PARTORDING NI PARMINGGUON di JABU

Di Pesta Parningotan Hananaek ni Tuhan, Kamis, 21 Mei 2020

TOPIK: MAMARITAHON BARITA NAULI TU NASA NATINOMPA
=============================================================
1. PAMUHAI:
U : Huria na hinaholongan ni Tuhan Jesus Kristus, sadari on marpungu do hita
di bagasta laho manghalashon Pesta Parningotan di Hananaek ni Tuhan
Jesus tu banua ginjang. Didok Tuhan Jesus do di Johannes 14 : 1 – 3:
“Unang ma bonsa rohamuna! Porsea ma hamu di Debata, jala porsea ma
hamu di Ahu! Torop do inganan di bagas ni Damang. Aut so i, dohononHu ma
tu hamu: Na laho do Ahu mangarade inganan di hamu? Jala laho pe Ahu
mangarade inganan di hamu, sai mulak do Ahu mangalap hamu, asa rap
hamu dohot Ahu!
Antong di bagasan las ni roha beta ma hita sumombahon pujipujian tu
Debata. Marende ma hita:
2. Marende BE No. 99 : 1 “O ULUBALANG NA GOGO”
O ulubalang na gogo, songon sadari on do Ho manaek tu hasangapon.
Naung sidung do ulaonMi, na ringkot patupaonMi humophop hajolmaon
Sabam, tongam do Ho muli tu na uli marhabangsa di siamun ni Jahowa.
3. VOTUM – INTROITUS – TANGIANG:
U : Marhitehite Goar ni Debata Ama dohot Goar ni AnakNa Tuhan Jesus Kristus
dohot Goar ni Tondi Parbadia, na tumompa langit dohot tano on. Amen.
(Parhalado partohonan).
U : Songon on do didok Tuhan i : BahenonKu do sogot na monang i rap dohot
Ahu hundul di habangsangKi, songon Ahu na monang i jala hundul rap
dohot Damang di habangsaNa i. Haleluya.
R : (Mangendehon): Haleluya, Haleluya, Haleluya!
U : Martangiang ma hita: Ale Tuhan Jesus Kristus, Anak ni Natumimbul i,
naung manaek tu banua ginjang jala hundul tu siamun ni Debata! Sai suru
ma Tondi Parbadia tu rohanami, asa Ibana tongtong mangajari rohanami.
Lehon tu hami parhalado na burju tu hataM, pargogoi ma nasida, asa
tongtong diradoti nasida ulaonna jala asa marsahala nasida mangalo bisuk
ni sibolis i, asa tung rarat harajaonMu di hasiangan on, paima sude musuM
peak di toru ni patMu. Sai pamonang ma hami saluhutna manaluhon dosa
dohot hamatean marhitehite Ho, ai Ho do na mangolu dohot na
manggomgomi rap dohot Ama i dohot Tondi Parbadia. Amen.
4. Marende BE No. 98: 1 “NAUNG MANAEK DO HO”
Naung manaek do Ho lao tu surgo do.
Ale Jesus Rajanami, Ho do ihuthononnami. Ho partogi i, lao tu surgo i.
5. PATIK:
U : Patik ni Debata sihangoluhonta di Pesta Parningotan di Hananaek ni Tuhan
Jesus sadari on, tarsurat di Heber 10 : 23 – 24. Momos ma tatiop
 panghirimon na taparhatopot i, ai haposan do na marbagabagahonsa!
Masiantoan ma hita, masipajujuan tu haholongon dohot tu angka ulaon na
denggan!
Antong rap mangido gogo ma hita sian Tuhan Debata.
R : Ale Tuhan Debata, sai pargogoi ma hami mangulahon na hombar tu
PatikMi. Amen.
6. Marende BE No. 174: 1 “TOROP DOPE NA SIAT I”
Torop do pe na siat i di hasampuran rea. I pe hamu pardosa i sai olo ma
porsea.
