HURIA KRISTEN INDONESIA (HKI)

“IBADAH JUMAT AGUNG”

ARI PARNINGOTAN HAMAMATE NI TUHAN JESUS KRISTUS

Ojahan :
“Dibungka Jesus Dalan Naimbaru Tu Hangoluan”

RESORT KHUSUS PERDAGANGAN

DAERAH I SUMATERA TIMUR I
JUMAT, 29 Maret 2024
 Jongjong ma Ruas
1. HUHUASI
U : Hamu angka dongan! Na marpungu do hita lao marningot dihaluaon
napinatupa ni Tuhan Jesus Kristus; na mansai patar mamungka sian
peristiwa na di porlak Getsemane, tu jolo ni angka panguhum, sahat na durus
mudarNa di hau pinarsilang. Nian hansit jala paet do ditaon Ibana. Alai tung
songon dia pe paet ni sitaonon i, anggo Ibana sai manaonnaon do, ndang
manjua; ndang dipangido Ibana asa disuru porangan parbanua ginjang palua
Ibana sian sitaonon i. Gorga ma tu roham jala panghilalahon sitaonon ni
Tuhanta i. Berengma dompak silang na di Golgata i, sian i do ro haluaonta
dohot haluaon ni sandok portibion!

(Manghuling Musik/Organ angonangon mangendehon BE. 412 saayat)

2. VOTUM – TABI
U : Dibagasan Goar ni Debata Ama, dohot Goar ni AnakNa Tuhan Jesus
Kristus, dohot Goar ni Tondi Parbadia; na manompa langit dohot tano on.
Dipasaor ma dameNa tu tondinta, Amen.
Rap ma hita mandok tangiangta i!
U+H : Ale Jesus Tuhannami, bereng hami na dison. PinarmahanMi do hami
saluhutna na dison. Sai asi rohaM di hami, sai pangolu hami on, Amen.
Hundul ma Ruas
3. MARENDE: BE. 81:1-2 “Aha ma Endehononku”
1. Jesus, mual ni ngolungku, sipangolu tondingki.
Ai dibunu Ho musungku, i ma hamatean i.
Ho manaoni hamagoan, patupahon hangoluan,
Ala ni hupuji Ho tung marribu hali do.
2. Haleaon, insahinsak, reherehe, tijur pe,
Tali dohot pastappastap, tung ditaonhon Ho sude,
Paluahon au na pogos, sian tangan ni sibolis.
Ala ni hupuji Ho tung marribu hali do.
4. AYAT – TANGIANG PAMUHAI
U : “Tongon do angka sahitta diusung ibana, jala angka pardangolanta
diporsan;alai anggo rohanta mandok: Debata do maminsang, mamungkul
dohot pasipal ibana. Hape ala ni pangalaosionta Ibana tartullang, binahen ni
hajahatonta Ibana mabugang. Ampe tu Ibana pinsangpinsang parhitean ni
hasonanganta, jala binahen ni bugangNa malum itahilala.” (Jesaya 53:4-5).
 Martangiang ma hita!
Ale Tuhan Jesus Kristus, Birubiru ni Debata na mamorsan dosa ni portibion.
Na pungu do hami nuaeng jala marunduk ni roha marningot hamamateM
na gantung di hau pinarsilang i ala ni dosanami. Asi ma rohaM, lehon ma
TondiM na badia i dihami, asa diajari hami mangauhon hinahansit dohot
hinabernit ni na tinaonMu laho manobus hami. Sai pahot ma haporseaonnami
di Ho, asa taruli hami dipanghophopMi, Amen.
Didongani Tuhan Debata ma hita on saluhutna, Amen.
Haleluya, Haleluya, Haleluya!
U+H : (Mangendehon) Haleluya, Haleluya, Haleluya!

5. SINGKAT NI PATIK
U : Hata ni Debata na gabe singkat ni patik di Parningotan Hamamate ni Tuhanta
Jesus Kristus sadarion, ima na tarsurat di 1 Korint 6:20, songon on ma
HataNa:
“Arga do hamu ditobus; dibahen pasangap hamu ma Debata marhitehite
dagingmuna dohot marhitehite Tondimuna, ai Debata do nampuna i.”
Rap ma hita mangido!
U+H : Ale Tuhan Debata! Sai pargogoi ma hami mangulahon na hombar tu hataMi.
Amen.

