IBADAH MINGGU XII DUNG TRINITATIS

Pesta HUT pa-43-taonhon HKBP Tridarma & Pesta Gotilon 2023

Minggu, 27 Agustus 2023

*) Preludium & Prosesi: (P= Paragenda; H= Huria; I= Ina/Parompuan; A= Ama/Baoa; S= Sude)

P : Parhalado HKBP Tridarma mandok MAULIATE tu ganup ruas ni Huria na ro man-
dohoti ibadah sadari on, lumobi ma i tu hamu na sahali on dope mandohoti ibadah di
inganan on. Horas jala dame ma di hamu saluhutna.
H : HORAS JALA DAME MA NANG DI HAMU!
P : Ganup taon dipaingot do hita asa mamestahon Pesta Ulang Taon ni hurianta dohot
Pesta Gotilon. Alai tapestahon pe i ndada ala naeng papuashon hagiot ni dagingta laho
marpesta. Ndada ala na godang artanta manang sinadongan. Alai ala tangkas do
tahaporseai pandonganion ni Debata di ngolu ni parhuriaonta sian na mamungka
parmingguon na parjolo tgl. 18 Agustus 1980 sahat tu tingki on. Sudena i holan alani
asi ni roha ni Debata sambing do i.
H : Pinuji ma goar ni Debata Ama, Anak dohot Tondi Parbadia. Debata Sitolusada naung
Pasaorhon diriNa di ngolunta sadari on nang marsogot, sahat ro di salelengnilelengna.
P : Sekaligus ma i marpesta hita sadari on marningot pasupasu dohot denggan basa ni
Debata naung tajalo marhitehite parbue na niula ni tanganta, i ma parbue ni partu-
monaan ni ulaonta saleleng sataon bolon on. Ai dilehon do tu hita hagogoon, hamalo-
on, hahirason, dohot sude na denggan di bagasan taon on, marhite angka musim na
margantisorin, songon i nang angka ari dohot bulan dohot taon. Jala i do alana ingkon
mandok mauliate hita tu Debata marhite na mamestahon Pesta Gotilon ganup taon.
Ai HOT DO PASUPASU NI DEBATA RO DI SALELENGNA. Jala asa ingot hita, sian
Ibana do saluhutna itajalo, marhitehite Ibana do itaulahon, jala marhapatean tu Ibana
do saluhutna i itapelehon. Di Ibana ma hasangapon salelengnilelengna.
Antong, itapasangap ma Ibana jala itaendehon ma ende pujipujian sian …
01. BE No. 565: 1+4 “LAS ROHANGKU LAO MAMUJI”
1. Las rohangku lao mamuji Debata Parholong i,
Songon bunga na mangerbang di na binsar ari i.
Arsak, dosa, haporsuhon mago dibaen asiMi.
Las ni roha na manongtong lehon di au Tuhanki.
(Huria Jongjong)
2. Rap ma hita mangendehon, sangap di GoarNa i,
Tapangiar soaranta lao mamuji Tuhan i.
Sun do holong ni rohaNa na so marnamontok i,
I do pasadahon hita salelenglelengna i.
02. Votum – Introitus – Tangiang: (Agenda…A.XV.A.12 – D.XIII.47)
P : Marhitehite Goar ni Debata Ama dohot Goar ni AnakNa, Tuhan Jesus Kristus
dohot Goar ni Tondi Parbadia, na tumompa langit dohot tano on. Amen.
 "Pardenggan basa do Jahowa, tau partanobatoan di ari hagogotan jala ditanda do
angka na marhaposan tu Ibana." Haleluya.
H : (mangendehon…) HALELUYA..HALELUYA..HALELUYA
P : Martangiang ma hita: Ale Tuhan Debata, Pargogo na so hatudosan, na songkal
jala na bonar ! Dialo Ho do na ginjang marroha, jala dipatimbo Ho do na serep
marroha.
H : Ala ni i hupangido hami tu Ho: Sai ramoti hami, asa unang jungkat hami, unang
ginjang rohanami.
P : Alai togutogu hami marhitehite TondiM, asa unduk, serep, tobok jala burju
di adopan ni halak saluhut, ala ni AnakMu, Tuhan Jesus Kristus, Tuhannami.
S : AMEN. (Huria Hundul)

