Minggu Advent III, 13 Desember 2020 Topik Minggu: “MANGOLU SO HASURAHAN DI HARORO NI TUHAN I” (Hidup tak bercacat pada kedatangan Tuhan)
1. Marende BE. No. 44 : 1
Hamuna na porsea i Sai tomu Tuhan Jesus i Pahehe rohamuna. Jonok do ari pesta ni Saluhut huriaNa i I ma hatutubuNa I pe hehe ma hamuna Baen pantunna lao manjangkon Na manopot hajolmaon 2. Tangiang Pamuhai sian na manguluhon Ibadah 3. Marende BE. No. 45 Hosianna Anak ni, Raja David ro tu hita Baen ture dalanna i, asa bongot tu rohanta. Baen ma gabagaba i, di Tuhanta na ro i. 4. Patik (U: Uluan Ibadah, K: Keluarga) U: Patik ni Debata tu hita di minggu sadarion ima Patik VIII dohot lapatanna, songon on ma didok: Unang ho manangko! K: Dia do Lapatan ni i? U: On do: Ingkon dihabiari rohanta Debata jala ingkon holong rohanta di Ibana, asa unang olo hita mandobo hepeng ni dongan jolma manang mambahen bisukbisuk mangalansumhon boniaga, ingkon sipagandaon ni rohanta do arta ni dongan jala siramothonon. Ima patikNa. Rap mangido gogo ma hita sian Tuhan Debata laho mangulahon patikNa. U+K: Ale Tuhan Debata sai pargogoi ma hami mangulahon na hombar tu patikMi. Amin. 5. Marende BE. No. 686 Ramun do au di joloMi, gok dosangki urasi au O, Jesus, birubiru I, dison do au patau ma au. 6. Manopoti Dosa (U: Uluan Ibadah, K: Keluarga) U: Tatopoti ma dosanta tu Debata, rap martangiang ma hita: U+K: Ale Amanami jala Debatanami, na di banuaginjang, Pargogo na so hatudosan! Pardengganbasa do Ho, jala ro di saleleng ni lelengna do asi ni rohaM. Sai marpamuati ma rohaM di hajahatonnami, jala sai unang be ingot angka dosanami; ai jotjot do hami mardosa maradophon Ho, jala jotjot do husungguli hami rimasMu marhite sian pangalaosionnami. Unang alang asi ni rohaM, sai urupi ma hami, Ho ale Tuhan Debata hatuaonnami, palua hami, jala sesa dosanami, alani AnakMu, Tuhan Jesus Kristus, Tuhannami, Amen. U: Tatangihon ma bagabaga ni Debata taringot tu hasesaan ni dosanta: Songon sintong na mangolu Ahu, ninna Tuhan Jahowa, tung na so lomo do rohangKu mida hamatean ni parjahat, na lomo do rohangKu mida hamumulak ni parjahat i tumadingkon dalanna, asa mangolu ibana. Hasangapon ma di Debata na di ginjang! Amen 7. Marende BE. No. 39 Beha ma panjalongku Di Ho O Tuhanki? Beha ma panomungku Di Ho o Rajangki? Sondangi ma rohangku na holom na bodo Ai naeng patupaonku Las ni rohaM di Ho 8. Epistel (U: Uluan Ibadah, K: Keluarga) U: Epistel di hita di minggu sadarion sian Psalmen 126: 1-6, marsorinsorin ma hita manjaha: Ende hananangkok. Di na mulak tinogihon ni Jahowa angka na tarbuang sian Sion, doshon halak na marnipi do hita. K: Gok parengkelon ma uju i pamanganta, jala marolopolop dilanta, martaringot ma uju i di tongatonga ni angka parbegu: Godang ma na binahen ni Jahowa tu nasida! U: Godang ma tongon na binahen ni Jahowa tu hita, jadi marhilas ni roha ma hita. K: Sai togihon ma mulak, ale Jahowa, angka na tarbuang sian hami, songon angka sunge di tano tungkan dangsina. U: Angka na mariluilu laho manabur, marolopolop do sogot laho manggotil. K: Mardalandalan pe ibana huhut tangis pausungusung boni sisaburhononhon, ro do ibana sogot marolopolop mangusung angka tibalanna. Amen. 9. Marende BE. No. 591 Boru Sion las roham las roham Jerusalem. Ai na ro do Raja mi padamehon ho tongtong Boru sion las roham las roham Jerusalem. 10. Manghatindanghon Haporseaon: Tahatindanghon ma haporseaonta i: Au Porsea..... 