1.

PAMUHAI
U : Huria na hinaholongan ni Tuhanta! Sadari on bongot ma hita tu Minggu
Ujung Taon Parhuriaon, laos Parningotan di angka naung monding. Asi ni

1 – Parmingguon Ujung Taon Parhuriaon

 roha dohot denggan basa ni Tuhanta do na mangaramoti huriaNa mardalan
di sandok partingkian. Sian ari tu ari, sahat tu sadari on, Ibana do na
mangondihon huriaNa.
H : Hupuji hami ma Ho ale Tuhannami, Parasiroha jala
Pardengganbasa. Sai ajari jala parrohai ma hami mamilangi
angka ariarinami, asa dapotan roha na bisuk hami.
U : Dibahen i, tapahibul ma rohanta laho mamuji Tuhanta, Marsinggang ma hita
di adopanNa, taendehon ma denggan ni basaNa!

2. BE No. 440 : 1, 2, 4 SAI PUJI MA TUHANTA BL. 296

Sai puji ma Tuhanta Jesus Kristus/ Pasangap ma, lomoNa ma patulus
Pinuji ma GoarNa, da!
Na sahat ma endeta tu joloNa./ Na metmet manang angka na umbalga/ Pinuji ma GoarNa,
da!
~~~~ J o n g j o n g ~~~~
Ndang leleng be tu Ho ma sahat hami/ Disiuli bege on endenami.
Pinuji ma goarNa da!

3. VOTUM – INTROITUS – TANGIANG:

U : Marhitehite Goar ni Debata Ama dohot Goar ni AnakNa Tuhan Jesus Kristus
dohot Goar ni Tondi Parbadia, na tumompa langit dohot tano on. Amen.
Songon duhutduhut do saluhut daging jala songon bungabunga ni
duhutduhut i do saluhut hasangapon ni jolma. Nunga malos duhutduhut i
jala nunga marurus bungabungana i, alai na hot do Hata ni Tuhan i ro di
saleleng ni lelengna. Sai burju ma ho rasi rasa mate, dung i lehononKu ma tu
ho tumpal hangoluan. Haleluya
H : (Mangendehon) Haleluya, Haleluya, Haleluya!
U : Martangiang ma hita! Ale Tuhan Jesus, Tuhan ni angka na mate dohot
angka na mangolu! Ho do nampuna hami, manang mangolu manang mate pe
hami. Nang pe mardalan hami di rura nilinggoman ni hamatean, ndang
huhabiari hami be hamatean, ai Ho do dongannami. Ndang tartiop hamatean
manang tanoman be hami, ai Ho do Tuhannami naung humophop hami, jala
Ho nampuna hami. Ro hami nuaeng tu Ho mangido: Sahat tu Ho ma
tondinami dohot dagingnami, asa di Ho hami manang na mangolu manang
na mate pe. Sai tiop ma tangannami, urupi hami marhitehite panghophopMi,
asa sahat hami tu hangoluan na so ra suda. Amen. ~~~~ H u n d u l ~~~~

4. BE No. 351 : 1-2 “BEHA MA HITA IA DUNG MARUJUNG” BL. 201

Beha ma hita ia dung marujung paraloanta di portibi on

Dung na malua hita na mangusung na dokdok i di atas tano on
Lao muli hita tu banuaginjang dung pinaspashon orbuk tano i
Di na jonok tinatap hasonangan na pinarsinta ni rohanta i
Beha ma hita molo disondangi panondang na so olo sundut be
Dalanta jala dosa dilongkangi Tuhanta sian hita on sude
So dipabali tihas i be hita so manolsoli be rohanta i
Di na tatopot saluhut donganta naung sonang di banua ginjang i.

2 – Parmingguon Ujung Taon Parhuriaon

5. PATIK
U : Tatangihon ma Patik ni Debata di minggu sadari on, i ma na tarsurat di
Konfesi HKBP Bindu 15, Parningotan di na monding. “Tahaporseai jala
tahatindanghon do: Hamatean i, i ma ujung ni ngolu ni jolma di portibi on,
maradian ma ibana sian sandok ulaonna. Adong haluaon di angka na
porsea paboa Jesus Kristus naung hehe i do pangoluhon jolma i sian na
mate, Ibana do Tuhan ni na mangolu dohot na mate. Martua do na mate di
bagasan Tuhan i na satia ro di ujung na. Dipatupa huria i do parningotan di
angka na monding laho padungohon haporseaonta marningot ajalta sandiri
huhut padohothon panghirimon di hamonangan ni Kristus manaluhon
hamatean songon i nang panghirimon di banua ginjang sambulon ni
tondinta dohot di hadodomu ni na porsea i dohot Tuhan Debata sahat tu na
ro Jesus Kristus paduahalion”.
I do sahatna. Antong, rap mangido gogo ma hita sian Tuhan Debata!
U+H: Ale Tuhan Debata, sai pargogoi ma hami mangulahon na
hombar tu PatikMi. Amen

6. Koor : Ina Lansia

7. Marende BE No. 174 : 1, 3 “TOROP DOPE NA SIAT I” BL. 184
Torop dope na siat i di hasampuran rea./ I pe hamu pardosa i sai olo ma porsea./ Ai Debata manjou
hamu tu hasonangan situtu
Hamu, hamu dijou Debatamu
~~~~ J o n g j o n g ~~~~
Pardosa ho didok roham, na so tama be dohot?/ Ndang pola ala ni dosam, umbaen na sundat bongot./
Ai nunga sae do dosam i, digarar Tuhan Jesus i
Naung sae, naung sae, naung sae do dosami.