03. BE No. 792: 1+4 “PASUPASU HAMI O TUHAN”

Refrein: Pasupasu hami O Tuhan, sai usehon dameMi;
Sai ampehon tanganMi Tuhan, lehon tu au gogoMi.
1. Di portibion baen ma au Tuhan habaoran
ni las ni roha tu na marsak i, tu na dangol i, gabe pangapuli i.
Refrein: Pasupasu hami O Tuhan, sai usehon dameMi;
Sai ampehon tanganMi Tuhan, lehon tu au gogoMi.
4. Di portibion baen ma au Tuhan siradoti haholongon,
Togutogu ma, hami on, Tuhan, marparange na denggan.
Refrein: Pasupasu hami O Tuhan, sai usehon dameMi;
Sai ampehon tanganMi Tuhan, lehon tu au gogoMi.
04. Patik (Galatia 6: 2-4)
P : Tangihon hamu ma Patik ni Debata di minggunta sadari on, i ma sian Galatia 6:
2-4 na mandok: "Masiurupan ma hamu mamorsan angka na dokdok i; i ma dalan
mangaradoti patik ni Kristus. Ai molo dipaburnang halak dirina, hape so adong di
ibana, sipaotooto diri do i. Alai ganup ma manangkasi ulaonna be; dung i tu
ibana sandiri ma pujipujian, ndada maradophon na asing."
Antong rap martangiang ma hita mangido gogo sian Tuhanta Debata…
S : ALE TUHAN DEBATA! SAI PARGOGOI MA HAMI MANGULAHON
NA HOMBAR TU PATIKMI. AMEN.
05. BE No. 467: 2-3 “ASI NI ROHAM HUPUJI” BL. 315
2. Sai ramoti ma rohangku, asa boi gohanMu au. Sai mabaor ma pasupasu
nang marhite sian au. IngananMu rohanami, TondiMi manggohi i.
Pangke dohot ngolunami gabe ulaulaMi.
( Huria Jongjong )
3. Naeng huhatindangkon hami hagogoonMi tongtong; Paluahon
na mardosa, nang parjahat na bolong. IngananMu……..
06. Tangiang Manopoti Dosa & Bagabaga ni Debata taringot tu hasesaan ni Dosa
P : Tatopoti ma dosanta di jolo ni Debata. Martangiang ma hita... Ale Tuhan Debata,
 Ama ni Tuhannami Jesus Kristus, Ho do Debata pargogo na so hatudosan, sitompa
nasa na adong, paruhum na tigor, na manguhumi jolma manisia ! Na ro do hami tu
joloM manopoti dosanami, angka na huula hami marhite sian pangalaosionnami di
PatikMu, i ma marhite sian tubutubu ni rohanami na roa i, nang sian
pangkataionnami na so ture, ro di pangoloionnami di hisaphisap ni rohanami.
I : Na tama situtu do hona uhum hami ala ni dosanami i,
alai na tarsolsolbagi do hami nuaeng ala ni i.
A : Asi ma rohaM di hami, ale Debatanami. Pardengganbasa jala Parasiroha do Ho
ala ni Anak haholongan ni rohaM, Tuhan Jesus Kristus Tuhannami.
P : Sai sesa ma dosanami saluhutna, jala suru ma Tondi Parbadia tu rohanami be,
asa tarbahen hami mangoloi Ho di bagasan hatigoran dohot habadiaon, gabe sahat
hami tu hangoluan na so ra suda, na pinarbagabagaM di angka na porsea di AnakMu,
Tuhan Jesus Kristus, Tuhannami. Amen.
Tabege ma hata bagabaga taringot tu hasesaan ni dosanta… “Songon on do Hata ni
Tuhan Jesus: Ro ma hamu tu Ahu, hamu angka na loja jala na sorat, hupasonang pe
hamu. Buat hamu ma augangKu tu hamu, guruhon hamu ma sian Ahu, ai na lambok
do Ahu jala na serep marroha, asa dapotan hasonangan tondimuna. Ai lambok do
augangKu jala neang do dohot na hupaporsanhon."
S : HASANGAPON MA DI DEBATA NA DI GINJANG !”AMEN ( Huria hundul )

