PARTORDING NI PARMINGGUON

DI MINGGU JUDIKA
&
Paborhathon Pdt. Bangun Pandapotan Pasaribu, S.Th
(LULUHON AHU ALE JAHOWA – PSALMEN 43 : 1A)

 Ev: Hesekiel 45 : 9 - 17  Ep: Ulaon ni Apostel 6 : 1 - 7

TOPIK :

ULAHON UHUM DOHOT HASINTONGAN

HURIA KRISTEN BATAK PROTESTAN

MINGGU, 26 Maret 2023

1. Marende BE HKBP No. 564 : 1 - 3 “LAS MA ROHANTA DI TUHANTA
DEBATA” BL.564
♫♪♫
Las ma rohanta di Tuhanta Debata, las ma rohanta di Tuhanta Debata
Las ma rohanta di Tuhanta Debata, haroroan ni hagogoon i.
♫♪♫
Parasi roha do Jahowa Debata, parasi roha do Jahowa Debata
Parasi roha do Jahowa Debata, parasi roha ma nang hita on.

…… (Musik - Jongjong) ……
♫♪♫
Pardenggan basa do Tuhanta Debata, pardenggan basa do Tuhanta Debata
Pardenggan basa do Tuhanta Debata, pardenggan basa ma nang hita on.

2. VOTUM – INTROITUS – TANGIANG :

U : Marhitehite Goar ni Debata Ama, dohot Goar ni AnakNa Tuhan Jesus
Kristus, dohot Goar ni Tondi Parbadia na tumompa langit dohot tano on.
Amen. Luluhon ma ahu, ale Debata, jala parbadahon badanghu dompak
bangso na so daulat roha, sai palua ma ahu sian baoa siulahon sipaotooto
dohot hajengkelon. Ai Ho do Debata haroroan ni hagogoonku. Tongos ma
hatiuronMu dohot hatigoranMu, angka na manogu ahu, pataru ahu tu dolok
ni habadiaonMu dohot tu ingananMu. Haleluya!
H : (Mangendehon): Haleluya, Haleluya, Haleluya
U : Martangiang ma hita! Ale Tuhan Debata, Ama ni saluhut parasinirohaon!
Nunga ditatap ho hami bangsoMon, ai ndang manjua Ho mangalehon
AnakMu na sasada i, Tuhan Jesus Kristus tu tangan ni pardosa, asa
taononNa haleaon dohot siak ni bagi sahat ro di hau na pinarsilang. Sai
tumpahi hami marhitehite asi ni rohaM, asa margogo hami jala marbenget ni
roha songon anak haholongan ni rohaMi di angka sitaonon, asa marsangap
GoarMu dohot AnakMu, Tuhan Jesus Kristus, dohot Tondi Parbadia
marhitehite hami. Amen. ( Hundul )

3. Marende BE No. 20 : 2 + 5 “PAIAN MA DI HAMI” BL 6

♫♪♫
Naeng ihuthononnami Na pinatikhonMi
Naeng pasidingonnami sogo ni rohaMi.
♫♪♫
On pe O Tuhannami tumpahi hataMi
Masuk tu rohanami paian ma disi.

1
4. PATIK:
U : Tangihon hamu (Tatangihon) ma Patik ni Debata na tarsurat di 5 Musa 16 :
20 “Hatigoran, hatigoran ma tutu ingkon eahanmu, asa mangolu ho jala
teanonmu tano silehonon ni Jahowa, Debatam tu ho”.
I ma sahatna. Antong, rap mangido gogo ma hita tu Debata.
H : Ale Tuhan Debata sai pargogoi ma hami mangulahon na hombar tu
patikMi. Amen.

5. Marende BE No. 419 : 1 - 2 “HO NA MARSAK ROHA I” BL 279

♫♪♫
Ho na marsak roha i, ro tu silang i
Boan nasa arsakmi, tu parsilang i
Sai usehon rohami, ai dibege Jesus i
Silang ni Tuhanmu do haporusanmi.

(Jongjong)
♫♪♫
Topot parasian i di parsilang i
Sai maporus ma tusi, Jesus do disi
Nang jorbut dosam ale, Jesus mangurasi be
Silang ni Tuhanmu do haporusanmi.