8. MANOPOTI DOSA
U : Tatopoti ma dosanta na godangi tu adopan ni Debata, martangiang ma hita!
Ale Tuhan Debata, Amanami, Pargogo na so hatudosan, Parasiroha mida
hami na dangol on! Na ro do hami tu joloM manopoti dosanami na godang i.
H : Ale Tuhannami, mansai godang do dosa dohot pangalaosionnami
di adopanMu. Tung jotjot do hami mangulahon na so lomo ni
rohaM na mambahen ingkon hona uhum hami ala nii. Mauliate
ma dipasahat rohanami tu Ho, ai diramoti Ho do hami tongtong,
ido umbahen sahat hami tu ujung ni Taon Parhuriaon on. Ale
Tuhan, binsan huingot hami asi ni rohaMi sadari on, sai suru
TondiM paubahon rohanami, asa unang be hudatdati hami
mangulahon angka dosa.
U : Di bagasan hajahaton do hami tubu jala ndang adong haporseaon di bagasan
rohanami hian, saluhut do hami manimbil sian angka dalanMu. Mansai
godang do pangalaosionnami di PatikMu. Alai ingot ma hami, ale Tuhan, ala
ni denggan ni basaM dohot asi ni rohaM.

3 – Parmingguon Ujung Taon Parhuriaon

 H : Ale Tuhannami, di Minggu Ujung Taon Parhuriaon sadari on,
huingot hami do angka hinaholongan ni rohanami naung jumolo
dijou Ho tu lambungMu. Ndada na mandele hami ala hamatean i,
alai narungka do rohanami marningot ajalnami be. Na ingkon
borhat do hami songon angka dongannami i, alani i, binsan diloas
Ho do pe hami mangolu di hasiangan on, sai lam patandahon ma
tu hami asi ni rohaM dohot denggan ni basaM asa tung muba
rohanami jala sai hutundalhon hami nasa ulaonna so
hinalomohon ni rohaM.
U : Sai unang paingotingot angka dosa ni haposoonnami dohot
pangalaosionnami; sai ingot ma hami hombar tu asi ni rohaM dohot denggan
ni basaM ala ni GoarMu. Ale Tuhan Jesus, marpamuati ma rohaM di
dosanami na godang i! Amen.
Bagabaga ni Debata Taringot tu hasesaan ni dosanta: Parasiroha jala
pardengganbasa do Jahowa, lambat tarrimas jala parasiroha godang. Ndang
dibahen tu hita hombar tu angka dosanta, jala ndang dibaloshon tu hita
hombar tu angka hajahatonta. Songon asi ni roha ni amaama mida angka
anakna, asi ni roha ni Jahowa di angka na manghabiari Ibana. Hasangapon
ma di Debata na di ginjang!
H: Amen. ~~~~ H u n d u l ~~~~

