PARTORDING NI PARMINGGUON

DI MINGGU
PARNINGOTAN ARI HAMAMATE NI TUHAN JESUS

EV.Lukas 23 : 44 - 48 EP. Psalmen 22 : 2 - 12

TOPIK:
DISEAHON JESUS DO HOSANA

HURIA KRISTEN BATAK PROTESTAN

Jumat, 02 April 2021

01. PAMUHAI :
U : Hamu angka dongan sahuria, na marpungu do hita nuaeng di inganan on patupahon
parpunguan PARNINGOTAN ARI HAMAMATE NI TUHAN JESUS. Tongon do angka
sahitta diusung Ibana, jala angka pardangolanta diporsan; alai anggo rohanta mandok :
Debata do maminsang, mamungkul dohot pasipal Ibana.
R: Hape ala ni pangalaosionta Ibana tartullang, binahen ni hajahatonta Ibana
mabugang. Ampe tu Ibana pinsangpinsang parhitean ni hasonanganta, jala
binahen ni bugangNa malum itahilala.
U : Sude hita nasa naung tardidi tu bagasan Kristus Jesus, tu bagasan hamamateNa do hita
tardidi. Antong naung tartanom do hita rap dohot Ibana marhitehite pandidion i tu
bagasan hamatean asa marparange hita dibagasan ngolu na imbaru! Diseahon Jesus do
hosaNa asa dapotan hangoluan hita, tapuji ma Ibana, mual ni ngolunta!
02. Marende BE No. 81 : 1 -2 JESUS MUAL NI NGOLUNGKU ‘
Jesus mual ni ngolungku,
sipangolu tondingki
Ai dibunu Ho musungku,
ima hamatean i.
Ho manaoni hamagoan,
patupahon hangoluan
Alani hupuji Ho,
tung marribu hali do.
Haleaon, insakhinsak, reherehe, tijur pe
Tali dohot pastappastap,
tung ditaonhon Ho sude,
Paluahon au na pogos,
sian tangan ni sibolis
Alani hupuji Ho,
tung marribu hali do.

03. VOTUM – INTROITUS – TANGIANG

04. Marende BE No. 622 : 1 “MANSAI NALNAL”

 Mansai nalnal di angka partingkian,
sinondang ni silangMu Tuhanki,
Sian hatiuron na marsinondang,
holongNa na so halampoan i.
Sude na bangso do marpanghirimon,
tu sondang ni asi ni roha i,
Songon parluga na manghalungunho,
 parbinsar ni mata ni ari i.

05. PATIK: Rom 6 : 11

U : Patik ni Debata di hita di Parningotan Ari Hamamate ni Tuhan Jesus Sadari
on, i ma na tarsurat di Rom 6 : 11 Suman tusi ma rajumi hamu dirimuna
songon naung mate di dosa i, alai mangolu di Debata di bagasan Kristus
Jesus! Antong rap mangido gogo ma hita sian Tuhan Debata!
R : Ale Tuhan Debata, sai pargogoi ma hami mangulahon na hombar tu
PatikMi! Amen.

06. Marende BE No. 79 : 1 “DI NA PONJOT ROHANGKU

 Di na ponjot rohangku binaen ni dosangki, ( Jongjong)
Paingot au Tuhanku di hamamateMi
Di hau na pinarsilang i digarar Ho utangku
Marhite mudarMi.

07. MANOPOTI DOSA

U : Tatopoti ma dosanta na godang i tu adopan ni Debata, martangiang
ma hita! Ale Tuhan Debata, Amanami na di banua ginjang, Parasiroha
na sumurung! Na mandok mauliate ma hami tu Ho sian nasa rohanami,
ala dilehon Ho AnakMu na sasada i tu hamatean humophop hami, asa
unang mago na porsea di Ibana, alai asa hangoluan na saleleng ni
lelengna di nasida. Tatap ma hami, ale Amanami di bagasan AnakMu
Tuhan Jesus Kristus, na gabe habadiaon dohot hatigoran di hami.

R : Ale Tuhannami, mansai godang do dosa dohot

pangalaosionnami di adopanMu. Tung jotjot do hami mangulahon
na so lomo ni rohaM na mambahen ingkon hona uhum hami ala ni
i. Mauliate ma dipasahat rohanami tu Ho, ai disuru Ho anakMu
Tuhan Jesus Kristus mamintori hami, sumeahon hosaNa asa
malua hami sian uhumMu. Ale Tuhan, binsan huingot hami
panghophoponNa i sadari on, sai suru TondiM paubahon
rohanami, asa unang be hudatdati hami mangulahon dosa.
U : Sai sesa ma dosanami saluhut ala ni pelean na sun denggan, na
pinelehonNa i humophop hami. Sai paeleng ma pinggolMu tu
tangiangnami jala asi ma rohaM di hami!

