PARTORDING NI PARMINGGUON

DI MINGGU ADVENT I

 Ev: Markus 13 : 24 - 37  Ep: Psalmen 80 : 1 - 8

TOPIK :

DUNGO LAHO MANOMUNOMU HARORO NI

KRISTUS

HURIA KRISTEN BATAK PROTESTAN

MINGGU, 03 Desember 2023

1. JOUJOU TU PARMINGGUON :
U : Huria na hinaholongan ni Tuhanta Yesus Kristus, hami saluhut
Parhalado, pasahathon tabe ma tu sude hamu ruas ni huria: Selamat
Advent ma di hita saluhutna.
H : Selamat Advent
U : Dungo ma hamu laho manomunomu haroro ni Kristus, sai endehon
hamu ma Debata, puji hamu ma GoarNa.
H : Ho do ale Jahowa, dihalungunhon rohangku. Ale Debatangku,
marhaposan tu Ho do ahu.
U : Marolopolop ma ho jala marlas ni roha di minggu Advent on,
marende ma hita :

2. Marende BE HKBP No. 590 : 1 - 3 “ADVENT” BL 590

♫♪♫
Advent i do di tingki on na marsaringar di tano on
Ingkon rade oroan i managam Sipalua i
Advent, advent, na ro ma Tuhan i, antong tagam ma.
♫♪♫
Advent, gok olopolop do di langit ni parlangitan i
Mandok na ro ma Tuhan i manopot huriaNa i
Advent, advent, na ro ma Tuhan i, antong tagam ma.
…… (Musik - Jongjong) ……
♫♪♫
Advent di tonga borngin do dungo so tung laos tarpodom ho
Tompu so panagaman do songon panangko borngin ro
Advent, advent, na ro ma Tuhan i, antong tagam ma.

3. VOTUM – INTROITUS – TANGIANG :

U : Marhitehite Goar ni Debata Ama, dohot Goar ni AnakNa Tuhan Jesus
Kristus, dohot Goar ni Tondi Parbadia na tumompa langit dohot tano
on. Amen. Paboa hamu ma tu boru Sion: Ida ma, nunga ro hatuaonmi!
Ida ma, ihut tu Ibana do upa silehononNa, jala pamaloshonna di
joloNa. Haleluya!

1
 H : (Mangendehon): BE. HKBP No. 852 : 1 ”HALELUYA HKBP (3x)
BL 852
Haleluya, Haleluya, Haleluya
U : Martangiang ma hita! Ale Tuhan Debata, Pargogo na so hatudosan,
na tumompa langit dohot tano, hinorhon ni asi ni rohaM do umbahen
sahat tu taon Huria na imbaru on. Lehon ma tu HuriaM TondiM na
badia i dohot hamaloon sian Ho, asa lam rarat jala ganda harajaonMu
di tongatonga ni hami on. Sai lehon ma hiras ni roha tu naposoM
manghatahon HataM, asa lam denggan HuriaM marhite sian i.
Pargogoi ma hami mangoloi Ho di bagasan haporseaon na tongtong,
asa manahan hami sahat ro di ujungna marhitehite AnakMu Jesus
Kristus Tuhanami. Amen.
(Hundul )

4. Marende BE No. 355 : 1 – 2 “MALUNGUN DO ROHANGKINON”

BL 173
♫♪♫
Malungun do rohangkinon di ariMi o Tuhan
Andigan jumpang haroroM manopot hasudungan
Ni rohami, ai alanii sonang do rohanami
HataM huingot hami.
♫♪♫
Sai hupaima hami Ho, do pangulunami
Ai nunga pola mate Ho, pasaehon dosanami
Dibahen i pos rohangki sai urupanMu hami
Di paraloannami.