11. Marende BE. No. 743 O Tuhan togu-togu ma au, tu dalan lomo ni rohaMi, Raphon Ho sonang mardalan au, nang rahis maol sidalananki, TondiMi baen manggohi au on, Margogoihon au naposoMon, Pasangap Ho dingolungkon, Paima sahat tu surgo au on. 12. Jamita: 1 Tessalonik 5 : 16-24 “MANGOLU SO HASURAHAN DI HARORO NI TUHAN I” (Hidup tak bercacat pada kedatangan Tuhan) Mangolu so hasuraharan di haroro ni Tuhan I; ”mangolu so hasurahan” (hidup tak bercacat), ndang adong jolma na singhop di jolo ni Debata, tung saluhutna do mardosa, holan asi ni roha ni Debata sambing nama sipangasahanonohon di ari haroroNa i. Alani di minggu advent na patoluhon on dipaingot do huriaNa asa unang mangasahon gogo papudi uhum, mangulahon hakorason, angka hajahaton, ai ido tihas na so haubatan di adopan ni Debata. Hajongjongan ni huria laho patupa haimbaruon, maningtinghon taon parasinirohaon ni Tuhan I na paluahon sian gonggoman ni dosa. Ibana do sitompa hita, na manarihon ngolunta jala laos Ibana do na manjanghon hita songon “anak na mago I”, gabe anakhonNa muse manjalo harajaonNa I, laos Ibana na mangaloas hita so hasurahan di harorona na paduahalihon i. Turpuk on ima paingothon huria asa tangkas dungo manangam haroro ni Kristus I (5:1-11); digombarhon songon panangko borngin do haroro ni Tuhan I (ay.2), “ari ni Tuhan”, ndada na manaringoti partingkian I, alai di tingki na leleng angka musu ni Debata di taluhon (Jesaya 2:12-21), molo didok halak dame jala mara so adong, disi ma tompu tahop hamagoan I (ay.3). Alai ari I ndang mangonai tu angka na porsea songon panangko na hatiuran ari, ala nunga dijalo haluaon, ai ndang dipadiri Debata gabe sirimasan, alai ala naung dungo marhite haroro ni Tuhan Jesus Kristus (ay.4-9). Halak na porsea manjalo haluon na naeng ro I (ay.10). Alani do turpuk on angka sipaingot parngoluon do, asa tangkas mananda angka na manghalojahon dohot na manguluhon marhitehite Tuhan I, ro di angka na paingothon hamu (ay.12). Huhut paingothon angka na so maradat, mangapuli siotik roha, manganju angka na gale, marlambas ni roha dompak saluhutna. Mamatahon asa unang adong na mambaloshon na roa balos ni na roa, mampareahi angka na denggan tu saluhut halak (ay.15). Ido na pinaandar ni parpesalmen I, haluaon I doshon halak na marnipi, gok parengkelon pamangan, marolopolop angka dila martaringot di tongatonga ni angka parbegu mandok: “Godang ma na binaen ni Jahowa tu nasida”. Tutu do godang ma na binahen ni Jahowa tu hita, jadi marhilas ni roha ma hita. Debata do na manogihon sian habuangan I, jala angka na mariluilu laho manabur, marolopolop do sogot laho manggotil, mardalandalan ibana huhut tangis pausungusung boni sisaburhononhon, ro do ibana sogot marolopolop mangusung angka tibalanna (Psalmen 126:1-6). Mangolu so hasurahan di haroro ni Tuhan I, ingkon manghabengethon angka sitaonon, angka sahit na rogom, angka hamaolon na tabolus di portibion laho papitahon haporseaonta di haroroNa i. Parjolo, Manongtong ma hamu martangiang. Diigil do sian na porsea asa sai tongtong marlas ni roha (bersukacita), ala las ni roha I do pasuang hosa loja (Pil.4:4). Ai loja do hita saleleng di portibion mangadopi ragam ni hamaolon, alai molo tongtong marlas ni roha ido mangubati hita. Dungkon ni I ima ngolu partangiangon (berdoa), ai tangiang do dalanna asa taruli hita. “Unang mansadi” (adileiptos- tetaplah), ndang marnaloja, ndang mansadi, ndang so, torus manorus martangiang (Luk.18:1; Rom 