9. Marende BE No. 837 : 2 “Sada Huta na mansai uli” BL. 837

Hita dohot donganta disan, rap marende mamuji Tuhan
Ndang adong be hasusaan disan, salelengna di Surgo sonang.
Sogot di Surgo I, sai pajumpang do hita disi
Sogot di Surgo I sai pajumpang do hita disi

10. E P I S T E L
U : Hata ni Debata turpuk Epistel di Minggu Ujung Taon Parhuriaon sadari on,
tarsurat di Jesaya 65 : 17 – 23. Songon on ma hata ni Jahowa. “Ai ida ma,
Ahu ma manompa langit na imbaru dohot tano na imbaru, jala ndang be
ingoton angka na parjolo i manang tarsunggul tu roha.
H : Ingkon marlas ni roha ma hamu jala marolopolop ro di
salelenglelengna ala Ahu manompa angka i! Ai ida ma, Ahu
manompa Jerusalem bahen parolopolopon, jala bangso isina i
bahen las ni roha.
U : Ahu sandiri pe marolopolop do mida Jerusalem, jala marlas ni roha Ahu
mida bangsongKu, jala ndang be tarbege disi soara partangison manang
soara angguhangguk
H : Ndang adong be disi posoposo siotik ari, manang na ubanon na
so gok ariarina; ai dolidoli dope na marumur saratus taon laho
mate, jala pardosa sisaratus taon hona bura.
U : Jala paulionnasida ma angka bagas, laos inganannasida, suanonnasida ma
hau anggur jala panganonnasida parbuena.

4 – Parmingguon Ujung Taon Parhuriaon

 H : Ndang tagamon nasida paulihon bagas, gabe halak na asing
mangingani, ndang tagamon nasida manuan, gabe halak na
asing manganhon; ai songon ariari ni hau, songon i do ariari ni
bangsongKu, jala jadijadian ni tangannasida ingkon halak na
Hupillit marsaulihonsa.
U : Ndang tagamon loja so marniula nasida, manang manubuhon anak, asa
tilahahononna tibu, ai pinompar ni na pinasupasu ni Jahowa do nasida ro di
tubunasida i. Ido sahatna. Martua do angka na tumangihon Hata ni
Debata jala na umpeopsa. Amen.

