Mansai ringkot do jamita partangiangan on bagas uhir tu rohanta ganup marsadasada.

Lumobi ma di
partingkian sinuaeng di na lam torop halak marsidalian manjua ulaon parasinirohaon (pelayanan
diakonia). Na deba mandok, ndang talup dope mangurupi dongan na pogos, ai iba pe tong dope
hurangan. na deba lambok do panjuana, ai di parhite pandohan ni natuatua mandok: “hansit do
tangan mandangurhon na soada.” Alai tupa do panjuaon I honorhon ni na hurang mananda di asi ni
roha dohot denggan basa ni Debata; jala tarimpu sude basabasa na tajalo I paruntunganta (rezeki)
manang gok ni tuanta sambing (nasib baik), na so ringkot pola parsaulihonon ni angka na hurangan
jala na patut urupan?

Hape, angka na badia do hita sude na pinapungupungu ni tondi parbadia tu bagasan huria i. jala na
songon sada pamatang do sude na porsea I (ruas dohot parhalado) dibagasan huria i. ala ni Huria na
badia ndang boi so ingkon saroha, sapingkiran, jala sapanghilalaan di nasa gulmit ni ngolu ni Huria i.
asa, ingkon otomatis do ungkap rohanta jala surduk tanganta mangula ulaon asini roha molo tahilala
adong na patut urupan di dongan. Ndada pola ala ni naung suksuk sinamot di hita asa urupan
dongan, alai ala ni holong na manghilala sitaonon ni dongan ruas ni pamatang ni Kristus I do. Nang so
adong di hita, na bolas do hita mandok tu parhalado, aha ma nab oi patupaon ni Hurianta mangurupi
donganta na marsitaonon on, rade do hami mangulahonsa. Gabe rap ma sude parhalado manghatai
angka dalan nab oi pasauthon ulaon asi ni roha I, anggiat tung malua na dangol sian pardangolanna,
margogo na gale mangeahi parngoluonna dumenggan. Boha amang, inang… hea do talehon tingkinta
di partangiangan si songon on laho manarihon dongan angka na patut urupan asa malua nasida sian
hapogoson, parsahiton dohot ragam ni parsorion, lumobi di parianakhonon dohot angka parsingkola
na patut urupan?

Di patuduhon raja David do diturpuk jamita on, dia na hinalomohon ni Debata sian angka na Daulat
roha, I ma mangoloi ulaon parsuruon ni Debata; mangulahon lomo ni roha Na na hombar tu patikNa.
Ai andul umarga do I sian pelean situtungon. Hadaulaton (Ibadah yang hidup) di parngoluon si ganup
ari, I do na rumingkot di Debata martimbanghon angka pelean situtungon na somal dipasahat di
tingki parmingguon. Lomo ni roha ni angka na Daulat roha, na tangkas manghaposi huaso dohot
holong ni Debata, I ma mangulahon na denggan, patupahon ulaon asi ni roha di ngolu siganup ari.
Songon na nidok ni raja David di ayat 9 “di parsitongan ni rohangku do patikmi.” Lapatanna, ndang
gabe boban di ibana mangulahon patik ni Debata; baliksa patikna I do na manggohi rohana, gabe
sian las ni roha di patupa angka na hinalomohon ni Debata. Di na pauliulihon angka na badia (Huria)
I, tontu ingkon tangkas ma radotanta ruhutruhut parhuriaon hombar tu aturan paraturan ni Huria,
Konfessi, Ruhut parmahanion dohot paminsangon, sahat ro di ruhut parmingguon na tangkas
marojahan tu Agenda Hkbp. Laos I ma na gabe sirimangrimanganta di na pauliulihon ngolu
parhuriaon di huria marsadasada, asa lomo niroha ni Debata na tapasaut di Huria i.

