ACARA MANGONGKAL MANANG PAPINDA

HOLI ( SARINGSARING )
OP. Timbul Tampubolon/ br Simanjuntak
&
Partangiangan Peletakan Batu Pertama Simin
Op. Timbul Tampubolon/br Simanjuntak & Op. Irwan Tampubolon/br Simanjuntak
Kamis, 08 Juli 2021

A. Mangongkal Holi
1. Marende No : 3:1+3 : Puji Jahowa Ale Tondingku
Puji Jahowa ale tondingku puji Ibana Debatami
Tagan so suda dope bohalhu naeng pujionku basaNa i
Sitompa daging tondi pe ingkon dipuji sasude
Haleluya, haleluya.
Martua halakna niondingan ni Debatanta Jahowa i
Angka na hot marhaporseaon di Jesus Kristus Tuhanta i
Molo Debata donganmu ndang adong hurang tuamu
Haleluya,haleluya.
2. Tangiang Pamuhai Sian sahalak Parhalado
3. Manjaha Ayat : I Tessalonik 4 : 13 – 18
U : Tajaha ma hata ni Debata turpuk dihita di ulaon sadarion, tarsurat di 1 Tessalonik 4 : 13 –
18, didok songon on: “Alai nang ma tangkas botoonmuna ale angka dongan taringot tu
angka naung monding i, asa unang marsak hamu songon angka na leban, na so
marpangkirimon.
H : Ai molo porsea hita, naung mate Jesus dohot hehe, sandok togihonon ni Debata do rap
dohot Jesus nang angka naung monding marhitehite Ibana.
U : Ai hata ni Tuhan i do na hupasahat hami nuaeng tu hamu: Ia mangolu pe hita angka na
mian ro di haroro ni Tuhan i, nda tung sumurung hita sian nasida naung monding i.
H : Ai na tuat ma Tuhan i sian banua ginjang mardongan suraksurak, marsoara ma raja ni
surusuruan, tarbege ma sarune ni Debata. Dung i hehe ma jumolo angka na mate di
bagasan Kristus.
U : Dung songon i, hita na mangolu dope angka na mian i, taitonNa ma hita raphon nasida
di bagasan angka ombun, laho manomunomu Tuhan i tu langit an; jadi olat ni i sai
tongtong ma hita rap dohot Tuhan i.
H : Antong, masiapulan ma hamu marhitehite angka hata i.
U : Martua ma na tumangihon hata ni Debata jala na umpeopsa. Amen..!
4. Marende No. 189:6+8 O, Jesus na pangolu au
Sai huhaposi hataMi, ai na sintong do i
Huingot bagabagaMi naso ubaon i
Dihalungunhon rohangki, naeng ingananMu au
Antong, urasi tondingki, parbadiai ma au.
5. Manjaha Ruhut Parmahanion dohot Paminsangon (RPP) HKBP, Halaman 47 point 5a – c
Taringot tu na Mangongkal Holi
a. Haoloan do mangongkal holi molo ala ni :
1. Kuburan na sega
2. Kuburan na nieak ni dalan, manang aek magodang, tanah longsor, na pasadahon simin,
na pasadahon saringsaring tu simin na imbaru
3. Na pasadahon kuburan ala mate di luat na dao
b. Molo tung adong angka na naeng pasadahon saringsaring (holiholi) ingkon radot ma
parhalado ni Huria maniroi, asa unang masa disi ruhut ni hasipelebeguon songon na
manortori holiholi, manulangi, mangandungi, pamasuk holi tu ulos, tu pinggan dohot
ampang, manganapurani, songon i nang pamasuk batang ni pisang tu pangongkalan ni
holiholi i domu tu ruhut hasipelebeguon.
c. Naeng ma parbinoto parhalado ni Huria, molo masa na mangongkal holi, laos songon i
manimpan holiholi i paima dipamasuk tu ingananna. Molo dao inganan i, gabe tu gareja ma i
disimpan. Molo ulaon sadari, jalo ma sian kuburan na leleng tu kuburan na imbaru. Ndang
sipatupaon be maragenda disi. Ndang jadi ditortorhon saringsaring, jala unang ma diiringi
gondang manang musik laho pamasukhon tu inganan na imbaru.
Pangauhononhon di hata ni Debata:
Hamu angka dongan, ditahi rohamuna nuaeng mangongkal holi laos papindahonsa tu
inganan na imbaru. Ala ni i ndang tama ulahononmuna songon ulaon ni halak sipelebegu.
Ndang adong be pardomuan ni angka naung mate i nang tu hita. Ala ni i ndang tama be hita
manghatai dohot manghirim tua nang pasupasu sian angka na mate manang sumangotna pe.
Ingkon badia do roha dohot pangalahonta mangulahon ulaon on, unang masa na manortori
holi i, na manulangi dohot mangalehon napuran, mangandungi, manghunihi dohot
mangulosi holi i, songon i namameakhon batang ni pisang tu pangongkalan ni holiholi i, ro
di nasa ragam ni hasipelebeguon. Ai taboto do, maralo do pambahenan na songon i tu ruhut
 hakristenon dohot Patik ni Debata. Antong nunga dibege hamu ruhutruhut ni ulaon i, na
marpadan do hamu nuaeng di jolo ni Debata dohot di jolo ni dongan na pungu dison, tung
unang ma ose hamu angka padan naung pinadanhonmuna. Amen. Martangiang ma hita……
6. Marende No. 309:1 Raphon Tuhan Jesus i
Raphon Tuhan Jesus i pungka ulaonmu. Ingkon tu Ibana i parguruhononmu.
Baen Ibana donganmi hehe dohot modom. Dege ma bogasNa i, rohami pahohom.
7. Hata Sipaingot/Renungan:
8. Borhat tu Inganan na Imbaru
(Ndang sipatupaon maragenda laho pamasukhon tu inganan na imbaru)