Ai Debata manjou hamu tu hasonangan situtu. Hamu, hamu dijou Debatamu.
7. TANGIANG PANGIDOAN DOHOT BAGABAGA NI DEBATA:
U : Ale Tuhan Jesus Kristus, Anak ni Natumimbul i, naung manaek do Ho tu
banua ginjang jala hundul tu siamun ni Debata! Ho do na pinabangkit ni
Debata gabe Raja di atas ni saluhut. Dipatutoru Ho diriM tu toru ni saluhut,
alai gabe tumimbo Ho sian sasude jala maruli Goar, asa lompit saluhut nasa
ulu ni tot laho marsomba tu Ho, jala ganup pamangan marhatopothon: Ho
do Tuhan. Ho do na mangungkap dalan tu banua ginjang, gabe sintua ni
malim na mangondihon hami tu Debata. Na maporus do hami nuaeng tu
adopanMu, mangasahon asi ni rohaM. Sai unang tulak hami, sai jalo ma
tangiangnami. Ale Tuhan Debata, Ama ni Tuhannami Jesus Kristus, Ho do
Debata pargogo na so hatudosan, sitompa nasa na adong, paruhum na tigor,
na manguhumi jolma manisia! Na ro do hami tu joloM manopoti dosanami,
angka na huula hami marhite sian pangalaosionnami di PatikMu, i ma
marhite sian tubutubu ni rohanami na roa i, nang sian pangkataionnami na
so ture, ro di pangoloionnami di hisaphisap ni rohanami. Na tama situtu do
hona uhum hami ala ni dosanami i, alai na tarsolsol bagi do hami nuaeng
ala ni i. Asi ma rohaM di hami, ale Debatanami. Pardengganbasa jala Parasi
roha do Ho ala ni Anak haholongan ni rohaM, Tuhan Jesus Kristus
Tuhannami. Sai sesa ma dosanami saluhutna, jala suru ma Tondi Parbadia
tu rohanami be, asa tarbahen hami mangoloi Ho di bagasan hatigoran dohot
habadiaon, gabe sahat hami tu hangoluan na so ra suda, na pinarbagabagaM
di angka na porsea di AnakMu Tuhan Jesus Kristus, Tuhannami. Amen.
Bagabaga ni Debata : Adong do di hita sintua ni malim na songon i, na
hundul di siamun ni habangsa ni hatongamon di banua ginjang. Dibahen i
tarbahen Ibana do pangoluhon ro di ujungna angka na sandok ro tu Debata
marhitehite Ibana; na mangolu do Ibana tongtong, asa ditangianghonnasida.
Hasangapon ma di Debata na di ginjang!
R : Amen.

8. Marende BE No. 458: 1 “BARITA NA UMULI I”

1
 Barita na umuli i, na sian Tuhan Jesus. Sai i do margogoihon au, nang arsak pe
hubolus.
On mangapuli rohangki : Sai Tuhanki na basa i do donganhi
9. E P I S T E L:
U : Hata ni Debata turpuk di Pesta Parningotan di Hananaek ni Tuhan Jesus
sadari on, ima na tarsurat di Heber 11 : 1 – 6 (dijaha ma) Ima sahatna.
Martua ma angka na tumangihon Hata ni Debata jala na umpeopsa. Amen.
10. Marende BE No. 541: 1 “NA MULAK JESUS I”
Na mulak Jesus i di dihasangapon i. Mangalap nabadia i, tu hasonangan i.
Hutundalhon ma, na di pudingki. Jesus ma haposanki, di haroroNa i.
11. MANGHATINDANGHON HAPORSEAON:
U : Tahatindangkon ma haporseaonta i, songon na hinatindangkon ni donganta
sahaporseaon di sandok portibi on. Rap ma hita mandok: Ahu Porsea…..
