PARTORDING NI PARMINGGUON

DI MINGGU
PARNINGOTAN ARI HAMAMATE NI TUHAN JESUS

EV.Lukas 23 : 44 - 48 EP. Psalmen 22 : 2 - 12

TOPIK:
DISEAHON JESUS DO HOSANA

HURIA KRISTEN BATAK PROTESTAN

Jumat, 2 April 2021
01. PAMUHAI :
 U : Hamu angka dongan sahuria, na marpungu do hita nuaeng di inganan on
patupahon parpunguan PARNINGOTAN ARI HAMAMATE NI TUHAN
JESUS. Tongon do angka sahitta diusung Ibana, jala angka pardangolanta
diporsan; alai anggo rohanta mandok : Debata do maminsang,
mamungkul dohot pasipal Ibana.
R : Hape ala ni pangalaosionta Ibana tartullang, binahen ni
hajahatonta Ibana mabugang. Ampe tu Ibana pinsangpinsang
parhitean ni hasonanganta, jala binahen ni bugangNa malum
itahilala.
U : Luhut do hita lilu songon birubiru, ganup masitondong dalanna be, alai
hajahaton ni hita sudena dihonahon Jahowa tu Ibana.
R : Alai dihalomohon Jahowa do parsipalna mangae sahit! Ia dung
dilehon hosaNa bahen pelean pardengganan, idaonNa ma boni jala
paganjangonNa ariarina, jala manjadi ma lomo ni roha ni Jahowa
marhitehite tanganNa.
U : Sude hita nasa naung tardidi tu bagasan Kristus Jesus, tu bagasan
hamamateNa do hita tardidi. Antong naung tartanom do hita rap dohot
Ibana marhitehite pandidion i tu bagasan hamatean asa marparange
hita dibagasan ngolu na imbaru! Diseahon Jesus do hosaNa asa dapotan
hangoluan hita, tapuji ma Ibana, mual ni ngolunta!
02. Marende BE No. 81 : 1 - 3 JESUS MUAL NI NGOLUNGKU BL. 185
 Jesus mual ni ngolungku, sipangolu tondingki
Ai dibunu Ho musungku, ima hamatean i.
Ho manaoni hamagoan, patupahon hangoluan
Alani hupuji Ho, tung marribu hali do.
 Haleaon, insakhinsak, reherehe, tijur pe
Tali dohot pastappastap, tung ditaonhon Ho sude
Paluahon au na pogos, sian tangan ni sibolis
Alani hupuji Ho, tung marribu hali do.
-------Musik/Jongjong--------
 Bugang sada tanggurungmu di na hona linsing i
Hamamalum ni bugangku na di rohangki do i
Ho do gabe binuraan au dapotan hangoluan
Ala ni hupuji ho tung marribu hali do.

