ACARA PARNINGOTAN HAMAMATE NI TUHAN JESUS

HKBP RESORT MEDAN LABUHAN

Jumat, 14 April 2006

1. Joujou tu partangiangan
U Horas ma di hamu saluhutna, amanami, inanami suang songoni nang
angka ianakhonnami remaja dohot naposo bulung, Pesta parningotan
Ari hamamate ni Tuhanta Jesus do sadarion, manang somal digoari
dohot pandohan “Jumat Agung”, ai di ari sadarion ma naeng tangkas
muse panotnotanta sitaonon ni Tuhanta i. Alani tapasonang ma
rohanta;
SL Pamuhai; B.E. Suplemen No. 566 ; 1 “Na badia” D = do Santo
santo santo, micorazon teadora, micorazon tesa bedesir, santo eres
senor.
H Na badia do Ho, dipuji rohangkon do, diboto rohangkon do mandok,
badia do Ho.
U Ari na badia do ari “Jumat” sadarion di sandok halak Kristen na di
portibi on, di namarsitaonon Ibana, jala sahat tu hamatean, hapaeton
dohot haberniton do na tinaonNa alani hita saluhutna, antong uhirhon
ma tu roham, sitaonon ni Tuhanta i, ihuthon ma hata ni ende on di
bagasan roham; B.E. No. 412 ; 1 “Ndi di dolok adui” BL. 387
SL Ndi di dolok adui, silang ni Tuhan i, sap mudar sap tijur do i, Jesus
mate disi, asa malum dibaen sude angka gondok roha i,
H dibaen i tung holong rohangki, mida silang di golgatha i, hupasahat
diringku tusi, dompak surgo pardalananki.
U Tapahibul ma rohanta paihutihut liturgi Parningotan Hamamate ni
Tuhan Jesus sadarion, anggiat digohi Tondi ni Tuhanta hita laho
marparange na lam tu dengganna tu joloan on.
2. Marende No. 81 ; 1 + 3 “Aha ma endehononku” BL.
185
 Jesus mual ni ngolungku, sipangolu tondingki, ai dibunu Ho
musungku, ima hamatean i. Ho manaoni hamagoan, patupahon
hangoluan, alani hupuji Ho, tung marribuhali do (jongjong)
 Bugang sada tanggurungMu dina hona linsing i. hamamalum ni
bugangku na di rohangki do i. Ho do gabe binuraan, au dapotan
hangoluan, alani hupuji Ho tung marribu hali do.
3. Votum / Introitus / Tangiang
U Marhitehite Goar ni Debata Ama, dohot Goar ni AnakNa Tuhan Jesus
Kristus, dohot Goar ni Tondi Porbadia, natumompa langit dohot tano
on. Amen.
H Na gabe pangoloi do Kristus paima mate, pola tung mate tarsilang.
Didia angka soropmi ale hamatean ? Didia pangagoonmu ale banua
toru ?
 U Sintua ni malim na songoni do tama di hita, na so jahat, na so
marlindang, na so marbolat sian angka pardosa, naung gabe tumimbo
sian angka banua ginjang, na so pola ganup ari songon angka sintua
ni malim i, mamboan pelean hasesaan ni dosa. Haleluya.
H Mangendehon; Haleluya,,,,,,,,,,Haleluya,,,,,,,,Haleluya,,,,,,,,
U Martangiang ma hita; Ale Tuhan Jesus, na mate tarsilang do Ho
humophop hami halak pardosa, ala ni holong ni rohaM na godang i di
hami, ajari ma hami paingotingot Ho,
H Ho do haporusannami maradophon rimas ni Debata dohot panoruion
ni patik dohot panolsolion ni roha.
U Pargogoi ma hami maralohon nasa roha sibuk, dohot hisaphisap nang
sangkapsangkap na roa. Marhitehite Tuhan Jesus Kristus Tuhannami.
Amen. (hundul ma hita)
4. Marende No. 77 ; 1 “Hamu saluhut halak” BL. 65
 Hamu saluhut halak ro ma hamu manatap hangoluanmu on, na
gantung di parsilang, tumahan hamatean, naeng ingotonmu i
tongtong.
5. Patik ; 1 Korint 1 ; 18
U Patik ni Debata di Pesta parningotan ari hamamate ni Tuhan Jesus
sadarion, ima na tarsurat di 1 Korint 1 ; 18, songonon ma hatana.
H Ai haotoon do hata na taringot tu silang i, di roha ni angka na laho
mago, alai hagogoon ni Debata do i di hita na dapotan haluaon.
