PARTORDING NI ACARA

PARTANGIANGAN PANGUJUNGI
HKBP CINTA DAMAI
RESORT MEDAN
Kamis, 23 Nopember 2023
“Martangiang Na Hohom”
1.Marende BE No. No 392 : 1-2 “Sai Pasiat Tuhan Jesus”
♪ Sai pasiat Tuhan Jesus tu bagasan rohami. Sai maimaima Jesus, bege
panuktukNa i. Sai pasiat Tuhan Jesus, jangkon i tu rohami. Nunga tingki
parasian, so tung jolo salpu i.
“Jongjong”
♪ Hariburon na di tano, sai ringgas dijangkon ho. Marisuang Tuhan Jesus sai
dihagarishon ho. Sai pasiat Tuhan Jesus……
2. Votum-Introitus-Tangiang L: Liturgis R: Ruas
L : Marhitehite Goar ni Debata Ama dohot Goar ni AnakNa Tuhan Jesus Kristus
dohot Goar Ni Tondi Porbadia na tumompa langit dohot tano on. Amen. Songon
duhutduhut do saluhut daging jala songon bungabunga ni duhutduhut i do
saluhut hasangapon ni jolma. Nunga malos duhutduhut i jala nunga marurus
bungabunga na i, alai hot do Hata ni Tuhan i ro di saleleng ni lelengna. Sai burju
ma ho rasi rasa mate, dung i lehononKu ma tu ho tumpal hangoluan. Haleluya,
Martangiang ma hita : Ale Tuhan Debata, pargogo na so hatudosan, na so
marmula na so marujung. Diparbaga Ho do marhitehite AnakMu, Tuhan Jesus
Kristus : LehononMu hasesaan ni dosa, hatigoran dohot hangoluan saleleng ni
lelengna di hami. Asi ma rohaM, lehon ma i di hami. Sai sungguli jala togutogu
rohanami marhitehite TondiM, asa hulului hami pangurupion sian Ho, molo ro
pangunjunan tu hami. Sai pahot ma rohanaMi, asa tung porsea hami di HataM
dohot di bagabagaM, asa jumpang hami hasonangan saleleng ni lelengna
marhitehite AnakMu, Tuhan Jesus Kristus , Tuhannami. “Hundul”
3. Marende BE. No. 385 : 1-2 “Dijuhon Jesus Ro Hamu”
♪ Dijouhon Jesus ro sude hamu na loja i. Hutogutogu do hamu tu hasonangan i.
Hamu sude pamanat i, hamu niarahonNa i; tadinghon niarsakhonmi, dompak
Tuhan i. Sonang ni roha i, sonang ni roha i; Sonang ni roha i dilehon Jesus i.
 ♪ Sai bege olopolop ni naung ro tu Jesus i. Malua sian dosa do naung saut tu
Jesus ro. Antong so tung tarambat ho, marlojong ma tu Jesus ro, sai golom
panghophopNa i, malua ho disi. Sonang ni roha i………
4. Manjaha Epistel : Pangungkapon 21 : 1-4 L: Liturgis R: Ruas
L : Turpuk Epistel patujolo ni jamita partangiangan di bagasan bodari on tarsurat
di Pangungkapon 21 : 1-4. Ita jaha ma marsingkat sorin :
Dung i huida ma banua ginjang na imabru dohot tano na imbaru, ai nunga i
salpu banua ginjang na parjolo dohot tano na parjolo i; laut i pe ndang adong be
R : Jala huida hami ma huta na badia i tuat sian banua ginjang sian Debata, i ma
Jerusalem na imbaru, na pinature songon oroan na sinanggulan mandapothon
harajaanna.
L : Jadi hubege ma soara na gogo sian habangsa i na mandok : “On do joro ni
Debata di tongatonga ni angka jolma; na maringanan ma Ibana di tongatonga
nasida, jala nasida ma bangsoNa, jala Debata sandiri saor tu nasida.
R : Jadi apusan ni Debata ma nasa iluilunasida sian matanasida: Ndang adong be
hamatean nang arsak ni roha; nang anggukangguk, nang na hansit, ndang disi
be; ai nunga salpu na parjolo i.