03. VOTUM – INTROITUS – TANGIANG:

U : Marhitehite Goar ni Debata Ama dohot Goar ni AnakNa Tuhan Jesus
Kristus dohot Goar ni Tondi Parbadia, na tumompa langit dohot tano
1
 on. Amen. Na gabe pangoloi do Kristus paima mate, pola tung mate
tarsilang. Di dia angka soropmi, ale hamatean? Di dia pangagoonmu, ale
banua toru? Haleluya
R : (Mangendehon): Haleluya, Haleluya, Haleluya!
U : Martangiang ma hita! O Tuhan Jesus, Birubiru ni Debata, na
mamorsan dosanami! Na jongjong do hami di joloM, marningot Ho, na
targantung i. tangkas do huantusi hami habebernit ni na tinaonMu di
dolok Golgata. Tungki do hami marningot dosanami na mangkorhon
hamamateMi. Asi ma rohaM, urupi ma hami, asa gabe upa ni halojaonMu
hami. Amen. (Hundul)
04. Marende BE No. 622 : 1 “MANSAI NALNAL” BL.622
 Mansai nalnal di angka partingkian, sinondang ni silangMu Tuhanki,
Sian hatiuron na marsinondang holongNa na so halampoan i
Sude na bangso do marpanghirimon tu sondang ni asi ni roha i,
Songon parluga na manghalungunhon parbinsar ni mata ni ari i.
05. PATIK:
U : Patik ni Debata di hita di Parningotan Ari Hamamate ni Tuhan Jesus
Sadari on, i ma na tarsurat di Rom 6 : 11 Suman tusi ma rajumi hamu
dirimuna songon naung mate di dosa i, alai mangolu di Debata di
bagasan Kristus Jesus! Antong rap mangido gogo ma hita sian Tuhan
Debata!
R : Ale Tuhan Debata, sai pargogoi ma hami mangulahon na hombar tu
PatikMi! Amen.
06. Marende BE No. 79 : 1 - 2 “DI NA PONJOT ROHANGKU” BL. 124
 Di na ponjot rohangku binaen ni dosangki
Paingot au Tuhanku di hamamateMi
Di hau na pinarsilang i digarar Ho utangku
Marhite mudarMi.
----Jongjong----
 Tama longang rohangku, mamingkir hata on.
PanghophopMi Tuhanku, di au pardosa on.
Ai hosa ni AnakNa i, dilehon Debatangku,
Tumobus tondingki.
07. MANOPOTI DOSA:
U : Tatopoti ma dosanta na godang i tu adopan ni Debata, martangiang ma
hita! Ale Tuhan Debata, Amanami na di banua ginjang, Parasiroha na
sumurung! Na mandok mauliate ma hami tu Ho sian nasa rohanami, ala
dilehon Ho AnakMu na sasada i tu hamatean humophop hami, asa unang
2
 mago na porsea di Ibana, alai asa hangoluan na saleleng ni lelengna di
nasida. Tatap ma hami, ale Amanami di bagasan AnakMu Tuhan Jesus
Kristus, na gabe habadiaon dohot hatigoran di hami.
R : Ale Tuhannami, mansai godang do dosa dohot pangalaosionnami
di adopanMu. Tung jotjot do hami mangulahon na so lomo ni
rohaM na mambahen ingkon hona uhum hami ala ni i. Mauliate ma
dipasahat rohanami tu Ho, ai disuru Ho anakMu Tuhan Jesus
Kristus mamintori hami, sumeahon hosaNa asa malua hami sian
uhumMu. Ale Tuhan, binsan huingot hami panghophoponNa i
sadari on, sai suru TondiM paubahon rohanami, asa unang be
hudatdati hami mangulahon dosa.
U : Sai sesa ma dosanami saluhut ala ni pelean na sun denggan, na
pinelehonNa i humophop hami. Sai paeleng ma pinggolMu tu
tangiangnami jala asi ma rohaM di hami!
R : Ale Tuhannami, di parngoluan on, di na marragam hamaolon
manosaknosak hami, tung gale situtu do panghilalaannami jala
jotjot tarela hami mangulahon dosa. Sai patau ma hami
mangihuthon Tuhan Jesus Kristus na mamolus di sitaononNa i, asa
tung dao hami sian dosa, jala unang tarela hami tu haholomon i.
U : Na tungki do hami sadarion di adopanMu, marningot Ho na targantung
di hau parsilang i. Huboto hami do na ingkon hami manaon na tinaonMi
ala hami do na mangulahon dosa i. Alai tung asi do rohaM di hami,
ditobus Ho do hami sian bura ni dosa i, pola mate Ho humonghop hami.
Sai uhirhon ma tu tondinami panghophoponMi di hami, anggiat hupauba
hami rohanami na so tama asa tung arga panghophoponMi di hami.
(Tangiang na hohom huhut manghuling Musik/Song Leaders
mangendehon marhite soara na angonangon BE.No. 421:1,
“Marsomba au di joloMon” BL. 281)
U : Bagabaga ni Debata Taringot tu hasesaan ni dosanta : Parasiroha
jala pardengganbasa do Jahowa, lambat tarrimas jala parasiroha godang.
Ndang dibahen tu hita hombar tu angka dosanta, jala ndang dibaloshon
tu hita hombar tu angka hajahatonta. Songon asi ni roha ni amaama
mida angka anakna, asi ni roha ni Jahowa di angka na manghabiari
Ibana. Hasangapon ma di Debata na di ginjang!
R : Amen. ----Hundul-----
08. Marende BE No. 84 : 1 “AUT NA GINORGA TU ROHANGKU” BL. 195
3
  Aut na ginorga tu rohangku, bohiM di na lao mate Ho
Aut na huingot o Tuhanhu, tongtong panghophopMi di au
Ai Ho do paluahon ahu, dosangku do pinorsanMi
Di daoni Ho parsahitonhu, martua au binahen nii