11. Koor : Ina Kamis

12. Marende BE No. 232 : 1 – 2 “JESUS URUPI” BL 116
Sian sude parulian na arga/ Sada huboto hutiop tongtong
Jesus Tuhanku Ho arta na arga/ Na mangatasi sudena antong
Tangkup Tuhanmu tung tiop hataNa/ Sai pangasahon ma bagabagaNa
~~~~ J o n g j o n g ~~~~
Naeng ho pistar? Sai dapothon Tuhanmu/ Nasa na hurang sai boan tusi
Tu pamodaiNa paunduk rohamu/ Asa tiur sasude bogasmi
Tangkup Tuhanmu tung tiop hataNa/ Sai pangasahon ma bagabagaNa.

13. MANGHATINDANGHON HAPORSEAON

U : Tahatindangkon ma haporseaonta i, songon na hinatindangkon ni donganta
sahaporseaon di sandok portibi on. Rap ma hita mandok:
H: Ahu Porsea….. Amen. ~~~~ H u n d u l ~~~~

14. Koor : Remaja Naposobulung

15. TINGTING, TANGIANG PANGONDIANON

16. PARNINGOTAN DI ANGKA NAUNG MONDING

S: Marende BE No. 334 : 5 - 6. “Nasa jolma ingkon mate” BL. 186.
Dohot do disi maringan na badia i sude.
Ompu dohot panurirang, nang sude apostel pe.
Ai marriburibu taonna lao tumopot ingananna.
Angka na badia i pasangaphon Tuhan i.
O Jerusalem nauli, tiur ni panondangmi
Sonang dohot au maruli tumangihon endemi
On pe timbul las ni roha, on pe binsar nasa tua
On ma ari i tahe, na so olo salpu be
U : Huria ni Tuhanta na hinaholongan, di naung sahat hita nuaeng tu Minggu
Ujung Taon Parhuriaon sadari on, tama do ingotonta angka donganta na
itahaholongi naung marujung ngolu jala maradian sian angka ulaonna di
hasiangan on. Tatangihon ma goar nasida angka naung jumolo i, mamungka
sian Minggu 20 November 2022 sahat tu Minggu sadari on, 26 November
2023.
1. ………………………….
2…………………………..
Di ujung ni ajal nasida, disoarahon ma tu hita natading dope di hasiangan
on. Anggiat ma marpanghorhon i tu haporseaonta na mandok :

5 – Parmingguon Ujung Taon Parhuriaon

 “Nunga hupasidung paraloan na denggan i, nunga hupaujung parlojongonki;
ramot hubahen haporseaon i. Diri nama di jolongku tumpal hatigoran,
silehonon ni Tuhan, Paruhum na tigor i, di ari sogot i tu ahu; alai ndada
holan tu ahu, tu saluhutna do tahe, angka na mangkaholongi hapataronna i.”
2 Timoteus 4 : 7-8.
H : Lehonon ni Tuhan i ma Tumpal Hangoluan tu nasida angka na
porsea jala naung sahat tu lambung ni Ama i.
U : Porsea do hita, TUHAN i do na manjou hita muse asa masipaidaan di
lambung ni Tuhanta, alani i rap jongjong ma hita huhut marende :
S : (Mangendehon) BE No. 347 : 1 – 3 “SAI MASIPAIDAAN” BL. 11
Sai masipaidaan do na porsea i, dung sahat be langkana
Tu hasonangan i, tu hasonangan i, tu hasonangan i.
Antong burju ma hita mangalo dosa i, sai unang tading hita
Di tongan dalan i, di tongan dalan i, di tongan dalan i
Sai masipaidaan ma hita on muse, di lambung ni Tuhanta
Dung monang hita be, dung monang hita be, dung monang hita be.
U : Ale Tuhan Debata, sian na hinan jala na mangolu ro di saleleng ni lelengna!
Huingot hami sadari on angka na mate sian hami, naung pajolohon tu
lambungMu. Di Ho do anakhinsu di banua ginjang, jala diungkap Ho do i di
angka na mangasahon Tuhan Jesus Kristus. Na rungka do rohanami sadari
on marningot ajalnami, dohot haheheon ni daging di ari sogot. Mauliate ma
rohanami tu Ho, ala ditubuhon Ho hami tu pangkirimon na mangolu, gabe
partohap hami di hangoluan na so ra suda. Ndada na mandele hami di ari
parningotan on, alai na malungun do hami di sambulo ni tondinami. Nunga
torop dongannami naung nialapMu; tau sipaingot do ujung ni langkanasida
di hami, bahen pangkirimon mida Tuhan Jesus di ujung ni langkanami be.
Sai sungguli ma rohanami mambahen tiruan na denggan di angka
pinomparnami. Sai apuli ma na marsak roha dohot angka na matean, asa
unang mangandungi jala mandele nasida. Sai taiti ma rohanasida mamereng
dompak ginjang. Sai lehon TondiM tu hami asa tangkas dihatindanghon tu
