PARTORDING NI PARMINGGUON

Dan Pemensiunan St Malanton Sitorus

DI MINGGU ROGATE
(MARTANGIANG)

 Ev: Pilippi 4 : 1 - 7  Ep: Jona 2 : 1 - 10

TOPIK :

MARTANGIANG MARDONGAN MAULIATE

HURIA KRISTEN BATAK PROTESTAN

RESORT KISARAN, HKBP HUTANAGODANG

MINGGU, 14 Mei 2023

1. Marende BE HKBP No. 815 : 1 + 3 “ULI DO TINGKI NA HOHOM” BL 815
♫♪♫
Uli do tingki na hohom di jolo ni habangsa ni
Amanghu na rade tongtong manjalo pangidoanhi
Ai di na marsak rohangki sai diapuli tondingki
Malua sian jorgong i, ditingki martangiang i.
……Jongjong) ……
♫♪♫
Uli do tingki na hohom, pasahat pangidoanhi
Tu Debata na bonar i, sitangihon tangiang i
Di na huida bohiMi porsea au dihataMi
Tompas holso ni rohangki, ditingki martangiang i.

2. VOTUM – INTROITUS – TANGIANG :

U : Marhitehite Goar ni Debata Ama, dohot Goar ni AnakNa Tuhan Jesus
Kristus, dohot Goar ni Tondi Parbadia na tumompa langit dohot tano
on. Amen. Songon on do didok Tuhan i: Pajoujouonmuna ma Ahu,
laho martangiang tu Ahu, jala tangihononKu ma hamu. Jala
luluanmuna ma Ahu laos jumpang hamu; molo tung dilului hamu Ahu
sian nasa rohamuna, jadi jumpang hamu ma Ahu.Haleluya!
H : (Mangendehon): Haleluya, Haleluya, Haleluya
U : Martangiang ma hita! Ale Tuhan Debata, Pargogo na so hatudosan!
Holan ala ni asi ni rohaM sambing do, umbahen na tarbahen hami
marpungu di joloM, marsada ni roha martangiang tu Ho.
Diparbagabaga Ho do di bagasan HataM: Molo adong dua manang
tolu halak marpungu marhitehite GoarMu, lehononMu do na
pinangidonasida. Ale Tuhan pasaut ma bagabagaMi, tangihon ma
pangidoannami, lehon ma na tau hangoluannami. Lehon ma di hami
saleleng di hasiangan on parbinotoan di hasintonganMi, dohot di
hangoluan salelenglelengna marhitehite AnakMu, Tuhan Jesus
Kristus, Tuhannami. Amen. (Hundul )

3. Marende BE No. 118 : 2 + 4 “PAIAN MA DI HAMI” BL 6

♫♪♫
Paian Tuhannami HataM di hami be
Asa martua hami, nuaeng nang sogot pe.

1
 ♫♪♫
Paian ma di hami, tongtong panumpakMi
Gandahon ma di hami, asi ni rohaMi.

4. PATIK:
U : Tangihon hamu (Tatangihon) ma Patik ni Debata na tarsurat di Judas
1 : 20 “Alai hamu, angka haholongan, pauliuli hamu ma dirimuna di
atas haporseaonmuna na badia situtu, jala martangiang di bagasan
Tondi Parbadia!”.
I ma sahatna. Antong, rap mangido gogo ma hita sian Tuhan Debata.
H : Ale Tuhan Debata sai pargogoi ma hami mangulahon na hombar
tu patikMi. Amen.