U Ima sahatna, antong rap mangido gogo ma hita tu Tuhan Debata, laho
mangulahon patikNa i.
H Ale Tuhan Debata, sai pargogoi ma hami, mangulahon na hombar tu
patikMi. Amen.
6. Marende No. 319 ; 2 - 3 “Sai tiop ma tanganku” BL. 150
 Sai sesa nasa dosa ale Amang, Ho na marholong roha, asi rohaM,
paias ma rohangku na ramun i, pagirgir au mamuji Ho Tuhanki.
(jongjong)
7. Agenda Manopoti Dosa;
U Nunga jongjong hita nuaeng paadopadop Tuhanta na tarsilang i, tatap
ma bohi ni Tuhanta na sai marsinondang na sailaon, nuaeng nunga
mardangol, ndang marsahala be, nunga tudos tu bohi ni na hona bura,
ida ma sungsang duri na dilohothon tu simajujung ni Tuhanmi, jala
tiris mudar panghophopon sian pamatangNa, alani unang be datdati
mardosa, pajonok ma tu Tuhanta i.
H O Tuhan Jesus…birubiru ni Debata na tarsilang i,,,,,,,,, asi ma rohaM
di ahu, jala sesa ma dosangku na godang i, asa mangolu ahu di Ho.
SL Mangendehon; B.E. No 174 ; 3 “Torop dope na siat i” BL. 184
(satonga soara) “Pardosa ho didok roham, na so tama be dohot, dang
pola ala ni dosam umbaen na sundat bongot, ai nunga sae do dosami,
digarar Tuhan Jesus i. naung sae, naung sae, naung sae do dosami.
 U Parasi roha jala parholong roha do Tuhanta i, alani dihaporseai roham
do naung disesa mudar ni Jesus i saluhutna dosam ?
H Tung dihaporseai rohangku do mudar ni Jesus na durus di hau na
pinarsilang i, gabe haluaonku.
U Antong ala naung sesa dosanta dibaen Tuhanta i, tapuji jala
tapasangap ma Ibana olat ni on ro di salelenglelengna.
H Hasangapon ma di Debata na di ginjang. Amen. (hundul ma hita)
8. Marende No. 78 ; 4 “O ulu na sap mudar” BL. 158
 Ai Ho do siparmahan, au pinarmahanMi, sai Ho do haroroan ni
hatuaonki, sai Ho do haolhaolonku marningot bugangMi, sai Ho do
tioponku, marningot mudarMi.
9. Epistel ; Heber 9 ; 15 - 28
U Hata ni Debata turpuk Epistel di hita di Pesta parningotan ari
hamamate ni Tuhan Jesus sadarion, ima na tarsurat di Heber 9 ; 15 -
28, songonon ma didok disi;
H Jadi alani on, umbahen na gabe pangulu di padan na imbaru Ibana,
asa dijalo angka na tarjou i bagabaga i, ima siteanon na so olo muba i,
dung jolo adong na mate laho pasaehon angka pangalaosion, uju di
padan na parjolo i.
SL Ai anggo adong padan testament, ingkon tandap mate sibahen
testament i. ai dung pe mate halak i, asa hot testament i. ai nda tung
margogo i saleleng mangolu dope na mambahensa. Ai nang padan na
parjolo i, marhitehite mudar do i dipasahat.
A Ai dung dihatahon si Musa tu sandok natorop i, nasa tona
mangihuthon patik i, dibuat ma mudar ni anak ni lombu dohot
hambing randuk mardongan aek, hapas na rara dohot limut isop,
dipispisi ma pustaha i sandiri ro di sandok natorop i.
U Huhut ma didok; on ma mudar ni padan na niaturhon ni Debata tu
hamu, laos songoni ma dipispishon mudar i tu joro i, dohot tu saluhut
ulaula na badia i.
H Jala hira saluhutna do diurasi marhitehite mudar mangihuthon patik i,
jala holan marhitehite na mandurushon mudar tulus hasesaan.
I Asa ingkon songon i do diurasi natiniru sian na di banua ginjang i,
alai na di banua ginjang i hian, marhite sian pelean na ummangat do.
H Ai ndada bongot Kristus tu bagasan na badia na pinauli ni tangan,
gombaran na sintong i, tung tu bagasan banua ginjang sandiri do, laho
patuduhon dirina nuaeng di adopan ni Debata, humophop hita.