hami, naung dohot do hami anakMu jala panean di arta na di banua ginjang.
Sai padao ma ganggu ni roha sian hami, asa hot haporseaonnami maniop
Tuhan Jesus Sipangolu i, andorang hubolus hami rura linggoman ni
hamatean i. Molo homur matanami be, ungkap ma mata ni rohanami asa
tangkas niida dalan tu hasonangan i. Molo hallang dilanami, so binoto be
mangkuling, pargogoi ma hami marhitehite TondiM i, asa tarjouhon hami:
Ale Amang! Sahat tu tanganMu ma tondingku! Sai patiur hian rohanami, asa
hobas langkanami jala sonang hami laho mate di bagasan Tuhan Jesus
Kristus, Tuhannami. Amen. ~~~~ H u n d u l ~~~~
17. BE No. 834: 1 – 2 “NA MASIHOL DO ROHANGKU” BL 834
(Pasahat Pelean Ia, Ib)
Na masihol do rohangku tu na sonang i tu inganan ni Tuhanta i
Tano on ro di sudena pangisina i susa sai susa rohangki
Marolopolop rohangki di surgo di na sonang i
Soada na hurang sabam sonang rohangki molo dung sahat au tusi
Ai andigan idaonhu haholonganhi raphon Jesus alealengki
Haholongan na badia sian Jesus i sonang sai sonang rohangki
Marolopolop rohangki di surgo di na sonang i.

6 – Parmingguon Ujung Taon Parhuriaon

 …..Organ……
Di na hundul au manatap dompak langit I, di na ro sibalik hunik i
Digombarhon I do ujung ni ngolunta I, ndang be mabiar au disi
Marolopolop …du

18. JAMITA: PANGUNGKAPON 21 : 1 - 4

19. BE No. 522 : 1… ”SURGO I SAMBULONTA DO I” BL 359

(Pasahat Pelean II)
Surgo i sambulonta do i ndang adong be siaeon disi
Na mamuji tongtong na disi pinalua ni Tuhanta i
Surgo i surgo i ndang adong be siaeon disi
Surgo i surgo i surgo i ndang adong be siaeon disi
Na marloksa naung sahat tusi tu inganan na sai denggan i
Aut naung domu ma au dohot i gok ma las ni rohangku disi
Surgo i surgo i ndang adong be siaeon disi
Surgo i surgo i surgo i ndang adong be siaeon disi
-----Organ----
Na mangkirim rohangku dison paima sahat tusi nang au on
Taiti au ale Tuhan tusi asa rap dohot Ho au disi
Surgo i surgo i ndang adong be siaeon di si
Surgo i surgo i surgo i ndang adong be siaeon disi
Holan sada nama holsongki unang tading haholonganhi
Na tu au pinalumenhonMi nang nasida sai togu tusi
Surgo i surgo i ndang adong be siaeon disi
Surgo i surgo i surgo i ndang adong be siaeon disi

20. Tangiang Pelean: (Jongjong )

U : Tatangianghon ma peleanta. Ale Debata, Amanami na di banua ginjang!
Ho do haroroan ni saluhut silehonlehon na denggan dohot nasa ulibasa
na mauliutus. Hupasahat hami ma sian na nilehonMi tu hami,
peleannami tu Ho. Sai jalo ma i gabe uap na hushus di joloM. Pasupasu
ma i jala ramoti asa huparhaseang hami pelean on, patimbulhon
HarajaonMu di tongatonga ni HuriaM dohot di portibi on. Buhai ma
rohanami marhitehite TondiM, asa lam hutanda hami godang ni
silehonlehonMi tu hami, asa lam girgir hami mandok mauliate tu Ho,
marhitehite Jesus Kristus Tuhannami. Amen.
H : (Mangendehon) BE. HKBP No. 204 : 2 “NDANG TADINGHONONHU
HO” BL 73
♫♪♫
Nasa na ni lehonMi, tondi ro di pamatanghu
Hosa dohot gogongki, ro di saluhut artangku
Hupasahat i tu Ho, na so unsatonhu do
U : Ale Amanami na di banua ginjang! Sai pinarbadia ma GoarMu! Sai ro
ma HarajaonMu! Sai saut ma lomo ni RohaM di banua tonga on songon

7 – Parmingguon Ujung Taon Parhuriaon

 na di banua ginjang! Lehon ma tu hami sadari on hangoluan siapari!
Sesa ma dosanami songon panesanami di dosa ni dongan na mardosa tu
hami! Unang hami togihon tu pangunjunan! Palua ma hami sian
pangago!
H : (Mangendehon): BE HKBP No. 841: 1 “AI HO DO NAMPUNA
HARAJAON” BL 841
♫♪♫
Ai Ho do nampuna harajaon, dohot hagogoon
ro di hasangapon, saleleng ni lelengna, Amen

U : Tangiang Pasupasu
H : (Mangendehon ) BE No. 845 : 1 “AMEN, AMEN, AMEN” BL 845
Amen, Amen, Amen

MEMENTO MORI

Selamat hari Minggu, Syalom !!

8 – Parmingguon Ujung Taon Parhuriaon