B. Peletakan Batu Pertama Simin

1. Marende No. 188 : 1 – 2 “Jahowa Siparmahan Au”
Jahowa siparmahan au, ndang hurang manang aha;
Ai nasa jea dipadao, do sian dorbiana.
tongon dibaen na lomak i, lao pangoluhon tondingki,
dibaen asi rohaNa.
Ditogu au tu natio, aek mata hangoluan.
Diabaen do tondingki sio, didalan hasonangan.
Sabam rohangku do tongtong, saleleng au ditano on
baen sangap digoarNa.
2. Tangiang Pamuhai dohot Jaou-jou tu Parsaoran
U : Hamu dongan saluhutna, ima hasuhuton dohot angka na niontang ni hasuhuton tu
ulaon sadarion. Tama marlas ni roha hita saluhutna, tarlobi ala dipatulus Tuhanta
angka na sinangkapan ni keluarga besar Op. Timbul Tampubolon/br Simanjuntak &
Op. Irwan Tampubolon/br Simanjuntak, ima angka na tinggal dihuta dohot
dipangarantoan. Dinamarsangkap nasida laho paulihon simin manang hinambor ni
natoras nasida, jala asa marhite ulaon I lam pataridahon hasadaon ni roha ni pomparan
tu joloan ni arion. Alai songon halak na porsea hita, tama saluhut na i
hamauliatehononta do tu Debata. Ala ni i do asa tapatupa ulaon partangiangan on,
dalan ta do on laho manghamauliatehon denggan basa ni Tuhanta na manumpahi
ngolu ta tarlobi hamu angka pomparan.
H : Mauliate ma tutu di Tuhan ta Pardenggan basa i. Ai dipataridahon do asi ni roha-Na na
pasadahon hita, asa gabe sisada sangkap dohot sisada tahi hita diangka ulaon na
denggan i.
Hasuhuton: Las situtu roha nami hamu angka dongan, ala dilehon hamu tingkimuna, marneang ni
langka hamu ro mangadopi gokkon dohot joujou nami. Nunga las situtu nian roha
nami, ala sada roha nami laho paulihon simin ni natoras nami laos sadarion ma
patupaonta Peletakan Batu Pertama, jala lam tamba singkop las ni rohanami i ala olo
hamu amang dohot hamu inang martangiang rap dohot hami manghamauliatehon
ragam ni pasupasuNa naung hujalo hami i. Laos huhut mangido tu Tuhan ta
pardenggsan basa i asa tongtong Ibana mangaramoti daging nang tondinami sude
pomparan ni besar Op. Timbul Tampubolon/br Simanjuntak & Op. Irwan
Tampubolon/br Simanjuntak na tinggal di bona pasogit on nang na di Pangarantoan.
U : Antong hamu angka amang dohot inang, saluhut hita na liat na lolo, tarlobi keluarga
Pomparan ni besar Op. Timbul Tampubolon/br Simanjuntak & Op. Irwan
Tampubolon/br Simanjuntak, barita na marlas ni roha dibagasan tingkion, jala na
tangkas mangkilalahon denggan basa ni Tuhanta. Tama sian na sa rohanta
pasangaphon Debata, asa marhite i lam martambatamba angka pasupasu-Na
jaloonmuna tu angka tingki na naeng ro, jala asa Tuhanta marhite Tondi-Na na maniroi
ulaon las ni roha na tapatuapa di ari sadarion nang tu angka ari na mangihut pe.
Antong tapuji ma Tuhanta, marende ma hita.
