Kel. A. Aldi Sibarani/br. Pangaribuan (U: Uluan, H: Huria, K: Keluarga) 1. MARENDE BE No. 2 : 1 – 2, “NAENG PUJIONKU HO JAHOWA” Naeng pujionku Ho Jahowa, ai Ho do Debata na tutu i Sai suru Tondi Parbadia tu Au asa hupuji GoarMi Marhitehite Jesus AnakMi, asa lomo rohaM di endeki Togihon ma au tu AnakMu asa tu Ho ditogu au muse TondiM pasaorhon tu tondingku, manogu au di dalan na ture Asa tongtong gok dame rohangki, huhut girgir mamuji goarMi 2. VOTUM – INTROITUS – TANGIANG U: Marhitehite Goar ni Debata Ama, dohot Goar ni AnakNa Tuhan Jesus Kristus, dohot Goar ni Tondi Parbadia, na tumompa langit dohot tano on. H: Amen. U: Olophon ma Jahowa ale sandok tano on! H: Bongoti hamu ma angka bahalna marhitehite hamuliaon, angka alamanna marhitehite pujian, mauliate ma rohamuna di Ibana, puji hamu ma goarNa! U: Jahowa do Debata. Ibana jumadihon hita, jala Ibana nampuna hita, bahen bangsoNa dohot birubiru pinarmahanNa. K: Ai Pardenggan basa do Jahowa, ro di saleleng ni lelengna do asi ni rohaNa, jala marsundutsundut do hasintonganNa. U: Haleluya! Martangiang ma hita: Ale Tuhan Debata parasi roha na sumurung! Ala asi ni rohaM do umbahen na boi hami marpungu dison! Ditatap Ho do hami na pungu dison sian habangsaMi. Mauliate rohanami di Ho, ala ni angka ariari na pinasahatMi tu hami, tarpatupa hami Ulaon Habatahonnami, i ma manggohi adat keluarga ni dongannami A. Aldi Sibarani/br. Pangaribuan. Ala ni i, tu Ho ma hupasahat hami ulaonnami sadari on, asa Ho ma na marhuraja di tongatonganami. Pasupasu ma nang keluarga rap dohot sude hasuhuton na patupahon ulaon on, asa jumpang di nasida asi ni rohaM na godang i. Nang hami pe na pungu nuaeng dison saluhutna, tongtong ma di bagsan pangaramotionMu, marhitehite AnakMu Tuhan Jesus Kristus Tuhannami. Amen. 3. MARENDE BE No. 159 : 1 – 2 “MARTUA DONGAN ANGKA NA SABAGAS” Martua dongan angka na sabagas, na mardonganhon Tuhan Jesus i Na mangoloi Ibana mansai ringgas na so marholang tangiangna i Tongtong holong rohana di Ibana manungkun lomo ni rohaNa i Huhut tongtong marguru tu HataNa dibaen sandok pangalahona i. Martua na saripe pangajari di anakhonNa asa tong burju Na so marpansohotan ganup ari Tumangiangkon angka i tutu Tu Tuhan Jesus asa sai Ibana mamasumasu sasudena i Huhut dilehon asi ni rohaNa manogihonsa tu lambungNa i 4. MANJAHA TURPUK U: Hita na pungu nuaeng dison, tajaha ma turpuk di hita, i ma na nienet sian Psalmen 23 : 1 – 6. Tajaha ma marsorinsorin! Jahowa do siparmahan ahu, ndang tagamon hurangan ahu. H: Dipatongon di ahu tu jampalan angka na lomak, ditogutogu do ahu di lambung aek hasonangan. U: Dipasabam do rohangku, ditogu do ahu di dalan hatigoran, ala ni goarNa i. H: Ai nang pe mardalan ahu di rura linggoman ni hamatean, ndang huhabiari parmaraan, ai Ho do mandongani ahu, tungkotMu dohot batahiM mangapuli ahu. U: Ho do manutup meja di jolongku maradophon angka musungku, dimiahi Ho do ulungku, suksuk do panginumanku. H: Tongon tahe denggan basa dohot asi ni roha mangihutihut ahu saleleng ahu mangolu, jala dung mulak ahu, masuhanku ma bagas ni Jahowa salelenglelengna. U: I do sahatna. Martua do angka na tumangihon hata ni Debata jala na umpeopsa. Amen. 5. MARENDE BE No. 102 : 1 “O TONDI PARBADIA, BONGOTI” Rajai ma hami sai tongtong, Pasaor tu rohanami on, DameM, o Tuhannami Marhitehite tondiMi, Ingani rohanami be, Huhut patogu hami Dao ma bada Sian hami, jabunami baen inganan Pardamean, hasonangan. 6. JAMITA 7. MARENDE BE No. 763 : 1-2 “MOLO JESUS DONGANMI” (Pasahathon Pelean) Molo Jesus donganmi las roham, Jesus i pangurupi, las roham, Hot haporseaonmi dohot pos ni rohami Mardonganhon Jesus i las roham. Las roham, las roham mardonganhon Jesus i. Las roham, Marsinondang ma di ho, bintang pangkirimon i, Mardonganhon Jesus i, las roham. Molo Jesus donganmi las roham, jagaonNa tondimi las roham, Tiruonmu ma tongtong dame nang holongNa i, Saleleng di ngolumi las roham. Las roham ………,du. 8. PARSURUON U: Hita na pungu dison! Tama situtu tahamauliatehon denggan basa ni Jahowa di pardalanan ni ngolunata. Angkup ni i, hangoluhononta ma nang HataNa naung tatangihon di pardalanan ni ngolunta siganup ari. Antong naeng borhat ma hita laho mangulahon i saluhutna! Ala ni i, tama ma jaloonta gogo sian Tuhanta asa Ibana ma na margogoihon hita di sandok pardalanan ni ngolunta, asa parsidohot hita gabe siulahon Hata na i. H: Sai ajari jala pargogoi ma hami Ale Tuhan, asa talup jala margogo hami pasauthon songon na nidok ni HataM. Sai jalo ma nang pamujionnami on Ale Tuhan, tau hasangapon di GoarMu, jala pargogoi ma hami saluhutNa di na patupahon sangkapMu di pardalanan ni ngolunami ganup marsadasada. K: Pargogoi ma nang hami Ale Tuhan, laho mamilangi angka denggan ni basaM di pardalanan ni ngolunami. Asi ni rohaM marhite gogo siganup ari ma hupangasahon hami laho mangula ganup ulaonnami siap ari. Sai ho ma na mangarajai, jala mangula marhite pamatang nang tondinami. U: Pasupasuhon ma HataMi tu hami on Ale Tuhan, asa i ma na mangarajai roha nang pingkirannami. Surdukhon ma tanganMi manjama roha nang pingkirannami. Ho ma na marhuraja di sandok pamatangnami. Padao ma nasa roha hageduhon sian hami na pungu on, jala pasonggop ma TondiM na gok dame i tu bagasan rohanami ganup marsadasada. Sai ajari ma hami Ale Tuhan mamilangi ariarinami jala sai dongani ma hami, marhitehite AnakMu Tuhan Jesus Kristus, Tuhannami. Amen. 9. TANGIANG PELEAN – TANGIANG ALE AMANAMI – AMEN