MINGGU KELUARGA HKBP RESSORT ADIANNANGKA

MINGGU V NDUNG TRINITATIS, 4 JULI 2021

Tema : Borhat Ma Ho Jala Baritahon Ma Hata Ni Tuhan I!
Pergi dan Beritrakanlah Firman Allah!

01. Pamuhai :
U : Parhorasan ma di hita, sude ruas ni Tuhanta, angka na hinaholongan! Di
bagasan Minggu keluarga, na tongon di minggu palimahon dung Trinitatis on,
naeng tumangkas paradeon ni Tuhanta hita laho mamaritahon hataNa songon
topik ni minggunta sadari on na mandok: “Borhat ma ho jala baritahon ma hata
ni Tuhan i! (Pergi dan Beritrakanlah Firman Allah)
R : Tung di bagasan las ni roha do laho mamongoti parsaoran rap dohot
Tuhanta laos manjanghon dohot manghangoluhon hataNa
sibaritahononhon di tongatonga ni ngolu siganup ari.
U : Antong jumolo ma tahalashon dohot tahamauliatehon nasa pasupasuNa naung
tajalo i, tapuji ma Ibana marhite na marende Las rohangku lao mamuji!
02. Marende BE No. 565:1-2, “Las rohangku lao mamuji”
Las rohangku lao mamuji Debata Parholong i, Songon bunga na mangerbang di na
binsar ari i. Arsak, dosa, haporsuhon mago dibaen asiMi. Las ni roha na manongtong
lehon di au Tuhanki. (Jongjong)
Sude jadijadianMu, laut, tano, langit i, Angka bintang dohot bulan nang mata ni
ari i. Hauma, ladang, nang harangan, rura dohot dolok i, Saluhut na
mangendehon sangap di Tuhanta i.
03. Votum – Introitus – Tangiang:
U : Mangasahon Debata sai hamonangan do ulahononta. Ngot ma ho, ale
parhinaloan! Tarsunggul ma ahu di buha siang ari. Pujionku ma Ho di
tongatonga ni angka bangso, ale Tuhan, endehononkunma Ho di tongatonga ni
angka marga. Haleluya!
R : (Mangendehon): Haleluya, Haleluya, Haleluya!
U : Martangiang ma hita!
Ale Tuhan Debata, Pargogo na so hatudosan! Sai lehon jala patubu ma di hami
haporseaon na sintong. Tambai ma haporseaonnami ganup ari, asa lam togu.
Lehon ma di hami holong ni roha na so marpangansi asa holong rohanami di Ho
dohot di dongannami jolma. Lehon di hami panghirimon na mangolu, asa marlas
ni roha hami mambahen lomo ni rohaM i. Sai oloi ma pangidoannami ala ni
AnakMu, Tuhan Jesus Kristus Tuhannami. Amen. (Hundul)
04. Marende BE No. 118:1+4, “Paian ma di hami” BL. 6.
Paian ma di hami O Jesus asiMi. Asa tung unang hami diansi musu i.
Paian ma di hami tongtong panumpakMi. Gandahon ma di hami Asi ni rohaMi
05. PATIK: I-X
U: Tatangihon ma Patik ni Debata di Minggu V dung Trinitatis ima Patik parjolo
sahat tu pasampuluhon. ……….. Patik Parjolo: Ahu do Jahowa Debatam,
ninna Debatanta. Ndang jadi marangkup Ahu bahenonmu Debatam.
R: Patik Paduahon: Ndang jadi ganaonmu jala ndang jadi sumanonmu
manang aha na di banua ginjang dohot na di banua tonga on, ro di na di
bagasan aek na di toru ni tano, ianggo tung gabe sisombaon manang
sioloan.
U: Patik Patoluhon: Ndang jadi dohonon goar ni Debata, ianggo so ture dalanna, ai
hona uhumNa do sogot angka na marsineang di GoarNa.
R: Patik Paopathon: Ingot hamu ma pabadiahon ari Minggu i ! Di na onom ari
ma ula hamu nasa siulaonmu; alai anggo ari papituhon i, ari paradianan ni
Jahowa Debatam do i. Ndang jadi ho mangula anggo di na sadari i,
manang anakmu pe manang borum manang naposom lahilahi manang
naposom boruboru, ro di pinahanmu, ro di isi ni huta ni halak pe na
mangebati hutam. Ai di na onom ari do ditompa Debata langit dohot tano
dohot laut dohot nasa isina, dung i maradian do Ibana di ari papituhon i.