6. TANGIANG MANOPOTI DOSA:

U : Tatopoti ma dosanta, martangiang ma hita: Ale Tuhan Debata, Amanami na
di banua ginjang! Ho do na patupahon hasesaan ni dosa di hami halak na
dangol on marhitehite Anak haholongan ni rohaM. Sai asi ma rohaM di
hami, angka na mangarsakhon dosanami. Sai sahapi ma tu bagasan rohanami
hasesaan ni dosanami i. Lehon ma tu hami TondiM na badia i, asa unang
ganggu rohanami di asi ni rohaM, alai asa hot rohanami marhaporseaon laho
manggotaphon nasa dosa dohot roha portibi on. Asa hupasahat hami
dirinami tu Ho, gabe pelean na mangolu jala na badia marhitehite Tuhan
Jesus Kristus Tuhannami. Amen.
Tabege ma bagabaga taringot tu hasesaan ni dosa: Satongkin do
Hutadingkon ho, alai papungupunguonHu ma ho muse marhitehite angka asi
ni roha godang! Tagan di parpiar ni murukHu Hutabunihon bohingKu
satongkin maradophon ho, alai marhitehite dengganbasa salelenglelengna
asianHu ho, ninna Jahowa Sipalua ho. Hasangapon ma di Debata na di
ginjang!
U+H : Amen (Hundul)

2
7. Marende BE HKBP No. 133 : 2 + 5 “O TONDI NA MANGGOHI ROHA”
BL 113
♫♪♫
Anggiat apiMi ma galak marlojong tu saluhut bangso i
Jahowa sai paborhat halak na burju manghatahon hataMi
Sai tatap lambas ni gotilon i, Ianggo naposoM otik do i.
♫♪♫
Urupi hami sian Sion, Sai suru Tondi Parbadia i
Lao paluahon hajolmaon, hombar tu na pinarbagahonMi
Sondangi ma sandok portibi on, pasiat ma hataM di tano on.

8. E P I S T E L:
U : Tangihon hamu (Tatangihon) ma Hata ni Debata turpuk Epistel di
Minggunta sadari on, tarsurat di Ulaon ni Apostel 6 : 1 – 7, Alai di angka
ari i lam manamba ma torop ni sisean i, jadi marmungutmungut ma halak
Gorik dompak halak Heber, ala tartading angka parompuan na mabalu sian
nasida di pangurupion ariari.
H : Jadi diparia na sampulu dua i ma sandok huria i, didok ma: “Ndang
denggan hupapudi hami hata ni Debata, laho paturehon angka asiasi.
U : Onpe, ale angka dongan, diori hamu ma sian tongatongamuna pitu halak na
denggan baritana, angka na gok Tondi jala na pantas marroha,
sipabangkitonta tu ulaon i.
H : Alai anggo hami, tangiang dohot ulaon jamita i ma tong huhapadothon
hami.”
U : Jadi lomo ma roha ni na sahuria i di hata i; dipillit ma si Stepanus, sada
halak na gok haporseaon dohot Tondi Parbadia, dung i si Pilippus, si
Prokorus, si Nikanor, si Timon dohot si Parmenas, angkup ni i si Nikolaus,
sada parguru sian Antiokia.
H : Angka i ma dipajongjong tu jolo ni angka apostel i, jala martangiang
ma huhut mangampehon tangan tu nasida.
U : Jadi lam rarat ma hata ni Debata, ganda situtu ma torop ni angka sisean di
Jerusalem; angka malim pe, torop do mangoloi porsea.
I do sahatna. Martua ma angka na tumangihon Hata ni Debata jala na
umpeopsa. Amen.

9. Marende BE HKBP No. 467 : 3 - 4 “ASI NI ROHAM HUPUJI” BL 315

♫♪♫
Naeng huhatindanghon hami hagogoonMi tongtong.
Paluahon na mardosa, nang parjahat na bolong.
IngananMu rohanami, TondiMi manggohi i
Pangke dohot ngolunami gabe ulaulaMi.
.….. (Jongjong) ……
3
 ♫♪♫
Sai papulik rohanami gabe pangoloi di Ho
Asa marsahala hami lao manghatindanghon Ho
IngananMu rohanami, TondiMi manggohi i
Pangke dohot ngolunami gabe ulaulaMi.

10. MANGHATINDANGHON HAPORSEAON:

U : Tahatindanghon ma haporseaonta i, songon na hinatindanghon ni donganta
sahaporseaon di sandok portibi on. Rap ma hita mandok:
H : Ahu Porsea di Debata Jahowa….. d.u.
(Hundul)
11. Tingting

12. Marende BE. HKBP No. 720 : 1… “NAENG MARSINONDANG

NGOLUNGKU” BL 720 (Pelean Ia, Ib)
♫♪♫
Naeng marsinondang ngolungku diigil Jesus i
Manang didia pe ahu tongtong huingot i
Tiur marsinondang ido niigil ni Jesus
Tongtong marsinondang, panondang do au tutu.
♫♪♫
Ingkon hobas mangurupi angka na gale i
Jala burju manghobasi songon Tuhanta i
Tiur marsinondang ido niigil ni Jesus
Tongtong marsinondang, panondang do au tutu.

