Evanggelium: Psalmen 95:1-11 Epistel: Johannes 4:20-26 S.Patik: Rom 15:11 Thema: Menyembah Allah Dengan Sepenuh Hati/ Manomba Debata Sian Nasa Roha I. Patujolo Dipartingkian saonnari nungga lam godang be juppaon ta angka na marminggu holan asa patuduhon status Kristen (formalitas), bahkan godang nuaeng laho tu parmingguan marnida manang namangalului dia do musik na natumabo, naboi pasonang roha, godang lampu-lampu songon na meriah. Manang na lao tuparmingguan alai asa boi do pajuppang dohot angka dongan laos marnonangi. Hape sian goar ni minggu ta minggu Okuli na marlapatan “Sai tong mangaranap matangku Tu Jahowa”, jala thema ni minggu ta sadarion, na gabe ojahan marhite jamita ima manomba Debata (Marminggu, mamuji Debata) sian nasa roha. Jala marhite turpuk jamitaon di patorang do tu hita songon dia do parsombaon na sian nasa roha, jala boasa ingkon marsomba tu Debata sian nasa roha, asa lam tandi jala tumangkas tapamanat ma isi hatorangan ni turpuk ta. II. Hatorangan Ayat 1-2. Beta hamu (Marilah)…. Par-Psalmen paingothon jala manogihon asa sude na porsea manomba Debata dibagasan namangendehon Debata (Bersorak-sorai untuk Tuhan). Panogihonon on paingothon paboa ndang olo Debata di panombaon na satonga sian rohana, alai dipangido do asa sian nasa roha, nasa ateate, nasa gogo, nang pingkiran (segenap hati, segenap jiwa, segenap akalbudi, dan segenap kekuatan). Di turpuk on ditogihon par-Psalmen do asa manongtong di ngolu na mamuji Debata sian nasa roha dibagasan lasniroha (sukacita). Ala memang godang dope na marsomba tu Debata alai ndang sian roha dohot lasniroha di panombaonna. Di tingki marsomba tu Debata, ia Debata diparateatehon do angka isi ni hata, roha, nang pingkiran jala diida do sikap ni roha ni jolma i. “ianggo jolma rupa do na diidana, alai anggo Jahowa roha dibagasan do na niidana (1 Sam.16:7c)”. Dibahen i, roha sian parbagasan dohot lasniroha (sukacita) sangat dilibathon do dibagasan panombaon tu Debata. Las niroha gombaran ni emosional ditingki marsomba tu Debata, jadi dibagasan parsombaon ingkon tarida do emosional na sian roha parbagasan dibagasan sukacita, jala emosional i ndang na dibahenbahen (pura-pura), ai di hagigihon Debata do kepurapuraan (kemunafikan), Bandinghon tu Amos 5:2, na dihagigihon Debata do angka ari raya parsombaon dohot pelean nasida tu Debata, siala na so sian ias ni rohana. Dibahen i, dihalomohon Debata do panombaon na sian roha na ias, tulus sian roha parbagasan. Boasa ingkon dibagasan larsniroha mangendehon Debata (bersorak-sorai untuk Tuhan)? Ala Ibana do partanobatoan ni hatuaon (gunung batu keselamatan). Partanobatoan ima inganan parlinggoman sian ragam ni angka panosak (serangan) ni angka musu. Hatuaon (keselamatan) paboahon Debata do dibagasan Jesus Kristus na tuk paluahon sian gomgoman ni dosa, ndang adong dungkon ni Debata. Jadi ala Ibana inganan parlinggoman jala na paluahon jolma sian dosa, ido na mangonjar roha asa marsomba tu Debata sian nasa roha dibagasan na mangendehon Jahowa (bersorak-sorai untuk Tuhan). Ayat 3-7a. Dibagasan turpuk on di patorang par-Psalmen do songon sada panghatindanghonon (pengakuan iman manang kredo), paboa Debata na ta somba ima Debata na Timbul jala Nabolon, namangatasi sude angka debata sileban, na manompa jala manjadihon saluhut pangisi ni portibion sian na soadong gabe adong, langit dohot tano dohot pangisina guru di Ibana do. Termasuk ma bagian ni portibi na paling bagas, dohot punsu ni dolok na paling tumimbo Ibana do namangarajai. Ido umbahen asa mulak muse diarahon nasa jolma ingkon marsomba tu Debata, ala Debata do na marhuaso. Jadi marhite turpuk on disoarahon do asa memang marsitutu do jolma i laho marsomba Debata. “beta hita manungkap, marsinggang, di ayat 6” paboahon praktek sikap marsomba tu Debata memang ingkong totalitas, ndanda holan sian nasa roha alai sikap praktek pardagingon pe ingkon patuduhon na marsomba songon manungkap dohot marsinggang, paboa ido sikap na tutu marsomba tu Debata na sun timbul jala na Bolon i. Jadi diarahon par-Psalmen on do jolma I asa tontong dibagasaan haunduhon laho marsomba tu Debata, ala memang godang dope jolma i na malas marsomba tu Debata bahkan olo terpengaruh marsomba tu debata sileban, na tinompa ni tangan ni angka jolma i, adong na manomba debata molokh (penguasa bagian dalam bumi), debata baal (penguasa punsu ni dolok), dohot debata sileban na asing dope. Alai turpuk on dohot tegas paboahon menolak angka parsombaon tu debata sileban manang ngolu na sinkritisme (penggabungan kepercayaan). Ayat 7b-11. Adong piga-piga sipaingot tu angka jolma na olo marsomba tu Debata. Marsomba tu Debata dibagasan na manangihon hataNa. Sipareon tung mansai ringkot do dibagasan panangihonon di hata ni Debata, asa unang