PARPUNGUAN BODARI

PARNINGOTAN ARI HATUTUBU

NI TUHAN JESUS

EV : Mateus 1 : 18 – 23 ---- EP : Jesaya 7 : 10 – 17

TOPIK :
DONGANTA MA DEBATA

HURIA KRISTEN BATAK PROTESTAN

Distrik XVIII Jabartengdiy
Minggu, 24 Desember 2023
Pukul 18:00

1
1. PANGARADEON
A. Pangaradeon pangkobasion di Konsistori
B. Sude Ruas jongjong ditingki ro prosesi, diiringi Musik Ende No. 52 :
C. Sude Parhalado bongot tu bagas joro laos jongjong tu jolo.
D. Na pagalakhon Lilin jongjong ma dijolo mengadop tu Parhalado
Mewakili : Parhalado, Panitia Natal, SM, Remaja, NHKBP, Ama,
Parompuan
2. PAMUHAI :
U : Huria nahinaholongan ni Tuhan Jesus Kristus na marpungu do
hita di borngin on laho mamestahon parningotan ari hatutubu
ni Tuhan Jesus Kristus. Na ro do Ibana manopot hita jolma
pardosa, dirumari do diriNa jala disolukhon rupa ni hatoban,
gabe suman tu jolma do Ibana jala rumang jolma dapot di
Ibana.
R : Mariaia do tondingku mida Debata Sipalua ahu. Ai ditatap
do haetehon ni naposoNa on.
U : Naeng bongot ma hita tu parsaoran na badia rap dohot Debata.
Alani tama do hita mandok mauliate tu Tuhan Jesus Kristus
Raja ni huria i, na mangalehon partingkian na uli di hita. Antong
manjonok ma hita jala marunduk ni roha di adopan ni Debata,
DONGANTA MA DEBATA. Tapangiar ma soaranta mamuji
Tuhanta pardengganbasa i, tapahohom ma martangiang na
hohom............musik BE No. 752 sa ayat ........... marende ma hita.
3. Marende BE No. 57 : 1 – 3 “Nunga Jumpang Muse”
Nunga jumpang muse ari Pesta i, Hatutubu ni Tuhanta Jesus i
Tuat do Ibana sian Surgo i, Mebat tu hita on
Hasangapon di Debata, Dame, dame ma di jolma
Las ni roha ni Debata, Hajolmaon muse
Beta, ale dongan tu Betlehem i, Itasomba ma Dakdanak na disi
Na tinongos ni parasiroha i, Debata Ama i
Hasangapon di Debata, Dame, dame ma di jolma
Las ni roha ni Debata, Hajolmaon muse
............................musik...................................sa ayat.....
2
 ------------huria Jongjong-----------------
Sombanami ma di Ho na tubu on, Ho siboan dame tu portibi on
Sai pasaorhon ma tu rohanami on, DameMi o Jesus
Hasangapon di Debata, Dame, dame ma di jolma
Las ni roha ni Debata, Hajolmaon muse