R : Ale Tuhannami, di parngoluan on, di na marragam hamaolon

manosaknosak hami, tung gale situtu do panghilalaannami jala
jotjot tarela hami mangulahon dosa. Sai patau ma hami
mangihuthon Tuhan Jesus Kristus na mamolus di sitaononNa i,
asa tung dao hami sian dosa, jala unang tarela hami tu
haholomon i.

U : Na tungki do hami sadarion di adopanMu, marningot Ho na

targantung di hau parsilang i. Huboto hami do na ingkon hami
manaon na tinaonMi ala hami do na mangulahon dosa i. Alai tung asi
do rohaM di hami, ditobus Ho do hami sian bura ni dosa i, pola mate
Ho humonghop hami. Sai uhirhon ma tu tondinami panghophoponMi
di hami, anggiat hupauba hami rohanami na so tama asa tung arga
panghophoponMi di hami.

(Tangiang na hohom huhut manghuling Musik BE.No. 421:1)

U : Bagabaga ni Debata Taringot tu hasesaan ni dosanta : Parasiroha

jala pardengganbasa do Jahowa, lambat tarrimas jala parasiroha godang.
Ndang dibahen tu hita hombar tu angka dosanta, jala ndang dibaloshon
tu hita hombar tu angka hajahatonta. Songon asi ni roha ni amaama
mida angka anakna, asi ni roha ni Jahowa di angka na manghabiari
Ibana. Hasangapon ma di Debata na di ginjang! Amen.
----Hundul-----

08. Marende BE No. 84 : 1 “AUT NA GINORGA TU ROHANGKU”

 Aut na ginorga tu rohangku,
bohiM di na lao mate Ho
Aut na huingot o Tuhanhu,
tongtong panghophopMi di au,
 Ai Ho do paluahon ahu,
dosangku do pinorsanMi
Di daoni Ho parsahitonhu,
martua au binahen nii

09. E P I S T E L : Psalmen 22 : 2 - 12

U : Ima sahatna. Martua do angka na tumangihon Hata ni Debata jala na

umpeopsa. Amen.

10. Marende BE No. 88 : 1 “JESUSHU NAUNG MANOBUS AU”

 Jesusku naung manobus ahu,
sai naeng haholonganku Ho
Tu dolok Golgata Ho laho,
nionjar ni holongMu do
Hupuji nasa asiMi,
alai gumodang holongMi.

11. MANGHATINDANGHON HAPORSEAON

U : Tahatindangkon ma haporseaonta i, songon na hinatindangkon ni
donganta sahaporseaon di sandok portibi on. Rap ma hita mandok:
Ahu porsea di Debata Jahowa,
I do Ama pargogo na so hatudosan, na tumompa langit dohot tano.

Ahu porsea di Jesus Kristus Anak ni Debata Jahowa nasasada i;

i ma na tinubuhon ni si Maria, na gabegabean sian Tondi Parbadia,
andorang so habubuhan.
I do Tuhanta na tumaon na bernit di panguhuman ni si Latus,
na mate tarpajal do Ibana di hau pinarsilang,
na tuat tu banuatoru dung ditanom, na mulak mangolu di ari patoluhon,
na manaek tu Surgo laho hundul tu siamun ni Debata Jahowa,
AmaNa I, pargogo na so hatudosan i,
disi ma Ibana paima mulak sogot tu tano on
manguhumi halak na mangolu dohot na mate.

Ahu porsea di Tondi Parbadia, jala adong sada Huria na badia,

Huria hatopan ni halak Kristen angka na badia,
dohot di hasesaan ni dosa dohot di Hata i na mandok:
 Mulak mangolu sogot daging ni halak naung mate,
dohot di hangoluan na so ra suda.
Amin

12. SUNGGULSUNGGUL dohot TANGIANG PANGONDIANON

13. Marende BE No. 86 : 1 – 3 “SILANG NA BADIA I”
(Pelean Ia, Ib TU HURIA)

 Silang na badia I,
Ho do lombulombungki .
Maralohon dosa I,
dohot pandelean i .
Di sude sitaonon I,
Ho ma lombulombungki.

 Nasa na huula I, ndang tau hasonanganki

Nang ringkot pe rohangki,
pola ro nang ilungki
Holan asi ni rohaM,
pangurupi o, Tuhan
------Musik-----
 Ro do au nuaeng tu ho,
sai palambas ma rohaM.
Nunga pola mate Ho,
ala asi ni rohaM
Jangkon au na dangol on,
sai ulosi tondingkon.