5. Marende BE No. 182 : 2 - 3 “HAHOLONGAN NA BADIA” BL 24

♫♪♫
Husolsoli do rohangku, na gok dosa i tongtong
Ai godang ariaringku, na hubahen ambolong
(Jongjong)
♫♪♫
Sai jotjot do hutadinghon, dalanMi na tigor i
Kristen au, hape hutondong dalan hamagoan i.
6. TANGIANG MANOPOTI DOSA:
U : Tatopoti ma dosanta, martangiang ma hita: Ale Tuhan Debata,
Amanami, Parasiroha na sumurung! Na pungu do hami di joloM
martangiang tu Ho; ndada mangasahon hatigorannami, na
mangasahon asi ni rohaM na godang i do. Sai asi ma rohaM mida
sandok bangsonami, sesa ma dosanami saluhutna. Sai sungguli ma
rohanami, asa muba roha dohot pangalahonami, ala ni Tuhan Jesus
Kristus Tuhannami, Sipangolu hami. Amen.
Tabege ma bagabaga taringot tu hasesaan ni dosa: Songon on do
Hata ni Tuhan Jahowa: Nunga diarsahi Ho Ahu marhite sian angka
dosam, jala nunga dilojai ho Ahu marhite sian angka hajahatonmu.
Ahu tutu, Ahu sandiri manalesei angka pangalaosim ala ni
hadirionKu, jala ndang be Hupaingotingot angka dosam. Hasangapon
ma di Debata na di ginjang!
U + H : Amen (Hundul)
7. Marende BE HKBP No. 830 : 1 “SAI PAHOHOM MA ROHANGKU” BL 830
♫♪♫
Sai pahohom ma rohangku, O Tuhan joloMi.
2
 Manangihon soaraMu patoguhon rohangki.
Haholongan na badia, gohi roha tondingki,
Naeng tangkas ma huantusi holongMi na balga i.
Ias tutu jala dame, hohom bulus do rohaMi.
Ajari au maniru i, lao pasolhothon au tu lambungMi.
Ditangihon Ho do au, di na martangiang I,
Hupangido ma tu Ho; Sai pahohom rohangki.

8. E P I S T E L:
U : Tangihon hamu (Tatangihon) ma Hata ni Debata turpuk Epistel di
Minggunta sadari on, na tarsurat di Jona 2 : 1 - 11, Dung i diparo
Jahowa ma sada ihan rea, asa di bondut si Jona. Jadi di bagasan
butuha ni ihan i ma si Jona tolu ari tolu borngin.
H : Dung i martangiang ma si Jona tu Jahowa Debatana, sian butuha
ni ihan i.
U : Jala didok ma: Joujou do ahu sian hagogotanhi tu Jahowa gabe dialusi
Ibana ahu. Sian butuha ni parbeguan ahu mangangguhi: Ditangihon
Ho do soarangki.
H : Nunga direonghon Ho ahu tu bagasan lung tu bagasan pusupusu
ni laut, gabe pusat manghaliangi ahu, sude angka ombakMi dohot
galumbangMi mangalingkupi.
U : Ianggo ahu, nunga hudok: Nunga bali ahu sian jolo ni mataM; alai
tahe ulahanhu dope mamereng dompak joro habadiaonMi.
H : Nunga nian dihaliangi angka aek i ahu, pola tos hosangku, lung i
pasampaksampak ahu sirambon do alit tu ulungku.
U : Nunga mangungkor ahu sahat tu bona ni angka dolok, ransangransang
ni tano on pe nunga tarsordak humaliang ahu ro di salelenglelengna.
Alai dipanangkok Ho ngolungku sian godung ale Jahowa Debatangku.
H : Uju mandate hosangku di bagasan, Jahowa ma huingot, jadi
sahat ma tangianghu tu Ho, tu joro ni habadiaonMi.
U : Alai halak na marsomba tu ganaganaan sipaotooto, i ma na
manadingkon hasonangannasida i.
H : Alai anggo ahu mardongan soara pujipujian ahu mamele tu Ho,
gararonhu do na huparbagabaga, Jahowa do nampuna hatuaon.”

3
 U : Dung i didok Jahowa ma tu ihan i, gabe diutahon ma si Jona tu pasir.
I do sahatna. Martua ma angka na tumangihon Hata ni Debata jala
na umpeopsa. Amen.

9. Marende BE HKBP No. 128 : 1 - 2 “DITANDA DEBATANTA” BL 162

♫♪♫
Ditanda Debatanta na di Ibana i,
Na metmet nang na balga di nasa bangso i.
Ndang mago loasonNa, nang sada sian i,
Ditogu do sudena, tu hasonangan i,
Ditogu do sudena, tu hasonangan i.
.….. (Jongjong) ……
♫♪♫
Ditanda do nasida, dibaen porsea do,
Nasida di hataNa, naung tu nasida ro.
I do hangoluanna, i do guruna i,
Laos i do sinjatana, mangalo musu i,
Laos i do sinjatana, mangalo musu i.
10. MANGHATINDANGHON HAPORSEAON:
U : Tahatindanghon ma haporseaonta i, songon na hinatindanghon ni
donganta sahaporseaon di sandok portibi on. Rap ma hita mandok!
H : Ahu Porsea di Debata Jahowa….. d.u.
(Hundul)
11. Tingting
12. Marende BE. HKBP No. 249 : 1…”NGOT MA HO O TONDINGKI”
BL 122 (Pelean Ia, Ib)
♫♪♫
Ngot ma ho, o tondingki dungo martangiang.
Asa unang musu i, tole so tinagam.
Bisuk ni setan i, do manait tu dosa, lan na bonar roha.
♫♪♫
Ngot ma ho, modom i, dibagasan dosa.
Asa unang ala ni Ho marutang hosa.
Ai hatop nang tahop, ro ma pangunjunan, tu na so managam.
------ Musik -------
♫♪♫
Dungo, ai na so tarbaen Tondi ni Jahowa,
Manorangi ho, mambaen sirang sian dosa.

