PARPUNGUAN BODARI

UJUNG TAON
TOPIK:
DIIBANA MA HASANGAPON RO DI SALELENGLELENGNA
(BAGI DIALAH KEMULIAAN SAMPAI SELAMA-LAMANYA)

Ev. ROM 11:33-36 Ep. 1 RAJARAJA 8:54-61

HURIA KRISTEN BATAK PROTESTAN

( HKBP ) RESSORT TORGANDA RANTAU
KASAI

Sabtu, 31 Desember 2022

1
01.Pangaradeon : Parhalado Marende & masuk tu bagas joro.
02.PAMUHAI :
U : Huria na hinaholongan ni Tuhan Jesus Kristus, na marpungu do hita di borngin
on i ma borngin na parpudi di taon 2022 on. Ndang apala sadia lelengnari
tinggalhononta ma taon 2022 jala bongot ma hita tu taon na imbaru 2023. Di
ujung ni taon on ringkot do marrujiruji hita marningot pardalanan naung
tabolus, huhut laos songon na paulak hosa loja laho manguduti pardalananta i.
Antong aha ma sisoarahononta tu Tuhanta Pardenggan basa i ?
R : Ale Tuhannami, sai parrohai ma hami mamilangi angka ariarinami, asa
dapotan roha na bisuk hami.
U : Marragam do angka na tabolus manipat di bagasan na sataon bolon on, ra atik
tung sipata ganggu do rohanta marningot angka na maol di pardalanan ni
ngolunta. Alai ingkon sai tongtong do golomonta, ia Tuhanta pardenggan basa i
sai patupaonNa do angka na dumenggan tu hita. Sangkap hasonangan na sian
Debata, i ma itagolom laho papos rohanta manalpuhon taon on dohot mangeahi
taon na imbaru i. Dibahen i, rap ma hita mamuji pasangap GoarNa i, Marende
ma hita.
01.Marende BE No. 565 : 1, 4 LAS ROHANGKU LAO MAMUJI
 Las rohangku lao mamuji Debata
Parholong i, Songon bunga na
mangerbang di na binsar ari i. Arsak,
dosa, haporsuhon mago dibaen asiMi.
Las ni roha na manongtong lehon di au Tuhanki. ----Jongjong-----
 Rap ma hita mangendehon, sangap di
goarNa i Tapangiar soaranta lao
mamuji Tuhan i.
Sun do holong ni rohaNa na so
marnamontok i, I do pasadahon hita
salelenglelengna i.
02. VOTUM – INTROITUS – TANGIANG:
U : Marhitehite goar ni Debata Ama, dohot goar ni AnakNa Tuhan Jesus
Kristus, dohot goar ni Tondi Porbadia na tumompa langit dohot tano on.
Amen. Hohom ma hamu maradophon Tuhan Jahowa; ai jonok nama ari ni
Jahowa na bolon i, jonok nama i, jala silu situtu do i ro. Di na mulak