07. BE No. 476: 1+3 “NDADA AU GURU DI AU BE” BL. 322

1. Ndada au guru di au be, Jesus do nampuna au. Las rohangku dung hubege,
Jesus sipangolu au. Ndang be au guru di au. Jesus na humophop au,
nampuna au. Tung saleleng au mangolu, Jesus do nampuna au.
3. Ulaonku nang artangku pangke ma baen sangapMi; Diusehon Ho mudarMu
tung tanda do holongMi. Ndang be au guru di au. Jesus na humophop au,
nampuna au. Tung saleleng au mangolu, Jesus do nampuna au.
08. Epistel: (Markus 8: 27-30) responsoria…..
P : Hata ni Debata na gabe turpuk ni Epistel di Minggu XII dung Trinitatis on nienet
sian Buku Evangelium ni si Markus bindu 8: 27-30. Itajaha ma secara marsorinsorin.
27 Dung i borhat ma Jesus rap dohot siseanna i tu angka huta mardonokkon
Kaesarea Pilippi; jala di tongandalan i disungkun ma angka siseanna i, ninna ma:
Ise do Ahu, didok halak?
28 Jadi dialusi nasida ma Ibana: Si Johannes pandidi do didok halak; na deba
mandok: Si Elia; na asing muse: Sahalak sian angka panurirang i do!
29 Dung i disungkun Ibana ma nasida: Ia hamu, ise ma Ahu didok hamu?
Jadi dialusi si Petrus ma Ibana: Kristus i do Ho!
30 Gabe dipopai ma nasida, unang dipaboaboa Ibana tu halak.

Olat ni i do sahatna. "Martua do angka na tumangihon Hata ni Debata jala na

umpeopsa." Amen.
09. BE No. 256: 1+6 “JESUS KRISTUS I DO RAJA”
 1. Jesus Kristus i do Raja pinabangkit ni AmaNa :,: manggomgomi sasude :,:
Jala nasa hajolmaon Tu Ibana do mar-Tuhan :,: parhatopotonna be :,;
( Huria Jongjong )
6. O hamuna na badia Nang na tigor i, na ria :,: nang sude naung monang i :,:
Tole ma hamu natorop, tole ma marolopolop :,: puji ma Tuhanta i :,:
10. Manghatindangkon Haporseaon: ( Huria hundul )

11. Koor:
12. Tingting:
13. Koor:
14. BE No. 435: 1… “MAROLOPOLOP TONDINGKI” BL. 294
huhut Papungu Pelean I.a, I.b & Pelean II
1. Marolopolop tondingki ai naung di tobus Jesus i. Hamu sude, bege ma i,
sai las rohangku mandok i: Sonang ni tingki i, dung jumpang Jesus Tuhanki!
TondiNa mangajari au, tarbaen marlas ni roha au! Sonang ni tingki i, dung
jumpang Jesus Tuhanki.
--- intro ---
2. Dihaol holongna rohangki, tung na so boi be mago i.
MataNa do manatap au, pinggolNa tumangihon au. Sonang ni………….
--- holan musik ---
3. Tu Jesus sahat ngolungki saleleng ni lelengna i.
Rap dohot au endehon ma endengku na imbaru da. Sonang ni…………..
15. Jamita (2 Samuel 7: 25-29)
25 Antong ale Debata Jahowa! Sai pahot ma hata naung pinarbagabagami
taringot tu naposom dohot taringot tu pinomparna sahat ro di saleleng-
lelengna, jala bahen ma hombar tu bagabagami.
26 Asa timbul Goarmu ro di salelenglelengna, asa dohonon ni halak songon on:
Jahowa Zebaot do Debata ni Israel, jala hot ia pinompar ni naposom si Daud
di jolomi.
27 Ai Ho, ale Jahowa Zebaot, Debata ni Israel, nunga dipapatar Ho tu pinggol
ni naposomon hata on: Ahu pajongjongkon di ho sada bagas. Ala ni umbahen
naung marhasonangan roha ni naposomon manangiangkon tu Ho tangiang on.
28 On pe, ale Tuhan Jahowa! Ho sandiri do Debata, jala hasintongan do angka
hatam, jala nunga diparbagabaga Ho tu naposomon hata na denggan on.
29 Antong pungka ma nuaeng mamasumasu pinompar ni naposomon, asa hot
di adopanmu nasida ro di salelenglelengna; ai Ho sandiri, ale Jahowa
marbagabagahon, jala marhite sian pasupasum dapotan pasupasu pinompar
ni naposomon ro di salelenglelengna.