Patureturehon Angka Na Badia

Sude jolma hea mangadopi angka hasusaan dibagasan ngolunta. Angka na porsea manang na so
porsea, na burju manang na jungkat, na ringgas marminggu manang na so ringgas marminggu, sude
do hea mangadopi hasusaan dibagasan ngoluna. Saleleng mangolu hita di portibi na mangilas on,
ndang tarsirat hita sian angka hasusaan. So tung sahat tu pingkiranta, molo nunga gabe Kristen,
molo nunga gabe siihuthon Jesus hita, molo dung dipasupasu Tuhan hita, tontu sonang ma ngolunta
jala dao ma hasusaan I sian hita. Ai tangkas do disurathon di buku na badia I pengalaman ni angka
jolma na jonok tu Tuhan I, angka na targoar naposo ni Tuhan i. targoar do si Abraham amang ni
angka na porsea alai masa do hasusaan di ngoluna. Tarbarita do nang si Paulus songon Apostel ni
Kristus alai mansai godang do hasusaan diadopi ibana tarlumobi laho patulushon ulaon marbarita
nauli. Nang Jesus I songon anak ni Debata tong do diadopi haporsuhon godang, sahat tu na agoan
hosa ibana. Jala marhite turpuk on pe dipabotohon do hasusaan na masa tu si David.

Ndang apala dipatorang rumang ni hasusaan na masa tu si David, alai turpukon patoranghon
hasusaan na mansai borat manosak ibana. Di ayat 3 tangkas do dipatorang: “Dienet ahu tu ginjang
sian godung halonongan, sian dore na pilhot.” Tung bagas do ibana lonong, gabe maol situtu ruar
sian I. hata on gabe tudutudu do tu hasusaan bolon na diadopi raja David. Adong na pistar
mangalapati hata on martudutudu tu pengalaman ni raja David uju maporus ibana ruar di pamhai ni
hajongjonganna gabe raja lumobi uju dielaela raja Saul. Adong muse na mangalapati I tu
pangarimangion ni raja David, hasusaan na manosak ibana mansai gogo. Molo masa do tutu ragam
ni hasusaan tu angka na porsea nang tu angka na so porsea, antong aha do imbar (parasingan dohot
hasurungan) ni angka na porsea martimbanghon angka na so porsea? Aha do upa sijaloon ni angka
siihuthon Jesus, molo tong dope diae nasida haporsuhon?

Turpun jamita sadari on boi mangurapi hita marnida parasingan dohot hasurungan ni angka
na porsea I jala boi gabe ojahan mambahen hita marasing sian angka na so porsea. Tutu masa do
hasusaan tu raja David, alai adong do pigapiga na patut taparrohahon sian pengalaman ni ngolu ni
raja David:

1. Sai tong do dihaposi ibana Jahowa (ay.1). molo di hata Indonesia didok “Aku sangat menanti-
nantikan Tuhan. “Jala jonok do lapatan ni hata Indonesia tu hata inggris na mandok: “I
waited patiently for the Lord.” Di hasusaan naiadopanna, marsitutu ibana paimaima
pangurupion sian Tuhan i. ai diboto do tangkas, na so dung talup ibana ruar/malua sian
hasusaan I molo so Jahowa mangurupi. Alani I marsitutu ibana paimaima Jahowa. Boi do
antusanta parsitutuon I marhite hata “Sai tong …. Sangat… patiently..” marsitutu do ibana
paimahon pangurupion ni Tuhan I, porsea do ibana tu Tuhan i. laos diuduti do muse di ayat
5: “Martua ma baoa na mambahen Jahowa haposanna.” Tutu ndang pintor ro pangurupion I
alai pos do rohana na ro do I, na ingkon tangihonon ni Jahowa soara alualuna. Ndang ganggu
rohana alai porsea na tuk do huaso ni Jahowa mangenet ibana sian godung halonongan ,
sian dore na pilhot. Ndang sian jolma ibana mangido pangurupion jala ndang marhaposan
ibana tu gogona sambing, alai Jahowa do dipangasahon.
2. Tongtong do sai diingot jala dibilangi angka pambahenan dohot asi ni roha ni Jahowa. Torop
situtu halongangan dipatupa Jahowa di ngoluna jala ndang habilangan godangna (ay.6).
ndang holan tu hasusaan I tongtong tartuju ngoluna (roha dohot pingkiranna), alai t
pambahenan dohot holong ni roha ni Debata do. Ndang diloas ibana hasusaan I mandondoni
alai tung asi ni roha ni Debata do na mangarajai ngoluna. Godang situtu do alana umbahen
nab oi ibana marhagogoan mangadopi ragam ni hasusaan na masa di ngoluna.
3. Hot do rohana laho mangulahon lomo ni roha ni Debata. Manang aha pe na masa dingoluna
hot do pamujina di jolo ni Tuhan i. tongtong do pamaganna mamuji Tuhan I (4). Udut ni
pujipujian na ruar sian pamanganna, sai hibul do rohana patupahon lomo ni roha ni Debata,
ndada marhite na pasahat pelean sipotongon dohot sipanganon, alai marhite pangalaho na
mangoloi patik ni Debata do, marhite na mamaritahon huhut mangulahon hatigoran di jolo
ni Debata nang di jolo ni dongan jolma. Alani I hasusaan I ndang gabe sidalian di ibana
mangulahon na so uhum (na so patut) di jolo ni Debata. Ndang pandelean na rot u ibana, alai
parsitutuon mamuji Debata do na patar tarida di ngoluna
I ma pengalaman ni raja David uju mangadopi hasusaan. Disurathon jala dibaritahon pengalaman on
tu tongatonga luhutan ni Israel nang tu hita, asa marhite I lam togu nang haporseaonta tu Tuhan i.
nab oi masa do ragam ni hasusaan (na borat) nang tu hita, alai unang mandele manang maheu hita
Alani i. songon hat ani umpama Batak I ma sahat tu hita, “Hotang binebebebe hotang nipulospulos.
Unang ho mandele, ai godang do tudostudos.” Molo na masa do hasusaan tu angka naposo ni
Debata di na robi jala boi do nasida monang maralohon hasusaan I, songon I ma nang hita naeng
monang maralohon hasusaan I. unang taloas dirinta didondoni hasusaan i. alai marhite hasusaan I
naeng lam sumolhot hita tu Tuhan I, naeng lam porsea hita tu Ibana. Songon na tarsurat di Rom 8:28
“saluhutna do manumpak tu na denggan di angka na marholong ni roha di Debata.” Saluhutna, las ni
roha nang arsak ni roha boi do pangkeon ni Debata dalan manogunogu hita tu haporseaon na togu.

I do napatar tarida sian ngolu ni par-psalmen I jala laos I ma nian na tarida sian ngolunta,
angka siihuthon Jesus i. unang talu hita Alani hasusaan i. unang mandele jala maheu. Alai tongtong
ma marhaposan hita tu Tuhan I, tongtong ma tapasahat alualunta tu ibana jala tapaima ma
pangurupionNa di bagasan benget ni roha, asa idaonta jala daionta muse denggan bas ani Tuhan I
dibagasan ngolunta. Asa saluhutna I lam patogu rohanta mangulahon lomo ni rohaNa, mamuji Ibana
ndada holan marhite hata alai lumobi marhite parange na hombar tu hata nang hasintonganNa.
Unang ma nian hasusaan I manait rohanta gabe mardosa. Gabe margabus manang manangko hita
ala maol mangalului sipanganon manang parabiton. Unang ma gabe taparsoada Tuhan I jala
tatadinghon hakristenon holan ala maol ni mandapot jabatan di angka parkarejoanta be. Unang
tapasahat uhum pamaloson tu angka jolma na patupa na roa tu hita. Unang ma tasangkapi na roa tu
dongan jolma, dohot lan angka na asing na so hinalomohon ni Jahowa. Alai naeng marhite angka na
masa di ngolunta (las ni roha nang arsak) lam tau ma hita mamuji Tuhan I marhite na mangulahon
hasintongan dohot lomo ni rohana, Amen!