Dibahen i do umbahen na dipasupasu Debata Jahowa ari paradiananNa i
jala diparbadiai.
U: Patik Palimahon: Ingkon pasangaponmu do natorasmu, asa martua ho jala
leleng mangolu di tano na nilehon ni Jahowa Debatam di ho.
R: Patik Paonomhon: Unang ho mamunu !
U: Patik Papituhon: Unang ho mangalangkup !
R: Patik Paualuhon: Unang ho manangko !
U: Patik Pasiahon: Unang ho olo manghatindangkon hata na so tutu maralohon
dongan jolma.
R: Patik Pasampuluhon: Ndang jadi haliangan ni roham bagas ni donganmu,
ndang jadi haliangan ni roham dongan saripe ni donganmu, manang
naposona baoa manang naposona boruboru manang lombuna manang
hodana, manang dia pe ugasan ni donganmu.
U: Beha pandok ni Debata taringot tu Patik na sampulu i ? On do: Ahu do Jahowa
Debatam, ninna Debatanta. Pargogo na so hatudosan jala Parrimas, Siluluhon
dosa ni ama-ama tu pinomparna, ro di sundut patoluhon, ro di sundut
paopathon, pinompar ni angka na sogo roha di Ahu; alai asi do rohangKu di
angka na marribu-ribu, angka na marholong ni roha di Ahu, na so mangalaosi
PatikHi. (Antong rap mangido gogo ma hita sian Debata!).
R : Ale Tuhan Debata, sai pargogoi ma hami mangulahon na hombar tu
PatikMi. Amen.
06. Marende BE No. 516:1-2, “Bege joujou ni Jesus” BL. 353.
Bege joujou ni Jesus i, tongtong di jou na lilu i. Mago do birubiru i sian Tuhanta
Jesus i. Sai lului, sai lului, birubiru na mago i, Sai lului, sai lului, mulak boan i tu
Jesus.
(Jongjong)
Ho diarahon Jesus i, silu, lului na mago i. Togihon ma tu Jesus i na loja, na
maheu i. Sai lului….
07. MANOPOTI DOSA: B.1-C.1
U : Ale Amanami jala Debatabami na di banua ginjang! Parasi roha na sumurung
mida hami. Amen.
R : Huparhatutu jala hutopoti hami do dosa dohot pangalaosionnami na
godang i di joloM.
U : Tatap hami marhitehite asi ni rohaM, jala sesa ma dosanami saluhutna, ala ni
panghophop ni Anak haholongan ni roham, Tuhan Jesus Kristus, Sipangolu
hami. Amen
( Martangiang na hohom huhut manghuling Musik angonangon sada ayat sian BE.No.167)
U : Bagabaga ni Debata Taringot tu hasesaan ni dosanta : Munsat pe angka
dolok jala humuntal angka robean, alai anggo parasi ni rohangKu na so tupa
munsat sian ho, jala padan ni hadameonku na so tupa humordit ninna Jahowa
Siasii ho. Hasangapon ma di Debata na di ginjang!
R : Amen. (Hundul)
08. Marende BE No. 730:1-2, “Sai patau ma au Tuhan” BL. 730.
Sai patau ma diringku ale Tuhan, papatarhon hinauliMi Tuhan,Suru ma tondiMi saor
tu rohangki, lao papatar HolongMu tu donganki.
Sai patau ma diringku ale Tuhan, papatarhon hinauliMi Tuhan, Suruma TondiMi
saor tu rohangki patariparhon basaM tu donganki.
09. E P I S T E L :
U : Hata ni Debata turpuk Epistel di Minggu V dung Trinitatis sadari on, tarsurat di
Hesekiel 2:1-5. Jadi didok ibana ma tu ahu: Ale anak ni jolma, ojakkon ma
patmu, asa mangkatai ahu tu ho.