5. PATIK:
U : Tangihon hamu (Tatangihon) ma Patik ni Debata di minggu sadari on,
i ma na tarsurat di Mateus 24 : 42 “Onpe, dungo ma hamu; ai ndang
diboto hamu ari haroro ni Tuhanmuna!”
I ma sahatna. Antong, rap mangido gogo ma hita sian Tuhan Debata!
U+H : Ale Tuhan Debata, sai pargogoi ma hami mangulahon na hombar
tu PatikMi. Amen

6. Marende BE No. 162 : 1 + 3 “O DEBATA MANSAI BALGA” BL 27

2
 ♫♪♫
O Debata, mansai balga huhut dokdok dosangku
Na so adong di tano on na tau haporusanhu.

(Jongjong)
♫♪♫
I pe tu Ho na ma au ro sai unang tulak ahu
Paombun ma, o Debata rimasMu mida ahu.

7. TANGIANG MANOPOTI DOSA :

U : Tatopoti ma dosanta, martangiang ma hita: Ale Tuhan Debata,
Pargogo na so hatudosan, Parasi roha na sumurung, Ama ni Tuhan
Jesus Kristus Sipangolu hami! Hami, halak pardosa na dangol on ro tu
jolo ni habangsa habadiaonMi manopoti jala manganggukhon
dosanami. Mansai jotjot huarsahi hami Ho marhitehite pingkiran
dohot hata dohot pambahenannami na roa i. Ndang huhaholongi hami
Ho sian nasa rohanami dohot nasa ateatenami dohot nasa tondinami
dohot nasa gogonami; nang dongannami, ndang doshon dirinami
hubahen hami. Dibahen i tama do rimasanMu jala uhumanMu hami tu
hamatean saleleng ni lelengna i. Alai na maporus ma hami nuaeng tu
asi ni rohaM na godang i mangido sian nasa rohanami hasesaan ni
dosanami saluhutna. Sai urupi ma hami paubahon rohanami ala ni
Tuhan Jesus Kristus, Anak haholongan ni RohaM, Sipangolu hami
dohot ala ni GoarMu na badia i. Ale Tuhan, sai asi ma rohaM di hami
halak na dangol on! Amen.

Tabege ma bagabaga taringot tu hasesaan ni dosa: Molo tung

adong manang ise na mardosa, adong do pangondianta di Ama i, i ma
Tuhan Jesus Kristus na tigor roha i. Jala Ibana do pardengganan
taringot tu dosanta, alai ndada holan taringot tu dosanta, dohot do
taringot tu dosa ni saluhut portibi on.
Hasangapon ma di Debata na di ginjang!
U + H : Amen (Hundul)

8. Marende BE HKBP No. 41 : 4 “PARRIPE NI TUHANTA” BL 153

♫♪♫
Antong girgir ma hita manomu Raja i
Mangungkap di Ibana sandok rohanta i
3
 Denggan nuaeng tabaen, dalanNa tu rohanta
Na naeng pasonangonNa, tiur ma i tabaen.

9. E P I S T E L:
U : Tangihon hamu (Tatangihon) ma Hata ni Debata turpuk Epistel di
Minggunta sadari on, tarsurat di Psalmen 80 : 1 - 8, Ende sian si
Asap. Ale siparmahan Israel, sai manangi ma Ho! Ai Ho do siadu
Josep, songon birubiru; sai pataridahon ma Ho, ale na
marhabangsahon herubim.
H : Sai sungguli ma hagogoanMu di jolo ni Epraim dohot Benyamin
dohot Manasse, jala sai ro ma Ho mangurupi hami.
U : Ale Debata, sai pasuang ma hami, jala pasihar bohiM asa malua hami.
H : Ale Jahowa, Debata Zebaot, sadia leleng on marmusu tihus Ho
mida tangiang ni bangsoM.
U : Dipanganhon Ho do tu nasida roti iluilu, jala dipainumhon Ho do tu
nasida iluilu martahutahu.
H : Dibahen Ho do hami ripe badaan ni hombar hundulnami, jala sai
dielesi angka musunami do hami.
U : Ale Debata Zebaot, sai pasuang ma hami, jala pasihar ma bohiM asa
malua hami.
I do sahatna. Martua do angka na tumangihon Hata ni Debata jala
na umpeopsa. Amen.