4
 Ingkon do dungo ho, asa lehononNa denggan ni basaNa.
♫♪♫
Dungo, jaga rohami unang dililuhon,
Hisap ni dagingmu i, jala ditaluhon.
Ginjang ni Roha i do jumotjot ala pangalapan sala.

13. J A M I T A: Pilippi 4 : 1 - 7
14. Marende BE HKBP No. 814 : 1… “SAI AJARI AU TUHANHU” BL 814
(Pelean II)
♫♪♫
Sai ajari au Tuhanhu, di na martangiang au.
Patuduhon tu rohangku, sangkap ni rohaM di au.
Songon na binaen ni Jesus, na manaon humophop au.
Unang lomo ni rohangku, lomo ni rohaM ma saut.
♫♪♫
Nasa na mauliutus, dipatupa Ho di au.
Panolopi do tondingku, disangkapMu na tu au.
Mangauhon pambaenanMu, di na marsitaonon au.
Unang lomo ni rohangku, lomo ni rohaM ma saut.
----- Musik -----
♫♪♫
Dibagasan Ho Tuhanhu, boi marlas ni roha au.
Ho sambing haporusanhu, Ho ma paluahon au.
Pargogoi ma au Tuhanhu, ai mansai gale do au.
Unang lomo ni rohangku, lomo ni rohaM ma saut.