12. Marende BE No. 522: 1 “SURGO I SAMBULONTA DO I”
Surgo i sambulonta do i, ndang adong be siaeon disi.
Na mamuji tongtong na disi, pinalua ni Tuhanta i.
Surgo i, surgo i, ndang adong be siaeon disi.
Surgo i, surgo i, surgo i, ndang adong be siaeon disi.
13. JAMITA: Markus 16 : 15 – 20
Suraon do adong sian tongatonganta nuaeng na manghilala na so dohot Ibana
dijou Jesus mamaritahon goar ni Jesus di partingkian nuaeng? Molo adong dope
na songon i, ringkot do marsiajar sian angka sisean ni Jesus na sampulu sada i
na, dung manang atik pe dipinsang Jesus, tong borhat. Molo angka siseanNa na
parjolo i borhat dung dipinsang siala ganggu dohot jogal roha di haheheon ni
Jesus, suraon do hita halak Kristen Batak dipinsang Ibana nuaeng ala ndang olo
dope hita borhat mamaritahon barita na uli marhite hata nang pambahenanta na
gok holong i? Ndang sigolomgolomon ni hita naung porsea dohot pinaluaNa
barita taringot tu Jesus i. Ingkon pasahatonta do tong tu na asing barita na uli i.
Ido umbahen didok “ Laho ma hamu ....” Hata “laho” ima hata parsuruon na
mansai arga jala gabe hata haposan do i di hita angka na manjalo hata i. Asa
ndada holan disuru laho asa mansai tangkas do siulahonon dipasahat Tuhan
Jesus ima “jamitahon hamu ma Barita Nauli”. Jadi laho pe hita ndada mamboan
na di hita alai Barita Nauli sian Tuhan i do ima HananaekNa tu Banua Ginjang
jala hundul di siamun ni Debata. Hata ‘hamu’ ima tu ganup jolma na olo
manjamitahon hata i. Jamita Barita Nauli ima gabe pasupasu sahat tu
pinomparta sogot. Jala Barita Nauli i do na mambahen hita hot di adopan ni
Tuhan i ro di salelengna. Barita Nauli do na mamboan hita halak Batak tu
hamajuon marhite angka missionaris na parjolo. Ra boi do tabayanghon
nuaeng, songon dia ma hita molo sanga do ndang dijalo angka ompunta na
parjolo i Barita Nauli i. Alani do sasintongna hita halak Batak ndada boi

2
mangalupahon sejarah Barita Nauli dohot angka parbarita nauli. Ndang boi be
hita sirang sian i. Alani sipata na parpudi on boi do gabe marbalik angka na
masa. Nunga tading be Barita Nauli alani angka haporluan ni ngolu siganup ari.
Ditonai Jesus Kristus asa borhat hita nuaeng mamaritahon barita na uli tu
sandok na tinompa Asa malua na porsea jala tardidi, ndang taruhum na porsea.
Ihut tu angka na porsea jala na tardidi i do angka tanda halongangan di ngolu
nasida (ayat 17-18). Ndang holan asa malua angka na porsea i di ari
panguhuman ia na binagabagahon ni Jesus tu angka siseanna na mamaritahon
barita na uli i. Alai dohot do na mangihut on idaonnasida: "Ihut tu ngolu nang
ulaon ni na porsea di Jesus Kristus na mangolu dohot mangula di bagasan
goarNa do angka tanda halongangan na mangihut on: Parjolo, di bagasan goar
ni Jesus pabalihon angka tondi na hodar sian tongatonga ni halak dohot
masyarakat na niingananna. Paduahon, mangkatahon angka hata na imbaru.
