PELETAKAN BATU PERTAMA PEMBANGUNAN PALAS-PALAS GAREJA

HKBP LOBUTOLONG II
Senin, 02 Mei 2022
A. Acara Ibadah
1. Joujou tu Pamujion di Debata
L : Dongan na sahuria, na hinaholongan di bagasan Kristus Jesus, marpungu do
hita di sadarion, di inganan on laho manghalashon denggan basa ni Tuhan I
na manontong di huriaNa. Lumobi di ombas on na laho mangulahon
peletakan batu pertama pembangunan palas-palas ni garejanta on.
Mangido ma hita asi ni roha ni Raja ni Huria, ima Jesus Kristus asa dipatulus
nang pembangunan ni palas-palas ni garejata on.
R : Pinuji ma ho Ale Debatangku, na manarihon ngolu nami jala na patulushon
sangkap ni rohanami di bagasan sadarion.
L : Tau pujian jala tau uap na hushus ma pamujionta on di Debata, marende ma
hita:
2. Marende Huria BE No. 565 : 1 + 4       “Las rohangku lao Mamuji”
 Las rohangku lao mamuji Debata parholong i/ Songon bunga na mangerbang di
na binsar ari i/ Arsak, dosa, haporsuhon mago dibaen asiMi/ Las ni roha na
manongtong lehon di au Tuhanhi.
 Rap ma hita mangendehon sangap di goarNa i/ Tapangiar soaranta lao mamuji
Tuhan i/ Sun do holong ni rohaNa na so marnamontok i/ I do pasadahon hita
salelenglelengna i.

3. Votum
L : Marhitehite goar ni Debata Ama, dohot Goar ni Anak Tuhan Jesus
Kristus, dohot goar ni Tondi Parbadia na tumompa langit dohot tano on.
Amen.
Marolopolop tu Debata ma ho, ale sandok tano on! Endehon hamu
pujipujianNa. Dok hamu mandok Debata: Tung na songkal do angka
pambahenanMu! O Debata Jahowa Amanami, Ho do partanobaton dohot
mual ni saluhut hagogoon. Lomo ma rohaM di hami, jala pasu-pasu ma
inganan on, asa batu na hupeakkon hami bahen ojahan pembangunan
palas-palas ni bagas joro on, togu jala hot, songon batu mamak
hajongjongan ni bagasMu. Paias ma inganan on sian angka tondi
hajahaton, panggunturi, parsalisian, late ni roha, dohot pangiburuon.
Suanhon ma diinganan on hadameon, holong ni roha, dohot parbueni
Tondi, asa sian na mamulai sahat tu na mangujungi pembangunan bagas
 joro di inganan marolopolop jala marlas ni roha ruas ni huriaMi. Pasu-
pasu ma nang angka pande (tukang), na mamandei bagas joro on,
lehononMu hahipason, gogo, hasadaon di parulaon, asa saluhut ulaon
nasida denggan jala uli dibagasan dame.
R : Ale Tuhan, tangihon ma tangiang pangidoannami on.
L : Debata Jahowa Amanami, na sun marhabadiaon, ditanganMu do
haluaon dohot hangoluan ni huria on. Ho do Parmahan na denggan roha
na patongon hami tu jampalan angka na lomak, jala na manogunogu
hami tu aek hasonangan. Holan tu Ho do hami marhaporusan jala
manghirim. Usehon ma pasu-pasuM tu saluhut ruas ni huriaMi nang
pangaranto ni huriamon, naung pasahathon silehonlehonna tu ulaon
pembangunan on. Parbue ni haporseaon ma i, asa dibagasan haserepon
saluhut ruasMu marsiadu mangulahon angka na denggan.
R : Ale Tuhan, tangihon ma tangiang pangidoannami on.
L : Ho do Raja ni huria jala nampuna Huria i, alani i molo hupungka hami
nuaeng mameakkon batu ojahan Pembagunan Palas-palas ni bagas joroM,
holan Ho do na hupangasahon hami. Ndang tuk gogo dohot na adong di
hami pajongjonghon bagasMi, alai mangasahon haporseaon dibagasan
Kristus, patauonMu do hami saluhut ruas dohot pangaranto ni huria
HKBP Lobutolong II laho patulushon i.
R : Ale Tuhan, tangihon ma tangiang pangidoannami on. Asi ma rohaM di hami
L : Anggiat ma bangunan palas-palas ni bagas joro na pinajongjong di atas ni
batu ojahan na pineakhonsadarion, hot dihansinghansing na, togu
dirancang-rancangna. Ia ro pe udan potir, mangalantap pe tangkuju, jala
pur pe habahaba manondong bagas on, ndang na marumpak, ai batu
mamak do ojahanNa. Amen

4. Marende Huria sian B.E No 691 : 1 “Hupasahat ma tu Jesus”

 Hupasahat ma tu Jesus saluhutna ngolungki,/ Roha nang pambahenanku
saluhutna tingkingki/ Hupasahat ma tu Jesus saluhutna diringki,/ Hupasahat
ma tu Jesus saluhutna ngolungki.