U Ndada laho mamelehon dirina jotjot songon sintua ni malim i, na
mambongoti na badia i jojor taon marhitehite mudar ni na leban, aut i,
ingkon jotjot ma Ibana marsitaonon olat ni haoojak ni hasiangan on,
alai sahali do gabe patar Ibana di ujung ni angka ari on, laho
pasohothon dosa i, binahen ni na pinelehonna i dirina.
N Songon na ampe tu jolma mate sahali, dung i uhum i. songon i do
nang Kristus, naung sahali dipasahat, laho mamorsan dosa ni natorop
 i, alai paduahalihon ndada alani dosa, tarida ma Ibana disi, mantat
haluaon di angka na paimaimahon Ibana.
U Ima sahatna, martua ma angka na tumangihon hata ni Debata jala na
umpeopsa.
H Amen.
10. Marende No. 84 ; 3 “Aut na ginorga tu rohangku” BL. 195
 Mauliate ma rohangku di Ho o Jesus Tuhanki, Ho naeng tongtong
haholonganku, marningot denggan basaMi, antong sai tiop ma
tanganku, manogu au tu lambungMi, dijalo Ho do tangiangku, sai pos
do rohangku disi. (jongjong)
11. M. Haporseaon;
U Tahatindanghon ma haporseaonta i, songon na hinatindanghon ni
donganta sahaporseaon di sandok portibi on, rap ma hita
manghatindanghonsa;
H Ahu porsea…………………………dst (hundul ma hita)
12. Tingting
13. Marende No. 86 ; 1…..P.P. “Silang na badia i” BL. 67
 Silang na badia i, Ho do lombulombungki, maralohon dosa i, dohot
pandelean i, di sude sitaonon i Ho do lombulombungki.
SL Nasa na hula i, dang tau hasonanganki, nang ringkot pe rohangki,
pola ro nang ilungki, holan asi ni rohaM, pangurupi o Tuhan.
 O R G A N
 Ro do au nuaeng tu Ho, sai palambas ma rohaM, nunga pola mate Ho,
ala asi ni rohaM, jangkon au na dangol on, sai ulosi tondingkon.
SL Dosa patundukhon au, Ho ma mangondihon au, ramun situtu do au,
mudarMi mamuri au, na pogos dangol au on, Ho ma artangki
tongtong.
 O R G A N
 Silang na badia i, Ho do lombulombungki, molo puas hodokki, dina
suda bohalhi, di sude sitaonon i, Ho ma lombulombungki.
14. Jamita ; Johannes 19 ; 16 - 30
15. Marende No. 88 ; 1……..P.P. “Di surgo do alealenta” BL. 106
SL Jesusku naung manobus ahu, sai naeng haholonganku Ho, tu dolok
golgatha Ho laho, nionjar ni holongMu do, hupuji nasa asiMi, alai
gumodang holongMi.
 Tarsolsol bagi do rohangku, paidaida dangolMi, marningot sasude
dosangku ai i do na tinaonMi, hupuji nasa asiMi, alai gumodang
holongMi.
 O R G A N
SL Jotjotna i husoadahon Ho, sipangolu tondingkon, mabiar lao
manghatindanghon Ho, na manghophop au tongon, hupuji nasa
asiMi, alai gumodang holongMi.
  Bagas uhirhon tu rohangku, panghophopMi humophop au, tusi ma
togu pingkiranku, guru di Ho sambing ma au, hupuji nasa asiMi, alai
gumodang holongMi.
 O R G A N
16. Tangiang Panutup
17. Tona tu ngolu siganup ari
U Nunga mate Kristus humophop ahu dohot hamu, tung unang ma
magopo sitaonon ni Tuhanta i di hita, parade ma roham mangadopi
parungkilon, molo tung diloas Tuhanta i masa tu bagasan ngolum,
lam mangarade ma hita mangadopi ujung ni ngolunta, jala sai lam
tapasabam ma rohanta tu joloan on.
SL Mangendehon Suplemen No. 836 ; 1 “Nunga loja au o Tuhan” F
Nunga loja au o Tuhan, di siulubalang ari, naeng tumibu au
pajumpang, rap dohot Ho di surgo i, nunga bot mataniari, lam jonok
nang ajalhi, nunga loja au o Tuhan, rade ma baen ingananki.
U Situtu do hatangkon tu hamu; “Sadarion do ho rap dohot Ahu di
Paradeiso”
H Mangendehon; “Nang pe naung hudai hubolus hamoraon hagabeon,
songon ombun na mamolus sude do tinggal ambolong, aha ma
tarboan ahu, lobi sian uloshi, nunga loja au o Tuhan, rade ma baeng
ingananki.
U Tangiang Pelean (bereng agenda).