09. E P I S T E L :
U : Hata ni Debata turpuk Epistel di ari parningotan hamamate ni Tuhan
Jesus sadari on, tarsurat di Psalmen 22 : 2 - 12 “Ale Debatangku,
Debatangku! Boasa tung tadingkononmu ahu? Sai mandaodao do angka
hata ni anggukkon sian hatuaonku.
R : Ale Debatangku, sai joujou do ahu arian, alai ndang mangalusi Ho,
jala borngin pe ndang jumpang ahu hasonangan.
U : Alai nabadia do anggo Ho, marhabangsahon angka pujipujian ni Israel.
R : Marhaposan tu Ho do angka ompunami, pos do rohanasida, jadi
dipalua Ho do nasida.
U : Tu Ho do nasida mangangguhi, jadi malua ma nasida, marhaposan tu Ho
do nasida, jadi ndang tarurak.
R : Alai gea nama ianggo ahu, ndada jolma, haeleson ni halak jala
parbilean ni natorop.
U : Sude angka na marnida ahu marengkelengkelihon ahu, dipangangang do
babana huhut mangupirupir.
R : "Tu Jahowa ma nian dipasahat, asa dipalua ibana, dipangolu ma
nian ibana, ai lomo do rohana mida ibana.
U : Ho do tongon na manait ahu sian ampuan, sipapos rohangku,
mangonsop bagot ni dainang.
R : Dung tubu ahu, sai Ho do parsigantunganku, sian butuha ni
dainang dope sai Ho do Debatangku.
U : Unang mandaodao Ho sian ahu, ai donok nama parmaraan, ai soadong
sipartumpak
Ima sahatna. Martua do angka na tumangihon Hata ni Debata jala na
umpeopsa. Amen.
10. Marende BE No. 88 : 1 - 2 “JESUSHU NAUNG MANOBUS AU” BL. 106
 Jesusku naung manobus ahu sai naeng haholonganku Ho
Tu dolok Golgata Ho laho nionjar ni holongMu do
Hupuji nasa asiMi alai gumodang holongMi
-----Jongjong-----
 Tarsolsol bagi do rohangku paidaida dangolMi
Marningot sasude dosangku ai i do na tinaonMi
4
 Hupuji nasa asiMi alai gumodang holongMi

11. MANGHATINDANGHON HAPORSEAON:

U : Tahatindangkon ma haporseaonta i, songon na hinatindangkon ni
donganta sahaporseaon di sandok portibi on. Rap ma hita mandok!
R : Ahu Porsea…..
-----Hundul-----
12. SUNGGULSUNGGUL dohot TANGIANG PANGONDIANON
13. Marende BE No. 86 : 1 - - - “SILANG NA BADIA I” (Pelean Ia, Ib)
BL. 67
 Silang na badia i Ho do lombulombungki
Maralohon dosa i dohot pandelean i
Di sude sitaonon i Ho ma lombulombungki
 Nasa na huula i ndang tau hasonanganki
Nang ringkot pe rohangki pola ro nang ilungki
Holan asi ni rohaM pangurupi o, Tuhan
------Musik-----
 Ro do au nuaeng tu ho, sai palambas ma rohaM.
Nunga pola mate Ho, ala asi ni rohaM
Jangkon au na dangol on, sai ulosi tondingkon.

 Dosa patundukkon au, ho ma mangondihon au.

Ramun situtu do au, mudarMi mamuri au,
Na pogos, Dangol au on. Ho ma artangki tongtong.
14. JAMITA: Lukas 23 : 44 - 48
15. Marende BE No. 83 : 1 - - - “NA LAO DO BIRUBIRU I” (Pelean II)
BL. 214
 Na lao do Birubiru i mamorsan angka dosa
Ni nasa hajolmaon i di benget ni rohaNa
Diporsan do sahitta i di lehon do diriNa i
Tu tangan ni pamunu, ditaoni do na bernit i
Ro di na tos hosaNa i, didok : Naeng porsanonku.
 Ianggo Birubiru i , ima alealengku
Na paluahon tondingki disuru Debatangku
Didok mandok AnakNa i, sai topot ma pardosa i
Naung sun tinoruanku, balga tutu do rimashi

5
 Alai tarbaen do mombun i, horhonon ni mudarMu
-----Musik-----
 Na olo au, ale Amang sian sandok rohangku
Pasauthon lomo ni rohaM, rohaM sambing do guru
O holong ni rohaNa i tung aha do tudosanmi