3. Marende No. 14 : 2 – 3 “Puji Hamu Jahowa Tutu”
Ingot tongtong, ale tondingkon, Sude na denggan na dipasonggop Debata tu ho.
Denggan basaNa do na pangoluhon ho.
Nda tung adong, pargogo tongon, Na martudosan, tu Tuhan Debata di surgo i.
Sun hinagogo, sun hinagogo i.
4. Votum – Tangiang
U : Marhitehite Goar ni Debata Ama dohot Goar ni Anak-Na Tuhan Jesus Kristus dohot
Goar ni Tondi Parbadia na tumompa langit dohot tano.
H : Amen!
U : Halomohon ma Jahowa, jadi lehononNa ma tu ho napinangido ni rohaM
H : Sai pasonggop ma asi ni rohaM tu hami, ale Jahowa, hombar tu panghangoluhonon nami
di hataM.
U : Gok asi ni rohaM do sandok tano on, ale Debata, jala marlas ni roha do hami manganton
angka parbue ni angka suan-suanan na dipatubu Ho di tano on. Marlas ni roha do hami
 di denggan ni basaM, ai ho do mambaen manjadi angka na jinama ni tangan nami.
Hupuji hami ma Ho diangka denggan ni basaM i.
H : Olo tutu dohot do pamangan nami naeng mansoarahon baritaM tu ujung ni tano on,
siala pambahenanMi.
U : Hasangapon hamuliaon ma di Ho ale Tuhan, ala Ho do mambaen manjadi saluhut angka
na sinangkapan ni rohanami. Haleluya..! Martangiang ma hita! Ale Debata Jahowa
Tuhannami dibagasan Jesus Kristus. Mandok mauliate situtu do hami nuaeng tu
adopanMu, ala denggan ni basaM do saluhutna mandongani ngolunami. Tarlobi
dimanogot niarion marpungu hami di inganan on dibagasan hahipason dohot las ni
roha, sude i Tuhan holan ala denggan ni basaM. Huhatindanghon hami Ho do ale Tuhan
na manumpahi ngolunami, dohot na patulushon sude na sinangkapan ni rohanami,
tarlobi Tuhan sangkap ni sude pomparan ni besar Op. Timbul Tampubolon/br
Simanjuntak & Op. Irwan Tampubolon/br Simanjuntak na adong di Lobutolong on.
Marsada ni roha nasida Tuhan laho pajongjong simin ni natoras nasida, asa marhite i lam
pataridahon hasadaon ni roha di sude pomparanna angka na tinggal di huta di bona
pasogit dohot angka na di Pangarantoan. Ala ni i ale Tuhan Ho ma na maniroi asa gabe
simin parsadaan i dinasida, jala lam patubu roha na masihaholongan i disandok angka
pomparanna. Simin na lam patoguhon parsaoran i dinasida. Ulaon las ni roha sadarion
pe, Ho ma na mandongani asa unang masa hasipelebeguon, alai asa saluhutna ulaon on
laho pasangaphon Ho. Pasupasu ma pomparan ni besar Op. Timbul Tampubolon/br
Simanjuntak & Op. Irwan Tampubolon/br Simanjuntak angka na dibona pasogit dohot
na diparserahan pe. LehononMu ma dinasida hahipason nang hagabeon jala Ho ma
mambaen manjadi angka na niula ni tangan nasida, asa tamba las ni roha nasida
pasangapahon Ho ditonga-tonga ni ngoluna. Asi rohaM jalo ma tangiang nami on,
mangasahon Kristus Jesus Tuhan nami. Amen..!

