TERTIB ACARA

MINGGU UJUNG TAON PARHURIAON

( PARNINGOTAN DI ANGKA NAUNG
MONDING) HKBP PARSAORAN NAULI

Thema :

“Ajari ma hami mamilangi angka ari-

arinami”

Minggu, 21 November 2021

1. Joujou Marsomba Tu Debata: (U=Uluan H=Huria)
U : Huria ni Tuhanta na hinophop ni Tuhan Jesus Kristus. Asi ni roha ma di hamu
dohot dame na sian Debata Ama i dohot sian Jesus Kristus Raja ni Huria i.
Huhut tongtong mamparungkilhon pangontak ni pandemi Covid-19 nuaeng on,
sahat ma hita tu minggu Ujung Taon Parhuriaon dohot Minggu Parningotan Ni
Angka naung Monding. Ai marhite minggu ujung taon parhuriaon on, ditogihon
do hita laho patupa rujiruji di pardalan ni ngolunta dibagasan na sataon
parhuriaon naung tabolus i. Jala molo ia tapatupa pe parningotan di angka na
monding, ndada na mangarungkari hinalungun dohot angka sitaaononta be, alai
naeng mangarahon rohanta do laho marningot ujung ni langkanta di portibion,
paboa hita sandiri pe ingkon tinggalhononta do hasiangan on di tingkina be.

H : Mauliate ma di Ho ale Tuhan, na umpasupasuhon di hami ragam ni pasupasu

pardagingon nang partondion.
U : Ndang tagamon so godang na masa na taadopi be dibagasan na sataon
parhuriaon on. Pasorin ro arsak, parungkilon, sahit, suang songoni las ni roha
songgop tu ngolunta. Sipata mandele do rohanta alani na masa. Alai laos di
tingki na asing, mengkel do hita ala las rohanta. Ndang adong hape na hot di
tano on. Nunga tibu hian i dipaingothon Tuhanta tu hita. Na sipata do hita lupa di
Hata ni Tuhanta dohot di bagabaga-Na.
H : Mauliate ma di Ho ale Tuhan, ala monang do hami maralohon angka na masa i
saluhutna.
U : Antong hamu angka dongan, Na marsalpuan do angka taon, marsorin do angka
na masa, alai na hot do anggo Hata ni Tuhanta. Asa, molo tapatupa sadarion,
marningot angka donganta naung jumolo marujung ngolu i, na paingothon hita
do i dibagabaga ni Tuhan Jesus na mandok:
H : Ida ma, sai dongananku do hamu rasirasa ro ajal ni hasiangan on .
U : Panghirimon na mangolu diparjumpangan ni angka na porsea, angka naung
jumolo i rap dohot na mangolu nuaeng nang haduan, di Harajaon ni Tuhanta na
pinarade ni Jesus Kristus, i do na tapatupa sadarion. Antong tapuji ma Tuhanta,
marende ma hita sian
2. Marende BE 464 : 1-3 Huboan ma diringku
 Huboan ma diringku Tuhan hibul tu Ho. Ai au do tinobusMu, umbaen tarbahen au ro.
Pagalak ma rohangku, dison managam au. TondiMi ma suru, na boi manggomgom au.

 Ho sipalua au. Sun hinagogoMi. HataM do huhaposi na so boi muba i. Pagalak ma

rohangku, dison managam au. TondiMi ma suru, na boi manggomgom au.
Musik..........jongjong
[[

 Las do au di buri Ho ale Tuhanki. Naeng dohot parulanku hombar tu hataM i. Pagalak ma
rohangku, dison managam au. TondiMi ma suru, na boi manggomgom au.
3. Votum – Introitus – Tangiang :
U : Marhitehite Goar ni Debata Ama dohot Goar ni Anak-Na, Tuhan Jesus Kristus
dohot Goar ni Tondi Parbadia, na tumompa langit dohot tano on..
H : Amen
U : Songon on do hata ni Tuhan Jesus : Namonang i do siparulosan dohot angka ulos
na saksak, jala ndang sesaonKu goarna sian pustaha hangoluan, jala
parhatopotongKu do goarna di jolo ni Damang dohot di jolo ni angka
surusuruanNa.