------ Musik -------

♫♪♫
Tuhan urupi ma ahu, sai jaga rohangki
Asa marsinondang ahu, Ho naeng tiruonhi
Tiur marsinondang ido niigil ni Jesus
Tongtong marsinondang, panondang do au tutu.
♫♪♫
Naeng oloanhu Tuhanhu, saleleng ngolungki
Sogot di Surgo, endengku pasangap Tuhan i
Tiur marsinondang ido niigil ni Jesus
Tongtong marsinondang, panondang do au tutu.

4
13. J A M I T A: Hesekiel 45 : 9 - 17

14. Marende BE HKBP No. 792 : 1…“PASUPASU HAMI O TUHAN” BL 792

♫♪♫
Pasupasu Hami o Tuhan sai usehon dameMi
Sai ampehon tanganMi Tuhan, lehon tu au gogoMi
Di portibi on baen ma au Tuhan, habaoran ni las ni roha
tu na marsak i, tu na dangol, gabe pangapuli i
Pasupasu Hami O Tuhan sai usehon dameMi
Sai ampehon tanganMi Tuhan, lehon tu au gogoMi.
♫♪♫
Di portibi on, baen ma au Tuhan monang maralohon dosa
Dibahen gogoMi, talu musu i sibolis pangago i
Pasupasu Hami O Tuhan sai usehon dameMi
Sai ampehon tanganMi Tuhan, lehon tu au gogoMi.

----- Musik -----

♫♪♫
Di portibi on baen ma au Tuhan sipatupa hadameon
Baen ma hataMi saor tu roha ni na masihosoman i
Pasupasu Hami o Tuhan sai usehon dameMi
Sai ampehon tanganMi Tuhan, lehon tu au gogoMi.
♫♪♫
Di portibi on baen ma au Tuhan siradoti haholongon
Togutogu ma hami on Tuhan marparange na denggan
Pasupasu Hami O Tuhan sai usehon dameMi
Sai ampehon tanganMi Tuhan, lehon tu au gogoMi.

-----Musik-----
♫♪♫
Di portibi on baen ma au Tuhan sipajongjong hatigoran
Pargogoi ma au, raphon huriaM patupahon na denggan.
Pasupasu Hami O Tuhan sai usehon dameMi
Sai ampehon tanganMi Tuhan,lehon tu au gogoMi.

II. Acara Paborhathon Pdt. Bangun Pandapotan Pasaribu, S.Th

1. Marende BE 729:1 “Laho Ma Hamu”

(Di tingki marende ro ma tu jolo Pdt. Bangun Pandapotan Pasaribu, S.Th
dohot keluarga, mangadophon Praeses)

5
 ♫ Laho ma hamu tu liat portibi on.
Ninna Jesus Kristus Tuhan i;
Ninna Jesus Kristus Tuhan i.
Baritahon ma Barita na uli i.
Tu saluhut na tinompa i
tu saluhut na tinompa i.
Asa marlas ni roha ma langit
nang dohot hajanghajang i;
Marolopolop angka ladang i,
ro di hau na diharangan i.
Martopaptopap sunge i,
Marhasakhasak tao nang laut i,
Marolop olop ma portibi on nang
Sudena pangisina i. (Amen.)

2. Patujolo
Praeses: Hamuna parhalado dohot ruas ni huria ni Tuhanta na di huria on.
Sadarion, paborhatonta ma Pdt. Bangun Pandapotan Pasaribu,
S.Th sian Huria HKBP Talun Karnas on dinalaho manguduti
panghobasion nasida na gabe uluan di Huria HKBP Batu Tolu
Ressort Sinta Nauli Distrik V Sumatera Timur. Dibahen I, tabege
ma jolo Surat Keputusan ni Ephorus Huria Kristen Batak
Protestan taringot tu parborhat nasida.
3. Manjaha Surat Keputusan : ...................
4. Paborhathon
Praeses: Hamu Pdt. Bangun Pandapotan Pasaribu, S.Th Nunga dibege
hamu Surat Keputusan ni Ephorus Huria Kristen Batak Protestan
taringot tu parpindaonmuna. Ala ni i, paborhatonnami ma hamu
sian Huria on (masijalangan) : Ahu Praeses Distrik XXIV Tanah
Jawa, atas goar ni Ephorus Huria Kristen Batak Protestan, di
bagasan goar ni Debata Ama, Anak dohot Tondi Porbadia:
Hupaborhat ma hamu laho manguduti ulaonmuna na gabe uluan
di Huria HKBP Batu Tolu Ressort Sinta Nauli Distrik V Sumatera
Timur. Dipasupasu, didongani jala dipargogoi Tuhan Debata ma
hamu laho manguduti panghobasionmuna i. Amen !

6
5. Marende BE No 66:1 “Debata Baen Donganmi)
♫ Debata baen donganmi, lao mangula ulaonmu
Baen ibana haposanmu, sai paserep rohami
Debata baen donganmi, Debata baen donganmi

III. Tangiang Pelean + Penutup: ( Jongjong )