4. VOTUM – INTROITUS – TANGIANG:

U : Marhitehite Goar ni Debata Ama, dohot Goar ni AnakNa Tuhan
Jesus Kristus, dohot Goar ni Tondi Porbadia na tumompa langit
dohot tano on. Amen. Dung i gabe daging ma Hata i, jala
maringanan di tongatonga ni hita on, jadi huida hami ma
hasangaponNa songon hasangapon ni anak sasada na sian Ama
i, gok asi ni roha dohot hatutuon. Haleluya!.
R : (Mangendehon): Haleluya, Haleluya, Haleluya!
U : Martangiang ma hita: Ale Tuhan Debata, Amanami na di
banua ginjang ! Mandok mauliate do hami tu Ho, ala ni godang
ni asi dohot holong ni rohaM di hami; ai dibasabasahon Ho do
AnakMu na sasada i tu hami na di pardangolan on, asa malua
hami marhitehite Ibana sian dosa dohot sian hamatean saleleng
ni lelengna. Hupangido hami tu Ho, sai sondangi ma rohanami
na holom i marhitehite Tondi Parbadia i; angkup ni i sai
parrohai ma hami, asa huboto hami mandok mauliate tu Ho,
asa tarapul situtu rohanami di hagogotan dohot di
pangunjunan marhitehite AnakMu, Tuhan Jesus Kristus
Tuhannami. Amen. (Hundul)
5. Marende BE No. 605 : 1 – 2 “Lasma Roham Tuhanta Ro”
Las ma roham Tuhanta ro
Gumomgom sasude ungkap roham
Jangkon rajam marende ma sude
Marende ma sude, marende, Marende ma sude
Tano nang laut, harangan i nang awangawang i
Hauma i, nang sunge i, olophon Raja i
Olophon Raja i, olophon, olophon Raja i
3
6. PATIK:
U : Tangihon hamu ma Patik ni Debata di Parpunguan Bodari Natal
on, i ma na tarsurat di Filippi 2 : 4 – 5, Unang ma na ringkot di
hamu be matahon hamu, dohot ma na di dongan! Songon
parrohaon ni Kristus Jesus ma parrohaonmuna! (Antong rap
mangido gogo ma hita tu adopan ni Debata).
R : Ale Tuhan Debata, sai pargogoi ma hami mangulahon na
hombar tu PatikMi. Amen.
7. Marende BE No. 52 : 1 - 3 “HATUAON DO ”
Hatuaon do las ni roha do hatutubu ni Jesus i
Mago do jolma ro ma Tuhanta las be las be ma rohanta i
Mago do jolma ro ma Tuhanta las be las be ma rohanta i
Hatuoan do las ni roha do hatutubu ni Jesus i
:’: Domu do hita tu Debatanta las be las be ma rohanta i :’:
............................huria jongjong......................................................
Hatuoan do las ni roha do hatutubu ni Jesus i
:,: Las ma rohanta mida Tuhanta las be las be ma rohanta i :,:

8. Manopoti Dosa :
U : Tatopoti ma dosanta tu adopan ni Debata martangiang ma hita :
Ale Tuhan Debata, Amanami na di banua ginjang ! Ho do na
patupahon hasesaan ni dosa di hami halak na dangol on
marhitehite Anak haholongan ni rohaM. Sai asi ma rohaM di
hami, angka na mangarsakhon dosanami. Sai sahapi ma tu
bagasan rohanami hasesaan ni dosanami i. Lehon ma tu hami
TondiM na badia i, asa unang ganggu rohanami di asi ni rohaM,
alai asa hot rohanami marhaporseaon laho manggotaphon nasa
dosa dohot roha portibi on, asa hupasahat hami dirinami tu Ho,
gabe pelean na mangolu jala na badia marhitehite Tuhan Jesus
Kristus Tuhannami. Amen

4
 --Holan Musik BE. No. 686 : 1 --
P : Bagabaga taringot tu hasesaan ni dosanta : Songon on do
panghaholongi ni Debata di portibi on, pola do AnakNa na
sasada i dilehon, asa unang mago ganup na porsea di Ibana, asa
hangoluan na saleleng ni lelengna di ibana. Hasangapon ma di
Debata na di ginjang ! Amin. –Hundul—

9. Marende BE 56 : 1 – 2 “SAI RO MA HAMU NA ”

Sai ro ma hamu na angka na porsea
Sai ro ma hamu na tu Betlehem
Ida dakdanak, Sipalua hita, tasomba ma Ibana
Tasomba ma Ibana, tasomba ma Ibana Rajanta
O Raja na sangap Tuhan ni saluhut
Ditaon Ho na porsuk di tano on
Ala ni jolma na di hamagoan tasomba ma Ibana
tasomba ma Ibana, tasomba ma Ibana, Rajanta.