2
 tinogihon ni Jahowa angka na tarbuang sian Sion, doshon halak na marnipi
do hita. Gok parengkelon ma uju i pamanganta jala marolopolop. Ida ma,
hatop do Ahu ro, tiop ma na di ho nuaeng, asa unang adong na mambuat
tumpalmi. Haleluya!
R : (Mangendehon): Haleluya, Haleluya, Haleluya!
U : Martangiang ma hita: Ale Amanami na di Banua ginjang ! Dibahen Ho
Anak haholongan ni rohaM tu toru ni patik, asa dipalua angka na
ginomgoman ni Patik. Urupi ma hami, asa dohot hami dapotan haluaon i,
jala asa mian hami di bagasan harajaonMu, Sai pinuji ma GoarMu na badia i,
ala naung ditingkir Ho hami bangsoM. Ditogutogu Ho do hami sian
haholomon tu hatiuron jala dipadomu Ho do hami, na holang hian sian Ho,
gabe saor muse dohot Ho. Gok halalas ni roha do hami ala ni i. Sai jalo ma
hamauliateon ni rohanami, naung tinopotMu hami marhitehite AnakMi.
Amen. (Hundul).
03. Marende BE No. 574 : 2-3 Puji Ma Debata
 Olophon, olophon Tuhan i, hatindanghon denggan ni basaNa i . Sai arahon
donganmi, ro tu Sipalua i. Olophon, olophon Tuhan i, hatindanghon ma
denggan basaNa i.
 Tagam ma, tagam ma Tuhan i, sai pagalak ma tongtong palitomi. Lam jonok
ariNa i, salpu parungkilon i. Tagam ma, tagam ma Tuhan i, sai pagalak ma
tongtong palitomi..
04. PATIK:
U: Tatangihon ma Patik ni Debata di Parpunguan bodari ujung taon on, ima
na tarsurat di 2 Petrus 3 : 13 – 14. Alai na maimaima do hita di langit na
imbaru dohot di tano na imbaru, inganan ni hatigoran i hombar tu
bagabagaNa.
R: Dibahen i, hamu angka haholongan, anggo i dipaimaima hamu,
ringkoti hamu ma, asa didapot Ibana hamu so martihas, so
hasurahan, dibagasan dame!
U: Antong rap mangido gogo ma hita sian Tuhan Debata!
U+R: Ale Tuhan Debata! Sai pargogoi ma hami mangulahon na hombar
tu PatikMi. Amen.
05. Marende BE No. 681: 1 + 2 ALE AMANG ASI ROHAM
 Ale Amang asi rohaM di au pardosa on,
3
 Unduk do rohangkon nuaeng marsomba di joloM.
Unang jujur unang jujur angka dosangki.
Sai salpuhon sai salpuhon sian rohaMi.
(Jongjong)
 Amang sai pargogoi ma au, di hasiangan on, TondiM pasaor tu tondingkon,
pamalum rohangkon. Sai usehon, sai usehon, TondiMi tu au,
Asa monang maralohon, parungkilon au.
06. MANOPOTI DOSA DOHOT BAGABAGA
U : Tatopoti ma dosanta na godang i tu adopan ni Debata, tapaunduk be ma
rohanta, martangiang ma hita ! Ale Debatanami, na marasi roha jala na
badia, Amanami, marhitehite Tuhan Jesus Kristus ! Manang piga hali hami
ro tu joloM, huhilala hami, ringkot do asi ni rohaM di saluhut hami halak
pardosa. Alani i do umbahen hupaserep hami dirinami sadari on di joloM,
jala huparhatopot hami, tung na jotjot do hami manimbil sian angka dalanMu
na badia songon birubiru na lilu.
R : Sai unang pabali hami sian joloM ala ni dosanami i, ai ndang
dihalomohon rohaM hamatean ni angka pardosa, alai hamubaon ni
rohana do lomo ni rohaM, asa mangolu.
U : Sesa ma saluhut hageduhonnami dohot pangalaosionnami marhitehite
pangulunami na sasada i, AnakMu Tuhan Jesus Kristus. Sai pahot ma asi ni
rohaM di hami marhitehite panindangion dohot hagogoon ni Tondi Parbadia
asa tarapul situtu rohanami manjou Ho, asa pantun, tigor jala daulat hami
marpangalaho, bahen hasangapon di goarMu na badia i. Amen. ----
Musik M. Dosa---
Laos tabege ma bagabaga ni Debata taringot tu hasesaan ni angka dosanta!
Molo tung adong manang ise na mardosa, adong do pangondianta di Ama i, i
ma Tuhan Jesus Kristus na tigor roha i. Jala Ibana do pardengganan taringot
tu dosanta, alai ndada holan taringot tu dosanta, dohot do taringot tu dosa ni
saluhut portibi on. Hasangapon ma di Debata na di ginjang!
U+R: Amen. (Hundul)
07. Marende BE No. 169 : 3 HO SIPANGOLU AU
 Togu ma rohangkon sai taiti au tu Ho
Ai langkaMi tongtong naeng tiruonku do
Ro Sipangolu ro tibu baen ma au anakMu tutu

