PATA N A K H O N H ATA N I D E B ATA

MI N GGU XVIII D U NG T R I N I TAT I S

8 OKTOBE R 2023

DIHALOMOHON JAHOWA DO
UHUM DOHOT HATIGORAN

1. Marende BE. No. 783: 1-3 “Tuhan Sitompa Saluhut”

2. Tangiang Pamuhai

3. Turpuk: Epesus 5: 15-17

4. Hatorangan

Songon angka halak na porsea tu Debata, tangkas do digurithon apostel

Paulus suratna tu huria Epesus asa mangolu Huria i di bagasan hatiuron
jala mamarangehon angka parange hatiuron. Deba sian angka parange
hatiuron i, adong ma tolu na diondolhon marhite turpuk jamita on,
naparjolo ima: ingkon ‘marroha’ jala manangkasi angka parulaonna
asa unang songon angka na hurang roha (bebal); napaduahon ima:
mamparhaseang tingki; jala napatoluhon ima: mangantusi lomo ni
roha ni Debata. Marhite na tolu pangalaho on, jumpang ma na nidokna
mangulahon uhum dohot hatigoran songon topik ni Minggu on.

Parjolo, didok tu hita asa mangolu songon angka na marroha, unang

songon na hurang roha. Lapatanna, dilehon Debata do di hita roha na
boi manirang na denggan sian na roa. Dibahen i, ingkon tapangke do
rohanta i laho marnida, manangkasi, dohot pamanathon angka ulaon na
denggan asa unang olo hita dipaotooto angka na rumar (ay.6). Diparsinta
do sian angka halak na porsea tu Debata asa mangolu songon angka
anak hatiuron marhite ulaon na denggan, asa unang dipajogal rohana
mangulahon na so denggan. Molo taula na denggan, sai gabe tiruan do
i di angka ianakhonta, keluarganta nang donganta pe, ai nunga dilehon

12
Tuhanta Jesus tiruan tu hita laho patupahon angka ulaon na denggan.

Surat Parsaoran Ina HKBP Edisi Oktober - Desember 2023

Paduahon, didok tu hita asa mamparhaseang tingki. Lapatanna, ngolunta
na terbatas on ingkon tanda jala tandi ma nian songon angka anak
hatiuron, boi tapangke partingkian ni ngolunta on, sadihari mate hita,
ndang haulahan hita be mulak tu pudi. Unang sumolsol di pudi, dung
matua hita gabe taingot angka na denggan na so taula dope, hape ndang
na boi be mundur partingkianta. Holan tingki do na so boi moru jala naso
boi mundur. Boha ma tutu hita angka inang laho mamangke partingkian
na pinasahatna tu hita i dohot denggan songon na binahen ni ‘ina
soripada’ di buku Poda bindu 31:15 i, borngin dope nunga hehe ibana laho
mansagihon sidabudabuon tu angka pangisi ni bagasna. Mansai arga do
tingki na nilehon ni Debata tu hita, apalagi molo mula ulaon hita di angka
na denggan, sai hira na hurang do partingkian i. Alai di angka na losok
(malas) sai hira na leleng do suda sadari.

Napatoluhon, didok tu hita asa mangantusi lomo ni roha ni Debata di

bagasan ngolunta. Molo tapamanat poin na parjolo dohot paduahon i,
gabe jumpang hita do lomo ni roha ni Debata, ai dihalomohon Tuhan i do
angka ulaon na denggan di ngolunta jala tapangke tingkinta mangulahon
lomo ni rohaNa. Sadalan jala saurdot do ulaon na denggan i dohot
mamangke tingki, ala tingki i gabe tapangke marhite na radot hita di
ulaon na denggan dohot ulaon asi ni roha. Boi do botoonta lomo ni roha
ni Debata di tingki martangiang hita, ala tarajumi tangiangta i mangido
hagogoon do i tu Debata laho patupahon angka ulaon na denggan. Ndang
tarpatupa hita laho mangulahon lomo ni roha ni Debata molo so tatanda
Ibana.

Umbahen i, sai jumolo ma tapasahat tangiangta tu Debata asa Ibana

mangajari hita mamangke tingkinta jala asa Ibana patuduhon dia do
siulahononta. Marhite tangiang i do tapangido bisuk sian Debata di na
laho mangulahon angka na denggan songon na tarsurat di Jakobus 1:5.
Ndang adong be hape sidalianta mandok ndang olo manang ndang sanga,
ai diparade Debata do di hita arian sampulu dua jom laho mangulahon
angka ulaonta di bagasan habisuhon na sian Tuhan i asa unang maoto
hita.

Molo denggan do tapamanat jamita on, gabe angka ina na marroha

ma hita, ndang na jogal, jugul, alai gabe angka ina soripada na pantas
marroha ma hita songon na tarsurat di Poda 31 i. Marhite jamita on, lam
tahalaputi ma angka ulaon na denggan jala taparhaseang tingki. Molo

13
 dung suda bohalta on, adong ma muse siingoton ni angka pinomparta,
Surat Parsaoran Ina HKBP Edisi Oktober - Desember 2023

paboa na tutu do hita angka Ina Kristen sipartangiang, siula lomo ni roha
ni Debata. Hinorhon ni i, gabe marsangap ma Debata, hita pe tongtong
mangolu di bagasan las ni roha laho mangihuthon Tuhan i. Amen.

5. Diskusi
1) Boha do hita laho mambagi tingki di angka ulaonta siganup ari?
2) Boha do hita mananda, manangkasi, dohot pamanathon angka
ulaon na denggan dohot ulaon na roa?
3) Piga porsen ma tingkinta patupahon parsaoran dohot Debata
ganup ari, jala piga porsen ma muse sian tingkinta i tapangke tu
ulaon na denggan ganup ari?
6. Marende BE. No. 802: 1-2 “Pangke Tingkim Saonari”

7. Tangiang Pangondianon

8. Marende BE. No. 724: 1,3 “Tuhan Baen Ma Ngolungkon”

9. Tangiang Panutup
Pdt. Santawaty Sirait, M.Th.,
Pendeta HKBP Resort Simanindo, Distrik VII Samosir

Kebersamaan Ina Marta HKBP Pangururan Kota, Resort

Pangururan Kota, Distrik VII Samosir dengan Punguan Ina
HKBP Harianboho, Resort Harianboho, Distrik VII Samosir.

14