L : I do sahatna, Martua do angka na tumangihon hata ni Debata jala naumpeopsa.
L/R: Amen
5. Marende BE. No. 267 :1-2 “O Tuhan Sulingkit Ma Au”
♪ Tuhan sulingkit ma au Sondangi rohangku tangkas. Gogongku soada di au
||:Tu Ho paringgas tu Ho au padonok di Ho na ma au:||
♪ Tu aha marguna be i Nang godang sinamot di au? Di ginjang di sambulongki.
||:Ho Jesus artangku tusi do siholhu sonang rohangki:||
6. Mangarimangi Pardalanan Ni Panghobasion Di Bagasan Sataon Parhuriaon
L : Liturgis R : Ruas
L : Hita angka dongan na pinamonang ni Jesus Kristus, ditingki on ma tutu
paujungonta ulaon partangiangan na pinatupa ni Hurianta dibagasan sataon
parhuriaon on. Ndada na laho manambai boban ni ripe dibahen panghobasion
i. Alai naeng do tinagam, asa marhite punguan i gabe lam matoras
haporseaonta tu Debata, matoras nang diangka parsaoran na sahuria.
H : Olo tutu, mansai balga do panghorhon ni parpunguan i tu ngolunami.
Hurajumi hami do, dalan ni Debata do i laho padimundimun, huhut
marmahani angka ruasNa, asa mangolu dibagasan haporseaon na sintong.
L : Antong taparbuehon ma angka poda, apopao, dohot sipaingot naung tolhas tu
marhite partangiangan na pinatupa ni hurianta. Asa unang magopo saluhut
angka pangajarion na sahat tu hita marhite angka parjamita, ai i do hangoluan.
H : Sai pasupasu ma hataM i di rohanami, ale Tuhan. Asa sitiriun saluhut ngolu ni
halak Kristen di portibion. Unang ma mambugangi, alai pamalumhon ma.
Unang ma mangalohai, alai marroha paulihon ma. Unang ma mangago, alai
 mangalului ma. Sai unang ma mangaribahi, alai manjarumi ma. Jala unang ma
marmusu, alai manghaholongi ma. Ai i do na hinirimMu di ngolunami,
umbahen sai diajari Ho hami marhite HataM i.
L : Tama do tutu pujionta Tuhan i, ai dipasupasu do huriaNa i. Disuru do angka
parjamita ro tu tongatonganta laho mamodai, manogunogu, marmahaman
angka ruas ni Tuhan i. Ndada holan i, alai dipabangkit do sian tongatonganta
angka parhalado, mangurupi nasa na ringkot tu ulaon panghobasion.
Saluhutna i rajumanta ma, dalan ni Debata do i manghophop huhut
mangaramoti huriaNa, asa marhapantunon, marhadaulaton, dohot
marhabadiaon.
R: Tung na songkal do Debata, jala tama sipujion. Ai marhite HataNa na badia i,
diondingi do hami sian roha ni portibi, tahitahi ni sibolis, na naeng manegai
roha nang pingkirannami. Maulite ma di Ho, o Tuhan Debata. Ala disuru Ho
do angka parjamita nang parhalado, songon singkatMu mangingani hami, laho
paimbaru gogo nang haporseaonnami.
L : Di tingki on, bagas ma tasulingkit tu rohanta, asa marhite panulingkiton ni
rohanta boi tapature muse haporseaonta di taon naimbaru, di taon 2024 na
naeng ro. Lam tu ringgasna ma hita, jala lam tu hobasna. Sai burju ma
saluhutna angka ruas ni huria mandohoti angka parpunguan na pinatupa ni
huria. Radot ma tongtong angka parhalado manghapadothon ulaonna. Asa
tuulina huria ni Tuhan i. Unang ma borat simanjojakta mangalangkahon tu
parpunguan. Sai unang ma tatulak angka partangiangan, dohot angka parbarita
na uli. Ai martua ma saripe na manjangkon haroro ni huria i. Ai sadihari
tajangkon ruas nang parhaladoNa, nda na manjangkon Tuhan i do hita disi?
