PARTORDING NI PARMINGGUON

DI MINGGU DUNG ARI HATUTUBU NI TUHAN JESUS

Ev. Psalmen 148: 1 – 14 Ep. Yesaya 61: 10 – 62: 3

TOPIK:
HOLAN DEBATA DO TAMA SIPUJION

HURIA KRISTEN BATAK PROTESTAN

Minggu, 27 Desember 2020
01. PAMUHAI :
 U : Huria ni Debata na Hinaholongan ni Tuhanta Jesus Kristus, nunga
masuk hita tu Minggu Dung Ari Hatutubu ni Tuhan Jesus. Alani
tapuji ma Tuhanta naung ro manopot hita laho paluahon hita sian
hagolapon tu hatiuron.
R : Pinuji ma Tuhan i, Debata ni Israel, ala ditopot bangsoNa jala
dipatupa haluaonna.
U : Marhite parmingguonta sadari on di paingot do hita asa HOLAN
DEBATA DO TAMA SIPUJION. Antong hamu ale angka raja ni tano
on dohot sude angka bangso, hamu ale angka pangarajai ro di
sude angka panguhum ni tano on. Angka dolidoli dohot namarbaju
pe, hamu ale angka natuatua rap dohot angka na bajar. Ingkon
pujionnasida ma goar ni Jahowa, ai sasada goarNa i do na timbul,
diatasi hamuliaonNa i do tano on dohot angka langit! Marende ma
hita.
02. Marende BE No. 587: 1,2 TAENDEHON LAS NI ROHA
 Taendehon las ni roha, pasangaphon Tuhan i.
Roha holong na mangonjar, laho mangendehon i.
Ganup ari ganup borngin, unang lupa ho disi.
Angka ende na umuli, si pasangap Tuhan i.
Nang parhinaloan i, baen pasangap Tuhan i.
(Jongjong)
 Taendehon las ni roha, sipadame roha i.
Tung dao do badabada, dohot angka hosom i.
Hadameon ni Tuhanta, i do sitiruon i.
Tapalambas ma rohanta, mida angka dongan i.
Na martua do sude, na lambok maroha i.
03. VOTUM – INTROITUS – TANGIANG:
U : Marhitehite Goar ni Debata Ama, dohot Goar ni AnakNa Tuhan
Jesus Kristus, dohot Goar ni Tondi Porbadia na tumompa langit
dohot tano on. Amen. Angka diboto hamu do, na manghorhon
habengeton ni roha do pangunjunan di haporseaonmuna. Alai
ingkon adong do ulaon naung sun denggan di habengeton i, asa
tung tang situtu jala halak sisandok hamu, angka na so hurangan

1
 di manang aha. Martua do naposo, na mangulahon sisongon i
didapot tuanna di harorona i. Haleluya!.
R : (Mangendehon): Haleluya, Haleluya, Haleluya!
U : Martangiang ma hita : Ale Debata, Ama na di banua ginjang,
pujipujian, hasangapon dohot hamauliateon husombahon hami tu
Ho, marningot silehonlehonMi na balga i tu hami jolma na di
pardangolan on, i ma AnakMu, Jesus Kristus, na sinuruMi sian
banua ginjang ala ni hami. Gabe na dangol do Ibana jala na pogos,
pola tubu Ibana di bara ni Betlehem, asa mamora hami. Sai rajai
jala togutogu hami marhitehite TondiM, asa lam huida hami
godang ni holong ni rohaM na pinapatar ni AnakMi. Amen.
(Hundul)
04. Marende BE No. 575: 1 PUJI MA DEBATA NA SONGKAL
 Puji ma Debata na songkal, pasangap ma goarNa.
Puji ma, angka rura dohot lung, angka dolok na timbo,
dohot hasak ni galumbang sude mamuji Ho.
Langit i na mansai hembang, bintang i
na mansai torang, ombun i na mansai saksak
pasangaphon Ho o Debata.
Tung so olo tading au, lao mamuji Ho Tuhan.
Nasa gogo bahenonhu, lao pasangaphon Ho.
Ro di ujungni ngolungku, sai pujionhu Ho.
05. PATIK:
U : Tangihon hamu ma Patik ni Debata di Minggu Dung Ari Hatutubu
ni Tuhan Jesus on, i ma na tarsurat di 2 Musa 20: 4 – 5, Ndang jadi
bahenonmu di ho ganaganaan, manang sumansuman dia na di
banua ginjang nang di tano on, ro di na di bagasan aek na di toru
ni tano. Ndang jadi ho marsomba tu nasida, manang oloanmu
nasida, ai Ahu do Jahowa Debatam, Debata parrimas, na
mangaluluhon hajahaton ni amaama tu angka anakna ro di sundut
patoluhon dohot paopathon, angka na sogo roha di Ahu. (Antong
rap mangido gogo ma hita tu adopan ni Debata).
R : Ale Tuhan Debata, sai pargogoi ma hami mangulahon na
hombar tu PatikMi. Amen.
2
06. Marende BE No. 421: 1,2 MARSOMBA AU DI JOLOMON BL. 281
 Marsomba au dijoloMon, ponjot, targogot rohangkon.
Dibaen godang ni dosangkon, sai jangkon dohot au.
Sai jangkon ma au on, na ramun diringkon;
tung pos do rohangki di Ho, dijangkon Ho au on.
 Ndang haurupan au au on, na busuk nama rohangkon. (Berdiri)
Alai hutangkup hataMon: Sai ro ma ho tu Au.
Sai………………..
07. MANOPOTI DOSA:
U : Huria ni Tuhanta, dibagasan roha na hohom tatopoti ma dosanta
na godang i tu adopan ni Debata, asa tama hita manjalo
bagabagaNa taringot tu hasesaan ni dosanta.:
(tingki na hohom . . : Musik ........BE No. 428: 1)
U : Ale Tuhan Debata, na badia jala na bonar. Ho do na manompa
hami dohot saluhut jadijadianMu. Dilehon Ho do hosa hangoluan.
Mandokhon Ho jadi tartompa do. Diatasi hamuliaonMu do tano on
dohot angka langit! Singhop do ulaon panompaonMu di hasiangan
on alai ndada holan ditompa alai tongtong do diramoti, ditobus,
dipaimbaru jala dipasinghop Ho marhite asi ni rohaM. Alani do
ingkon sude na tinompa i mamuji dohot pasangaphon Ho. Angka
langit dohot tano, angka hau dohot binatang, angka dengke dohot
pidong, angka raja dohot bangso, angka pangarajai dohot
panguhum, angka dolidoli dohot namarbaju, angka natuatua rap
dohot angka na bajar ingkon do mamuji dohot pasangaphon
Debata. Alai Tuhan, saluhut angka na tinompaMi nunga lam sega.
Nunga sega tano, laut dohot alogo alani hamongkusonnami. Nunga
marsak angka na tinompa i ala jotjot do hami holan na
mangharingkothon ngolunami sandiri, ndang parduli tu angka na
humaliang hami. Ajari ma hami Tuhan asa saluhut na tinompami
mamuji dohot pasangaphon Ho marhite na mangaramoti dohot
pauliulihon angka na tinompaMi. Asa marguna na tinompaMi tu
hangoluannami. Unang holan na pasuasaehon huboto hami alai
tongtong ma parsidohot hami mangaradotisa asa gabe pujipujian
dohot hasangapon di goarMu.

