I.

PATANDAHON SINTUA
Marende No. 156: 4 “Jahowa Tuhanki”
(Tingki marende hita, Jongjong ma angka Sintua nanaeng Patandahononton
Tohonan mangadop langgatan dohot keluarga,)
Sai tatap ma dison, O Jesus siseanMu. Najongjong di joloM, mangido
lehononMu. Tu ganup tondiMi, nang huasona pe. Manogu bangsoMi,
nang mangajari pe.
Pandita Resort : Mamungka na di ari Minggu 18 September 2022, dijangkon hurianta
ma gabe sintua ima inanta St. Nurliana Br. Silalahi / Bernard Hasiholan Nainggolan
na ro sian HKBP Sei Meranti Afdeling 2 Resort Bagan Batu Kota. Dung adong
pangidoan sian sektor 03 dohot adong panimbangion ni sude parhalado partohonan,
alani i gabe sintua ma nasida di hurianta on, ima di sektor 03. Jala patandahonon
nasida ma hadirion nasida tu Hurianta
St Nurliana Br Silalahi/Kel : Patandahon diri tu Huria
Pandita Resort: Hamuna dongan sahuria di HKBP Kisaran Kota on, jangkon
hamu ma nasida dibagasan dame. Sude ma hita on manggogo tumangianghon
nasida, asa manjadi ulaonnasida i, huhut manghorhon hasangapon ni Tuhanta
Jesus Kristus Raja ni Huria i.
Panjangkonon ni Huria: Huria Mandok
Hujangkon hami ma tutu nasida gabe Parhalado di Huria ni Tuhanta dibagasan
holong dohot dame na sian Tuhanta i.
Pdt Resort Martangiang ma hita : Ale Tuhan Debata Amanami na di banua
ginjang! Mauliate ma rohanami tu Ho ala ni asi ni rohaM di angka dongannami on.
Sai tambai ma tu rohanasida angka silehonlehon ni Tondi Parbadia, asa lam marroha
jala margogo nasida Ulaon Panghobasioni. Asi ma rohaM dohot di sude ruas ni
HuriaM on, asa lam hot haporseaonnasida be, jala lam ture parange nasida
mangihuthon Ho. Sungguli ma rohanami asa masihaholongan, unang adong
sipinsangon di hami, asa lam rarat harajaonMu, jala marmulia goarMu nabadia i.
Amen.
II. PABORHATHON SINTUA MAMONGOTI MASA PANGSIUN:
01.   Marende No. 15 : 1         “Aut na saribu hali ganda”  
(ro ma tu jolo Sintu na naeng pensiun rap dohot keluarga)
Aut na saribu hali ganda saringar ni soarangki, naeng nasa gogo bahenonku
mamuji Debatantai. Paboa las ni rohangki hinorhon ni pambaenNa i.

