di isi ni huta ni halak pe na mangebati hutam. Ai di na onom
ari do ditompa Debata langit dohot tano dohot laut dohot nasa
isina, dung i maradian do Ibana di ari papituhon i. Dibahen i do
umbahen na dipasupasu Debata Jahowa ari paradiananNa i jala
di parbadiai.
U : Patik Palimahon: Ingkon pasangaponmu do natorasmu, asa martua ho
jala leleng mangolu di tano na nilehon ni Jahowa Debatam di ho.
H : Patik Paonomhon: Unang ho mamunu!
U : Patik Papituhon: Unang ho mangalangkup!

2
 H : Patik Paualuhon: Unang ho manangko!
U : Patik Pasiahon: Unang ho olo manghatindanghon hata na so tutu
maralohon dongan jolma!
H : Patik Pasampuluhon: Ndang jadi haliangan ni roham bagas ni
donganmu, ndang jadi haliangan ni roham dongan saripe ni
donganmu, manang naposona baoa, manang naposona boruboru,
manang lombuna, manang hodana, manang dia pe ugasan ni
donganmu.
U : Beha pandok ni Debata taringot tu patik na sampulu i?
On do: Ahu do Jahowa Debatam, ninna Debatanta. Pargogo na so
hatudosan jala parrimas, Siluluhon dosa ni amaama tu pinomparna, ro
di sundut patoluhon, ro di sundut paopathon, pinompar ni angka na
sogo roha di Ahu; alai asi do rohangKu di angka na marriburibu,
angka na marholong ni roha di Ahu, na so mangalaosi PatikHi. Antong
rap mangido gogo ma hita sian Tuhan Debata!
U & H :Ale Tuhan Debata! Sai pargogoi ma hami mangulahon na
hombar tu PatikMi. Amen.

05. Marende BE HKBP No. 68: 2 – 4. “Masilelean angka taon” BL. 93.
 Diudut Ho do hosangki paidaida ahu. Manang adong parbue ni na
niulaM di ahu. Hape jotjot tarhirim Ho, parbue i ndang olo ro.
(Jongjong)
 Alai na niondihonMi do au umbaen mangolu. Ho do mandok tu Ama i:
“Sai loas ma mangolu hau on, asi ma rohaMi, taon i pe lalu uhum i.”

06. MANOPOTI DOSA:

U : Tatopoti ma dosanta, martangiang ma hita! Ale Amanami jala
Debatanami na di banua ginjang. Parasiroha na sumurung mida hami.
Huparhatutu jala hutopoti hami do dosa dohot pangalaosionnami na
godang i. Tatap hami marhitehite asi ni rohaM, jala sesa ma dosanami
saluhutna, ala ni panghophop ni Anak haholongan ni rohaM, Tuhan
Jesus Kristus, Sipangolu hami. Amen.

3
 Tabege ma bagabaga ni Debata taringot tu hasesaan ni dosanta!
Parasi roha jala Pardengganbasa do Jahowa, lambat tarrimas jala
Parasiroha godang. Ndang dibahen tu hita hombar tu angka dosanta,
jala ndang dibaloshon tu hita hombar tu angka hajahatonta. Songon asi
ni roha ni amaama mida angka anakna, asi ni roha ni Jahowa di angka
na manghabiari Ibana. Hasangapon ma di Debata na di ginjang!
H : Amen.
(Hundul)
07. Marende BE HKBP No. 64: 2 + 4. “Naung moru do muse sataon”
BL.192
 Aut alusanhu Debatangku, ra, tung maila au disi. Marningot salpu ni
rohangku, ro di sude ulaonhi. Ai dosa do binaen ni tangan, gok dosa
nang rohangku pe; nang pat, nang mata, nang pamangan luhut
marsala do hape.
 Ndang dapot bilanganhu dosa naung huulahon na sai laon. Huhut
ndang harajuman basa ni Tuhan Jesus na sai laon. Ndang dibaloshon
Ho Tuhanhu tu au hombar tu dosangki, sai dipalambas Ho rohaMu
marnida pangalahongki.

