Bahan Sermon HKBP Gempolan Ressort Gempolan

Distrik XIV Tebing Tinggi Deli

Epistel tu Minggu Judika, 26 Maret 2023
Topik Minggu: Ulahon Uhum Dohot Hatigoran

I. Patujolo
Buku Ulaon ni Angka Apostel ima na sinurathon ni si Lukas, sada dongan ni si Paulus
laho mangurupi angka ulaon parbaritanaulion tu ganup ingananna. Lukas ima sahalak
pangubati naung gabe porsea nang pe ndang sian halak Jahudi ibana. Disurathon si Lukas
buku Ulaon ni Apostel on, laho paboahon jala mamaritahon tu si Teopilus, sahalak na
pinarsangapan. Dimulai si Lukas do suratna on ima songon udut ni baritana na parjolo i
(evangelium Lukas) taringot poda dohot ulaon na pinungka ni Jesus uju di portibion Ibana.
Ulaon ni Apostel (Yunani: Prakseis Apostolon) ima na mamaritahon ulaon panghobasion ni
angka apostel na parjolo i, dung hehe Tuhan Jesus sian na mate. Sian buku Ulaon ni Apostel
on, boi idaon boha do pardalanan ni angka apostel i laho mamaritahon haheheon sian
hamatean dohot hananaek ni Tuhan Jesus. Ndang mura ulaon i, alai gok parmaraan sian pihak
halak Jahudi dohot pihak panggomgomi Romawi na niadopan ni huria na parjolo i nang
songoni angka Apostel, alai lam martamba do bilangan nasida jala lam maju huria i di angka
panghobasionna, tudos mai tu peribahasa na mandok “semakin dibabat semakin merambat”.
Ala lam tu hembangna panghobasion i jala lam tamba bilangan ni angka na porsea i, tung
diharingkothon do manambai angka parhobas di Huria i asa unang adong na tading
panghobasion di Huria i. Nang pe dipungka barita on marhite na tubu parsalisian na
memprihatinkan di angka ruas ni huria na marmungutungut sian halak Gorik dompak halak
Heber, ala tartading angka parompuan na mabalu sian nasida di pangurupion ariari.
Marmungutungut ala sian pamerengan nasida ndang jumpang keadilan di tonga-tonga ni
huria i. Ringkot nai tutu mangulahon uhum dohot hatigoran tarlumobi di ngolu parhuriaon.
II. Hatorangan ni Turpuk
Tangkas do dihangoluhon huria na parjolo i, ngolu na mar-Diakonia, na mangurupi
angka na pogos ala godang angka na pogos hatiha i, tarlumobi angka ruas parompuan na
mabalu, nang sian bangso Gorik dohot sian bangso Heber. Tontu sai adong do na hurang,
dang boi singkop sude, jala dang boi pasonanghon sude ruas tarlumobi di pembagian
pangurupion, nang pe sasintongna berusaha do angka apostel na parjolo i mambahen na
denggan hombar tu kebutuhan ni angka ruas na pogos secara adil, tanpa memihak tu ruas
sian halak Gorik manang sian halak Heber. Alai sai adong ma ungutungut nasida, ala
tartading panghobasion tu angka parompuan na mabalu sian halak Gorik. Boasa adong
parungutunguton? Ala angka parompuan na mabalu sian halak Heber, adong dope angka
pinomparna na mangurupi nasida, ala kewajiban do di keluarga ni halak Heber mangurupi ina
na mabalu sian keluarga nasida (bnd. Jesaya 1:7; Lukas 18:3; 1 Tim 5:3-4). Alai angka
parompuan na mabalu sian halak Gorik sian angka keluarga na pogos mansai godang na
terlantar jala sengsara ngolu nasida, ala dang adong keluarga nasida na boi mangurupi. Jala
pengurus diakonia huria na parjolo i, marpingkir ala gumodang do bantuan na ro tu huria sian
halak Heber gabe gumodang ma pangurupion dipasahat nasida tu angka parompuan na
mabalu sian halak Heber dibandinghon tu angka parompuan na mabalu sian Gorik. Nang pe
