PARTORDING IBADAH MINGGU KELUARGA

HKBP DISTRIK XI TOBA HASUNDUTAN

MINGGU JUBILATE
(Marolopolop tu Debata sandok tano on)
Minggu, 03 Mei 2020
TOPIK: Marolopolop ma tu Debata (Ev. 1 Kronika 16:31-36 ; Ep: Epesus 5: 15-21)

I. IBADAH (U: Uluan, K: Keluarga)

1. Marrende BE No. 565: 1+3 “Las rohangku lao mamuji”
♫♪♫
Las rohangku lao mamuji Debata Parholong i
Songon bunga na mangerbang dina binsar ari i,
Arsak dosa haporsuhon, mago dibaen asiMi
Las ni roha na manongtong lehon di au Tuhanhi
♫♪♫
Debata Parholong roha na manesa dosangki.
Ndang tarbaen so las rohangku lao mamuji asiMi.
Sai ajari sude hami mangulahon holong i
Asa gok las rohanami di bagasan Tuhan i.
2. Tangiang Pamuhai (Jongjong)
U= Marolopolop tu Debata ma ho, ale sandok tano on! Endehon hamu ma hamuliaon ni
GoarNa marmulia bahen hamu pujipujianNa. Dok hamu mandok Debata: Tung na songkal do
angka pambahenanMu! Binahen ni hinatimbul ni gogoM ingkon marsomba tu Ho angka
musuM. Haleluya!
K= Mangendehon “Haleluya”
U= Martangiang ma hita: Ale Tuhan Debata, Pargogo na so hatudosan! Na mandok mauliate
do hami tu Ho, ala dipapatar Ho dohot tu angka sipelebegu AnakMu Tuhan Jesus Kristus. Sai
asi ma rohaM, sai paian ma di hami ro di pinomparnami Barita na Uli i, jala pararat ma i tu
saluhut bangso, asa binsar sondang ni hasangaponMi dohot di angka na hundul di haholomon
dohot na nilinggoman ni hamatean marhitehite Anak haholongan ni rohaM, Tuhan Jesus
Kristus, Tuhannami. Amen. (Hundul)
3. Marende BE No.562: 1 “Hamuna ale jolma”
♫♪♫
Hamuna ale jolma sai puji Debata.
Hamu na ale jolma sai puji Debata
4. Patik V dohot Lapatanna:
U: Ingkon pasangaponmu do natorasmu asa martua ho, jala leleng mangolu di tano na
nilehon ni Jahowa Debatam di ho!
K: Dia do lapatan ni i?
U: On do: Ingkon dihabiari rohanta Debata jala ingkon holong rohanta di Ibana. Asa unang lea
rohanta mida natorasta dohot mida angka rajanta rodi angka natuatua. Ndang jadi paroonta
rimas nasida. Ingkon pantun do hita jala ingkon holong rohanta tu nasida. Sioloan do nasida
jala sisubuton do rohana. Ido sahatna, rap mangido gogo ma hita tu adopan ni Debata laho
mangulahon PatikNa i
Sude: Ale Tuhan Debata sai pargogoi ma hami mangulahon na hombar tu PatikMi. Amen.
5. Marende BE No.683: 2 “DiadopanMu Jesus”
♫♪♫
Diadopanmu Jesus, marsomba au huhut tungki.
Lao manopoti dosangki, di adopanMu Jesus.
6. Manopoti Dosa
U: Ale Tuhan Debata dibagasan unduk dohot serep ni roha, ro do hami tu adopanMu
manopoti mansai godang dosa naung huulahami dibagasan saminggu on.
K: Sai asi ma rohaM jala sesa ma dosanami maradophon natuatuanami suang songoni nang
maradophon ianakkonami.
U: Urupi ma keluarganami on, ale Tuhan. Asa margogo hami mangalo nasa dosa jala dongani
hami mangulahon angka na denggan. Asi ma rohaM, sesa ma sude dosanami alani Jesus
Kristus Sipalua hami. Amen.
7. Marende BE. No. 190: 2 “Las rohangku situtu”
♫♪♫
Las rohangku situtu ai parjambar au tutu
Di na denggan sasudena, pinarbaga ni Debata
Di sude na burju i mangihuthon Jesus i
8. Manjaha Epistel Epesus 5: 15-21 (Responsoria)
U: Tajaha ma Hata ni Debata turpuk ni ari Minggu onTurpuk di minggunta sadarion Epesus 5:
15-21. Antong manat ma hamu mamereng manangkasi parulaonmuna; songon angka na
marroha, unang ma songon angka na hurang roha.
K: Parhaseang hamu ma tingki, ai ari hasusaan do nuaeng.
U: Dibahen i, unang ma gabe maoto hamu; alai antusi hamu ma manang dia lomo ni roha ni
Tuhan i.
K: Unang ma mabuk hamu bahenon ni anggur, ai hamagoan do di bagasan i; alai gok Tondi
ma hamu!