10. REFLEKSI – PAGALAK LILIN:

U : Huria ni Tuhanta, nunga ro Tuhanta manopot bangsoNa jala
mamboan haluaon. Ido na tahalashon di borngin on. Alai haholomon
do jotjot manghuphupi tano on jala lam tu jorbutna do pangela ni
sibolis i mangihoti torop jolma, disegai do tondi, haporseaon dohot
panghirimon sogot. Digunturi na marrumatangga, disegai nang roha
ni ianakhon asa tois tu hata ni Debata. Alani i tama do
pahusorhusoronta dibagasan rohanta be.

R : (Mangendehon): 608 : 1,4 O BETLEHEM NA METMET I

 O Betlehem na metmet i boasa modom ho
Humirdophirdop bintang i hohom marnida ho
Alai ro sian ho do panondang na tongtong
5
 Na pinarsinta na sai laon sorang di borngin on

 O Anak na Badia i ro Ho tu hami be

Bongoti daging tondi i parbadia sude
Barita na ummuli hutangi hami be
Sorang ma Ho dingolungki ale Immanuel

U : Lam godang pe angka parungkilon na masa di tongatonga ni ngolu

on, ingot ma Tuhanta do na mandongani hita. Molo lam lumlam
angka parrohaon ni jolma di partingkian on, ingot ma, alani i do
umbahen na ro Tuhan Jesus sian banua ginjang sorang tu portibi on,
asa didongani Tondi ni Debata sandok ngolunta na dibagasan
hagolapon. Alani ndang jadi papeolonmu uhum, ndang jadi ho
marnidanida bohi, jala ndang jadi jaloonmu silua, ai sisip do
papitung mata ni halak na pistar jala pabalikbalik parhataan ni halak
na tigor. Antong songon dia pe rumang ni parngoluan na
niadopanmu nuaeng, di arsak manang las ni roha, sai ungkap ma
roham manjangkon Tuhan i asa sorang Ibana di bagasan ngolum,
donganta ma Debata.

Solo: (Mangendehon BE No. 616 : 3 “Ulina i di borngin na badia”)

Uli na i sude marlas ni roha, ala naung songgop harajaonNa i.
Huria i ria do ro marsomba, mamuji Raja na sun sangap i.
Ibana do panondang hangoluan, na mangalehon panghirimon i.
Uli na i marende do suruan di borngin i do tubu Kristus i
Di borngin i do tubu Kristus i.
Pdt: (tingki marende solo ro ma Pandita/Parjamita dohot
paragenda tu langgatan, laho pagalakhon lilin. Laos
diombas on ma ro parhalado na marhobas mamboan lilinna
asa dipagalak Pandita/parjamita)
(dohonon ni pandita/parjamita ma):
6
 Hamu angka dongan sahuria, dihorhon hatutubu ni Jesus i do,
ombas na imbaru, parsaoran na imbaru dohot holong na imbaru.
Jangkon ma Sipalua i! Sondang ni lilin on ma songon simbol na
marpadan hita borngin on, na so taulahon be dosa, rade ma hita
manesa dosa ni donganta. Tuhanta do mandok: Ahu do
Panondang diportibi on. Na so tupa be mardalan di na holom
nasa na mangihuthon Ahu. Antong borhat ma hamu manopot
angka ruas (borhat ma angka parhalado mandapothon ruas,
diintopi ma lampu, dipagalak ma lilin ni ruas/senter handphone).
JONGJONG MA HITA MARENDE :
MARENDE : BE. No. 54 : 1 – 3 “SONANG NI BORNGIN NA I” BL. 64
Sonang ni borngin na i, uju ro Jesus i. Sonang modom do halak sude,
holan dua na dungo dope; mangingani Anakna, Jesus Tuhanta i.
Denggan ni bornginna i, uju ro Jesus i. Tu parmahan di Betlehem i,
dipaboa na di surgo i; nunga ro Sipangolu, Jesus Tuhanta i.
.....................................musik.....................sa ayat.........................................
Godang ni tua disi, di na ro Jesus i. Tung malua pardosa
muse,
sian hamagoanna sude; ala ro Sipangolu, Jesus Tuhanta i .
~ hundul~
Pdt: Hamuna angka dongan, las ma roham nunga saor be Tuhanta
Jesus Sipalua i tu portibi on, jangkon ma Ibana sian ungkap
roham jala hatindanghon ma Ibana di ngolum.
R : Haluaon do di boan Tuhan Jesus marhite hatutubuNa,
alani hami pe naeng ma hobas manghatindangkon Tuhan
Jesus marhite ngolunami.
11. Marende BE No. 53 : 1 + 3 “DI BETLEHEM DO TUBU “
Di Betlehem do tubu di hita Anak i
Ido sian na burju hupillit Rajangki
Ido, ido hupillit Rajangki