5. Manjaha Hata ni Debata

L : Tajaha ma hata ni Debata, na tarsurat di Psalmen 95 : 1 – 7, songon on ma
didok disi:“ Beta hamu itaendehon ma Jahowa, itaolophon ma partanobatoan
ni hatuaonta.
R : Itadapothon ma tu jolo ni bohiNa marhitehite pujipujian, itaolophon ma
Ibana marhitehite ende!
L : Ai Debata na tumimbul do Jahowa, jala raja bolon mangatasi sude angka
debata.
R : Dibagasan tanganNa do angka ojahan ni tano on, jala guru di Ibana do
punsu ni angka dolok.
L : Guru di Ibana do laut, jala Ibana do tumompasa, jala tanganNa do
jumadihon tano darat.
R : Beta hita manungkap dohot marsomba, marsinggang ma hita tu jolo ni
Jahowa, sitompa hita.
L : Ai Ibana do Debatanta, jala hita bangso pinarmahanNa, jala birubiru ni
tanganNa. Sadarion, aut ditangihon hamu nian soaraNa.
I do sahat na, “Martua do angka na tumangihon hata ni Debata jala na
umpeopsa”.
L+R : Amen..!

6. Marende Huria sian B.E No. 465 : 1+4 “Pasupasu LehononMu”

 Pasupasu lehononMu, Ido bagabaga Mi/ Songon angka udan nene sai tu au
manetek i/ Nang tu au, nang tu au patetek I tu au.
 Suru ma tondiM manggomgom hata nang ulaonhi/ Paimbaru ma rohangku
topot au di asiMi/Dohot au, dohot au, sai ditopot Ho nang au.

7. Tangiang Pangondianon

8. Marende Huria B.E No. 467 : 1-2 “Asi ni rohaM hupuji”

 Asi ni rohaM hupu ji ala Ho manobus au./ Di paias Ho rohangku, gabe
soranganMu Au./ IngananMu rohanami. TondiMi manggohi i. / Pangke dohot
ngolunami gabe ulaulaMi.
 Sai ramoti ma rohangku, asa boi gohanMu au/ Sai mabaor ma pasupasu nang
marhite sian au/ IngananMu…(d.u)

9. Renungan
B. Mameakhon Batu Pertama

10. Marende Huria B.E No. 122 : 1 +9 “Ida Hinadenggan ni”

Dipajonok ma angka nanaeng mameakhon batu pertama ma tu inganan peletakan
 Ida hinadenggan ni Angka na saroha i/ Parpambaenan na burju Nang hatana pe
tutu.
 Sai padomuma muse na so olo saor dope/Nang pe rohanami on, sai pasada ma
tongtong

  Mameakhon Batu Ojahan sian :

1. Pandita         
: Dibagasan goar ni Debata Ama, Anak, dohot Tondi Parbadia; pinaojak ma batu
on gabe batu parsuhi ni palas-palas ni gareja on. Sai tulus ma ulaon on
mangasahon haporseaon dohot roha biar mida Jahowa. Dung i pasupasuhonon
ni Tuhan i ma hasadaon dohot ragam ni basabasaNa tu sude ruas ni huria on,
Amen.                                  
2. Uluan ni Huria
3. Mewakili Parhalado
4. Panitia Pembangunan
5. Mewakili Ruas Ama                         
6. Mewakili Ruas Ina                     
7. Tukang  

11. Marende Huria B.E. No. 672: 1-2 (huhut papungu pelean)
 Tung godang situtu ulaonmu antong dipasahat Tuhanta tu ho/Ndang adong be
tingkim marnalemba tahe, ngolumi bahen tiruan tongtong/ Sai patupama i ala ni
Tuhan i, so manghirim balosna tu ho/ Debata do marnida naniulami, manang na
adong parbue ni i.
 Ai lambok do soara ni Tuhanta I Ro ma ho las ma nang rohami/ Sai taingot
tongtong hata ni Tuhan I Mangarahon jolma tu Tuhan i/ Sai patupa..(d.u)

12. Tangiang Panutup

C. Acara Mandok Hata (diaturhon Panitia Pembangunan)