3
 R : Ale Tuhan Debata, na badia jala na bonar. Di Ho ma tama
pujipujiannami.
U : Ale Tuhan Debata, na badia jala na bonar. Parasi jala Partalup ni
roha jala na basar do Ho! Sai marpangulahi ma rohaM mida hami.
Dibahen i sai sesa ma sude dosanami! Ndang adong na
hupangasahon hami dungkon ni asi ni rohaM; hatigoran na
pinatupa ni AnakMu do na hupangasahon hami tu joloM. Dibahen i
pasonang jala apuli ma hami angka na hinophop ni Tuhan Jesus
Kristus, Tuhannami. Amen.
R : (Mangendehon): 428: 1 HO NA LOJA HO NA SORAT BL. 288
 Ho na loja, ho na sorat, pos roham di Debatam.
Di na hansit, di na borat, dipapita do roham.
Unang ganggu rohamuna di pandok ni Debatam.
PasautonNa bagabaga, pos roham di Debatam.
U : Tabege ma Hata bagabaga taringot tu hasesaan ni dosa: Molo
tung adong manang ise na mardosa, adong do pangondianta di
Ama i, i ma Tuhan Jesus Kristus na tigor roha i. Jala Ibana do
pardengganan taringot tu dosanta, alai ndada holan taringot tu
dosanta, dohot do taringot tu dosa ni saluhut portibi on.
Hasangapon ma di Debata na di ginjang!
R : Amen (Hundul)
08. Marende BE No. 699: 1 SINGKOP DO ASI NI ROHAM
 Singkop do asi ni rohaM, tu au na dangol on.
Na lilu ahu na hinan, nuaeng jumpang do.
 Di na hutanda dosangki, gok biar rohangki.
Alai ala ni asiMi, mardame rohangki.
09. E P I S T E L :
U : Tabege ma Hata ni Debata turpuk ni ari Minggu Dung Ari
Hatutubu Ni Tuhan Jesus on i ma na tarsurat di Jesaya 61: 10 –
62: 3, Marlas ni roha situtu do ahu di bagasan Jahowa,
marolopolop do tondingku di bagasan Debatangku; ai nunga
disolukhon tu ahu angka ulos hatuaon, baju hatigoran dihohoshon