Patoluhon, boi manaluhon ulok, jala malua sian angka rasun na pamatehon
jolma di portibion. Paopathon, tuk pamalumhom na marsahit marhite na
mangampehon tangan tu na marsahait. . Alai laos boi do i taantusi di
pangantusion na mansai maju nuaeng, i ma mangalo angka ideologi na
patutoru dohot pasiaksiak ngolu ni jolma nuaeng on (so marimbar na mansai
borat di Indonesia on, i ma manaluhon penyalahgunaan narkoba), isara
ideologi hatop mamora marhite na manggadis Narkoba. Dohot do tahe
mangondihon jolma sian angka pihak-pihak di duru ni jolma di portibion na
naeng pamatehon jolma i, mangalo angka rasun na mambahen mate jolma
(hasesega ni aek, sipanganon, udara, senjata-senjata kimia dohot angka na
mangarsuni na asing). Nang mangantusi gejala sahit na somal dohot
mambahen ubat na boi pamalumhon sian i ihut do tu ngolunta. Ndang holan
sahit pamatang, alai dohot do angka sahit roha boi pamalumon ni na porsea di
Jesus Kristus i, marhite huaso ni Debata nang marhite angka ubat medis. Ihut
do di ngolu nang ulaon nasida angka tanda, songon Jesus na mamaritahon
barita na uli i digohi tanda halonganan sian bona sahat tu ujung.
Mansai ringkot do i botoon, tiopon, haposan, ulahonon dohot patuduhonon ni
ganup sisean ni Jesus di tingki on, di partingkian ni hajolmaon na lam maju
situtu nuaeng on, i ma na lam mangasahon parbinotoan ni jolma dohot
pasidingkon huaso di duru ni dirina, asa lam hiras roha nasida mamaritahon
barita na uli ni Jesus Kristus i. Asa, mansai bidang, komprehensif do
panghorhon ni molo borhat angka sisean ni Jesus nuaeng on mamaritahon
barita na uli. Ndang holan haluaon sian uhum parpudi dapot ni na porsea jala
tardidi dipalumehon tu nasida na porsea, alai dohot do hatauon nasida
manaluhon angka na pasingkorsingkorhon dohot pamatehon ngolu ni jolma di
portibion, dohot do pamalumhon angka sahit, sude marhitehite goar ni Jesus
lehonon ni Jesus tu hita.

3
 Mansai uli do hape motivasi nang na tinuju ni panuruon ni Jesus tu hita angka
siseanNa nuaeng, i ma asa unang tauhum na porse, alai asa malua na porsea,
gariada asa ihut tu ngolu nang ulaon nasida angka ulaon na gok halongangan.
Molo ndang diida halak Kristen Batak hataridaan ni i di ngolu nasida saleleng
on, tama do hita manungkun di bagasan rohanta, suraon do i siala ndang
borhat hita mamaritahon barita na uli? Molo ndang diida angka na porsea di
Jesus siala ulaonta mamaritahon barita na uli angka tanda halongangan i di
ngolu nasida, suraon do i ala nang nasida ndang borhat mamaritahon barita na
uli asa malua na porsea? Beta ringgas ma hita paboahon Barita Nauli i asa ro
angka halongangan di ngolunta. Amen
14. Marende BE No. 669: 1 “RINGGAS AU PABOAHON” ( Pelean )
Ringgas au paboahon Barita na uli. Barita haholongon ni Jesus Tuhanhi.
Ringgas au paboahon ai na sintong do i. Mambuat nasa holso soada tudos nii.
Ringgas au paboahon, barita na ummuli, Barita haholongon, ni Jesus
Tuhanhi.
15. PANGUJUNGI:
U: Tatangianghon ma peleanta: Ale Tuhan Debata Amanami, haroroan ni
saluhut pasupasu na mauliutus, godang do hujalo hami sian asi ni rohaM.