Na songon ho margogo ? dilehon Debata hape

AnakNa lao manaon sude sitaonon ni na mago
 Saleleng na mangolu au, naeng ingotonku Jesus.
Sude na binaenMi di au, hataM naeng hupatulus.
Ho naeng haholonganku do , huhut ihuthononku Ho
Di dalan hangoluan, tung ingkon Ho, nampuna ahu,
Mangolu manang mate au sai Ho do tioponku
-----Musik-----
16. PANGUJUNGI: (Jongjong)
U : Ndang tarasam asi dohot holong ni roha ni Debata di portibi on, pola do
AnakNa na sasada i dilehon asa unang mago ganup na porsea di Ibana
alai asa hangoluan na saleleng ni lelengna di nasida. Alani i tajanghon
ma hamamate ni Jesus i gabe hangoluan di hita.
R : Tapuji ma Jesus i jala tahatindanghon ma Ibana di ngolunta
siganup ari songon panindangion ni Letnan i na mandok: “Tutu do,
halak na tigor roha do on.” Ima tutu, halak na tigor roha do Jesus i.
U : Suang songon Jesus i na pasahathon diriNa tu Debata, songon i ma nian
nang hita. Jala tadok ma di bagasan ngolunta ganup ari: “Ale Amang! Tu
bagasan tanganMu ma hupasat tondingku!”
Tapasahat ma peleanta tu harajaon ni Debata, martangiang ma hita! Ale
Debata, Amanami na di banua ginjang! Ho do haroroan ni saluhut
silehonlehon na denggan dohot nasa ulibasa na mauliutus. Hupasahat
hami ma sian na nilehonMi tu hami, peleannami tu Ho. Sai jalo ma i gabe
uap na hushus di joloM. Pasupasu ma i jala ramoti asa huparhaseang
hami pelean on, patimbulhon harajaonMu di tongatonga ni huriaM
dohot di portibi on. Buhai ma rohanami marhitehite TondiM, asa lam
hutanda hami godang ni silehonlehonMi tu hami, asa lam girgir hami
mandok mauliate tu Ho, marhitehite Jesus Kristus Tuhannami. AMEN
R : (Mangendehon) BE No. 204 : 2 “Ndang Tadingkononhu Ho”
 Nasa na nilehonMi, tondi ro di pamatanghu.
Hosa dohot gogongki, ro di saluhut artanghu.
Hupasahat i tu Ho, na so unsatonhu do.
6
U : Ale Tuhan Debata, Amanami, na marhabangsa di atas ni saluhut! Nunga
patar huida hami holong ni rohaM na godang i. Gumodang do i sian
holong ni roha ni amaama dohot inaina di anakhonna. Tung na so
tartimbang do godang dohot arga ni silehonlehonMu di hami. Ai AnakMu
na sasada i disuru Ho gabe jolma, manaon pardangolan, insakinsak
dohot pastappastap gabe tarpajal Ibana jala tu hamatean humophop
hami. Mauliate ma rohanami, ala naung sae utangnami, jala malua hami
sian dosa, sian hamatean dohot sian gomgoman ni sibolis; ala ni i
pujionnami ma GoarMu na badia i, ala naung dipatupa AnakMu
pardomuan, pardenggannannami tu Ho. Ale Tuhan Jesus Kristus,
birubiru ni Debata, naung mamorsan dosanami dohot dosa ni
hajolmaon! Mauliate ma rohanami tu Ho jala pujionnami ma Ho ro di
saleleng ni lelengna. Sai tatap ma HuriaM, na hinophopMu jala na
pinapunguM i. Sai pahot ma di hami hasesaan ni dosa dohot dame na
pinatupaM i. Sai paias jala parbadiai ma hami, asa tarboan Ho hami tu
banua ginjang pasaorhon hami tu angka na badia i. Sai bunu jala
parsilangkon ma jolma na buruk i dohot sangkapsangkap na roa na di
bagasan hami, asa unang marlindang hami mandapothon Ama na di
banua ginjang i. Hupasahat hami ma dirinami tu Ho, jala hulehon hami
rohanami bahen ingananMu, ala naung dihophop Ho hami. Di Ho ma
hami jala Ho di hami, sai unang loas hami sirang sian Ho; dongani ma
hami jala saor ma Ho tu hami. Sai patogu ma haporseaonnami tu Ho, asa
hot langkanami ro di ujung ni hamatean. Sai ramoti ma angka ruasMu na
mamaritahon holong ni rohaM dohot dalan naung pinatupaMi. Antong
manang mangolu manang mate pe hami, Ho do Tuhannami dohot
Rajanami. Sai asi ma rohaM, ingot ma hami di hasangaponMi jala boan
hami tu hasonangan na di lambung ni Debata. Ale Amanami na di banua
ginajang! Sai pinarbadia ma GoarMu! Sai ro ma harajaonMu! Sai saut ma
lomo ni rohaM di banua tonga on songon na di banua ginjang! Lehon ma
tu hami sadari on hangoluan siapari! Sesa ma dosanami songon
panesanami di dosa ni dongan na mardosa tu hami! Unang hami togihon
tu pangunjunan! Palua ma hami sian pangago!
R : Mangendehon :
 Ai Ho do nampuna harajaon, dohot hagogoon.
Ro di hasangapon, saleleng ni lelengna, Amen
U : Pasupasu
R : (Mangendehon) Amen, Amen, Amen.