1
 ( Ro ma sude Parhalado Partohonan tu Langgatan marhaliang tondonghon ni
Pandita )
Pandita Resort : Hamu dongan sahuria na pungu di bagas joro on, nuaeng jongjong do
ditongatonganta ima Amanta  St. Drs Wasman Sitohang. Nunga digohi tingki
pangulaon nasida di hurianta. Na mansohot ma nasida nuaeng sian
haparhaladoon di huria i. Alani i tama do pasahatonta hamauliateon ni rohanta tu
Tuhanta na mandongani jala  margogoihon, huhut napatauhon nasida salelengon
mangulahon haparhaladoon i. Angkup ni une do pasahatonta mauliate nang tu
nasida naung manghalojahon, jala mangharonsothon mangulahon ulaon di
hurianta. Alani i paborhatonta ma nasida nuaeng laho mamongoti masa pangsiun.
Hamu dongan nami St. Drs Wasman Sitohang. hombar tu Aturan dohot
Peraturan ni HKBP, nunga digohi hamu panjouon na sahat tu hamu marhobas di
huria i. Na mandok mauliate do huria on tu Tuhanta na patauhon hamu marhobas
hombar tu tohonan na sahat tu hamu. Nunga digohi hamu pangoloionmuna
marhite panghobasion tohonan Sintua. Dipasahat hamu do napinangido ni hata ni
Tuhanta na mandok:”Sahat ula Tohonanmi”. Na tama do hamauliatehonon ni
hurianta siala  pangulaonmuna na saleleng on di Tuhanta, anggiat parbue ni na
hinobasanmuna na saleleng on di jolo ni Tuhanta gabe pelean na hushus jala
mamboan pasu-pasu tu hagaganda ni na porsea dohot hatotogu ni haporseaon di
angka  na hinobasanmuna .
Alani i; jongjong ma hita sahuriaon martangiang tu Tuhanta (Jongjong
Huria):
Ale Debatanami, na gok asi dohot holong ni roha, ro do hami tu adopanMu laho
pasahathon hamauliateon ni rohanami siala pangurupionMu di naposoM on
saleleng diparar Ho manghobasi huriaM. Nunga sahat diula ulaon ha-Sintuaon na
pinasahatMi: Sai baen ma ramos parbue ni panghobasion nasida di  ruas ni
HuriaM tu hangoluan salelengna. Nang naposoM pe sai asi ma rohaM ramoti ma
nasida, lam ramoti ma nasida dung mamungka pensiun sian panghobasionna
songon sahalak Sintua. Molo tung dijalo pensiun sian ha-Sintuaon, sai ramoti jala
patogu ma pos ni rohanasida  tu Ho. Palas  ma roha nasida tongtong, pahipas ma
pamatangna laho mandai hinauli ni tingki pensiun songon jolma na
marpanghilalaan, marroha jala na martondi hombar  tu lomo ni rohaM.  Togutogu
jala ramoti ma nasida di angka  ariari ni hatuatuaonna asa tongtong manaili tu
Ho, ai sian Ho do haroroan ni hadameon, las dohot sonang  ni roha di bagasan
Tondi Parbadia. Pasupasu ma nang keluarga dohot sisolhot nasida,  asa rap
2
 mangolophon jala manghamauliatehon pasupasu najinalo  nasida sian Ho.
Angkup ni i marpamuati ma rohaM di nasa hagaleon dohot hahurangan ni
dongannami on di nasa pangulaon dohot panghobasionna na sailaon, sesai ma i
ala ni  holong ni rohaM. Pinuji ma Ho  ale  Tuhan Jesus  ro  di saleleng ni
lelengna. Amen.
02.Manjaha SK  Taringot tu  Sintua Pensiun   ( Jinahahon ni Sekretaris Huria Diak
Rosmegawati Hutagaol MPd ) Dohot Barita Panghobasion
03. Paborhathon na pensiun (dijalang Pdt ma Sintua na pensiun):
Pdt Resort : Ale naposo ni Debata,  St. Drs Wasman Sitohang., mardongan pos ni
roha di Debata Ama dohot AnakNa Tuhan Jesus Kristus dohot Tondi Porbadia,
hupaborhat hami ma hamu laho pensiun sian Sintua. Dipasu pasu Tuhanta Jesus
Raja Ni Huria ima panghobasionmuna na saleleng on, jala diramoti ma hamu di
angka ari-ari di ngolumuna jala diparrohai hamu mandai hinauli ni tingki pensiun
di angka ariari sidalananmuna dope tu tingki na ro on. Amen.
Pandita Resort Pasahathon hata mauliate:
Pdt Resort : Nunga dibege hamu taringot tu Surat Ketetapan Pensiunmuna sian
hasintuaon di HKBP Kisaran Kota Resort Kisaran Distrik XIII Asahan
Labuhan Batu Antong, hamauliatehon hamu ma tu Tuhanta Pardenggan
basa i sian na sa rohamuna.
Sintua na pensiun manghamauliatehon:
Tama situtu do hami mandok mauliate tongtong tu Debata siala hamu ale
angka dongan, songon na patut, ai na ganda situtu do haporseaonmuna,
laos tamba holong ni roha ni ganup hamu sama hamu (1 Tess 1: 3).
04. Marningot ulaon panghobasion ni Parhalado naung pangsiun:
Pandita Resort: Huria ni Tuhanta, nunga saut tapatupa pensiun sian hasintuaon
nuaeng donganta dison. Tama do ojak tu rohanta Hata ni Debata na mandok:
“Huelek-elek ma hamu, ale angka dongan, tanda hamu ma angka na
manghalojahon hamu, angka na manguluhon hamu marhitehite Tuhan i, ro di
angka na paingothon hamu. Sangap situtu ma rajumi hamu nasida mardongan
holong ni roha ala ni ulaonnasida; Sai mardame ma hamu sama hamu”. Ingot
hamu ma angka na manguluhon hamu, na paboahon Hata ni Debata tu hamu,
ujung ni pardalanan nasida ma bereng hamu, jala tiru hamu ma
haporseaonnasida” (1 Tess 5: 12 – 13; Heber 13: 7).

3
Huria: I ma tutu! Huingot jala huhangoluhon hami ma Hata ni Debata na
niajarhon nasida, manghorhon las ni roha, patoguhon holong ni roha dohot
pahothon panghirimon di hami mangulahon lomo ni roha ni Tuhan i. Amen.
05. Mandok Hata Partadingan sian Sintua Na Pangsiun / Keluarga
06. Mandok Hata Borhatborhat sian Ruas / Parhalado
07. Pasahat Cinderamata tu Sintua Na Pangsiun
08. Marende No. 137: 4 “Raphon Tuhan Jesus i” BL. 164
(Ditingki marende hita mulak ma Sintua na pangsiun /Kel tu hundulanna, laos
jongjong ma hita saluhutna).
Tuhan, nang tu jolo on tatap hajolmaon. Sai pararat ma tongtong hata
haluaon. Tu na so tumanda Ho dohot Tuhan Jesus. Asa sasudena ro
mandapothon Kristus.