Mauliate ma di Ho, hupasahat hami ma nuaeng peleannami tu Ho, sai jalo
ma i gabe pelean na hushus di di joloM. Pasupasu ma na niula ni
tangannami jala ajari ma hami manghamuliatehon saluhutna i marhite
parange nang pambahenannami. Ungkap rohanami asa sai ringgas hami
pasahat pelean tu Ho hombar tu asi ni rohaM naung hujalo hami, marhite
Kristus Jesus Tuhan nami. AMEN
K : (Rap Mandok): Tangiang Ale Amanami – Amen 3x

PARTORDING NI PARMINGGUON di JABU

Di MINGGU EXAUDI, Minggu, 24 Mei 2020
TOPIK: DITANGIHON JAHOWA DO JOUJOU NI HALAK NA PORSEA
4
 ========================================================
1. PAMUHAI:
U : Hamuna angka dongan na hinaholongan, sadarion sahat ma hita tu minggu
EXAUDI, lapatanna : Sai tangihon ma soarangku, ale Jahowa. (Psalmen 27 :
7). Marhite parmingguonta sadari on, joujou ma hita tu Debata, ai Debata do
na tuk manangihon soaranta dohot hoihointa jala asi do rohaNa mida angka
na joujou tu Ibana.
R : Sai tangihon ma soarangku ale Jahowa jala asi ma rohaM mida ahu.
U : Antong hamu na hinaholongan, joujou ma hita tu Debata mangido asi ni
rohaNa, tapasahat ma pujipujian holan tu Ibana, marende ma hita.
2. Marende BE No. 2 : 1 “NAENG PUJIONKU HO JAHOWA”
 Naeng pujionku Ho Jahowa ai Ho do Debata na tutu i
Sai suru Tondi Parbadia tu au asa hupuji goarMi
Marhitehite Jesus AnakMi asa lomo rohaM di endengki
3. VOTUM – INTROITUS – TANGIANG:
U : Marhitehite Goar ni Debata Ama dohot Goar ni AnakNa Tuhan Jesus Kristus
dohot Goar ni Tondi Parbadia, na tumompa langit dohot tano on. Amen.
(Parhalado partohonan).
U : Sai tangihon ma soarangku ale Jahowa molo joujou ahu. Didok rohangku, Ho
mandok: Lului hamu ma bohingKu. Antong bohiM ma na hulului ale Jahowa.
Sai unang ma tabunihon bohiM maradophon ahu. Jahowa do panondangi di
ahu dohot hatuaonhu, tung mida ise ma mabiar ahu ? Jahowa do
partanobatoan ni ngolungku, tung mida ise ma ahu biahaton ?Haleluya.
R : (Mangendehon): Haleluya, Haleluya, Haleluya!
U : Martangiang ma hita: Ale Tuhan Debata, Pargogo na so hatudosan,
Amanami na di banua ginjang i! Usehon ma TondiM na badia i dohot
hapistaran na sian Ho i tu saluhut HuriaM, asa lam rarat jala lam hot HataM
na badia i di tongatonga ni hami on. Lehon ma hiras ni roha di naposoM
manjamitahon HataM, asa lam pita jala lam ganda HuriaM na badia i.
Patongtong ma huhut rohanami mangoloi Ho sahat ro di ujung, di bagasan
haporseaon na ture, marhitehite AnakMu, Tuhan Jesus Kristus, Tuhannami.
Amen.
4. Marende BE No. 262 : 3“ JAHOWA TUHANHI”
Di na tarsosak au, padao ma pandelean. Sitaonon na di au, urupi au mamorsan.
Pamonang au tongtong, palambok rohangki. Parroha na holong, baen angka
donganhi

5. PATIK:
U : Patik ni Debata sihangoluhonta di minggu Exaudisadari on,dienaet sian 1
Korint 16 : 13Dungo ma hamu, marsihohot marhaporseaon, tang ma hamu
jala margogo.
5
 Antong rap mangido gogo ma hita sian Tuhan Debata.
R : Ale Tuhan Debata, sai pargogoi ma hami mangulahon na hombar tu
PatikMi. Amen.