ma na holan mambege sambaing alai ingkon tangi, di Hata ni Debata. Tangi lapatanna ndanda sekedar ditangihon alai sahat tu na mangantusi dohot namangulahon hata ni Debata. “unang ma tangkangi rohamuna songon uju di Meriba, songon ari uju di Masapangunjunan di halongonan”. Situasi ngolu di Meriba dohot dihalongonan i, memang angka bangso i dibagasan roha na marmungutmungut, roha na tangkang, mengabaikan hata ni Debata, hape nungga diida nasida huaso pambahenan ni Debata na paluahon nasida sian parhatobanon, jala mangiring-iring nasida di halongonan. Dibagasan na so satia i bangso i tu Debata mambahen ndang sahat nasida tu tano nabinagabagahon ni Debata i (tano kanaan). Dibahen i dipaingot nasida, asa mulak muse manangihon hata ni Debata, jala dipaholang ma dirina sian angka ulaon na maralo tu lomoniroha ni debata (mangunjuni Debata). III. Refleksi / Hahonaanna 1. Tarsongon diama parsombaon na tutu tu Debata? ima parsombaon na sian roha na ias, parsombaon na autentik (asli, tulen, sah) sian kemurnian ni roha. Jadi parsombaon i partomuan ni tondi ta tu tondi ni Debata, ndanda alani tabo ni musik, manang na marinjaki, manang ruangan na marlapulapu songon bar, songon angka naumposo nuaeng na mandok taboan do marminggu di san ala tabo musik na, ala tabo angka endena, boi marjogeti songon na di bar. Parsombaon ndada laho memuaskan na di roha sambaing, alai manomba Debata ala Ibana do na mangontang hita laho marsomba paboa Ibana do na patuk si sombaon. 2. Parsombaon na dihalomohon ni Debata ima parsombaon na sian angkal ulan (akal budi). Tung dihalomohon Debata do parsombaon sian akal budi, ai molo parsombaon na so sian akal budi digoari ma i “hasomalon na marulakulak na so marlapatan (pengulangan yang sia-sia)”. Ndang dihalomohon Debata angka ende na asal manghuling, manang na so marnada na so pas, angka tangiang na marteletele, manang angka parsombaon na asal jadi. Jadi memang parsombaon na dihalomohon Debata ingkon parsombaon na sian akal budi. Jadi parsombaon ingkon benar-benar mampu merespon dohot manghilala paboa dibagasan parsombaon i Debata do na ta somba, jadi molo pe so ta ida Debata secara kasat mata di jolo (Altar) di jolo ni Debata do hita na marsomba, ido na rumingkot jala ingkon dihaporseai, dipanghilalahon, dohot dipartondihon dibagasan parsombaon (kebaktian), asa tarbahen hita manungkap, marsinggang, jala marsomba dibagasan akal budi. Ido asa disoarahon par-Psalmen mangendehon Debata (bersoraksorai untuk Tuhan) manang aha pe kondisi situasi ta. 3. Ala Debata do na marhuaso, na sun timbul jala na Bolon, jala manongtong do huasoNa ro disaleleng ni lelengna, jala marhuaso patupahon nasa panghirimon, bahkan patupahon ragam ni halongangan (mujizat), dibagasan angka jolma na porsea di Tuhan Jesus, dibahen i unang adong keraguan laho marsomba tu Debata, manang satonga roha, manang leas (anggap enteng). Ingkon benar-benar adong pengakuan iman (kredo) paboa Debata marhuaso dibagasan ngolu ta, asa tarbaen hita marsomba tu Debata sian nasa roha. Unang be ro tu parsombaon tu adopan ni Debata asa di tangihon Debata na tapangido, manang na maila dipahatahata na asing ala so marminggu, alai ro ma tu parsombaon i ala marningot saluhut pambahenan ni Debata di tonga ni ngolu ta. 4. Managihon dohot mangulahon hata ni Debata adalah bagian sian na mangulahon parsombaon na tutu diadopan ni Debata. Molo tangi hita di hata ni Debata, pasti do dapotan hangoluan nang angka silasniroha di pardangingon lumobi dipartondion. Alai molo leas, jala ndang taulahon hata ni Debata, ndang parjambar hita agia aha. 5. Unang be adong na marmungutmungut molo dung diulahon parsombaon tu Debata, diajari do hita molo dibagasan sitaonon asa marpanghirimon dibagasan haporseaon na mangolu di Debata, paboa adong do Debata na gabe haluaon dohot partanobatoan na mangatasi saluhut angka parsorion di ngolu ta. Dibahen i ingkon pos do roha, ndang adong na so tarpatupa Debata, jala rade do sude diadopan ni Debata molo adong panghirimon dibagasan pos niroha. 6. Salah satu aksi parsombaon na boi ta ulahon tu Debata molo taulahon sian nasa roha, ima na tarsurat di Rom 6:12 “persembahkanlah tubuhmu, sebagai persembahan yang hidup, yang kudus dan yang berkenn kepada Allah, itu adalah ibadah yang sejati”. Ibadah yang sekedar menjadi rutinitas sering sekali monoton, menjadi pertemuan sesama manusia saja yang akan menimbulkan kejenuhan, namun ibadah yang sejati adalah ketika kita mengalami tranformasi, sehingga hidup kita seperti yang tertulis dalam Yesaya 40:31 “tetapi orang-orang yang menati-nantikan Tuhan mendapat kekuatan baru, mereka seumpama rajawali yang naik terbang dengan kekuatan sayapnya; mereka berlari dan tidak menjadi lesu, mereka berjalan dan tidak menjadi lelah”. Amen.