10. Marende BE HKBP No. 44 : 1 – 2 “HAMUNA NA PORSEA I SAI

TOMU TUHAN JESUS I” BL 206
♫♪♫
Hamuna na porsea i, sai tomu Tuhan Jesus i, pahehe rohamuna
Jonok do ari pesta ni, saluhut huriaNa i, i ma hatutubuNa
I pe, hehe ma hamuna, baen pantunna lao manjangkon
Na manopot hajolmaon.
(Jongjong)
♫♪♫
Marlas ni roha situtu saluhut halak na burju, lao mangihuthon Jesus
I pe pataridahon ma las ni roham di Debata, sangkapNa ma patulus
Puji, puji, Jesus Kristus na manobus tondimuna
Sian hamagoanmuna.

4
11. MANGHATINDANGHON HAPORSEAON:
U : Tahatindanghon ma haporseaonta i, songon na hinatindanghon ni
donganta sahaporseaon di sandok portibi on. Rap ma hita mandok:
H : Ahu Porsea di Debata Jahowa….. d.u. (Hundul)
12. Tingting :
13. Papungu Pelean Huhut Marende BE HKBP No. 354 : 1… “SAI TONG
MAIMAIMA DO” BL 134 (Pelean Ia, Ib)
♫♪♫
Sai tong maimaima do rohanta i di Jesus
Ibana haluaon do di angka naung tinobus
Reff. : Ro do muse Tuhanta i, mardongan hasangapon i
Sai ro ma Ho o Jesus, sai ro ma Ho o Jesus.
♫♪♫
Marlas ni roha ma disi, sudena naung tinobus
Masihol situtu do i di Jesus i Partobus
Reff.: Ro do muse . . . . . . .
------ Musik -------
♫♪♫
Satongkin nari nangkok be marhitehite ombun
Rap dohot Jesus lao sude tu surgo i marujung
Sai longang be do sasude, di hasangapon i muse
Di surgo di na sonang, di surgo di na sonang.

14. J A M I T A: Markus 13 : 24 - 37
15. Papungu Pelean Huhut Marende BE. HKBP No. 539 : 1 .... ”SAI
HUTAGAM” BL 371 (Pelean II)
♫♪♫
Sai hutagam do Tuhanhu, sai masihol rohangki
Di haroro ni Tuhanhu songon na nidokNa i
Reff: Sai mardongan olopolop huriaM managam Ho
Maranata ro o Tuhan, amen sai tibu ma ro.
♫♪♫
Las ni roha ndang hapalang do manggohi rohangki
Dung binege soaraNa di na ro Tuhanta i
Reff: Sai mardongan . . . . .
5
 ----- Musik -----
♫♪♫
Sai rade ale tondingku tagam panjouonNa i
Sai tu langit an manomu, ho di Jesus Tuhanmi
Reff: Sai mardongan . . . . .
♫♪♫
Ai tagamon nunga borhat Ho Tuhanhu sian i
So tung unang au tarlalap, tading di na rodop i
Reff: Sai mardongan . . . . . .

. 16. Parsuruon :
U : Tama do hita mandok mauliate tu Debata Jahowa, ala dipabotohon
Ibana do tu hita : na laho salpu sogot langit dohot tano, alai na hot do
anggo HataNa ro di salelenglelengna.
H : Sai asi ma rohaNa di hita, sai di pahot ma rohanta marhaporseai
HataNa marhitehite Tondi Parbadia.
U : Dungo ma hamu jala paringgas ma martangiang, asa marlas ni roha
hamu paimaimahon haroroNa.
U+H : (Mangendehon) BE No. 594 : 5 “SAI RO MA HO
IMMANUEL" (BL. 594)
♫♪♫
Sai ro ma Ho Debatangki, baen marhuaso hataMi
Songon na pinatupaMi, di atas dolok Sinai i.
Las ma roham o Israel, ai nunga ro Immanuel