H : Songon duhutduhut do saluhut daging jala songon bunga ni duhutduhut i do

saluhut hasangapon ni jolma
U : Nunga malos duhutduhut i, nunga marurus bungabunga i. Ala na hot do hata ni
Tuhan i ro di saleleng ni lelengna. Sai burju ma ho rasirasa mate, dung i
lehononKu ma tu ho tumpal hangoluan. Haleluya.
H : (Mangendehon): Haleluya, Haleluya, Haleluya.
U : Martangiang ma hita: Ale Tuhan Debata, pargogo na so hatudosan ! Ho do
namanjou hami, jala Ho do na papunguhon angka na pinillitMu tu huriaM na
badia i. Mauliate ma rohanami di Ho, ala naung dipasahat Ho hami tu anakMu,
asa Ibana nampuna hami. Asi ma rohaM, sai pargogoi ma hami mangulahon na
nidok ni hataM, asa domu hami dohot angka naung tolhas tu lambungMu. Sai
patogu ma haporseaonnami sahat ro di ajalnami, asa sahat hami sogot tu halalas
ni roha na sumurung, napinaradeM di angka na manghaholongi Ho, asa
pujionnami Ho disi saleleng ni lelengna marhitehite Tuhan Jesus Kristus,
Tuhannami. Amen hundul

4. Marende Be. 354 : 1 – 2 ‘Sai Tong Maimaima Do’

 Sai tong maimaima do rohantai di Jesus, Ibana haluaon do di angka naung tinobus.
Ro do muse Tuhanta i, Mardongan hasangapon i Sai ro ma ho o Jesus, sai ro ma Ho, o
Jesus.
 Marlas ni roha ma disi sudena naung tinobus Masihol situtu doi di Jesus i partobus.
Ro do muse Tuhanta i, Mardongan hasangapon i, Sai ro ma ho o Jesus, sai ro ma Ho, o
Jesus.

5. Patik
U : Singkat ni Patik ni Debata di minggunta sadarion ima sian Confessi HKBP
Bindu 25. Songonon ma didok disi : Tahaporseai jala tahatindanghon do:
Hamatean i, i ma ujung ni ngolu ni jolma di portibi on, maradian ma ibana sian
sandok ulaonna. Adong haluaon di angka na porsea paboa Jesus Kristus naung
 hehe i do pangoluhon jolma i sian na mate, Ibana do Tuhan ni na mangolu dohot
na mate. Martua do na mate di bagasan Tuhan i na satia ro di ujungna.
Dipatupa Huria i do parningotan di angka na monding laho padungohon
haporseaonta marningot ajalta sandiri huhut padohothon panghirimon di
hamonangan ni Kristus manaluhon hamatean, songon i nang panghirimon di
banua ginjang sambulon ni tondinta dohot di hadodomu ni na porsea i dohot.
Tuhan Debata sahat tu na ro Jesus Kristus paduahalihon.
Marhite poda on: Taondolhon do panghirimon di haluaon ni jolma sian angka na
mate di bagasan Jesus Kristus. Taalo do pingkiran na mandok boi na mangolu
manjalo pasupasu sian na mate. Taalo do pingkiran na mandok paboa na adong
pardomuan ni na mate dohot na mangolu, marhite tangiang (mendoakan arwah-
arwah). Taalo do pingkiran na mandok ingkon pajongjong tugu laho
pasangaphon na monding, dalan pangalapan pasupasu tu pinomparna.
Jala marhite poda on: Tatulak do sude rumang ni na pinodahon ni ugamo
hasipelebeguon lumobi poda taringot tu tondi na mandok : tading do tondi ni na
mate i, jala tondi ni na mate i gabe begu dohot sumangot.
Di parningotan di na monding siparateatehononhon do mandok mauliate tu
Debata di na marningot ulaon na denggan uju di ngoluna, alai ndang na mangigil
pasupasu dohot tanda siarsiaran sian naung monding i. Ido sahatna, antong rap
mangido gogo ma hita mangulahon na hombar tu PatikNa i.
H : Ale Tuhan Debata sai pargogoi ma hami mangulahon na hombar tu patikMi,
Amen !
6. Koor
7. Marende BE 174 : 1 + 3 : Torop Dope Na Siat i.
 Torop dope na siat i di hasampuran rea. Ipe hamu pardosa i, sai olo ma porsea. Ai Debata
manjou hamu tu hasonangan situtu. Hamu, hamu di jou Debatamu.
Jongjong
 Pardosa ho didok rohsam, na so tama be dohot. Ndang pola ala ni dosam umbahen na
sundat bongot. Ai nunga sae do dosam i digarar Tuhan Jesus i. Naung sae, naung sae,
naung sae do dosami