12:12). Martangiang ima manongtong raphon Debata laho manjalo asi ni roha dohot pasupasuNa. Molo so martangiang be halak na porsea na mate nama haporseaon dohot panghirimon ni i. Dungkon I I ima ringgas mandok mauliate (mengucap syukur) siala saluhutna, ai I do dipangido Debata di bagasan Kristus Jesus. Dungkon ni, unang mangintopi Tondi I, ai girgir do anggo tondi alai gale do ia daging. Ai torop halak na manghaporsea I hagogoon dohot silehonlehon ni Tondi I (1 Kor.12:7-10, 28-30). Ulaon ni Tondi I dipatorang (di Joh.14:26; Ul.1:8; Gal. 5:22) Unang lea dipanurirangon, bagabaga parnidaan tu jolo aha na naeng masa. Manangkasi saluhutna, na denggan I (yang baik) do sitiopon, jala sipasidingon do nasa rumang ni angka na roa. Paduahon, Diparbadia I Debata pardame i hamu gabe sun denggan. “Diparbadia” (menguduskan), habadiaon ima na pinatupa ni Debata di ngolu ni jolma. Debata do na mangaramoti (memelihara) tondi (roh), roha (jiwa), nang daging (soma-tubuh) asa ias so hasurahan di haroro ni Tuhanta Jesus Kristus. “So hasurahan” (amemptos/preserved blameless-tidak bercacat-tidak bisa disangkal, diawetkan tanpa cacat). Ala Debata do silehon ngolu, Ibana do Parmahan bolon I, siramoti jolma na hinonghopNa, jala ndang adong na boi “menyangkal/menggagalkan” manang ise pe na di portibion di haroroNa i. Alani ndang boi ruhut portibi, aturan ni jolma mandok tu donganna jolma hasurahan, rumar manang martihas, ai ndang adong parnampunaon ni jolma tu donganna jolma, so holan Debata nampuna jolma I sandiri. Haposan (faithfull) Ibana na manjou (memanggil), sai pasautonNa I do i. Tidak perlu diragukan/dikuatirkan, ai panjouonNa I sintong do I jala sihaporseaon, molo mandokhon Ibana manjadi do. Ai saguru di Ibana do saluhutna hombar tu asi ni rohaNa na sohadodoan i. Patoluhon, Mangolu so hasurahan di haroro ni Tuhan I, di Advent patoluhon on paingothon huria asa parade diri jala dungo managam haroro ni Tuhan Jesus na paduahalihon i. Ingkon tangkas mangolu di bagasan partangiangon na sintong, unang ma sipaulaula, alai partangiangon na martaridaan ma tu na humaliang. Debata do na mamparbadia huriaNa saleleng mardalan di portibion asa dao sian hagangguon, hamaolon, na sai mangharingkoti na di dirina be, hagiothagiot ni portibi na boi manegai pardalan ni Barita Nauli i. Marhite Advent na patoluhon I nunga ingkon tarida di sikap, pangalaho, etika moral tanda naung hinonghop ni Tuhan Jesus. Unang sarombang be dohot angka na di portibion, alai ingkon lam imbaru, pauba pingkiran dohot roha laho mangeahi hamajuon. Huria I ingkon mardalan di haimbaruon (transformasi) sian ganup angka partingkian. Marhite Sinode Godang HKBP 65 nunga tarpillit be Puncuk Pimpinan na imbaru di periode 2020-2024 on (Lima pimpinan dohot 32 praeses), na manguluhon hurianta di sandok Indonesia on dohot di Portibion, mangulahon Hurianta asa gabe pasupasu tu portibion. Sai dipasupasu Tuhan Debata ma huriaNa asa lam mangerbang angka panghobasion I marhataridaan tu na humaliang, gabe huria na marparsaon na denggan, marpanindangion na tangkas, jala na marpanarihon tu na humaliang, patupa hadameaon, hapistaran, hahipason, las ni roha, dohot na marhasintongan di bagasan Kristus. Amen.. 13. Marende BE. No. 40 Las be ma rohamuna Na igor roha i Naung ro do Rajamuna Mamboan tua i Ndang marpanggortap i Anggo di haroroNa Alai tuk do gogoNa Padaohon jea i 14. Tangiang Ale Amanami, Endehon Amen 3x