17. Tangiang Pelean: ( Jongjong )

U : Tatangianghon ma peleanta. Ale Debata, Amanami na di banua
ginjang! Ho do haroroan ni saluhut silehonlehon na denggan dohot
nasa ulibasa na mauliutus. Hupasahat hami ma sian na nilehonMi tu
hami, peleannami tu Ho. Sai jalo ma i gabe uap na hushus di joloM.
Pasupasu ma i jala ramoti asa huparhaseang hami pelean on,
patimbulhon harajaonMu di tongatonga ni huriaM dohot di portibi on.
Buhai ma rohanami marhitehite TondiM, asa lam hutanda hami
godang ni silehonlehonMi tu hami, asa lam girgir hami mandok
mauliate tu Ho, marhitehite Jesus Kristus Tuhannami. Amen.

6
H : (Mangendehon) BE. HKBP No. 204 : 2 “NDANG
TADINGHONONHU HO” BL 73
♫♪♫
Nasa na nilehonMi, tondi ro di pamatanghu
Hosa dohot gogongki, ro di saluhut artangku
Hupasahat i tu Ho, na so unsatonhu do
U : Ale Tuhan Debata, Amanami ro di saleleng ni lelengna! Mauliate ma
rohanami tu Ho, ala diramoti Ho hami di bagasan taon parhuriaon
naung salpu i. Asi ni rohaM do na pasahathon hami tu bagasan taon na
imbaru on. Huida hami di bagasan na sataon i denggan ni basaM:
Buas do Ho mangalehon Barita na Uli tu hami, asa mardame jala
marhasonangan rohanami. Ditambai Ho do bilangan ni angka na
porsea, angka na burju mangoloi HataM. Dipargogoi Ho do angka na
porsea dohot naposoM, angka na mamaritahon habalgaonMu di
tongatonga ni HuriaM. Tung na so habilangan do sude denggan ni
basaM na sataon i, sian minggu tu minggu, sian bulan tu bulan, sahat
ro di sadari on. Dibahen i hupuji hami ma GoarMu jala hupasangap
hami ma Ho. Sai gomgomi jala pasupasu ma nang HuriaM; tambai ma
ganup ari torop ni angka na porsea, na marholong ni roha di Ho. Sai
pararat ma harajaonMu di tano Batak on dohot di sandok pulo on. Sai
ramoti HuriaM asa unang saut tahi ni parjahat na mangambati
harararat ni harajaonMu. Sai unang loas HuriaM i disusai, digaori
manang dileai. Ramoti ma angka na pinillitMu, paima sahat tu
hangoluan. Sai ramoti ma sude naposoM, na mamaritahon Barita na
Uli. Sai jou ma angka sipelebegu dohot parugamo na asing asa dohot
nasida pasangaphon GoarMu. Sai ramoti jala parbadiai ma HuriaM
sahat ro di haroro ni Tuhannami Jesus Kristus. Amen.
Ale Amanami na di banua ginjang! Sai pinarbadia ma GoarMu! Sai ro
ma harajaonMu! Sai saut ma lomo ni rohaM di banua tonga on songon
na di banua ginjang! Lehon ma tu hami sadari on hangoluan siapari!
Sesa ma dosanami songon panesanami di dosa ni dongan na mardosa
tu hami! Unang hami togihon tu pangunjunan! Palua ma hami sian
pangago!
H : (Mangendehon): BE HKBP No. 841 : 1 “AI HO DO NAMPUNA
HARAJAON” BL 841
♫♪♫
Ai Ho do nampuna harajaon, dohot hagogoon

7
 ro di hasangapon, saleleng ni lelengna, Amen
U : Tangiang Pasupasu
H : (Mangendehon ) BE No. 845 : 1 “AMEN, AMEN, AMEN” BL 845
Amen, Amen, Amen