08. E P I S T E L : Epesus 3 : 14-21

U : Tatangihon ma hata ni Debata turpuk Epistel di minggu taon baru
sadari on ima na tarsurat di Epesus 3:14-21. Ala ni i, hulompit do
tothu maradophon Ama i.
H : Ibana do haroroan ni nasa bangso, na targoar di banua ginjang
nang di tano on.
U : Anggiat, hombar tu godang ni hasangaponNa i, dilehon tu hamu jolma
parbagasan, sipargogoan jala sipatoguon marhitehite TondiNa,
H : asa maringanan Kristus i marhitehite haporseaon di bagasan
rohamuna, gabe hot hamu marurat jala marojahan di bagasan
roha na holong.
U : Naeng ma malo hamu mangantusi, rap dohot saluhut angka na badia i,
ganjangna dohot bidangna, bagasna dohot timbona,

4
 H : laho tumanda holong ni roha ni Kristus, na mangatasi nasa
pangantusion, asa sahat tu hamu sandok hagogok ni Debata.
U : Alai tarpatupa Ibana do andul lumobi sian na tapangido manang
tapingkiri, hombar tu hagogoon na manghorhon di bagasan hita.
H : Di Ibana ma hasangapon di tongatonga ni huria i jala di bagasan
Kristus Jesus ro di saluhut sundut salelenglelengna. Amen.
U : Ido sahatna. Martua do angka na tumangihon Hata ni Debata jala na
umpeopsa.
H : Amen.

09. Marende BE HKBP No. 437:1-2. “Tung na muba rohangku” BL. 390.
 Tung na muba rohangku dibaen Tuhanki, dung Jesus ma ringan di au.
Nunga sonang au on, tung dame rohangki, dung Jesus maringan di au.
Dung Jesus maringan di au, dung Jesus maringan di au. Tung na
sonang do au dung tu Jesus au lao, dung Jesus maringan di au.
 Au na lilu hian dapot sambulonhi, dung Jesus maringan di au. Nunga
sae dosangki dibaen mudarNa i, dung Jesus maringan di au. Dung
Jesus maringan di au, dung Jesus maringan di au. Tung na sonang do
au dung tu Jesus au lao, dung Jesus maringan di au.

10. MANGHATINDANGHON HAPORSEAON:

U : Tahatindanghon ma haporseaonta i, songon na hinatindanghon ni
donganta sahaporseaon di sandok portibi on. Rap ma hita mandok!
H : Ahu Porsea di Debata Jahowa…..d.u.
(Hundul)

11. TINGTING

12. MANDOK HATA SELAMAT TAON BARU: Diatur hombar tu

ringkotna.

5
13. Marende BE HKBP No. 149:1…... “Ho tongtong ihuthononhu”
BL. 182. (Papungu Pelean Ia, Ib)

 Ho tongtong ihuthononhu Jesus Sipangolu au. Tung na so

tadinghononhu Ho na paluahon au. Sian sasude dosangku, dohot sian
uhum i. Na tongtong habiaranhu, ala pardosaonhi.
 Tung di dia jumpang ahu, Tuhan sada songon Ho. Na manogunogu ahu
tu na sonang songon Ho? Naung ditaon Ho hamatean lao humophop
tondingki. Asa masuk au manean tohap na sumurung i.
---Musik---
 Manang aha pe na masa, las ni roha arsak pe. Tioponhu Ho na basa,
na marholong roha pe. Tung saleleng au mangolu, nang dung suda
bohalhon. Ingkon Ho, o Sipangolu, pujionhu sai tongtong.
 Sai ingani ma rohangku, Jesus dohot TondiMi. Ro di ujung ni
langkangku, togu au o Tuhanhi. Di na tos muse hosangku, di na homur
matangki. Sai tiopi ma tanganhu, togu au tu lambungMi.
---Musik---

14. JAMITA: Psalmen 8 : 1-10.

15. Marende BE HKBP No. 581:1….. “Sangap di Jahowa” BL. 581.
(Papungu Pelean Na marboho tu Kategorial Naposobulung)

 Sangap di jahowa na sun timbul i, balga ni holongNa ndang tarasam i.

Di lehon AnakNa na sasada i, manobus hita jolma pardosa i. Puji ma
Debata ale manisia, las roham, las roham somba ma Debata.
Dapothon Jahowa na sun timbul i, marhite AnakNa Tuhan Jesus i.
 Tung so hasuhatan do basaNa i, marhite AnakNa ni lehonNa i.
MudarNa durus do di hau silang i, rara pe dosanta ias dibaen i.
Puji ma Debata ………
---Musik---
 Balga situtu pambaenMi Debata, tung so hasuhatan holong ni rohaM.
Tu jolma pardosa asi do rohaM, di ungkap Ho dalan lao tu banuaM.
Puji ma Debata ………