6. Marende BE No. 688 : 3 “ TUHAN ”
 Nuaeng na ro do au sumomba Ho, pasahat ngolungki Tuhan tu Ho
Tuhan lehon ma roha na holong, urupi au
7. TANGIANG PANGIDOAN DOHOT BAGABAGA NI DEBATA:
U : Ale Tuhan Debata, Pargogo na so hatudosan! Ho do panondanginami dohot
hatuaonnami. Ho do partanobatoannami di ngolunami. Sai tangihon ma
soaranami, ale Jahowa, di na joujou hami tu Ho, asi ma roham mida hami,
jala alusi ma hami. Unang tung tabunihon bohiM maradophon hami, unang
tung tulak hami di bagasan rimasmu, matua Ho do pangurupinami, unang
tung ambolongkon hami, jala unang tadingkon hami, ale Debata ni
hatuaonami! Di hamamasa ni mara ala ni Covid-19 on, gok do biar huadopi
hami na pola mambahen ganggu dohot haporseaonnami. Mabiar do hami di
perekonomian na hurang denggan, mabiar do hami sotung hona sahit,
mabiar do hami ndang dapot mangan, mabiar do hami sotung lam godang
angka mara na asing ala ni Covid-19 on. Ale Tuhan Parasiroha,salpuhon ma
mara Covid-19 on sian tongatonganami. Pasuang ma hami tu hinauli ni
panompaonMu di langit dohot tano on. HataM do na mandok: “Parhanalom
ma Jahowa, pagomos jala patogu roham jala parhanalom Jahowa!
R : Ale Tuhan Debata, Pargogo na so hatudosan, sai tangihon ma
soaranami jala sesama dosanami.
U : Ale Tuhan Debata, na badia jala na bonar. Parasi jala Partalup ni roha jala na
basar do Ho! Sai marpangulahi ma rohaM mida hami. Dibahen I sai sesa ma
sude dosanami! Ndang adong na hupangasahon hami dungkon ni asi ni
rohaM; hatigoran na pinatupa ni AnakMu do na hupangasahon hami tu
joloM. Dibahen I pasonang jala apuli ma hami angka na hinophop ni Tuhan
Jesus Kristus, Tuhannami. Amen.
U : Bagabaga ni Debata :Ro ma hamu tu Ahu, asa mangolu tondimuna, ninna
Tuhan Jahowa. Tung sura rara dosamuna songon abit bunga dapdap, bontar
do bahenonHu songon itak; nang pe rara songon abit hasumba, gabe songon
hapas do muse. Hasangapon ma di Debata na di ginjang!
R : Amen.

8. Marende BE No. 701: 2 “TU HO DO AU MARPADAN ”

Baen ma panghilalaan di au o Tuhanhi. Donok do Ho o Tuhan, mandopang
musungki
Ragam do pangunjunan di hasiangan on. Ho partanobatoan di paraloanhon
9. E P I S T E L:
6
 U : Hata ni Debata turpuk di minggu EXAUDI sadari on, ima na tarsurat di
Psalmen 27: 7 – 14. (dijaha ma) Ima sahatna. Martua ma angka na
tumangihon Hata ni Debata jala na umpeopsa. Amen.
10. Marende BE No. 298: 2 “ DI LAMBUNGMI O JESUSHI ”
 Di lambungMi o Jesushi, sumurut do na gaor i
Ai guru dokMu do sude, galumbang nang alogo pe
Lam sonang do nang rohangki, dung ho o Jesus Tuhanhi
11. MANGHATINDANGHON HAPORSEAON:
U : Tahatindangkon ma haporseaonta i, songon na hinatindangkon ni
donganta sahaporseaon di sandok portibi on. Rap ma hita mandok: Ahu
Porsea…..