6. MARENDE: BE. 407:1-2 “Panotnoti ma Silang”

1. Panotnoti ma silang ni Tuhanta i, Na mamorsan sude dosami,
Sai tinggangkon sude arsak ni rohami pasesahon sude dosami.
So, jo bereng i; panotnoti ma silang ni Tuhanta i, ngolumi, ngolungki sian i.
2. Tung beasa ditaon Ho, Tuhan, songon i dibagasan sude burjuMi?
Tung beasa sap mudar sude dagingMi, ai tigor do sude dalanMi?
Nda i holongMi? MudarMi na use pasonangkon muse sasude na porsea disi.
Jongjong ma Ruas
7. MANOPOTI DOSA – HASESAAN NI DOSA
U : Ale Tuhan Debata, Amanami na di banua ginjang! Namarholong ni roha do
Ho tu saluhut hami jolma pardosa. Nunga dilehon Ho AnakMu Tuhan Jesus
Kristus, manaon haporsuhon dohot pardangolan, jala pola mate tarsilang
holan humophop hami; naung mulak mangolu jala manaek tu banuaginjang
mangondihon hami. Huparhatopot hamima tu joloM, paboa ndang
huhangoluhon hami balga ni holong dohot pambahenanMi. Jotjot do
marisuang doshon naso marguna hubahen hami nasa silehonlehonMi, ala
ndang huringkoti jala huradoti hami i dibagasan ngolunami. On pe, sai asima
 rohaM huhut palambas mida hami. Sesama saluhut dosa dohot angka
pangalaosionnami di Hatam.
H : Tuhan, asi ma rohaM di hami pardosa on!
U : Sai buhai jala sunggulima haporseaonnami, jala patinggilma tongtong
sipareonnami tumangihon HataM dohot soara ni TondiM, asa huantusi jala
hurajumi hami panghophopMu, huhut tau hami mandok mauliate tu Ho, ala ni
saluhut pambahenanMu dibagasan ngolunami.
H : Tuhan, asi ma rohaM di hami pardosa on!
U : Sai jaloma tangiangnami on, marhitehite AnakMu Tuhan Jesus Kristus
Tuhannami, Amen.
U : Hamu angka dongan! Ndang tarasam balga ni pasupasu ni Debata naung
tajalo. On do Hata ni Debata taringot tu hasesaan ni dosanta: “Martuama
manang ise naung sinesaan pangalaosina, naung hinungkupan dosana.
Martuama jolma, ia so dijujur Jahowa tu ibana hajahaton.” (Psalmen 32:1-
2a).
Hasangaponma di Debata na diginjang!
U+H : Amen.
Hundul ma Ruas
8. MARENDE: BE. 179:2-3 “Adong do Sada Mual i”
2. Aek mual na badia i, ima di Jesus i.
Disesa do tihasta i, dibuat arsak i.
3. Ai mudar ni Tuhanta i do mual i sintong.
Durus di Golgata do i manghophop hita on.