7
 Sai naeng haholonganku Ho ale Tuhanhi
Nang marsak las rohangku ingkon lam ganda i
Olo, olo ingkon lam ganda i
12. E P I S T E L :
U : Tabege ma Hata ni Debata turpuk di Parpunguan Bodari Natal
on i ma na tarsurat di Jesaya 7 : 10 – 17, Marsorinsorin ma hita
manjahasa : Angkup ni didok Jahowa ma mandok si Ahas,
songon on:
R : Pangido sada tanda di ho sian Jahowa Debatam, pangido
sian banua toru, manang sian banua ginjang sahali.
U : Jadi ninna si Ahas ma: Ndang olo ahu mangido, asa unang
huunjuni Jahowa.
R : Jadi ninna si Jesaya ma: Ua tangihon hamu ma, ale
pinompar ni si Daud! Ndang dope sae hamu pauruuruhon
jolma, dohot do Debatangku naeng lojaanmuna.
U : Dibahen i apala Tuhan i sandiri ma mangalehon sada * tanda di
hamu: ** Ida ma, gabegabean ma sada namarbaju, jala
tumubuhon sada anak, jala bahenonna ma goarna: * Immanuel.
R : Mantega dohot situak ni loba panganonna, paima diboto
mambolongkon na jat, jala mamillit na denggan.
U : Ai * tagan so diboto dakdanak i dope mambolongkon na jat, jala
mamillit na denggan, *tarulang ma tano i na nirajaan ni na dua
raja hinabiaranmu i.
R : Paroon ni Jahowa ma tu ho dohot tu bangsom dohot tu
pinompar ni amam angka ari na so dung ro, olat ni ari
hababali ni Epraim sian Juda, * bahenon ni raja ni Assur.
U : I do sahatna: Martua ma angka na tumangihon Hata ni Debata
jala na umpeopsa. Amen.

8
13. Marende BE No. 615 : 1 – 2 “TARBEGE SURUSURUAN
MARENDE”
Tarbege surusuruan marende mansai uli
Angka dolok dohot rura gok do saringar na i
Sangap ma, sangap ma di Tuhan. Sangap ma, sangap ma di Tuhan
--Jongjong--
Las roham ale parmahan nunga tubu Kristus i
Rap marende ma hamu na pasangaphon Raja i
Sangap ma.......................
14. MANGHATINDANGHON HAPORSEAON:
U : Tahatindanghon ma haporseaonta i, songon na hinatindanghon ni
donganta sahaporseaon di sandok portibi on. Rap ma hita mandok:
R : Ahu Porsea….. (Hundul)
15. KOOR/VG/SOLO
16. SUNGGULSUNGGUL
17. KOOR/VG/SOLO
18. Marende BE No. 49 : 1 + 4 “SAI RO MA TU BARA”
Sai ro ma tu Bara di Betlehem i
Hamu na porsea hatop ma tuson
Marnida halasan ni rohanta i tinongos ni Ama na di Surgo i
--Musik--
Pasinggang ma totmu hamu na sude
Marnida parmahan marsomba muse
Marende hamu na marlas roha i, maniru suruan na di ginjang i
19. JAMITA: Mateus 1 : 18 – 23
20. Marende BE No. 598 : 1-… “Bege Ende Ni Suruan” (Pel. II)
Bege ende ni suruan, sangap ma di Tuhan i
Nunga tubu Sipalua Raja Sipardame i
Dipadame Debatanta do diriNa tu pardosa
Nunga tubu Kristus i di huta Betlehem i
9
 Ende ni suruan i, sangap ma di Tuhan i
--Musik--
Kristus Raja sian surgo tuat tu portibi on
Tubu sian si Maria lao manobus hita on
Debata na so tarida gabe daging songon hita
Nunga raphon hita be Jesus i, Immanuel
Ende ni suruan i, sangap ma di Tuhan i
--Musik--