R : Dung i uju mangkatai ibana tu ahu, bongot ma Tondi i tu bagasan ahu,
laos dipajongjong ahu di pathu, gabe mananginangi ahu tu ibana na
mangkatai dohot ahu.
U : Dung i didok ibana tu ahu: Ale anak ni jolma, ahu ma marsuru ho tu halak
Israel, tu bangso angka na manggunturi dompak ahu; nang nasida, nang
ompunasida, sai marbalik do sian ahu rasirasa sadarion.
R : Ahu ma tongon marsuru ho tu anak, angka na pir bohi dohot na tangkang
marroha, jala dohononmu ma tu nasida: Boti hata ni Tuhan Jahowa.
U : Alai anggo nasida, manang tangihononna manang ndang, ai bangso
panggunturi do nasida, gabe diboto nasida naung adong panurirang sada di
 tongatonganasida. Ido sahatna. Martua do angka na tumangihon Hata ni
Debata jala na umpeopsa. Amen.
10. Marende BE No. 658:1-2, “Tu portibi on na rundut” BL. 658.
Tu portibi on na rundut borhat ma ho, galak bahen palitomu sai dungo ho. Boan
sondang tu na holom mangurupi na mardangol Ido barita na uli ni Kristus i.
(Jongjong)
Taradoti hasadaon ni ruas i. talului birubiru na mago i. Hata ni Tuhan Jahowa do
pasada houm nang hata. Sian sude partingkian tu Debata.
11. MANGHATINDANGHON HAPORSEAON:
U : Tahatindangkon ma haporseaonta i, songon na hinatindanghon ni donganta
sahaporseaon di sandok portibi on. Rap ma hita mandok!
R : Ahu Porsea….. (Hundul)
12. TINGTING
13. Marende BE No. 518:1…… “Marsinondang dibaen Jesus”
Marsinondang dibaen Jesus asi ni rohana i,Jala hita do disuru , asa tapaboa i. Ta
pagalak palitonta, ta patiur dalan i, Ai torop dope na lilu, sai hatop ma mulak i.
Nang au on na dao na jolo, di na holom lilu au, Alai sondang ni Tuhanku do
mamboan mulak au. Ta pagalak….
14. JAMITA: Markus 6:6b-13
15. Marende BE No. 666:1…..,”Ingkon do boanonta barita” (Pelean Ia, Ib & II)
Ingkon do boanonta Barita, tu inganan na holom i,I ma holong nang hasintongan
dame na manongtong i, Dame na manongtong i, Ai naung binsar do hatiuron,
nunga salpu na holom i, Huaso ni Kristus hot tongtong salenglelengna i
Ingkon endehononta pujian, pasangaphon Tuhanta i, Na tuk manaluhon na
jahat, nang sinjata porang i, Na sinjata porang i.Ai naung ………
Ingkon do boanonta Barita, Debatanta do Raja i, Dilehon anak sasadaNa, manobus
pardosa i, Manobus pardosa i.Ai naung ………
16. PANGUJUNGI: (Jongjong)
U : Nunga tapanghilalahon parsaoranta dohot Debata di bagasan ari tingki on.
Songon angka na porsea hita, tama situtu ma hangoluhononta barita nauli
naung marsaringar di tongatonganta. Masiurupan jala masitumpahan ma hita
laho mamaritahon barita nauli i songon angka sisean i na disuru borhat
marduadua laho marbarita na uli.
R : Tapuji ma Tuhanta na marhamaolhon ngolunta di adopanNa pola diparar
Ibana hita gabe ulaulaNa.
U : Didok Tuhan Jesus: “Ndada hamu mamillit Ahu; Ahu do mamillit hamu jala
hupadiri hamu, asa laho hamu marparbue, jala asa mian parbuemuna i; asa
dilehon tu hamu nasa sipangidoonmuna sian Ama i marhitehite Goarhu.”
R : (Mangendehon BE. No. 142:1, “Pararat ma baritaM i”)
 Pararat ma baritaMi O Jesus asa sahat i tu nasa halajolmaon. Tutu ma dung
dipungka i manogu jolma sasude tu dalan hangoluan. I pe sude hajolmaon
sai tangihon soaraNa. Sai bongoti huriaNa.
U : Tangiang Pelean – Ale Amanami – Pasupasu – Amen 3x