6
16. Tangiang Pelean-Pangujungi-Pasupasu: (Jongjong)
U : Tatangianghon ma peleanta! Ale Debata, Amanami na di banua
ginjang! Ho do haroroan ni saluhut silehonlehon na denggan dohot
nasa ulibasa na mauliutus. Hupasahat hami ma sian na nilehonMi tu
hami, peleannami tu Ho. Sai jalo ma i gabe uap na hushus di joloM.
Pasupasu ma i jala ramoti asa huparhaseang hami pelean on,
patimbulhon harajaonMu di tongatonga ni huriaM dohot di portibi on.
Buhai ma rohanami marhitehite TondiM, asa lam hutanda hami
godang ni silehonlehonMi tu hami, asa lam girgir hami mandok
mauliate tu Ho, marhitehite Jesus Kristus Tuhannami. Amen.
H : (Mangendehon) BE HKBP No. 204 : 2 “NDANG
TADINGHONONHU HO” BL 73
 Nasa nanilehonMi; tondi ro di pamatanghu, hosa dohot gogongki
ro di saluhut artangku. Hupasahat i tu Ho na so unsatonhu do.
U : Ale Tuhan Debata, na so marmula na so marpansohotan, Debata na
manongtong ro di saleleng ni lelengna! Na so olo suda do angka
taonMu, jala ndang marparbolatan angka ariariM; alai jempek jala na
gabur salpu do taonnami dohot ariarinami. Nunga salpu muse sada
taon sian ariarinami, alai ndang salpu ianggo asi ni rohaM. Dibahen i
hupuji hami Ho marhitehite Tuhan Jesus Kristus Tuhannami, ala ni
godang ni asi ni rohaM na pasahat hami tu bona ni taon on. Mansai
godang do denggan ni basaM hujalo hami manipat taon na salpu i, jala
huingot hami do i sadari on. On pe mauliate ma rohanami tu Ho, ala
dipangolu jala diramoti Ho hami; dilehon Ho sipanganon dohot
paruloson di hami jala dipasupasu Ho na niula ni tangannami. Angkup
ni i dilehon Ho do hasonangan tu luatnami, jala dipalua Ho do hami
sian parmaraan, jala diramoti Ho do hami di hagogotan. Tongtong do
dilehon Ho Barita na Uli i manondangi hami asa sanga hami paubahon
rohanami. Angkup ni i dilehon Ho do apulapul tu na marsak, tu na
matean, asa unang mandele nasida. Molo huingot hami sude
pambahenannami di taon naung salpu i, na maila do hami nuaeng
maradophon Ho, ala jotjot magopo ariarinami dohot asi ni rohaM
hubahen hami. On pe binsan disalpuhon Ho nuaeng taon naung salpu i
sian hami, salpuhon ma sude pambahenannami na hurang i, jala sesa
sude dosanami. Sai huphupi ma pambahenannami na hurang i,
7
 marhitehite asi ni rohaM. Diebati Ho do hami manipat na sataon i, jala
diida Ho do lan na so marparbue na denggan di tongatonganami. Sai
unang jolo taba, sai pasombu ma hami mangolu, anggiat marparbue na
denggan hami tu joloan on. Huparhatopot hami do sude asi ni rohaM
jala di bagasan haserepon dohot unduk ni roha do hami nuaeng
mangido tu Ho; Sahat tu Ho ma hami on sude. Sai togutogu jala
ramoti ma hami on sude. Sai togutogu jala ramoti ma hami di bona ni
taon on, songon i ganup ari, asa pujionnami Ho di taon na ro on.
Patuduhon ma ganup ari tu hami dalan sidalanannami dohot ulaon
siulaonnami. Sai pasupasu ma hami jumpa marpungu di bagasMon, di
parsikolaan, songon i dohot di bagasnami be. Sai tumpahi sude
parjamita, pangajari dohot na paturehon na marsahit, songon i dohot
na pinasahat tu nasida. Sai ramoti ma na manggomgomi hami. Tatap
ma saluhut na tarsosak, na pogos, na dangol, na so marama, na nileaan
ni halak. Unang loas nasida hona rupa, alai patuduhon ma tu nasida asi
ni rohaM na so mansohot i, asa rap marlas ni roha hami sogot di
hasonangan di lambungMu di inganan na hot, ala ni AnakMu, Tuhan
Jesus Kristus, Tuhannami. Amen.
Ale Amanami na di banua ginjang! Sai pinarbadia ma GoarMu! Sai ro
ma harajaonMu! Sai saut ma lomo ni rohaM di banua tonga on songon
na di banua ginjang! Lehon ma tu hami sadari on hangoluan siapari!
Sesa ma dosanami songon panesanami di dosa ni dongan na mardosa
tu hami! Unang hami togihon tu pangunjunan! Palua ma hami sian
pangago!
H : (Mangendehon): BE HKBP No. 841 : 1 “AI HO DO NAMPUNA
HARAJAON” BL 841
 Ai Ho do nampuna harajaon dohot hagogoon, ro di hasangapon
saleleng ni lelengna. Amen.
U : Tangiang Pasupasu !
H : (Mangendehon): BE HKBP No. 845 : 1 “AMEN (3x) HKBP”
BL 845
Amen, Amen, Amen.

========
SELAMAT TAON BARU 1 JANUARI 2023