R : (Mangendehon) BE. No. 391: 1 “So Tung Ditulak”
So tung ditulak rohami panjouon ni Tuhanta i. Disi do hangoluanmi, sadarion ma
tangkup i. sadarion, sadarion, paujung I sadarion; sadarion, sadarion, paujung i
sadarion
L : Sai manumpak tu na denggan ma saluhut angka na tahirim di bagasan tingki
on, marhite haporseaon dohot roha na sintong. Marsangap ma Debata, olat ni
on ro di saleleng ni lelengna.
L/R: Amen.
10. Marende BE No. 258 : 1 , 3 “Sai Hutuju”
♪ Sai hutuju hangongolu na pasabam au. Sai hugogo lao tu surgo, paima sahat au.
Sabat hupasiding do, hata on huingot do: Sai datdati manjalahi hasonangan i.
♪ Ale Jesus sai pabulus langkangki tu Ho. Pargogoi ma au na loja na maheu do.
Sai apoi ma rohangkon manundalhon tano on. Baen malua, baen martua au
pardagang on.
11. Sunggulsunggul
12. Tangiang Pangondianon : Sahalak Sian Parhalado
13. Marende BE No. 266 : 1-2 “Tu Banua Ginjang Do”
♪ Tu banua ginjang do pardalanta i. Na dihalungunhon ho tulus ma disi. Anggo
dison mubauba do sude, so sadia na ture, di tano on.
♪ Tu banua ginjang i sai tabereng be. Molo ngot manogot i, nang bodari pe. Olo
tongtong, martangiang ho gogo, ia naeng taruli ho di Jesus i.
14. Jamita “Jesaya 65 : 17-23”
15. Marende BE No. 354 : 1… “Sai Tong Maimaima Do” (Papungu Pelean Ia & Ib)
♪ Sai tong maimaima do rohanta i di Jesus. Ibana haluaon do di angka naung
tinobus. Ro do muse Tuhanta i, mardongan hasangapon i. Sai ro ma Ho o
Jesus, sai ro ma Ho o Jesus.
♪ Marlas ni roha ma disi, sudena naung tinobus. Masibhol situtu do i di Jesus i
partobus. Ro do muse Tuhanta i………
♪ Satongkin nari nangkok be marhitehite ombun. Rap dohot Jesus lao sude tu
surgo i marujung. Sai longang be do sasude, di hasangapon i muse, di surgo di
na sonang, di surgo di na sonang.
16. Tangiang Pelean – Ale Amanami – Pasupasu-Amen-Amen-Amen
SUNGGULSUNGGUL
1. Parmingguon
Di ari Minggu marsogot, nunga sahat hita tu minggu ujung taon parhuriaon. Hot do
patupaonta parmingguon disi songon na somal, manogot dohot arian. Di Minggu manogot
pungkaonta ma masuk jam 08.00 WIB dohot minggu arian gabe jam 11.00 WIB. Marhata
Batak do parmingguanta sian minggu manogot sahat tu minggu arian. Laos dibagasan
minggu i ma jahahononhon angka goargoar ruas ni huria naung jumolo marujung sian
tongatonganta. Pinangido gomos tu hita asa renta ma hita mandohoti parmingguon i di ari
Minggu na naeng ro. Ala parningotan di angka naung monding do, molo boi tapangke ma
pahean na marrumanghon na birong.
2. Ulaon Na Badia
Patupaon do di ari Minggu marsogot ulaon na badia tu sude ruas nang parhalado naung
manghajongjonghon haporseaon dohot na so hona ruhut parmahanion dohot paminsangon
sian hurianta. Ulaon i dipatupa di sude rumang ni parmingguon (manogot & arian).
Masipaboaan ma hita tu angka donganta angka amang/inang lumobi di angka na so sahat
dope barita tu nasida.
3. Guguan Ni Huria
Ala nunga sahat hita tu Sipaha sampulu sada (Nopember 2023), jala dibagasan tingki na
jonok patupaon ni hurianta ma tutup buku akhir tahun. Ihut tusi pinangido tongtong tu
hita, asa taingot ma amang/inang laho pasahathon guguanta tu huria on, lumobi di angka
na so pasahathon dope. Di angka celengan gotilon, na so pasahathon dope asa dipasahat
ma tu hurianta on. Disiala haradeon ni rohanta jumolo pinasahat mauliate.