Jamita Evangelium

Minggu Adven IV, 18 Desember 2022

“Tomu ma Ibana na Pinarbaga ni Debata”

(Rom 1:1-7)
Ginurithon di Pdt. Dr. Robinson Butarbutar, Ephorus HKBP

Hamu angka dongan hinaholongan, di Minggu IV Adven sadarion, i ma

onom ari nari andorang so tapatupa pesta parningotan di borngin
hatutubu ni Jesus Kristus Sipalua i, hata ni Debata na mamangkulingi
hita ro sian bagian pamonai ni surat ni apostel Paulus tu angka na porsea
di huria Rom di taon 56 abad na parjolo, na marisihon dua na mangihut
on: Parjolo, panjouon, turgas, dohot asi ni roha jinalo ni apostel Paulus
marbarita nauli. Paduahon, taringot tu isi ni barita nauli na binaritahonna
i. Ala di hita nuaeng nunga tung tangkas haapostelon ni apostel Paulus,
na di partingkianna adong na mandok ndang dos haapostelonna tu
haapostelon ni angka na borhat sian Jerusalem di Judea, i ma angka na
tinongos ni uluan ni huria i di Jerusalem uju i, i ma apostel Jakobus nang
Petrus, songon i nang si Johannes tu angka huta naung diebati apostel
Paulus di duru ni Palestina, ndang apala taringot tu haapostelan ni
apostel Paulus i na ringkot tatangihon di ngolunta nuaeng di dekade
patoluhon ni abad pa-21-hon on. Alai dia do isi ni barita nauli (Gorik:
Euanggelion) na binaritahon ni apostel Paulus i di ulaonna songon
apostel ni Jesus Kristus tu angka bangso na so Jahudi di angka kota di
bagian Habinsaran/Timur ni Kekaisaran Romawi i. Dia na binaritahonna
uju i, na diuduti ibana sahat tu bagian Hasundutan/Barat ni Kekaisaran
Romawi, i ma di Spanyol, jala na sian i meret tu sandok Eropa, jala sian
i tu Asia muse, tu Afrika, jala nuaeng di partingkian era digital dipararat
angka parbarita nauli di sandok portibion nuaeng marhite marragam
dalan, dohot ma marhite digitalisasi. I do impola ni isi ni barita nauli i, i
ma taringot tu Kristologi: Ise do Kristus i. I do tong na dibaritahon
angka parbarita nauli di tongatonga ni Huria Kristen Batak Protestan.
(1)
Molo adong na meret sian isi ni barita nauli i di ulaonna songon
parbarita nauli mansai denggan mulak muse. Denggan ma muba.
Jala ndang holan impola ni isi ni barita nauli i tahe na digurithon apostel
i, alai sahat do tu songon dia alus ni na umbege barita nauli i, sahat tu
haunduhon ni haporseaon di isi ni barita nauli i. Ala ni i denggan ma
tapaandar dia do isi ni barita nauli binaritahon ni apostel i dohot na
ingkon begeonta nang nuaeng pe. Dung i taida ma dia na niigil ni
apostel i sian naumbege isi ni barita nauli i, na jumahasa najolo nang
nuaeng, jala na tong ingkon jouhononta tu ganup na tumangihon isi ni
barita nauli i.
Dia ma isi ni barita nauli i, dia ma Kristologi na pinaandar ni apostel i? I
ma:
Parjolo, songon na tarsurat di bukku ni angka panurirang na tinanda ni
apostel i najolo, nunga tibu disangkapi Debata laho paro Jesus Kristus
laho patupa na denggan/nauli, haluaon tu angka jolma. Sangkap na
denggan do dipatupa Debata.
Paduahon, sangkap nauli ni Debata i dipatupa marhite na pamasa
hajajadi/haroro ni Jesus Kristus. Dumenggan sian na sailaon do ianggo
sangkap ni Debata di bagasan hadirion ni Jesus. I ma, sangombas jolma,
na marpamatang, marhadagingon, anak ni/pomparan ni raja Daud,
songon hita jolma do ia Jesus Kristus i. Ibana i ma bagian ni hajolmaon.
Anak ni Jolma, na mangantusi dohot manghilalahon hajolmaonta do
Ibana, huhut mamelehon dirina laho manobus hita sian hadosaon dohot
hamatean, rap dohot hita di angka sitaononta huhut mandungdung
tujuanta songon jolma.
Napatoluhon, alai ndang holan anak ni jolma i ia Jesus i. Huhut do Ibana
Anak ni Debata na badia dohot na marhuaso, di ginjang ni nasa huaso,
sisombaon ni nasa ulu ni tot, naung hehe sian hamatean, jala siala ni i na
pahehe hita muse sian hamatean.
Napopathon, ala ni na songon i do hadirion ni Kristus i, Anak ni Jolma i,
alai Anak ni Debata naung manaluhon hamatean i, diarop do sian na
tumangihon barita nauli taringot tu Jesus Kristus naung tibu disangkapi,
(2)
dibagabagahon jala dipasaut Debata, i ma Anak ni Jolma huhut Anak ni
Debata na marhuaso, na - saurdot tu Tondi Habadiaon - naung
manaluhon hamatean, ndang jadi holan manangihon barita nauli i ulaon
ni na tumangihonsa, alai ingkon sahat do tu haunduhon ni haporseaon di
Jesus Kristus na songon i hadirionNa, jala marhite i gabe nampuna ni
Kristus. Sian na parjolo sahat tu na paopathon i do dibahen gabe topik ni
jamitanta sadarion songon on: "Tomu ma Ibana pinarbaga ni Debata."