12. Marende BE No. 772 : 2 “TUHANHU DO PATURE DALANHI”
 Tuhanhu do pature dalanhi. Tuhanhu do patiur langkangki
Hulului do Tuhanhi, surut ma na holom i. Tuhanhu do patiur langkangki
13. JAMITA: (Mateus 20 : 29 – 34)
Hatiha mamolus sian huta Jeriko laho nangkok tu Jerusalem, disi ma
pajumpang Jesus dohot dua halak na mapitung na pinamalumNa di bagasan turpuk
on. Adong manang na piga pangalaho masa di bagasan turpuk on na ringkot
sipahusorusoron jala na ringkot sihangoluhononhon ni hita halak Kristen: 1.
Tiruan na pinatuduhon ni angka na mapitung. Adong dua tiruan na arga na
boi berengonta sian dua halak na mapitung i ima:
a. Hajugulon mangido dohot hajugulon naeng pajumpang tu Jesus
Godang do hamaolon diadopi na mapitung i di na marsangkap nasida naeng
pajumpang tu Jesus. Hamaolon na parjolo ima na ro sian angka na torop na tongon
manangihon Jesus mangajari. Dipinsang na torop i na mapitung i, ala dirajumi
nasida gabe panggugai hadirion ni na mapitung i di nasida laho manangihon
pangajarion ni Jesus. Udut tusi adong do nasida na maminsang ala dirajumi nasida
ndang talup angka na mapitung (orang cacat) pajumpang manang manggugai
kesibukan ni sada halak na sangap. Tudos do i tu pangalaho na masa di tongatonga
ni bangso on, somalna molo naeng mebat uluan manang na sangap ni bangso on tu
sada luat, somalna nunga jumolo hian dirazia angka pangidoido, gelandangan dohot
na suman tusi, asa unang gabe manegai pemandangan ni na sangap i. Alai laos
adong do na torop i maminsang na mapitung i ala joujou nasida na manggoari Jesus,
Tuhan, Anak ni si Daud. Somalna mansai sogo do roha ni angka malim dohot
sibotosurat umbege pernyataan ni halak na mangarajumi Jesus songon Tuhan, Anak
ni si Daud. Pandohan Anak ni si Daud, na martudutudu do i tu pengakuan di
hadirion ni Jesus songon Mesias.
Hamaolon na paduahon, ala mansai godang do ulaon ni Jesus tontu ndang apala boi
sigopsigop Tuhan i laho manangihon joujou ni halak na mapitung i. Ala ndang
pintor ditailihon Jesus nasida, alani i do boasa pola ingkon marulakulak na
mapitung i manjoujou dompak Jesus, dung pe i asa ditangihon Jesus joujou nasida.
7
Alai atik pe songon i godang ni tantangan na ni adopan nasida na dua naeng
pajumpang tu Jesus, ndang gabe sumurut manang mandele na mapitung i. Alai
tongtong do dijugulhon, i do alana umbahen na gabe saut nasida taruli di
silehonlehon na arga i ima hamalumon i.
Beha do ia hita halak Kristen di partingkian na parpudi on, adong dope di hita sihol
laho pajumpang dohot Jesus songon sihol ni roha ni angka na mapitung i? Molo
adong na mangambati hita naeng pajumpang dohot Jesus, sumurut do hita manang
tongtong do tajugulhon songon pangalaho ni angka na mapitung on? Molo
martangiang hita, hape ndang pintor dilehon Debata na tapangido i, gabe gale do
haporseaonta? Godang do faktor na boi mangambati hita naeng pajumpang dohot
Jesus, isarani pangelaela ni dongan, halosokon, ekonomi, cuaca, ulaon dohot angka
na asing. Alai dipaingot hita marhite turpuk on, manang ise na jugul manang na so
olo loja naeng pajumpang dohot Jesus, ingkon dapotan na uli manang pasupasu.
b. Habisukon mamillit na dumenggan
Atik pe pangidoido do ulaon ni na mapitung i ganup ari, alai ndang gabe laos
ditopa kondisi i mental ni na mapitung i, gabe mental pangidoido. Hatiha
disungkun Jesus nasida, “Aha dipangido rohamuna sibahenonKu tu hamu”, molo
marningot hasomalan ni pangidoido, suraon ni roha tontu hepeng do pangidoonna
sian Jesus. Alai ndada songon i hadirion ni na mapitung i, diboto do mamillit na
rumingkot dohot na dumenggan di ngolula, ima hamalumon.