15. PABORHATHON SINTUA MAMONGOTI MASA PANGSIUN:

01.   Marende No. 15 : 1         “Aut na saribu hali ganda”  
(ro ma tu jolo Sintua na naeng pensiun )
 Aut na saribu hali ganda saringar ni soarangki, naeng nasa gogo bahenonku
mamuji Debatantai. Paboa las ni rohangki hinorhon ni pambaenNa i.
(Ro ma sude Parhalado Partohonan tu Langgatan marhaliang
tondonghon ni Pandita )
Pandita Resort : Hamu dongan sahuria na pungu di bagas joro on, nuaeng
jongjong do ditongatonganta ima Amanta  St. Malanton Sitorus. Nunga
digohi tingki pangulaon nasida di hurianta. Na mansohot ma nasida
nuaeng sian haparhaladoon di huria i. Alani i tama do pasahatonta
hamauliateon ni rohanta tu Tuhanta na mandongani jala  margogoihon,
5
 huhut napatauhon nasida salelengon mangulahon haparhaladoon i.
Angkup ni une do pasahatonta mauliate nang tu nasida naung
manghalojahon, jala mangharonsothon mangulahon ulaon di hurianta.
Alani i paborhatonta ma nasida nuaeng laho mamomgoti masa pangsiun.
Hamu dongan nami  St. Malanton Sitorus Hombar tu Aturan dohot
Peraturan ni HKBP, dohot surat pangidoan muna, nunga digohi hamu
panjouon na sahat tu hamu marhobas di huria i. Na mandok mauliate do
huria on tu Tuhanta na patauhon hamu marhobas hombar tu tohonan na
sahat tu hamu. Nunga digohi hamu pangoloionmuna marhite
panghobasion tohonan Sintua. Dipasahat hamu do napinangido ni hata ni
Tuhanta na mandok: ”Sahat ula Tohonanmi”. Na tama do
hamauliatehonon ni hurianta siala  pangulaonmuna na saleleng on di
Tuhanta, anggiat parbue ni na hinobasanmuna na saleleng on di jolo ni
Tuhanta gabe pelean na hushus jala mamboan pasu-pasu tu hagaganda ni
na porsea dohot hatotogu ni haporseaon di angka  na hinobasanmuna .
Alani i; jongjong ma hita sahuriaon martangiang tu Tuhanta
(Jongjong ruas):
Ale Debatanami, na gok asi dohot holong ni roha, ro do hami tu adopanMu
laho pasahathon hamauliateon ni rohanami siala pangurupionMu di
naposoM on saleleng diparar Ho manghobasi huriaM. Nunga sahat diula
ulaon ha-Sintuaon na pinasahatMi: Sai baen ma ramos parbue ni
panghobasion nasida di  ruas ni HuriaM tu hangoluan salelengna. Nang
naposoM pe sai asi ma rohaM ramoti ma nasida, lam ramoti ma nasida
dung mamungka pensiun sian panghobasionna songon sahalak Sintua.
Molo tung dijalo pensiun sian ha-Sintuaon, sai ramoti jala patogu ma pos
ni rohanasida  tu Ho. Palas  ma roha nasida tongtong, pahipas ma
pamatangna laho mandai hinauli ni tingki pensiun songon jolma na
marpanghilalaan, marroha jala na martondi hombar  tu lomo ni
rohaM.  Togutogu jala ramoti ma nasida di angka  ariari ni hatuatuaonna
asa tongtong manaili tu Ho, ai sian Ho do haroroan ni hadameon, las
dohot sonang  ni roha di bagasan Tondi Parbadia. Pasupasu ma nang
keluarga dohot sisolhot nasida,  asa rap mangolophon jala
manghamauliatehon pasupasu najinalo  nasida sian Ho. Angkup ni i
marpamuati ma rohaM di nasa hagaleon dohot hahurangan ni
dongannami on di nasa pangulaon dohot panghobasionna na sailaon,
sesai ma i ala ni  holong ni rohaM. Pinuji ma Ho  ale  Tuhan Jesus  ro  di
saleleng ni lelengna. Amen.
02.Manjaha SK  Taringot tu  Sintua Pensiun   (Jinahahon ni Sekretaris
Bendahara Resort : St. H. Tanjung ) Dohot Barita Panghobasion
6
03. Paborhathon na pensiun (dijalang Pdt ma Sintua na pensiun) :
Pdt Resort : Ale naposo ni Debata, St. Malanton Sitorus, mardongan pos ni
roha di Debata Ama dohot AnakNa Tuhan Jesus Kristus dohot Tondi
Porbadia, hupaborhat hami ma hamu laho pensiun sian Sintua. Dipasu pasu
Tuhanta Jesus Raja Ni Huria ima panghobasionmuna na saleleng on, jala
diramoti ma hamu di angka ari-ari di ngolumuna jala diparrohai hamu
mandai hinauli ni tingki pensiun di angka ariari sidalananmuna dope tu
tingki na ro on. Amen.
(Hundul ma Sintua na Pensiun dohot Keluarga tu Hundulanna)
16. Tangiang Pelean: ( Jongjong )
U : Tatangianghon ma peleanta. Ale Debata, Amanami na di banua
ginjang! Ho do haroroan ni saluhut silehonlehon na denggan dohot
nasa ulibasa na mauliutus. Hupasahat hami ma sian na nilehonMi tu
hami, peleannami tu Ho. Sai jalo ma i gabe uap na hushus di joloM.
Pasupasu ma i jala ramoti asa huparhaseang hami pelean on,
patimbulhon harajaonMu di tongatonga ni huriaM dohot di portibi on.
Buhai ma rohanami marhitehite TondiM, asa lam hutanda hami
godang ni silehonlehonMi tu hami, asa lam girgir hami mandok
mauliate tu Ho, marhitehite Jesus Kristus Tuhannami. Amen.
H : (Mangendehon) BE. HKBP No. 204 : 2 “NDANG
TADINGHONONHU HO” BL 73
♫♪♫
Nasa na nilehonMi, tondi ro di pamatanghu
Hosa dohot gogongki, ro di saluhut artangku
Hupasahat i tu Ho, na so unsatonhu do.
U : Ale Amanami na di banua ginjang! Sai pinarbadia ma GoarMu! Sai ro
ma harajaonMu! Sai saut ma lomo ni rohaM di banua tonga on songon
na di banua ginjang! Lehon ma tu hami sadari on hangoluan siapari!
Sesa ma dosanami songon panesanami di dosa ni dongan na mardosa
tu hami! Unang hami togihon tu pangunjunan! Palua ma hami sian
pangago!
H : (Mangendehon): BE HKBP No. 841 : 1 “AI HO DO NAMPUNA
HARAJAON” BL 841
♫♪♫
Ai Ho do nampuna harajaon, dohot hagogoon
ro di hasangapon, saleleng ni lelengna, Amen.
U : Tangiang Pasupasu
7
H : (Mangendehon ) BE No. 845 : 1 “AMEN, AMEN, AMEN” BL 845
Amen, Amen, Amen.