U: Hatahon hamu ma sama hamu angka ende psalmen, angka ende pujipujian dohot ende
partondion; endehon jala puji hamu ma Tuhan i di bagasan rohamuna.
K: Manongtong ma hamu mandok mauliate siala saluhut tu Debata Ama, di bagasan goar ni
Tuhanta Jesus Kristus.
U: Masioloan ma hamu sian biar ni rohamuna mida Kristus. Ido sahatna. Martua do angka na
tumangihon Hata ni Debata jala na umpeopsa. Amen.
9. Marende BE No. 443: 1-2 “Dung Tuhan Jesus”
♫♪♫
Dung Tuhan Jesus nampuna au songgop dameNa biarhu lao
Taripar gogo ngoluNa i, nasa dosangku naung sae do i
Tabaritahon holongNa i, didia Tuhan tudoshon i?
Tuk manumpahi, tarlobi da? Sasada Jesus, pinuji ma.
Jongjong
♫♪♫
Di Ho ngolungku, las rohangki jumolo Jesus siluaMi.
pangiringonMu, tolongMu i, mangalo dosa nang rohangki
tabaritahon, d.u
1
10. MANGHATINDANGHON HAPORSEAON
U: Tahatindangkon ma haporseaonta i, songon na hinatindangkon ni donganta sahaporseaon
di sandok portibi on. rap ma hita mandok:
K: Ahu porsea….d.u (hundul)
11. TINGTING HURIA
12. Marende B.E. No.564: 1-2 “Las ma rohanta di Tuhanta Debata”
♫♪♫
Las ma rohanta di Tuhanta Debata, las ma rohanta di Tuhanta Debata
Las ma rohanta di Tuhanta Debata, haroroan ni hagogoon i
♫♪♫
Parasiroha do Jahowa Debata, parasiroha do Jahowa Debata
Parasiroha do Jahowa Debata, parasiroha ma nang hita on
13. JAMITA
a. Martangiang
b. Manjaha Turpuk Jamita sian 1 Kronika 16: 31-36 (holan na manguluhon ma na
manjahaon)
c. Hatorangan ni Jamita
“Marolopolop ma tu Debata (Bersoraklah bagi Tuhan)”
Uluan : Horas jala selamat hari Minggu ma di hita saluhutna!
Keluarga : Jubilate! Marolopolop tu Debata sandok tano on!
Di hamu dongan sahaporseaon, molo disungkunhon tu hita? Aha do na boi mambahen ho
marlas ni roha jala marolopolop di ngolu on? Adong na mandok, bah molo godang hepeng jala
gok arta, marolopolop daging nang tondiniba, ninna na deba. Alai adong do muse deba na
mandok, bah molo hasea angka gellengniba, nunga tung marolopolop tondiniba. Ianggo di
angka ruas partani marolopolop jala mariaria molo denggan jala godang gotilon (panen). Di
angka ruas partigatiga manang na marboniaga, marolopolop jala mariaria molo godang
pangomoan (keuntungan). Ido jotjot jala somalna, jolma na marlas ni roha jala marolopolop
holan ditingki sonang jala tabo parngoluon. Alai sada na gabe sipahusorhusoron, boa do tutu
hita, keluarganta, dohot sude natinompaNa i boi marolopolop hape mangadopi hagogoton
dohot hadangalon portibi on nuaeng?
Huria ni Tuhanta dibagasan Jesus Kristus, marhite turpuk Jamita Minggu Jubilate sadari on
(Marolopolop tu Debata sandok tano on), dijou jala dipangkulingi do hita asa mamuji
pasangaphon Debata sian nasa roha dohot pingkiranta alani balga ni pambahenan ni Debata di
ngolunta on. On ma dipaandar dibagasan turpuk Jamita sadari on. Di masa ni Raja David
hatiha i, mansai balga do pambahenan ni Debata marmudumudu Bangso Israel di na laho
papindahon Poti Parpadanan ni Jahowa i mulak tu Jerusalem. Ai sanga do poti i ditaban halak
Filistin hatiha i sadia gok lelengna. Tontu ndada ulaon na mura jala neang boi merebut kembali
Poti Parpadanan i. Alai mangasahon huaso dohot pangurupion na sian Debata, Raja David boi
manaluhon halak Filistin. Jala di ujungna, marhite hagogoon ni Debata boi do tarpalua Poti
Parpadanan i sian tangan ni halak Filistin jala diboan ma i mulak tu Jerusalem (1 Tawarikh
1:26). Pangurupion ni Debata mambahen gabe boi mulak Poti Parpadanan i tu Bagas Joro di
Jerusalem, tama do mandok mauliate bangso i tu Debata, jala marolopolop, mariaria huhut