4
 Dohot mudarMi buri au ias songon hapas ma au
Ias tutu ias tutu, dohot mudarMi buri au, ias
songon hapas ma au
08. E P I S T E L :
U : Hata ni Debata Epistel di parpunguan bodari ujung ni taon on, tarsurat di 1
Rajaraja 8 : 54 – 61, tajaha ma marsoringsoring! Jadi dung sun
ditangianghon Raja Salomo tu Jahowa saluhut tangiang dohot pangidoan
ondeng, hehe ma ibana sian adopan ni langgatan ni Jahowa dohot sian na
marsinggang i dohot sian na pinaherbangna i tanganna dompak banua
ginjang.
R : Laos jongjong ma raja i, huhut mamasumasu sandok luhutan Israel, pola
dipagogo soarana mandok songon on:
U : “Pinuji ma Jahowa, naung mangalehon hasonangan tu bangsoNa Israel,
hombar tu sandok naung pinarbagaNa i! Ndang adong tartinggal nanggo
sada hata sian saluhut hataNa na denggan i, naung pinaboaNa hian
marhite sian si Musa naposoNa i.
R : Sai didongani Jahowa, Debatanta i ma hita, songon naung nidongananNa
angka ompunta na jolo; sai unang ma ditadinghon Ibana hita manang
mambolonghon hita.
U : Sai ditaiti ma rohanta tu Ibana, asa marparange hita di saluhut dalanNa huhut
mangaradoti angka tonaNa dohot patikNa dohot uhumNa, angka naung
tinonahonNa tu angka ompunta i.
R : Jala saluhut hata pangidoan on, angka naung husombahon di adopan ni
Jahowa, sai ngomngom ma i di jolo ni Jahowa, Debatanta i borngin dohot
arian, asa pasintongonNa uhum tu naposoNa dohot tu bangsoNa Israel,
singkop ariari!
U : Asa tung saluhut bangso ni tano on mananda, paboa Jahowa do Debata, jala
dungkon ni Ibana ndang adong.
R : Jala ingkon sun daulat rohamuna tu Jahowa, Debatanta i, asa marparange
di bagasan angka patikNa jala mangaradoti angka tonaNa suman songon
sadarion.”
U : I do sahatna: Martua do angka na tumangihon Hata ni Debata jala na
umpeopsa.
Amen.

5
09. REFLEKSI PARSIRANGAN NI TAON :
 Marende BE No. 707 : 1. HAGOGOON DOHOT APULAPUL
 Hagogoon dohot apul-apul do dilehon Tuhan i tu au, Ganup ari au
ditogutogu, ganup tingki diondingi au. Ai hombar tu lomo ni rohaNa do
dilehon Tuhan i tu au Ro marsorin arsak las ni roha haporseaonhu di
patau.
U : Borngin on, i ma borngin na parpudi di bagasan taon 2022 on. Satongkinnari
salpuhononta ma taon 2022 on, jala bongotanta ma taon na imbaru taon 2023.
Marragam do na tabolus di taon 2022, tudos tu sorha ni padati na sai
marhusor, ro do angka parungkilon, mara dohot pangunjunan, alai soluk do ro
muse angka las ni roha. Diloas do hita mangula ulaon, manggotil parbue ni na
taula. Boi tapaborhat angka ianakkonta marsingkola, dohot lan angka na asing
naung taulahon. Marningot saluhutna i, tama do ingkon marlasniroha hita
nuaeng ala sahat do hita tu ujung ni taon on.
R : Ale Tuhan, nunga di ramoti Ho hami mardalan di bagasan sada taon, huida
hami do godang ni asi ni rohaM na pinatongonMu di ngolunami. Sai lam
gandai ma holong ni rohanami tu Ho, asa sai hupuji hami Ho di sandok
panggulmiton ni ngolunami.
U : Hamuna angka dongan sahaporseaon, manongtong do bagabaga ni Debatanta.
Di bagasan bagabagaNa i do sangkap hasonangan silehononNa tu hita. I do na
sai tongtong dipatongontongon Tuhanta i tu hita. Antong sai tahaposi ma
bagabagaNa, tagolom ma i tongtong, asa margogo hita laho mandalani ariari
ni ngolu na nilehonNa i di hita ganup marsadasada.
R : Ale Tuhannami, Parasi ni roha jala Pardenggan basa do Ho. Sai asi ma
rohaM mida hami. Pasuang ma hami tu ngolu na dumenggan marhite
pangaramotionmu di hamai. Nunga tung tangkas huida hami, tung
sangkap hasonangan do sangkapMu tu hami angka na tinompaMi. Di Ho
ma hasangapon ro disalelengnilelengna
U : Manongtong do Hata ni Debata, ala ni i tu Debata ma panghirimonta, jala
unang ganggu rohanta disi. Ida ma, ndada na hurang ganjang tangan ni Jahowa
laho mangurupi hamu; jala ndada marhapal pinggolNa, so marbinege. Borhat
ma hita dibagasan pos ni roha, ta haporsea ma Debata laho manarihon
ngolunta di taon na imbaru i. Tapasahat ma haporseaonta tu Debata,