8. Manopoti Dosa :
U : Na jongjong do hita nuaeng di jolo ni Debata, na umboto saluhut. Tatopoti ma
dosanta na godang i tu adopan ni Debata, martangiang ma hita. Ale Debata,
Amanami na di banua ginjang, Pargogo na sohatudosan! Pardenggan basa do
Ho, jala ro di salelenglelengna do asi ni rohaM. Sai marpamuati ma rohaM di
hajahatonnami, jala sai unang be ingot angka dosanami. Ai jotjot do hami
mardosa maradophon Ho, jala jotjot do husungguli hami rimas-Mu marhite sian
pangalaosionnami di hataM.
H : Asi ma rohaM di hami ale Debatanami, sai sesa ma saluhut dosanami.
U : Ndang hibul hujangkon hami Anak-Mu dibagasan ngolunami, ai jotjot do ndang
 huulahon hami lomo ni rohaM, baliksa angka na hinasogohon ni rohaM do
hupatupa hami, gabe manghorhon hasusaan di masyarakat, bangso nang
negaranami on. Jotjot do ndang gabe sira dohot panondang ngolunami.
Baliksa tahe, laho manopot huriaMi sipata marsidalian do hami. Tartait do
rohanami holan tu hariburon dohot hagiot ni portibi on, gabe lupa do hami
mangguruhon: hapistaran na marguna di hajolmaon.
H : Asi ma rohaM di hami ale Debatanami, sai sesa ma saluhut dosanami.
U : Ale Debata Amanami Parasiroha na Sumurung! Marunduk ni roha ma hami
nuaeng di joloM. Lomos do rohanami mangadopi angka hamaolon dohot
marnida angka na masa di tongatonga ni bangsonami on: Bencana Alam,
radikalisme, gosip dohot barita palsu. Ketidak-jujuran di tugas dohot
tanggungjawab. Perselingkuhan, manipulasi, mandobo di naso ugasanna, ndang
haposan, mambuat paruntungan ndang sian dalanna. Angka hajahaton na
martamba-tamba dohot na patujolo kekerasan. Mura-mura mandele jala
marungut-ungut. Hosom, teal, elat nang late. Jala jumotjotan lupa do hami
martangiang dohot manangihon hataM. Sai pingkiran dohot gogonami do
hupangasahon hami.
H : Asi ma rohaM di hami Ale Tuhan, sai marpangulahi ma rohaM di dosanami i.
U : Sesa ma saluhut hageduhonnami dohot pangalaosionnami marhitehite
Pangulunami na sasada i, Anak-Mu Tuhan Jesus Kristus. Sai pahot ma asi ni
rohaM di hami marhitehite panindangion dohot hagogoon ni Tondi Parbadia, asa
tarapul situtu rohanami manjou Ho, asa pantun, tigor jala daulat hami
marpangalaho, bahen hasangapon di Goar-Mu na badia i. Amen
U : Bagabaga ni Debata taringot tu hasesaan ni dosanta. Songon on do Hata ni
Tuhan Jahowa: Nunga di arsahi ho Ahu marhite sian angka dosam, jala nunga
dilojai ho Ahu marhite sian angka hajahatonmu. Ahu tutu, Ahu sandiri manalesei
angka pangalaosim ala ni hadirionKu, jala ndang be Hupaingotingot angka
dosam. Hasangapon ma di Debata na di ginjang.
H Amen. hundul