9. EPISTEL
U : Tabege ma Hata ni Debata turpuk ni Epistel na tarsurat di Psalmen 22:1-6,
songon on ma hata ni Debata!
Ende sian si Daud.Ale Debatangku, Debatangku! Boasa tung tadingkononmu
ahu? Sai mandaodao do angka hata ni anggukhon sian hatuaonku.
H : Ale Debatangku, sai joujou do ahu arian, alai ndang mangalusi Ho, jala
borngin pe ndang jumpang ahu hasonangan.
U : Alai nabadia do anggo Ho, marhabangsahon angka pujipujian ni Israel.
H : Marhaposan tu Ho do angka ompunami, pos do rohanasida, jadi dipalua Ho
do nasida.
U+H : Tu Ho do nasida mangangguhi, jadi malua ma nasida, marhaposan tu Ho do
nasida, jadi ndang tarurak.
U : Martua ma angka na umbege jala na umpeop Hata ni Debata! Amen
10. MARENDE: BE. 622:1-2 “Mansai Nalnal di Angka Partingkian”
1. Mansai nalnal di angka partingkian, sinondang ni silangMu, Tuhanhi.
Sian hatiuron na marsinondang holongNa na so halompoan i,
Sude na bangso do marpanghirimon tu sondang ni asi ni roha i.
Songon parluga na manghalungunhon parbinsar ni mata ni ari i.
2. SilangMu Kristus tanda ni holongMu pahisar tondi na magopu i.
Mangalononghon sasude dosangku mabaor tu laut asi ni rohaMi.
Naung tubu hami gabe na imbaru, na niurasan sian dosa i.
Ala mudarMu na niusehonMu, di Golgata, di hamamateMi.
Jongjong ma Ruas
11. MANGHATINDANGHON HAPORSEAON
U : Rap ma hita manghatindanghon Haporseaonta i!
U+H : Ahu porsea di Debata Jahowa, i do Ama pargogo na so hatudosan, na
tumompa langit dohot tano.
Ahu porsea di Jesus Kristus, Anak ni Debata Jahowa nasasada i; i ma na
tinubuhon ni si Maria, na gabegabean sian Tondi Parbadia andorang so
habubuhan. I do Tuhanta na tumaon na bernit di panguhuman ni si Latus, na
mate tarpajal do Ibana di hau pinarsilang, na tuat tu banuatoru dung ditanom,
na mulak mangolu di ari patoluhon, na manaek tu Surgo laho hundul tu
siamun ni Debata Jahowa, AmaNa i pargogo na so hatudosan i, disi ma Ibana
paima mulak sogot tu tano on manguhumi halak na mangolu dohot na mate.
Ahu porsea di Tondi Parbadia, jala adong sada Huria na badia, Huria hatopan
ni halak Kristen angka na badia, dohot di hasesaan ni dosa dohot di Hata i na
mandok: Mulak mangolu do sogot daging ni halak naung mate, dohot di
hangoluan na so ra suda, Amen.
Hundul ma Ruas
12. MARENDE: BE. 86:1… “Silang na Badia i” (PELEAN I & II)
1. Silang na badia i Ho do lombulombungki; maralohon dosa i dohot pandelean i
Di sude sitaonon i Ho ma lombulombungki.
2. Nasa na huula i ndang tau hasonanganki. Nang ringkot pe rohangki pola ro nang
ilungki.
Holan asi ni rohaM Pangurupi o, Tuhan.
3. Ro do au nuaeng tu ho, sai palambas ma rohaM. Nunga pola mate Ho, ala asi ni
rohaM.
Jangkon au na dangol on, sai ulosi tondingkon.
4. Dosa patundukkon au, ho ma mangondihon au. Ramun situtu do au, mudarMi
mamuri au,
Na pogos, dangol au on, Ho ma artangki tongtong
 5. Silang na badia i Ho do lombulombungki. Molo puas hodokhi, di na suda bohalhi.
Di sude sitaonon i, Ho ma lombulombungki.

13. JAMITA - Heber 10:16-25

14. MARENDE: BE. 88:1-2 “Di Surgo do Alealenta”

1. Jesusku naung manobus ahu, sai naeng haholonganku Ho.
Tu dolok Golgata Ho laho, Nionjar ni holongMu do.
Hupuji nasa asiMi, Alai gumodang holongMi
2. Tarsolsolbagi do rohangku paidaida dangolMi
Marningot sasude dosangku ai i do na tinaonMi
Hupuji nasa asiMi Alai gumodang holongMi
15. TANGIANG PANGONDIANON

16. MARENDE: BE. 405:1... “Adong Sada Mual” (PELEAN III & IV)
1. Adong sada mual, tung sae uli ni Sombu do disi uas mi.
Ai manang hajorbut ni sahitmi, na malum luhut na disi.
Oloi ma joujouNa i, lului mual na uli i. Sopola martuhor mual i; Porsea! Di ho nama i.
2. Ai manang tu dia mabaor mual i, denggan do pangkorhon ni i.
Sumurung do tumpal sijaloon ni na ro manahui sian i.
Oloi ma joujouNa i, lului mual na uli i. Sopola martuhor mual i; Porsea! Di ho nama i.
3. Ai aek hangoluan do goar ni i, na dapot di Jesus do i.
MudarNa na arga niusehon ni, humophop pardosa do i.
Oloi ma joujouNa i, lului mual na uli i. Sopola martuhor mual i; Porsea! Di ho nama i.
4. Masihol do ho? Ro tahui mual i, nang ho pe, dijou tondi i;
Ai holan na ias maridi disi, tarbaen tolhas tu surgo i.
Oloi ma joujouNa i, lului mual na uli i. Sopola martuhor mual i; Porsea! Di ho nama i.