2
marlas ni roha, marhite pujipujian nang angka tortor dipasahat tu Debata. On ma sada
pengalaman na mansai arga rap dohot Debata. Jala marhite perjuangan iman na luar biasa ni
adopan ni Bangso Israel, ndada lupa nasida tu Jahowa siala pambahenanNa na balga i.
Antong, di hamu angka dongan na hinaholongan, aha ma na boi siputikonta marhite turpuk
sadarion?
a. Sude natinompaNa i marlas ni roha jala marolopolop manghatindanghon “Jahowa do
Raja” (ayat 31-32). Ibana do Raja sigomgom saluhut. Jala sude jadijadianNa ingkon
marsomba di joloNa. ”Sude na marhosa ingkon mamuji Jahowa! Halleluya!” (Psalm.
150: 6)
b. Marolopolop siala sasada Jahowa do Panguhum ni tano on (ayat 33). Ibana do
Panguhum na tigor (adil). Di Ibana do huaso manguhumi portibi on. Sialani i ingkon
Jahowa Debata do sisombaon jala sioloan. “Oloi hamu ma Jahowa dohot biar ni roha,
jala marolopolop ma hamu, huhut angka hitir” (Psalmen 2:11).
c. Mandok mauliate tu Debata, ai na basa jala parasiroha do Ibana ro di saleleng ni
lelengna (ayat 34). Molo mandok mauliate manang bersyukur hita di ngolunta on,
ndada holan di tingki sonang manang ditingki las ni roha, alai mandok mauliate ma hita
di tingki mangadopi parungkilon nang sitaonon. Ido umbahen na didok di 1 Tes 5:18
“Mandok mauliate ma hamu siala saluhutna” (Indonesia: mengucap syukurlah dalam
segala hal) Boasa? Ala marhite keadaanta na dangol jala susah on, boi tadapot jala
taputihi angka hal-hal na positif di ngolunta. Isarana, ditogihon hita asa mangolu
dibagasan hahipason, ias dirinta, mangula jala marsaor di tonga ni bagasta be laho
menghargai hangoluanta, dln.
d. Jahowa Debata do hatuaon dohot sipalua, jala na badia do ianggo goarNa i (ayat 35).
Ibana do mual ni hatuaon dohot haluaon. Alani i, ganup angka na porsea i ingkon
marlas ni roha jala marolopolop dibagasan Tuhanta i. “Marlas ni roha ma hamu
tongtong di bagasan Tuhan i!” (Pilippi 4:4). Jala Debata na badia do Ibana. Alani ingkon
dibagasan habadiaon do hita manomba Debata. Unang marlaok pamujionta i.
e. Rim ma sude manongtong mamuji pasangaphon Jahowa Debata. (ayat 36). Rap
sauduran marparsaoran dohot Debata. Ingkon sahata saoloan jala saurdot mandok
“Pinuji ma Tuhan i, Amen!”. Jala pamujion i ingkon manongtong, na marlapatan, ndang
mansohot manang marsanggasangga.
Di hamu angka dongan, saluhutna i boi tarpatupa hita molo sai tongtong hita marningot di
angka pambahenan ni Debata sian ariari naung salpu sahat tu tingki on. Halak na Marjubilate
(Marolopolop) ima halak na so mangkalupahon denggan basa ni Jahowa. Amen (martangiang)
14. Marende B.E. No. 435: 1+3 “Marolopolop tondingki” (Pasahathon Pelean)
♫♪♫
Marolopolop tondingki, ai naung ditobus Jesus i
Hamu sude bege ma i, sai las rohangku mandok i
Sonangni tingki i, dung jumpang Jesus Tuhanki
TondiNa mangajari au, tarbaen marlas ni roha au
Sonang ni tingki i, dung jumpang Jesus, Tuhanki

3
 ♫♪♫
Tu Jesus sahat ngolungki saleleng ni lelengna i
Rap doho au endehon ma endengku na imbaru da
Sonangni tingki i, d.u

15. Tangiang Pangujungi: Ale Amanami - Amen, Amen, Amen.

Pdt. JPPL