9. Marende BE 209 : 1 Na Sonang Au

 Na sonang au, dung na marTuhan au tu Tuhan Jesus i. Ai ndang adong dunga naposoNa
au, siholsohononku. Ibana nama huihuthon, portibi on ma hutundalhon. Na sonang au,
na sonang au.

10. Epistel
U : Turpuk Epistel di minggunta sadarion, ima na tarsurat di Pangungkapon 1 : 4 - 8
“Ahu surat ni si Johannes mandapothon na pitu huria na di Asia. Asi n iroha ma
di hamu dohot dame sian Iban ana mangolu hian jala na naeng ro, nang sian na
pitu Tondi na diadopan ni habangsaNa”
H : Nang sian Jesus Kristus, sitindangi haposan I, na parjolo tubu sian angka na
mate. Sigomgom angka raja ni tano on. Ibana do manghaholongi hita jala
 dipalua hita sian dosanta marhitehite mudarNa.
U : Dijadihon do hita gabe harajaon hamalimon di Debata, Ama-Na i: Di Ibana ma
hasangapon dohot hagogoon ro di saleleng-lelengna. Amen.
H : Ida ma, na ro ma Ibana dibagasan ombun. Idaon ni nasa mata do Ibana, nang
angka naung manullang Ibana. Gabe mangangguhi be ma saluhut bangso ni
tanoon mida Ibana. I ma tutu. Amen
U : “Ahu do Bonana jala Ujungna” ninna Tuhan Debata, Debata nuaeng, Debata
naung adong hian, na naeng ro i, Sigomgom saluhutna.; Ima sahatna. Martua do
angka na tumangihon Hata ni Debata jala na umpeopsa.
H : Amen.

11. Koor
12. Marende BE. 539 : 1 + 3 ‘Sai Hutagam do Tuhanku’
 Sai hutagam do Tuhanku, sai masihol rohangki di haroro ni Tuhanku songon na nidok
nai. Sai mardongan olop olop huriaM managam Ho. Maranata. ro, o Tuhan, Amen, sai
tibu ma ro!.
jongjong
 Sai rade, ale Tondingku, tagam panjouonNa i. Sai tu langit an manomu ho di Jesus
Tuhanmi. Sai mardongan olop olop huriaM managam Ho. Maranata. ro, o Tuhan, Amen,
sai tibu ma ro!.