Jesus Raja Hadameon sondang hatigoran i

Panondang ni hangoluan di saluhut jolma i
Dirumari do diriNa lao manobus manisia
Asa unang mate be ala ni dosana be
Ende ni suruan i, sangap ma di Tuhan i

21. PANGUJUNGI: (Jongjong)

U : Nunga tabege Hata ni Debata na pabotohon tu hita: Donganta
ma Debata. Tuhanta i do donganta di bagasan ngolunta. Na ro
do Ibana mandongani hita marhite Tondina, manondangi hita
na mardalan di bagasan hagolapon asa dapotan las ni roha hita
songon las ni roha di gotilon, songon parolopolopon di na
marbagi tabantaban. Antong angka naung manjalo hatiuron i
patut do manghatindanghon i di bagasan ngolunta. Unang be
mangolu dibagasan hagolapon. Hata ni Debata mandok:
”Marburi ma hamu, urasi hamu dirimuna, paholang hamu ma
hinaroa ni pambahenanmuna sian jolo ni matangKu, pasohot
hamu ma manjahati. Guruhon hamu ma mambahen na
denggan, lului hamu ma uhum, pintori hamu na nirupa,
patingkos hamu ma uhum tu nasopot so marama, ondingi hamu
angka na mabalu.”

10
 R : Ale Tuhan Debata, dongani ma hami asa gabe panondang
hami di portibi on.
U : Kristus do Tuhan naung ro tu portibi on laho paluahon dohot
sumondangi hita saluhut na tinompaNa. Martua ma angka na
porsea di Jesus Kristus ai Ibana hatuaon i. Ibana do hagogoonta
di angka parungkilonta, Ibana do na manongtong asa manang
ise na mian di bagasan Tuhan Jesus dapotan hangoluan
sisaleleng ni lelengna, Ibana do Raja Dame na padamehon hita
tu Debata Ama. Alani mangolu ma hamu dibagasan dame rap
dohot na humaliang. Ibana ma na mangaramoti langkanta di
bagasan panghirimon na imbaru. Donganta ma Debata.

R : (Mangendehon) BE No. 597b : 1 “BARITAHON DI DOLOK”

 Baritahon di dolok di rura di sude inganan,
Baritahon di dolok naung tubu Kristus i.
Ro do surusuruan tu ladang Efrata
Mandapothon parmahan tompu mansai torang
Baritahon di dolok di rura di sude inganan
Baritahon di dolok naung tubu Kristus i
.........................musik..................sa ayat..............................
22. TANGIANG PANGUJUNGI : Pelean – Aleamanami - Pasupasu

11
 Praeses, Pandita, Bibelvrow, Diakones, Guru Huria
dohot Perangkat Distrik
HKBP Distrik XVIII Jabartengdiy
Pasahathon “Selamat Ari Natal”

Tu Sude Ruas ni Huria HKBP Ressort :

Bandung Riau Martadinata, Jawa Tengah, Bandung
Timur, Cimahi Jalan Lurah, Purwakarta, Yogyakarta,
Bandung Barat, Pekalongan, Cilacap, Cirebon,
Cimahi Jalan Sisingamangaraja, Brebes, Karawang,
Tasikmalaya, Bandung Tengah, Semarang, Subang,
Solo,
Cikampek, Betesda Baleendah.

Tuhan na mamasumasu hita saluhutna !

12