Ringkot do hita marsiajar sian na mapitung on dohot sian raja Salomo, laho
mamillit na dumenggan sipareahan manang sipangidoonta sian Debata. Torop do
halak Kristen na sala mamillit. Torop do halak, ala ringkot ni na mangalului
sihumisik gabe lupa mangalului na ringkot tu ngolu ni partondionna. Di
tongatonga ni luatta on sotung gabe lupa manarihon dohot manuanhon bohal na
ringkot tu masa depan dohot tu partondion ni ianakhon. Tagamon boi do di tingki
na naeng ro on gabe torop angka dakdanak na gabe mago ala halembaon ni angka
na toras. Dibaheni binsan adong dope tingki, naeng ma jamot hita mamillit na
dumenggan dohot na rumingkot i, asa unang gabe tubu angka panolsolion di
pudian ni ari.
2. Tiruan na pinatuduhon ni Jesus
Songon naung pinaandar, hatiha mamolus Jesus sian huta Jeriko, nunga talpe
tingki ni Jesus laho mamorsan silang i. Dibahen i ndang na hurang be nian hatiha i
dokdok ni hamaolon na ingkon adopan ni Jesus. Alai atik pe songon i ndang gabe
pangambati i di Jesus laho patuduhon panarihononNa tu na marsitaonon. Di
tongatonga ni hamaolon i, diharingkothon Jesus do paluahon na mapitung i sian
parsorionna i.
Nang hita be pe tagamon do adong be hamaolon manang parungkilon na taadopi
di ganup ngolunta be. Alai ma nian unang gabe pangambati angka parungkilon
manang hamaolon i di hita laho mangurupi angka donganta na marungkil. Adong
do istilah ni sahalak panurat na mandok, “Yang terluka, yang menyembuhkan.”
8
Ingkon songon i ma nian hadirion ni halak Kristen. Atik pe godang sahit na masa
di ngolunta, sahit ni pardagingon suang songon i nang sahit ni parrohaon ala ni
godang ni angka parungkilon na masa, alai naeng gabe hamamalum hita tu
parsahiton ni angka donganta. Godang do na boi tarbahen hita laho mangurupi
angka dongan na marsitaonon. Boi do i marrumang apulapul, materi, tenaga dohot
angka na asing. Atik pe mansai metmet do na boi tarbahen hita, alai molo gabe las
ni roha hita tu angka na marungkil, nunga tulus na pinangido ni Jesus, gabe
hamamalum hita di tongatonga ni portibi on. Amen
14. Marende BE No. 758: 1“JAHOWA PANGURUPI”( Pelean)
 Jahowa pangurupi di si ulaonmi, dilehon pos ni roha di ganup tingki i
Nang pe sipata ganggu haporseaonmi, jamot tongtong Tuhanmu manjaga
ngolumi
15. PANGUJUNGI:
U: Tatangianghon ma peleanta: Ale Tuhan Debata Amanami, haroroan ni
saluhut pasupasu na mauliutus, godang do hujalo hami sian asi ni rohaM.
Mauliate ma di Ho, hupasahat hami ma nuaeng peleannami tu Ho, sai jalo
ma i gabe pelean na hushus di di joloM. Pasupasu ma na niula ni
tangannami jala ajari ma hami manghamuliatehon saluhutna i marhite
parange nang pambahenannami. Ungkap rohanami asa sai ringgas hami
pasahat pelean tu Ho hombar tu asi ni rohaM naung hujalo hami, marhite
Kristus Jesus Tuhan nami. AMEN
K : (Rap Mandok): Tangiang Ale Amanami – Amen 3x