5. Marende No. 691 : 1 – 2 “Hupasahat ma tu Jesus”

Hupasahat ma tu Jesus saluhutna ngolungki,
Roha nang pambaenanku saluhutna tingkingki
Hupasahat ma tu Jesus saluhutna diringki,
Hupasahat ma tu Jesus saluhutna ngolungki.
Pangkeonku ma tanganku, mangula lomoNa I,
Langka nang simanjojakku mangihuthon Tuhanki.
Hupasahat ma ………
6. Manjaha Hata ni Debata
U : Tajaha ma hata ni Debata, na tarsurat di Psalmen 95 : 1 – 7, songon on ma didok disi: “
Beta hamu itaendehon ma Jahowa, itaolophon ma partanobatoan ni hatuaonta.
H : Itadapothon ma tu jolo ni bohiNa marhitehite pujipujian, itaolophon ma Ibana
marhitehite ende.
U : Ai Debata na tumimbul do Jahowa, jala raja bolon mangatasi sude angka debata.
H : Dibagasan tanganNa do angka ojahan ni tano on, jala guru di Ibana do punsu ni angka
dolok.
U : Guru di Ibana do laut, jala Ibana do tumompasa, jala tanganNa do jumadihon tano darat.
H : Beta hita manungkap dohot marsomba, marsinggang ma hita tu jolo ni Jahowa, sitompa
hita.
U : Ai Ibana do Debatanta, jala hita bangso pinarmahanNa, jala birubiru ni tanganNa.
Sadarion, aut ditangihon hamu nian soaraNa.
I do sahat na, “Martua do angka na tumangihon hata ni Debata jala na umpeopsa”.
U+H: Amen..!
7. Marende No. 465 : 1 + 4 “Pasupasu LehononMu”
Pasupasu lehononMu, Ido bagabaga Mi
Songon angka udan nene sai tu au manetek i.
Nang tu au, nang tu au patetek I tu au.
Suru ma TondiM manggomgom hata nang ulaonhi
Paimbaru ma rohangku topot au diasiMi
Dohot au, dohot au, sai ditopot Ho nang au.

8. Tangiang Pangondianon sian sahalak Sintua

9. Marende No. 467 : 1 – 2 “Asi ni rohaM hupuji”
Asi ni rohaM hupu ji ala Ho manobus au.
Di paias Ho rohangku, ga-be soranganMu Au.
IngananMu rohanami. TondiMi manggohi i.
Pangke dohot ngolunami gabe ulaulaMi.

Sai ramoti ma rohangku, asa boi gohanMu au.

Sai mabaor ma pasupasu nang marhite sian au,
IngananMu……..
10. Renungan
11. Marende No. 122 : 1 – “Ida Hinadenggan ni” (Pst. Pelean)
Ida hinadenggan ni Angka na saroha i
Parpambaenan na burju Nang hatana pe tutu
Sai hushus uapna i Songon bungabunga i
Angka na tinompa i Pajengkarhon tano i.
Doshon nambur do tahe Na sumorop sasude
Denggan ni parsaoran ni Dongan na saroha i.
Di parbaga Debata Tu na marsaroha, da,
Pasupasu na godang i ma roha na sonang
12. Tangiang Parsuruon
U : Nunga dibasabasahon Ho tu ahu hangoluan dohot asi ni roha, jala panatapMu
mangaramoti hosangku
H : Puji ma Jahowa, hamu angka naniasianNa, jala endehon hamu ma barita ni
habadiaonNa
U : Dompakhon hamu ma Jahowa, asa martua hamu nuaeng nang sogot pe, hamu ale angka
bangso ni Debata.
H : Sai tiop ma tangan nami ale Tuhan, ramoti langka dohot ngolu nami. Pargogoi hami
pasauthon hataM asa martua hami ro di pinompar nami. Sai pasupasu hataM jala
pasaut ma lomo ni rohaM tu sude pomparan ni Op. Timbul Tampubolon/br
Simanjuntak & Op. Irwan Tampubolon/br Simanjuntak
on.
U : Uluhon ma nasida mangulahon lomo ni rohaM, asa marlas ni roha nasida pasauthon
sangkapMu. Sai raphon Ho ma pomparan ni Op. Timbul Tampubolon/br Simanjuntak
& Op. Irwan Tampubolon/br Simanjuntak
tung manang didia pe nasida maringan, jala urupi ma nasida mangula angka siulaonna.
H : Dongani ma nang hami patulushon ulaon nami sadarion.
U : Iale Jahowa sai manumpak ma Ho ! iale Jahowa sai Ho ma mabahen manjadi. Antong
marsihohot jala so mubauba ma hita dibagasan Kristus i, ai taboto do ndang marisuang
halojaonta dibagasan Tuhan i.
U : Tangiang pelean – Ale Amanami – Pasupasu- Amen, Amen, Amen..

Mulak Ma Hamu Dibagasan Dame Dohot Las Ni Roha

Tuhan Mamasumasu hamu Saluhutna