(Molo ndang dipatupa Ulaon Na Badia, diuduti ma tu Tangiang Panutup)

17. ULAON NA BADIA

1. BE. 153:1 “O, Jesus Naung Sineat”
1. O, Jesus naung sineat, di hau na pinarsilang.
RohaM tongtong daulat, nang uju Ho tarsilang.
Marutang hosa hami, ditaon Ho dosanami, asi rohaM o Jesus.
2. BE. 154:1 “Sai palinggas ho”
1. Sai palinggas ho tondingku, sai tadingkon ma arsakmu.
Ro ma ho tu hatorangan, asa dapot hasonangan.
 Ai tarontang ho saonari, tu haroan na badia.
Na manggomgom parluhutan, naeng tu Ho do maringanan.

(Catatan: Tingki tu jolo ruas manjalo roti dohot anggur, holan musik ma na manghuling
angonangon, manang holan Songleader mangendehon BE No. 153,154,155)

3. BE. 153:2… “O Jesus Naung Sineat”

2. Pelean na badia na masuk tu Jahowa. Singkat ni manisia na so daulat roha.
Ditaon Ho dosanami, so i lao mago hami; asi rohaM, o Jesus.
3. Pelean na badia jinalo ni Debata. Panaon ni manisia na pasohothon bada.
Sai sesa dosanami, Ho hatigorannami; asi rohaM, o Jesus.
4. Pelean na badia dagingMu sipanganon. Di angka na porsea, mudarMu siinumon.
Sai ro ma maringanan marhite parpadanan, di hami on, o Jesus.

4. BE. 154:2… “Sai Palinggas Ho Tondingku”

2. Sai ringkoti ma manomu na pangolu ho tondingku.
Na manuktuk do Ibana di rohaM dibaen hataNa.
Ungkap pintu ni rohamu, asa bongot ma Rajamu.
Dok: “Ingani ma rohangku, unang be tadinghononMu.”
3. Sai malungun do rohangku, ale Jesus di basaMu.
Tung na tangis do rohangku, na malungun di mannaMu.
Na mauas do tondingku, ale Jesus di mudarMu.
Pinangido ni rohangku hasasaor tu Debatangku.
4. Las huhut do angka hitir rohangkon di na hupingkir.
Simosimo ni panganon, di bagasan parpadanan.
Ai na so tardodo roha, pinatupa ni Jahowa.
Ingkon Tondi Porbadia pabotohon i tu iba.

5. BE. 155:1… “Tuson Ma Ho Ale Tondingku”

1. Tuson ma ho ale tondingku din a mauas male ho.
Manjalo basa ni Tuhanmu pinaradeNa i di ho.
Di lehon Jesus do dagingNa marhitehite roti on.
Dilehon dohot do mudarNa marhitehite anggur on.
2. Ai nang tongtong pe ganup ari mudarNa mangurasi au.
Huhut Ibana so mansadi manogu tu lambungNa au.
Sai naeng au mangan parpadanan ni Jesus Kristus Tuhanhi.
Na padamehon parbadaan, na pasonanghon rohangki.
3. Asi rohaM di au o Jesus, tumpahi au sadari on.
 Ai hataMi do hupatulus manganhon parpadanan on.
Antong patiur ma rohangku marningot denggan ni basaM.
I ma na tinaonMi dosangku, binaen ni holong ni rohaM.
4. Patogu haporseaonhu di hasasae ni dosangki.
Marsitiopan baen rohangku di mudarMi na durus i.
Sai ro ma Ho ale Tuhanhu marhite parpadanan on.
JoroM ma baen nuaeng rohangku, Ho ma nampuna au tongtong.

18. MARENDE: BE. 227:1... “Jesus Ngolu Ni Tondingku” (KOLEKTE ULAON NA

BADIA)
1. Jesus ngolu ni tondingku, Ho do haporusanki.
Gok di Ho nama diringku ro di nasa langkangki.
2. Lam tangkas ma patuduhon tu au on panghophopMi.
Asa i huhalungunhon hot ma au di lambungMi
3. Jangkon au baen siseanMu na girgir tu podaMi
sai surdukhon ma tanganMu asa tong hutiop i
4. Tangkup au Jesus Tuhanku tiop au mansai gomos.
Asa unang runsur pathu sian dalan na tingkos
5. Raphon Ho do au mangalo dosa dohot hisaphi
Ai sumurut do pangago anggo Ho di lambungki
Jongjong ma Ruas
19. TANGIANG PANUTUP

-----ooooo00000ooooo-----