13. Manghatindanghon Haporseaon .

14. Tingting

15. Acara Parningotan di na monding sian 22 November 2020 – 21 November 2021

Marende BE. No. 353 : 1 – 2 ‘Di Surgo Hasonangan i’
 Di surgo hasonangan i, inganan na dumenggan i; tu si naeng laho muli au, asa rap
dohot Jesus au.
 Tutu godang dope adong marnihot au di tano on; Sai tostosanku nama i, lao
mandapothon surgo i.
U : Hamu angka dongan sahaporseaon dibagasan Goar ni Tuhanta Jesus Kristus.
Sadarion, ingotonta do angka donganta naung jomolo monding sian
tongatonganta dibagasan sataon parhuriaon on. Ndang na mangarungkari lungun
manang sidangolon hita nuaeng disi. Ai tapatupa pe Parningotan di angka na
Monding, na paingothon hita do i, paboa hita pe monding do muse songon
donganta naung monding i, jala tahaporseai do, ndada hamatean ujung ni
pardalananta, tung dalan hangoluan do i. Songon ni dok ni apostel Paulus tu
Huria na di Korintus: “Ai apala Tuhan i ma na tuat sogot sian banua ginjang,
mardongan soara ni sintua ni surusuruan ni Debata, dohot mardongan sarune
ni Debata, dung i, hehe ma jumolo angka na mate, angka na marhitehite
Kristus.”
H : Marende BE 525 : “Na laho ma au”
 Na laho ma au tu na sonang di ginjang. Di surgo tutu sai na sonang ma au. O
ho donganki na gok dosa gok arsak, sai dohot ma ho, sai tu surgo ma lao. Sai ro
dohot ho, dohot ho, dohot. Sai dohot ma ho, sai tu surgo ma lao.
U : Mardalan do tingki, humusor do ombas, ndang hea mansadi manang maradi,
dituju do dompak jolo. Di parhusoran i, marsingkat do ari gabe minggu, minggu
gabe bulan, sian bulan gabe taon. So tahilala nunga sahat hita tu ujung ni
partingkian mangihuthon taon parhuriaon. Nunga tabolus sataon na
dibasabasahon ni Tuhanta i tu hita di bagasan ragam ni parungkilon, arsak dohot
las ni roha. Mauliate ma di Debata na basa i, marhitehite Tuhanta Jesus Kristus.
Laos sadarion ma Minggu parningotan di angka naung monding, ima angka
“naung jumolo” sian tongatonganta, angka haholongan ni roha, hahaanggi
manang na pinaribot pe, ama manang ina, angka natoras, ro di angka sisolhot. Na
dipaumbuk hurianta do Minggu Ujung Taon Parhuriaon on tu Minggu
Parningotan di na monding songon sosososo dohot paingothon, “Martiti do
huhut na tinompa na adong di hasiangan on” . Alai na paingothon hita do
“MEMENTO MORI”, ingot ma ari hamamatem! Ndada na laho palungunlungun
rohanta jala manungguli arsak, alani parsiranganta hinorhon ni hamatean sian
angka na tahaholongi. Alai asa pos do rohanta jala tarapul, ianggo angka na
porsea i, ima angka na mate di bagasan Kristus, hehe do i muse, jala
masipaidaan, dung sahat be langkana tu surgo hasonangan i. Tahaburjuhon ma
mangulahon ulaonta, “Sai burju ma ho rasirasa mate, dung i lehononKu ma tu ho
tumpal hangoluan i” (Pangungkapon 2:10). Saonari, jahaon ma goar-goar ni
angka na monding manipat na sataon parhuriaon on, mamungka sian tgl. 22
November 2020 s/d 21 November 2021: Angka on ma goar ni ruas ni
hurianta na marujung ngolu dibagasan sataon parhuriaon on : manjahahon
goar goar ruas naung jumolo marujung ngolu. ......
U : Nunga maradian nasida sian nasa ulaonna di portibi on. Alai nang pe ingkon
ampe tu ganup jolma hamatean i, songon naung masa tu angka haholongan ni
rohanta naung jumolo i. Dibagasan pangaramotion ni Debata do nang angka i
saluhutna. Ai Kristus do Tuhan ni na mangolu dohot na mate.
H : Ingkon sude do hape jolma mamolus hamatean. Ndang mardia imbar manang
ise pe, na metmet nang na magodang, na mora nang na pogos, na sangap nang
na lea, na gogo dohot na gale
U : Antong rim ma hita jongjong. dibagasan unduk dohot serep ni roha, tapahohom
ma rohanta jala taingot ma pasahathon dirinta tu Tuhanta, sahat ro di hasusuda ni
bohalta be songon angka naung parjolo i. Marende ma hita BE 347:1 +3 “sai
masipaidaan”)
 Sai masipaidaan do na porsea i, Dung sahat be langkana, Tu hasonangan i, tu
hasonangan i, tu hasonangan i.
 Sai masipaidaan ma hita on muse, Di lambung ni Tuhanta, Dung monang
hita be, dung monang hita be, dung monang hita be. ( dung sidung marende
hundul ma ruas )
 16. Tangiang Pangondianon
17. Marende 535 : 1..... Hamatean Parhitean. ( Pel Ia, Ib )
 Hamatean parhitean Lao manopot Jesuski. Dohot au ingkon mamolus Asa sahat au tu si.
Nang pe pinadaodao dompak hamatean i. Lam jonok do hapengan i, langkangki tu ajalhi
 Ala ni sai golomonku sitaluhon musungki. I ma Jesus Sipalua, naung mamolus songon i.
Nang pe sai mangogaoga bolis sipangago i. Ndang adong be huasona, ala Jesus donganki
...........Musik............
 Molo i hugolomgolom, sabam sonang rohangki. Nang marningot angka dongan, naung
jumolo lao tusi. Ai denggan tohap nasida di banua ginjang i. Na marende do nasida, raphon
pardisurgo i