16. BE No. 585: 1… “SOMBA MA JAHOWA” BL. 585

Pelean Khusus Patumonaan na niula marhite Amplop Pesta Gotilon 2023
1. Somba ma Jahowa Debatanta: Amen Haleluya
 Sigomgom langit tano on ro diisina: Amen Haleluya
Beta hita lao, marsinggang tu joloNa: Amen Haleluya
Na songkal jala na badia do Jahowa: Amen Haleluya
:,: endehon Amen haleluya, endehon Amen haleluya
endehon Amen haleluya, endehon Amen haleluya :,:
--- intro ---
2. Puji ma Jahowa Debatanta, Amen Haleluya
Parasi roha na sumurung do Ibana, Amen Haleluya
Taendehon ma goar ni Debatanta, Amen Haleluya
Alani denggan ni basaNa tu hita, Amen Haleluya.
:,: endehon Amen haleluya, endehon Amen haleluya
endehon Amen haleluya, endehon Amen haleluya :,:
--- holan musik ---
3. Sangap di Jahowa Debatanta, Amen Haleluya
Na bonar jala marmulia do Jahowa, Amen Haleluya
Tapatimbul ma goar ni Debatanta, Amen Haleluya
Na tigor jala na sun gogo salelengna, Amen Haleluya
:,: endehon Amen haleluya, endehon Amen haleluya
endehon Amen haleluya, endehon Amen haleluya :,:
17. Tangiang Pelean… (Huria Jongjong)
Marende BE No. 204: 2 Nasa na nilehonMi tondi ro di pamatangku;
hosa dohot gogongki ro di saluhut artangku;
hupasahat i tu Ho na so unsatonku do.
18. Tangiang Pesta Gotilon + Tangiang Ale Amanami…
P : Ale Tuhan Debata, Amanami Pardengganbasa na sumurung! Na ro do hami tu
joloM mamboan pujipujian dohot olopolop. Mauliate rohanami ala dipasupasu Ho
na huula hami, gabe jumpang hami parbue sian na niula ni tangannami.
A : Marlas ni roha hami nuaeng mangalehon silehonlehonnami na denggan tu Ho.
Na laho pasangaphon Ho do hami, ala ni pangaramotiM di hami dohot di angka
ulaon na huula hami jala malua hami dibahen Ho sian ragam ni parmaraan.
P : Na hurang tama do hami nian manjalo asi ni rohaM na godang i, ala jotjot hulaosi
hami parentaM. Sai sesa ma dosanami, jala unang jujur pambahenannami i. Sai
togu ma hami marhitehite silehon-lehonMi, asa lam hupauba hami roha na so
hasea, jala huihuthon hami Jesus Kristus, Tuhannami.
I : Sai buhai ma rohanami marhitehite TondiM, asa hutanda hami godang ni silehon-
lehonMu tu hami asa lam girgir hami mandok mauliate. Sai urupi ma angka na

pogos dohot na dangol, unang loas mate anturaparon manang ise na manghabiari
Ho.
P : Sai tatap ma na haleonon jala suru pangurupi tu nasida. Sai apoi ma angka na
 mora, na duma, asa dilehon tu angka na hurangan. Sai pasupasu ma HataM tu
rohanami, ai i do hangoluan ni tondinami. Sai paingot hami di ujung ni
langkanami, asa unang holan hangoluan di tano on hulului hami, alai togutogu ma
hami, asa hupareak hami hangoluan dohot arta na so olo suda, silehononMu tu
hami. Sai pasupasu na manggomgomi hami dohot panguhum, ro di angka raja, asa
tigor uhumnasida jala asa diuluhonnasida parripena i tu angka ulaon na denggan.
H : Sai paringgas hami mulaulaon, ai patikMu hian do i, asa lam moru bilangan ni
angka na jungkat jala lam tu toropna parasiroha, na pasangaphon Ho.
P : Sai boan ma hami sian rura hasusaan on tu lambungMu, marhitehite Jesus Kristus,
Tuhannami. Amen. Ale Amanami na di banua ginjang…
H : (mangendehon BE No. 841: 1) Ai Ho do nampuna harajaon dohot hagogoon,
ro di hasangapon salelengnilelengna. Amen.
19. Pasupasu: (mangendehon BE No. 845) AMEN… AMEN… AMEN

ACARA PERAYAAN & HIBURAN

Tortor
Lelang
Sumbangan Lagu
Makan Bersama
Lain-Lain