4
 tu ahu, songon pangoli, na marbulangbulang mangaradoti
hamalimon jala songon oroan naung hinohosan.
R : Ai songon tano na manubuhon suansuanan, jala songon
porlak na pasimbur tubu boni na sinaburhon tusi ingkon
songon i do patubuon ni Jahowa hatigoran dohot pujipujian
di adopan ni sandok angka parbegu.
U : Ala ni Sion ndang tarbahen ahu sip, jala ala ni Jerusalem ndang olo
ahu pompoman, paima binsar hatigoranna songon sondang ni
mata ni ari, jala hatuaonna songon sulusulu na marsigorgor.
R : Jadi idaon ni angka bangso parbegu ma hatigoranmu, jala
saluhut angka raja hamuliaonmu, jala ingkon margoarhon
goar na imbaru ho, sipaboaon ni pamangan ni Jahowa.
U : Jadi gabe tumpal hamuliaon ma ho di tangan ni Jahowa, jala
tumpal harajaon di tangan ni Debatam. I do sahatna: Martua ma
angka na tumangihon Hata ni Debata jala na umpeopsa. Amen.
10. Marende BE No. 715: 1, 2 BALGA DO HOLONGMI
 Balga do holongMi sitobus au.
Ai nunga mate Ho humophop au.
Hulehon ma tu Ho saluhut ngolunghi.
Sai i ma padanhi tu Tuhanhi.
 Baen ma au pangoloi haposanMi. (Jongjong)
Marhobas di joloM, burju tongtong.
Patar ma holongMi di pambahenanhi.
Manogu dongan i tu Tuhanhi.
11. MANGHATINDANGHON HAPORSEAON:
U : Tahatindanghon ma haporseaonta i, songon na hinatindanghon ni
donganta sahaporseaon di sandok portibi on. Rap ma hita
mandok:
R : Ahu Porsea….. (Hundul)
12. TINGTING + TANGIANG PANGONDIANON

5
13. Marende BE No. 574: 1- PUJI MA DEBATA (Pel. I Huria)
 Puji ma, puji ma Debata
Na niainNa do umpuji Debata.
Nunga sesa dosami, malum dohot rohami.
Puji ma, puji ma Debata
Na niainNa do umpuji Debata.
 Olophon, olophon Tuhan i
Hatindanghon denggan ni basaNa i.
Sai arahon donganmi, ro tu sipalua i.
Olophon, olophon Tuhan i,
hatindanghon ma denggan basaNa i.
---- Musik ----
 Tagam ma, tagam ma Tuhan i,
sai pagalak ma tongtong palitomi.
Lam jonok ariNa i, salpu parungkilon i.
Tagam ma, tagam ma Tuhan i,
sai pagalak ma tongtong palitomi.
14. JAMITA: Psalmen 148: 1 – 14
15. Marende BE No. 706: 1- GODANG NI PASU-PASU I ( Pel. II)
 Godang ni pasu-pasu i, dilehon Tuhanhi.
Tarlobi asi-asiMi, marhite anakMi.
Jalo ma pujianhi, Jesus Sipalua i.
Boi au bongot tu surgo i,
marnida hasangaponMi.
 Tondong nang aleale i, palashon rohangki.
Alai na umuli i, boi au anakMi.
Jalo ma pujianhi…..
---- Musik ----
 Ndang dung mansohot basaMi, saleleng ngolungki.
Ho ma tongtong pujionhi, sangap digoarMi.
Jalo ma pujianhi…..
16. PANGUJUNGI: (Jongjong)
U : Didok Hata ni Debata do tu hita sadari on: HOLAN DEBATA DO
TAMA SIPUJION ai nunga singhop ulaon panompaon ni Debata di
6
 hasiangan on. Antong tapuji jala tapasangap ma Debata di bagasan
ngolunta on, unang ma tu angka jadijadian manang marsomba
tusi. Angka langit dohot tano, angka hau dohot binatang, angka
dengke dohot pidong, angka raja dohot bangso, angka pangarajai
dohot panguhum, angka dolidoli dohot namarbaju, angka natuatua
rap dohot angka na bajar ingkon do mamuji dohot pasangaphon
Debata.
R : Ale Tuhan Debata, di Ho ma pujipujian dohot hasangapon ro
di saleleng ni lelengna.
U : Taida jala tapanghilalahon do godang ni angka parsorion di
tongatonga ni portibi on. Sega do tano, laut dohot alogo alani
ulaon ni jolma na so mangharingkothon haulion ni jadijadian ni
Debata. Alani ulaonta do laho pauliulihon dohot mangaramoti
angka na tinompa i asa marguna i bahen hangoluanta asa gabe
pujipujian dohot hasangapon di goar ni Debata naung manarihon
ngolunta. “Ai jadijadianNa do hita, angka na tinompa di bagasan
Kristus Jesus, asa marulaon na denggan hita; ai angka i do
dipature Debata hian, asa taparangehon i.
R : (Mangendehon) BE No. 133: 5 O TONDI NA MANGGOHI ROHA
BL. 371
 Urupi hami sian Sion, sai suru Tondi Parbadia i.
Lao paluahon hajolmaon, hombar tu na pinarbagahonMi.
Sondangi ma sandok portibi on, pasiat ma hataM di tano on.
17. TANGIANG PANGUJUNGI:
- Tangiang Pelean: (Agenda HKBP)
- Tangiang Ale Amanami:
- Pasupasu:
- Amen, Amen, Amen