HKBP ADIANNANGKA RESSORT ADIANNANGKA

ACARA PARTANGIANGAN KELUARGA

UJUNG BULAN JUNI 2021
1. Parade diri (Martangiang na hohom)
2. Marende BE No 149 : 1 – 2 “Ho Tongtong Ihuthononhu”
3. Tangiang Pamuhai
4. Manjaha Turpuk : Poda 24 : 10
5. Manjaha Hatorangan ni Turpuk :
UNANG GODORON ROHAM

Hea do dongan di Facebook manurathon songon, “Molo sala do, pature – Molo gagal do, ulangi
muse”. Alai molo so tolapmu be – tumagon paso ma”. Sada motivasi na diigil Tuhanta sian hita unang
tadok, ndang be tolaphu ba, nunga sae be. Molo adong sikapta mandok ndang be ba, ndang
torushononku be, berarti naung menyerah do hita. Asa tung boha pe borat ni situhukonta di ngolu on,
unang pahatophu hita menyerah. Taingot ma poda ni raja Salomo na di turpukta sadarion, mandok:
“Molo godoron roham di ari hagogotan, lam moru ma gogom.” (Poda 24:10). Poda on paingothon
hita do asa unang pintor godoron, unang pintor mirdong hita tung boha pe dokdok ni ulaon manang
sitaonon. Roha na gale, i do parjolo na mangorui gogo di hita.

Ayat on naeng patubu semangat na imbaru, dao lomos, unang pintor songon sigurbak ulu molo
dokdok ulaon. Tingki dipasahat Debata tu Josua laho manguduti pardalanan ni bangso Israel, dipapos
Debata do ibana, “Nda nunga hudok tu ho: Pir ma tondim, jala Jahowa Debatam do donganmu,
manang dompak dia pe ho mangalangka” (Josua 1:9).

Autsugari pintor godoron do si Josua marnida habonggalon ni halak Amori, Kanaan, ba nunga
pintor tarik diri ibana gabe uluan ni bangso Israel. Alai, dipapos Debata do rohana asa tulus sangkap ni
Debata. Mardalan ma hita dibagasan haporseaon, songon poda ni si Paulus, ”... ala hutailihon hami na
so tarida i, nda tung na tarida i; ai parsatongkinan do na tarida i, alai manongtong do ro di
salelenglelengna na so tarida i” (2 Korint 4:18).

Hamu angka dongan sahaporseaon, halak na porsea di pandonganion ni Debata, ndang hea ibana
manuhuk pangunjunan lobi sian batas ni gogona. Molo tung pe ingkon ampe na borat, gabe dokdok
tahilala, porsea ma hita di pangurupion ni Debata asa margogo hita laho patulushon pardalanan ni
ngolunta. Amen
6. Martangiang : 1 Huria; 2. Keluarga; 3. Panggomgomi & Covid-19
7. Marende : BE. No. 471 : 1 + 4 “Hupilit Jesus Donganhi”
8. Tangiang Aleamanami