18. Jamita : Psalmen 90 : 1 – 12

19. Marende BE 522 : 1..... Surgo i Sambulonta do i ( Pel II )

 Surgo i sambulonta do i, ndang adong be siaeon disi, na mamuji tongtong na disi,
pinalua ni Tuhanta i. Surgo i, surgo i, ndang adong be siaeon disi, surgo i, surgo i, surgo
i, ndang adong be siaeon disi.
 Na marloksa naung sahat tusi, tu inganan na sai denggan i. Aut naung domu ma au
dohot i, gok ma las ni rohangku disi. Surgo i ..............
..........organ...........
 Na manghirim rohangku dison, paima sahat tusi nang au on, Taiti au, ale Tuhan tusi, asa
rap dohot Ho au disi. Surgo i ................
 Holan sada nama holsongki: Unang tading haholonganki, Na tu au pinalumehonmi:
Nang nasida sai togu disi. Surgo i ...........
20. Manghangoluhon Hata Ni Debata:
U : Alai naeng ma botoonmuna tangkas ale angka dongan taringot tu angka naung
monding i, asa unang marsak hamu songon angka na leban na so marpanghirimon i,
surgo i do na hot tongtong, parsatongkinan do anggo portibion. Na manghirim do
hita malua sian panguhuman ni Debata na bolon i, asa di hita hangoluan sisaleleng
ni lelengna. Ai dung sahat tu panguhuman i, patedekhononNa ma pambahenan ni
saluhut manisia. Ai di banua ginjang do sambulonta, sian i do tapaimaima
Sipangolu hita, ima Tuhan Jesus Kristus.
H : (mangendehon BE.539 : ’Sai hutagam do Tuhanku’)
Sai hutagam do Tuhanku, sai masihol rohangki di haroro ni Tuhanku songon na
nidok nai. Sai mardongan olop olop huriaM managam Ho. Maranata. ro, o Tuhan,
Amen, sai tibu ma ro!
U : Di dok Tuhanta Jesus Kristus: “Magira ma Ahu ro, tiop ma na di ho, unang adong
na mambuat tumpalmi! Sai burju ma ho rasirasa mate, dungi lehononKu ma tu ho
tumpal hangoluan i !
H : (mangendehon BE.539 : ’Sai hutagam do Tuhanku’)
Sai rade, ale Tondingku, tagam panjouonNa i. Sai tu langit an manomu ho di Jesus
 Tuhanmi. Sai mardongan olop olop huriaM managam Ho. Maranata. ro, o Tuhan,
Amen, sai tibu ma ro!

21. Tangiang Pelean + Tangiang Dung Simpul Jamita + Aleamanami – Pasupasu

...Amen …..Amen…….Amen….!!!