sasintongna memang ndang adong keadilan di pembagian na songon i di pelayanan diakoni.
Taida ma nang pe maju huria na parjolo i, alai tong do adong hahurangan nasida di hal
pengelolan pelayanan diakoni, na gabe patubu ungutungut di tonga ni huria i. Tinggil do
sipareaon ini angka apostel i, laho menanggapi ungutngut nasida. Marhite na masa i ma
adong piga-piga solusi na dipatupa angka Apostel, ima:
1. Diupayahon angka Apostel do padamehon asa unang tubu ungutungut di tongatonga
ni ruas, marhite na tinggil manangihon persoalan na tubu, jala aha bonsir ni
ungutungut i (pemimpin yang baik segera menangani persoalan). Dibahen i, ingkon
pilliton ni angka Apostel pigapiga halak na rade jala na adong tingkina laho
padalanhon ulaon panghobasion tu angka parompuan na mabalu ini halak Gorik.
Tontu dang ingkon angka apostel be na mangulahon panghobasion i. Ala ulaon
parjamitaon do na ingkon dihapadothon nasida, asa unang tading ulaon parjamitaon
dohot partangiangon ala ni angka panghobasion na asing (ay. 2). Dungi di ay.5 dipillit
ma 7 halak lao manghobasi di ulaon diakoni ni huria i, ima Stepanus, Pilippus,
Prokorus, Nikanor, Timon, Parmenas, Nikolaus. Angka na tarpillit i ima angka
haposan, na denggan baritana, angka na gok Tondi, jala na pantas marroha, na
mangulahon uhum dohot hatigoran.
2. Dipatujolo angka Apostel do tugas utama nasida ima martangiang jala mamaritahon
barita nauli (ay.4). Ingkon rade do tingki nasida memperlengkapi diri
manghapadothon ulaon parjamitaon asa unang tading ulaon i di huria nang di
masyarakat na so tumanda Kristus. Jala angka Apostel do na gabe singkat ni Kristus
pasahathon hata ni Debata, jala manangianghon huria na parjolo i di tingki une nang
so une asa gabe pasupasu huria i tu humaliangna.
3. Diampehon angka apostel tangan nasida tu angka naung tarpillit i jala ditangianghon
do na pitu halak i, songon tanda pengakuan manang panjanghonon ni sude ruas tu
nasida, na tau do nasida jala memenuhi syarat mangulahon ulaon na pinasahat ni huria
tu nasida, asa gabe pasupasu nasida di huria i, tarlumobi tu angka na pogos na mabalu
na ingkon siurupan. Dipasahat Debata kepercayaan tu angka parhobasNa, asa
diulahon secara bertanggungjawab tu Debata, gabe parhobas haposan di huriaNa.
Dungi lam maju ma huria na parjolo i, marhite na dipatau Debata angka apostel
mangalusi angka ungutungut ruas ni huria, padengganhon angka na humurang jala
patupahon na dumenggan dipanghobasion ni huria. Hata ini Debata pe lam sar tu
humaliang tarlumobi tu angka na so porsea tu Jesus Kristus.
III. Panimpuli
Sai adong do tubu persoalan na so tinagam di tonga ni huria ni Tuhanta, nang pe
didok pamatang ni Kristus do huria i, alai ndang na marlapatan gabe ndang adong be
persoalan di tonga ni huriaNa. Boi do persoalan i ro sian bagasan dohot sian duru. Alai
ingkon rade do uluan ni huria rap dohot angka parhalado nang ruas mangadopi jala
mangalului solusi di sude persoalan na ro tu tonga ni huria. Jala di bagasan bisuk na sian
Debata mangulahon uhum dohot hatigoran, tarlumobi angka naposo ini Debata naeng ma
tongtong di bagasan panogunoguon ni Tondi Parbadia, patujolo uhum dohot hatigoran,
membentuk teamwork na denggan di angka panghobasion ni huria, tarlumobi na rade
memperlengkapi diri laho manghapadothon ulaon panghobasion di tonga ini huria di na
mamaritahon Barita Nauli dohot martangiang. Amen.