14. JAMITA: Lukas 23 : 44 - 48

15. Marende BE No. 83 : 1 - 3 “NA LAO DO BIRUBIRU I”
(Pelean II TU PUSAT + PEMBANGUNAN HURIA)
 Na lao do Birubiru i mamorsan angka dosa
Ni nasa hajolmaon i di benget ni rohaNa
Diporsan do sahitta i di lehon do diriNa i
Tu tangan ni pamunu, ditaoni do na bernit i
Ro di na tos hosaNa i, didok : Naeng porsanonku.
  Ianggo Birubiru i , ima alealengku
Na paluahon tondingki disuru Debatangku
Didok mandok AnakNa i, sai topot ma pardosa i
Naung sun tinoruanku, balga tutu do rimashi
Alai tarbaen do mombun i, horhonon ni mudarMu
-----Musik-----
 Na olo au, ale Amang sian sandok rohangku
Pasauthon lomo ni rohaM, rohaM sambing do guru
O holong ni rohaNa i tung aha do tudosanmi ,
Na songon ho margogo ? dilehon Debata hape
AnakNa lao manaon sude sitaonon ni na mago

16. PANGUJUNGI: (Jongjong)

U :Ndang tarasam asi dohot holong ni roha ni Debata di portibi on, pola do AnakNa
na sasada i dilehon asa unang mago ganup na porsea di Ibana alai asa hangoluan
na saleleng ni lelengna di nasida. Alani i tajanghon ma hamamate ni Jesus i gabe
hangoluan di hita.

R : Tapuji ma Jesus i jala tahatindanghon ma Ibana di ngolunta siganup ari

songon panindangion ni Letnan i na mandok: “Tutu do, halak na tigor roha
do on.” Ima tutu, halak na tigor roha do Jesus i.

U : Suang songon Jesus i na pasahathon diriNa tu Debata, songon i ma nian nang

hita. Jala tadok ma di bagasan ngolunta ganup ari: “Ale Amang! Tu bagasan
tanganMu ma hupasat tondingku!”

Tapasahat ma peleanta tu harajaon ni Debata, martangiang ma hita!

U : AGENDA – ALE AMANAMI – Pasupasu

R : (Mangendehon) Amen, Amen, Amen.

II. SUNGGUL SUNGGUL

1. Surat Penugasan Sian Distrik tu Cln. Biv. Esra Erni L Br Butarbutar ditongatonga ni
Hurianta (Dijaha dung sidung Manjaha Warta jemat)

2. Punguan Na Hohom : diari Jumat sadarion, 02 April 2021, tapatupa ma Punguan Na

Hohom, masuk pk. 14.00 Wib (02 Siang)
3. Perlombaan Perayaan Paskah Anak Sekolah Minggu :
a. SABTU, 03 APRIL 2021, pk. 14.00 WIB
 HORONG III : KELAS 5- I SMP : MENGHAFAL ‘HATA HAPORSEAON’
 HORONG II : KELAS II SD – IV SD ‘MENGHAFAL ‘DOA BAPA KAMI ‘
 HORONG I : TK – KELAS I SD ‘MENGHAFAL : PATIK PALIMAHON
b. PERLOMBAAN SESUDAH BUHA-BUHA IJUK (MINGGU, 04 APRIL 2021),
PK.05.00
1. Mencari Telur paskah
2. Horong I : Lomba Mewarnai telur Paskah
Horong II : Susun Ayat Alkitab
Horong III : Pesan Berantai.

4. BUHA-BUHA IJUK : Tapatupa Ibadah BUHA-BUHA IJUK DIGareja, ima ari Minggu,
04 April 2021, pk.05.00 Wib

5. PASKAH I : Minggu, 04 April 2021 . Ibadah Bahasa Indonesia, masuk Pk.08.30 Wib.
Na bertugas Naposo & Remaja Sektor 4, di Ibadah Pagi.
Ibadah Bahasa Batak, masuk pk.10.30 Wib. Tapatupa ma Ulaon Nabadia dung sidung
Pelean II di Ibadah Minggu Bahasa Batak.

6. PASKAH II : Senin, 05 April 2021, masuk pk.10.30 Wib (Gabung). Jala disi ma
dibagikan hadiah tu angka Inakhonta Sekolah Minggu na mengikuti Perlombaan
Perayaan Paskah na diari Sabtu tanggal 03 April 2021. Asa rap ma hita angka natoras
dohot ianakhonna Sikkola Minggu.

7. Protokol kesehatan : asa talaksanahon ma hombar tu protokol kesehatan ima mamake

Masker dohot jaga jarak (social distancing).