PARTORDING NI PARMINGGUON

MINGGU IX DUNG TRINITATIS

 Ev: Mateus 14: 13 – 21  Ep: Parjamita 3: 11 – 15

TOPIK:
“SILEHONLEHON NI DEBATA DO SIPANGANON DOHOT SIINUMON”

HURIA KRISTEN BATAK PROTESTAN

MINGGU, 06 AGUSTUS 2023

1
1. Marende BE. HKBP No. 114: 1 – 3 “Ale Jahowa Debata” BL. 212
♫
Ale Jahowa Debata! Sai tatap hami on. Ai masiboan dosana be do hami tu
joloM. Asi rohaM di hami be, sai sesa dosa i sude, marhite Jesus AnakMi,
na mate di hau silang i; di Golgata, di dolok Golgata.
♫
O Jesus, haholongan i sai tatap hami on. Ho pangondingannami i, ondingi
hami on. Sai unang mago hami be, ai na tinobusMi sude. Taluhon ma
sibolis i, ai na jorbut parulan nii, Pangolu be ma hami on sude.
…………Musik…………Ruas Jongjong………..
♫
Ho, Tondi Parbadia i sai tatap hami on. Lopokhon haholongonMi tu
rohanami on. Pasada rohanami be, patiur tondinami pe, lao mangihuthon
dasdasMi, manghasiholi sondang ni Parholong i, Pardenggan basa i.

2. VOTUM – INTROITUS – TANGIANG:

U : Marhitehite Goar ni Debata Ama, dohot Goar ni AnakNa Tuhan Jesus
Kristus, dohot Goar ni Tondi Parbadia na tumompa langit dohot tano on.
Amen. Ingkon songon i do HatangKu na ruar sian pamanganKu: Ndang
mulak boti tu Ahu, ingkon bahenonna do lomo ni rohangKu, jala ingkon
manjadi do umbahen na Hutongos. O sude hamu, angka na mauas, ro ma
hamu tu aek! Jala hamu angka na so marhepeng, ro ma hamu manuhor
dohot manganhon! Sai ro ma hamu manuhor anggur dohot susu, unang
pola marhepeng manang marpanuhor. Sai lului hamu ma Jahowa, binsan
tarbahen dope jumpang Ibana, jou hamu ma Ibana binsan jonok dope
Ibana. Haleluya!
H : (Mangendehon): BE. HKBP No. 852 : 1 “HALELUYA HKBP (3x)”
BL. 852
Haleluya, Haleluya, Haleluya.
U : Martangiang ma hita! Ale Tuhan Debata, Pargogo na so hatudosan jala
Parasiroha na sumurung! Dipangido rohaM, naeng mangolu jala martua
hami sogot; nunga ragam dalanna dibahen Ho manungguli rohanami, asa
hutanda hami hatuaon sogot. Dibahen i hupaserep hami ma nuaeng
rohanami mangido sian Ho: Sai lehon ma TondiM na badia i tu hami, asa
porsea hami di holong ni rohaM di hami. Sai hutangihon hami ma
soaraM, na mangapoi hami di tingki parasirohaon nuaeng, asa sampan
hami tu hangoluan, na pinaradeMi di hami marhitehite Tuhan Jesus
Kristus, Tuhannami. Amen.
( Hundul )

2
3. Marende BE. HKBP No. 186: 1 - 2 “Jahowa do Haposanhi” BL. 173
♫
Jahowa do haposanhi, na mangapoi rohangku, na patiurhon dalanhi,
bulus dibaen langkangku. Sonang tongtong rohangkinon binaen ni
Debatangku, patikNa do lomongku.
♫
Na tau haposan situtu do Ho, O Debatangku. Ai Ho do na tongtong burju
mambaen hangoluanhu. Na gogo Ho; Sai tulus do sinangkap ni rohaMu,
Pasaut na pinungkaMu.

4. PATIK:
U : Tangihon hamu ma (Tatangihon ma) Patik ni Debata di Minggu IX Dung
Trinitatis sadari on, ima ayat bulanan bulan Agustus, na tarsurat di
Psalmen 107: 3, Ingkon pujionnasida ma Jahowa ala asi ni rohaNa,
dohot halongangan angka na binahenNa i tu jolma manisia.
Ima sahatna. Antong, rap mangido gogo ma hita sian Tuhan Debata.

U+H: Ale Tuhan Debata sai pargogoi ma hami mangulahon na hombar tu

PatikMi. Amen.
5. Marende BE. HKBP No. 688 : 1 – 2 “Tuhan” BL. 688
♫
Tuhan jotjot do marsak donganhi ala na sala pambahenanhi.
Hatangku, langka nang parulanhi, jora ma au.
………..Ruas Jongjong………..
♫
Panghulingki pe tupa so une, mambaen jut roha ni donganhu pe.
Pingkiran, hata na hurang ture, jora ma au.