6
 tahantindanngkonma haporseaonta i, songon ni hinatindakhon ni donganta di
sandok portibion, rap ma hita mandok..............
10. Manjaha Barita Jujur Taon.
11. Mandok Hata
- Mewakili Ruas
- Mewakili Parhalado
12. Marende BE No. 268 : 1---“Debatangku Do Donganku” P. Pelean 1a + 1b
 Debatangku do donganku, ganup ari ganup taon Tumpahanna do langkangku,
urupanNa au manaon Pos do rohangki disi, Debatangku do donganki
salelenglelengna i.
 Debatangku do donganku, nang pe marsitaonon au Ai Ibana do Amangku, anak
haholongan au Pos do rohangki disi, Debata do donganki salelenglelengna i.
-----MUSIK----
 Debatangku do donganku, tung na ganggu ma au disi? Nda tongtong
hangoluanku asi ni rohaNa i? Pos do rohangki disi, Debata do donganki
salelenglelengna i!
13. JAMITA : ROM 11: 33 – 36
14. Marende BE No. 435 : 1--- “Tung Na Muba Rohakku” P. Pelean II.
 Tung na muba rohangku dibaen Tuhanki, dung Jesus maringan di au. Nunga
sonang au on, tung dame rohangki, dung Jesus maringan di au. Dung Jesus
maringan di au, dung Jesus maringan di au, Tung na sonang do au, dung tu
Jesus au lao, dung Jesus maringan di au.
 Au na lilu hian dapot sambulongki, dung Jesus maringan di au. Nunga sae
dosangki dibaen mudarNa i, dung Jesus maringan di au. Dung Jesus maringan
di au, dung Jesus maringan di au, Tung na sonang do au, dung tu Jesus au lao,
dung Jesus maringan di au.
--Musik---
 HaroroNa hutagam, ndang uhum tahe, dung Jesus maringan di au. Dohot
au ma partohap di sangap muse, dung Jesus maringan di au. Dung Jesus
maringan di au, dung Jesus maringan di au, Tung na sonang do au, dung tu
Jesus au lao, dung Jesus maringan di au.
15. PANGUJUNGI: (Jongjong)
U : Hamu dongan sahuria. Tongkin nari salpuhononta ma taon 2022 jala taripar ma
hita tu taon 2023. Didok sijolojolo tubu : “Nilangka tu jolo, tinailihon tu pudi”.

7
 Ala naeng mangalangka ma hita tu jolo, tama do jo tatailihon tu pudi, i ma
pardalananta manipat na sataon bolon on.
R : Ale Tuhan Debata, na pos situtu do rohangku, urupanMu ma ahu laho manguduti
pardalanan ni ngolungku ganup ari. BagabagaM ma na sai huhaposi di
ngolungku. U: Molo tatailihon pe tu pudi, asa dapotan bisuk do hita sian
angka na tabolus i, ai i do guru di hita mangalangka tu jolo tu taon 2023
sibongotanta. Godangna i na masa di bangsonta on na mambahen tarsonggot jala
mabiar hita, marhite angka hasusaan dohot angka parungkilon.
R : Sintong do i, “Torop pe mara manahopi au, Debatangki do sumarihon au, pos
rohangki, sonang do au Ibana do na mandongani au.”
U : Kristus do Tuhan naung ro tu portibi on na sinuru ni Debata Ama laho pasauthon
sangkap hatuaon dohot haluaon na sian Debata. Nunga saut dipalua Jesus hita
sian haholomon, jala diboan hita tu hatiuron hombar tu bagabagaNa i. Antong
Raphon Tuhan Jesus i ma taula siulaonta. Antong ! Beta ma hita borhat lao
mandalani taon na imbaru 2023, di bagasan las ni roha.
16. TANGIANG PELAN + ALE AMANAMI + PASU-PASU+ AMEN 3X.

Pendeta dan Parhalado

HKBP RESSORT TORGANDA RANTAU
KASAI
Mengucapkan
Tahun Baru 01 Januari 2023
KIRANYA TUHAN MEMBERKATI KITA