Mamungka dung gabe Anak ni Jolma Jesus i jala mamungka dung

tangkas na Anak ni Debata naung manaluhon hamatean i do Ibana, na
marhuaso di ginjang ni saluhut di abad na parjolo sahat tu nuaeng,
dipasungkunhon do tu hita manang na unduk do hita tu haporseaon na
binasabasahon ni Debata marhite TondiNa Tondi Porbadia i tu hita di
Jesus Kritus i. Dipasungkunhon do tu hita manang na tatomu do Ibana
di ngolunta marsadasada.
Ala ni i, hamu angka dongan, mansai denggan do parjolo tatangkasi
dirinta manang naung tatanda, tatomu, tajangkon, tahaporseai Jesus
Anak ni Jolma dohot Anak ni Debata dung haheheonNa i di bagasan
ngolunta? Tatangkasi manang naung unduk hita marhite haporseaon di
Ibana i jala siala ni i manang umampit, marhite i nunga angka naung
tarjou nampuna ni Kristus i hita (Rom 1: 6)?
Paduahon, denggan do tong tapasungkuhon manang na hatutubu ni Jesus
na hadirionNa songon i do na tatomu di pesta parningotan di hatutubu ni
Jesus Kristus di ariari on tarlumobi di na marpesta Natal hita sahat tu
jala dung tanggal 24-25 Desember on? Manang holan bagian parduru ni
pesta parningotan di ari hatutubu ni Jesus Kristus i do na taula?
Patoluhon, ringkot do tong tapasungkunhon tu dirinta, songon dia do
hita manghatindangkon, mamaritahon dohot manghobasi ulaon
mamaritahon barita nauli taringot tu Jesus Kristus na songon i saleleng
on jala tu joloan ni ari on. Domu tuson, ringkot do hita marsiajar sian
hadirion ni apostel Paulus dohot haringgasonna mamaritahon barita
nauli taringot tu Jesus Kristus na songon i, tarlumobi taringot tu hadirion
(3)
ni Jesus Kristus, Kristologi na mandok ia Jesus Kristus i Anak ni Debata
naung manaluhon hamatean i do. Andorang so pajumpang ibana dohot
Jesus Kristus naung manaluhon hamatean i di dalan tu huta Damaskus,
ndang unduk dope ibana tu haporseaon taringot tu Jesus Kristus na hehe
i. Dilele ibana do angka na manghaporseai naung hehe Jesus Kristus
sian na mate. Alai dung pajumpang ibana di dalan na tu Damaskus i,
gabe unduk ma ibana tu haporseaon na mandok Jesus Anak ni si Daud i
i ma Anak ni Debata na marhuaso. Dung i hiras jala hinsa situtu do
ibana mamaritahon taringot tu hadirion ni Jesus na songon i dohot
taringot tu haunduhon haporseaon di Jesus na songon i.

Boasa, hamuna angka dongan, di partingkianta nuaeng ditogihon hataNa

hita mangarimangi mulak taringot tu hadirion ni Jesus na songon i di
Minggu Adven paopathon on? Suraon do siala adong sian tongatonganta
naung meret sian haunduhan haporseaon sisongon i siala mansai doras
do angka na so manghaporseai ibana manulak hadirionNa na songon i di
sandok portibion, ndang holan di negara-negara maju, alai dohot do di
negara-negara berkembang, dohot di negara-negara na pogos di
partingkian internetisasi segala sesuatu i.
Siala ni ringkotna di sandok HKBP hiras jala hinsa huhut tau ruas nang
partohonan ni HKBP mangongku dohot mamaritahon hadirion ni Jesus
na songon i sahat tu unduk na tumangihonsa di haporseaon di Jesus na
songon i, nunga ditotophon Sinode Godangta na mamungka 1 Januari
2023 on tapadalan ma pengelolaan parhepengon tu ulaon ni HKBP
mamaritahon barita nauli secara sentral, i ma 55 persen sian sandok
pelean di huria dipasahat tu hatopan, 45 persennari dipangke di huria di
inganan i, asa boi hita manongos angka parbarita nauli tu angka huria na
metmet jala na pogos parhepengonna, asa boi tong tubu haporseaon disi,
jala asa boi tong hita mamaritahon barita nauli tu duru ni HKBP
dumenggan sian nasailaon. Asa boi unduk na tumangihon ulaonta
mamaritahon taringot tu Jesus Kristus i tu haporseaon di Jesus Kristus
na songon i.
(4)
Mansai ringkot on ala di partingkian internetisasi nuaeng mansai doras
do ro jala dipararat angka soara ni manoal dohot manulak hadirion ni
Jesus na songon i. Didok ibana holan anak ni jolma i, ndang dung jala
ndang sahat tu Anak ni Debata. Alai di hita Hakristenon songon naung
pinaandar ni apostel Paulus, Anak ni Debata do hita. Tapajamot ma
dirinta. Tapajamot ianakkonta. Unduk do hita tu haporseaon di Ibana,
Jesus Kristus Anak ni si Daud dohot Anak ni Debata naung manaluhon
hamatean, jala na marhuaso?

Dipargogoi Debata ma hita mananda muse, manjangkon mulak,

manghalashon, huhut mamaritahon Jesus Kristus na ro tu tongatonganta
gabe jolma songon na sinangkapan, binagabagahon dohot pianasaut ni
Debata, Anak ni Raja Daud, donganta jolma, alai Anak ni Debata naung
manaluhon hamatean i, na marhuaso. Amen.

(5)