6. MANOPOTI DOSA:
U : Tatopoti ma dosanta martangiang ma hita! Ale Tuhan Debata,
Pargogo na so hatudosan, Parasiroha na sumurung, Ama ni Tuhan Jesus
Kristus Sipangolu hami! Hami, halak pardosa na dangol on ro tu jolo ni
habangsa habadiaonMi manopoti jala manganggukhon dosanami. Mansai
jotjot huarsahi hami Ho marhitehite pingkiran dohot hata dohot
pambahenannami na roa i. Ndang huhaholongi hami Ho sian nasa
rohanami dohot nasa ateatenami dohot nasa tondinami dohot nasa
gogonami; nang dongannami, ndang doshon dirinami hubahen hami.
Dibahen i tama do rimasanMu jala uhumanMu hami tu hamatean
saleleng ni lelengna i. Alai na maporus ma hami nuaeng tu asi ni rohaM
na godang i mangido sian nasa rohanami hasesaan ni dosanami

3
 saluhutna. Sai urupi ma hami paubahon rohanami ala ni Tuhan Jesus
Kristus, Anak haholongan ni rohaM, Sipangolu hami dohot ala ni
GoarMu na badia i. Ale Tuhan, sai asi ma rohaM di hami halak na dangol
on! Amen.

Bagabaga ni Debata taringot tu hasesaan ni dosa! Adong do di hita

sintua ni malim na songon i, na hundul di siamun ni habangsa ni
hatongamon di banua ginjang. Dibahen i tarbahen Ibana do pangoluhon
ro di ujungna angka na sandok ro tu Debata marhitehite Ibana; na
mangolu do Ibana tongtong, asa ditangianghonnasida. Hasangapon ma di
Debata na di ginjang!

U+H : Amen! (Hundul………)

7. Marende BE. HKBP No. 693 : 1 – 2 “Jesus do Tuhan” BL. 693

♫
Jesus do Tuhanhu Sihophop au on, Ibana do haposanhi.
TanganNa na gogo manogu au on, patogu au di langkangki.
Ref.: Tuhanhu tongtong sumarihon au on,
martua sonang tondingkon.
Holong ni rohaNa pahisar au on,
:,:mardame tongtong rohangkon.:,:
♫
Jesus do Tuhan Siramoti au on, na margogoihon diringkon.
Nang gok parungkilon, godang na tinaon, sabam do dibaen rohangkon.
Ref.: Tuhanhu tongtong…

8. E P I S T E L:
U : Turpuk Epistel di Minggu IX Dung Trinitatis sadari on i ma na tarsurat di
Parjamita 3: 11 – 15, Tajaha ma marsingkatsoring: Alai anggo Ibana
denggan do saluhutna i dibahen di tingki halehetanna; ditompahon do
huhut roha hangoluan salelenglelengna tu bagasan rohanasida, holan na
so dapot jolma i sulingkitonna jadijadian na jinadihon ni Debata sian
mulamula sahat ro di ujung.
H: Dibahen i nunga tung hutanda, ndang adong na dumenggan di
nasida, nda na marlas ni roha dohot na mambahen na denggan
saleleng di ngoluna.

4
 U: Angkup ni tahe manang ise jolma na mangan dohot na minum dohot
marnida na denggan marhite sian ulaonna, silehonlehon ni Debata do
nang i.
H: Nunga tung tangkas huboto, luhut na binahen ni Debata, i do na hot
ro di salelenglelengna; ndang tarbahen jolma i manambai tusi,
manang mangorui sian i, dibahen Debata pe songon i, asa mabiar
jolma i mida Ibana.
U: Manang aha na masa nuaeng, naung dung masa do i, jala manang aha na
masa sogot pe, naung dung masa do i di na robi; ai diulahi Debata do
mangalului naung salpu i. I do sahatna. Martua do angka na
tumangihon Hata ni Debata jala na umpeopsa.

U + H: Amen.

9. Marende BE. HKBP No. 10 : 2 - 3 “Hupuji hupasangap Ho” BL. 128

♫
Saluhut na tinompaMi naeng sonang di rohaMu. Arian dohot borngin pe
disarihon rohaMu. Nang uhum digomgomanMi, na tigor, na sintong do i.
pinuji ma GoarMu.
♫
Ndang dung tartading bangsoMi, naung pinillitMu jolo. Sai Ho do
haporusan ni sude na ro, na olo. Ditogu Ho do sasude, asa tu hangoluan
be; pinuji ma GoarMu.

10. MANGHATINDANGHON HAPORSEAON:

U : Tahatindanghon ma haporseaonta i, songon na hinatindanghon ni
donganta sahaporseaon di sandok portibi on. Rap ma hita mandok!
H : Ahu porsea di Debata Jahowa... d.u
(Hundul)
11. TINGTING:

12. Marende BE. HKBP No. 512 : 1 .... “Didalani Jesus tano” BL. 352
(Pelean Ia, Ib)
♫
Didalani Jesus tano dohot laut, tahi holong ni rohaNa di pasaut.
Na mura luhut dibaen TondiNa i, dung disesa utang ni dosanta i.
Hahaanggi, ro hamu sude, taarahon ma donganta be. Hahaanggi dao
nang jonok be; hara tu joloNa donganmu sude.
5
 ♫
Nunga monang di jabum hataNa i, hata i dipangke ho sinjatami?
Ido hapistaran na sumurung i, jumpang do mura sudena baenon ni i.
Refr. Hahaanggi ...
………..Musik………….
♫
Dongan, pinalua ni Tuhanta i, taondingi, taapoi na lilu i.
Asa lam dame luatta, lam ture, itahaholongi ma donganta be.
Refr. Hahaanggi ...
♫
Ganggu roha mida pangunjunan i, moru pe gogonta lao marungkil i.
Sai tabereng dompak Jesus Tuhan i, ganda hiras ni rohanta baenon nii.
Refr. Hahaanggi ...
…………Musik…………
♫
Tung na sae do halalas ni rohangki, anggo mulak tu Tuhanhu dongan i.
Rap tapuji ma Tuhanta Jesus i, ala tamba muse na tu surgo i.
Refr. Hahaanggi ...

13. JAMITA: Mateus 14: 13 – 21 “Silehonlehon ni Debata do sipanganon

dohot siinumon”

14. Marende BE. HKBP No. 759: 1.... “Jahowa Siparmahan au” BL. 759
(Pelean II)

♪ Jahowa Siparmahan au, ndang na hurangan au. Tongon dibaen na

lomak i, pangolu tondingki.
♪ Ditogu au tu na tio, aek hangoluan i> Dibaen do tondingki sio, di
hasonangan i.
…………Musik………..
♪ Sai dipasabam rohangki, di togu tondingki; Tu dalan hatigoran i, ala
GoarNa i.
♪ Di rura hamatean pe, ndang be mabiar au. Ai disondangi do sude,
sonang mardalan au.
………….Musik………….
♪ Batahi dohot tungkotMi do mangapuli au. Di dalan sidalananki Ho
mandongani au.
♪ Rade dibaen Ho meja i gok panginumanki. Ho mamiahi ulungki, diida
musungki.
………….Musik………..

6
 ♪ Tongtong do denggan basaM i, jambar ni ngolungki. Bongot ma au tu
bagasMi dung suda bohalhi.
15. Tangiang Pelean – Tangiang Ale Amanami - Tangiang Pasupasu:
(Jongjong)
U : Tatangianghon ma peleanta! Ale Debata, Amanami na di banua ginjang!
Ho do haroroan ni saluhut silehonlehon na denggan dohot nasa ulibasa na
mauliutus. Hupasahat hami ma sian na nilehonMi tu hami, peleannami tu
Ho. Sai jalo ma i gabe uap na hushus di joloM. Pasupasu ma i jala ramoti
asa huparhaseang hami pelean on, patimbulhon harajaonMu di
tongatonga ni huriaM dohot di portibi on. Buhai ma rohanami
marhitehite TondiM, asa lam hutanda hami godang ni silehonlehonMi tu
hami, asa lam girgir hami mandok mauliate tu Ho, marhitehite Jesus
Kristus Tuhannami. Amen.

H : (Mangendehon) BE. HKBP No. 204 : 2 “NDANG TADINGHONONHU

HO” BL. 73
♫♪♫
Nasa na nilehonMi, tondi ro di pamatanghu. Hosa dohot gogongki,
ro di saluhut artangku. Hupasahat i tu Ho, na so unsatonhu do.

U : Ale Amanami na di banua ginjang! Sai pinarbadia ma GoarMu! Sai ro ma

harajaonMu! Sai saut ma lomo ni rohaM di banua tonga on songon na di
banua ginjang! Lehon ma tu hami sadari on hangoluan siapari! Sesa ma
dosanami songon panesanami di dosa ni dongan na mardosa tu hami!
Unang hami togihon tu pangunjunan! Palua ma hami sian pangago!

H : (Mangendehon): BE. HKBP No. 841 : 1 “Ai Ho Do Nampuna

Harajaon” BL. 841
♫♪♫
Ai Ho do nampuna harajaon, dohot hagogoon, ro di hasangapon,
saleleng ni lelengna. Amen.

U : Tangiang Pasupasu.

H : (Mangendehon ) BE. No. 845 : 1 “Amen (3x) HKBP” BL. 845

Amen, Amen, Amen.