I. PATUJOLO U :Hamuna angka dongan na hinaholongan di bagasan Krsitus Jesus. Di ari sadarion, 20 Oktober 2023 tapatupa do partangiangan manabur boni. Paingothon hita do i paboa ndada ala ni gogonta manjadi saluhut na taula, alai na ro ma hita tu adopan ni Debata pasahathon nasa hadirionta di na laho mangula ulaonta i. Ro ma hita tu adopan ni Debata asa Ibana na mandongani, mangurupi, manumpahi jala mamasumasu ulaonta i. R : Ido tutu! dang ala ni gogo dohot malo ni jolmai sambing umbahen manjadi angka na niulana, alai diparhatopot roha nami do saluhut ala huaso ni Debata do mambahen manjadi. Ai mangula hita jolma manabur boni i, alai anggo jadina di Debata do i. U : Tapasahat ma saluhut pangidoanta tu Debata asa Ibana manjadihon boni i gabe marparbuehon na denggan hombar tu lomo ni roha ni Debata. Tapuji ma Debata marende ma hita. II. IBADAH 1. BE. NO. 10:1-2 HUPUJI HUPASANGAP HO BL.128 Hupuji hupasangap Ho Amang pardenggan basa Ai jadijadianMu do sude angka na masa Ditompa Ho do sasude Dagingku rodi tondi pe pinuji ma goarMu. Saluhut na tinompaMi Naeng sonang di rohaMu Arian dohot borngin pe Disarihon rohaMu Nang uhum di gomgomanMi Na tigor na sintong do i pinuji ma goarMu. 2. VOTUM U : Marhitehite goar ni Debata Ama dohot goar ni AnakNa Tuhan Jesus Kristus dohot goar ni Tondi Parbadia. R : Amen. U : On pe saleleng adong tano on, ndang jadi mansohot saburon dohot gotilon, ari ngali dohot ari las , ari logo dohot rondo ni ari, arian dohot borngin. R : Huboto, Ho do mual ni na denggan sasude jala Ho do na margogo i, sitompa sasude na pangoluhon dohot marmuduhon pe. Alani i, hudok hami ma tu Ho (mangendehon BE No 575 “Puji ma Debata na songkal” – holan Reff.) : Langit i na mansai hembang, bintang i na mansai torang , ombun i na mansai saksak pasangaphon Ho, O Debata. Tung so olo tading au lao mamuji Ho Tuhan nasa gogo bahenonku lao pasangaphon Ho. Rodi ujung ni ngolungku sai pujionku Ho. U : Ibana do na basa na manatap hita be jala basa manumpak ngolunta. Antong tahaposi ma Ibana na manarihon dohot na manongos tu daging nang tu tondinta pe. Haleluya! Martangiang ma hita : “ Ale Tuhan Debata, Amanami na di banuaginjang! Ho do nampuna langit dohot tano ro di pangisina sudena. Jadijadian ni tanganMu do sude na adong jala na pinarmuduM do umbahen mangolu sude na tinompaMi. Na marpungu do hami dison ruas ni HuriaM mangido : Sai sesa ma dosanami dohot dosa ni angka dongannami. Sai unang baloshon tu hami angka pambahenannami na hurang i, molo tung jotjot pe hami mangapian dohot holsoan ala ni na ringkot dingolunami. Sai digohi asi ni rohaM ma sude na hurang i di hami. Hupangido hami nuaeng sian nasa rohanami : Asi ma rohaM, sai lehon ma udan dohot las ni ari di tingki na be, na pa gabe na huula hami asa jumpang hami parbue na denggan bahen panganon siganup ari. Sai lam patandahon ma tu hami godang ni denggan ni basaM, asa lam dao hami sian pangalaho parungutunguton. Sai ajari ma hami mandok mauliate tu Ho dohot mamuji goarMu na badia i alani Tuhan Jesus Kristus Tuhannami. Amen (Hundul) 3. B.E No.188 : 1-2 JAHOWA SIPARMAHAN AU BL. 131 Jahowa Siparmahan au Ndang hurang manang aha Ai nasa jea dipadao Do sian dorbiana Tongon dibaen na lomak i Lao pangoluhon tondingki Dibaen asi rohaNa Ditogu au tu na tio Aek mata hangoluan Dibaen do tondingki sio Di dalan hasonangan Sabam rohangku do tongtong Saleleng au di tano on Baen sangap di goarNa. 4. Manjaha Hata Ni Debata P: Tajaha ma Hata ni Debata di Partangianganta di tingki on, ima sian Psalmen 36: 6- 11, marsorinsorin hita manjaha ”Tolhas ro di langit do angka asi ni rohaM, ale Jahowa, tolhas ro di angka ombun do hasintonganMu”. R: Sobokhon angka dolok ni Debata do hatigoranMu, doshon angka aek na sumar do panguhumMu, diparmudu Ho do jolma dohot pinahan ale Tuhan. P: Tung na arga situtu do asi ni rohaM, ale Debata. Jadi marhaporusan di parlinggoman ni habongMu do angka anak ni jolma. R: dihamahaphon nasida do tabotabo ni bagasMu, jala dipainumhon Ho do tu nasida sian batang aek ni angka hahinsaonMi, EdenMi. P: Ai dilambungMi do mual hangoluan di bagasan hatiuronMi huida hami hatiuron. R: Sai panene ma asi ni roham tu angka na gtumanda Ho jala hatigoranMu tu angka na unjur marroha. P: Disi ma sahatna, Martua ma angka na tumangihon Hata ni Debata, jala na umpeopsa. Amen. 5. BE. NO. 569:1-2 O DEBATA TUNG LONGANG O Debata tung longang do rohangku Molo hubereng na tinompaMi Saluhut bintang, hilap dohot ronggur Manghatindanghon hasangaponMi. Marende au Tuhan mamuji Ho O Debata, sangap do Ho Marende au Tuhan mamuji Ho O Debata, sangap do Ho Di ladang di adaran dohot tombak Marende pidong tung mansai sonang Punsu ni dolok, sunge dohot rura Mamaritahon sangapMi Tuhan. Marende au Tuhan mamuji Ho O Debata, sangap do Ho Marende au Tuhan mamuji Ho O Debata, sangap do Ho. 6. Tangiang Pangondianon 7. BE. NO. 495: 1, 5 Maringan do di Surgo i BL. 36 Maringan do di surgo i, Amanta na sun gogo i, Sai dirana pisian i, sudena langka langkangki. Urupi au, o Tuhanki, marhaseangkon tingkingki, :,: Sai lam pita baen tondingki, songon surusuruanMi 8. RENUNGAN 9. BE. No. 373:1-3 MANGULA HITA JOLMA (Papungu Pelean) BL.219 Mangula hita jolma manabur boni i Alai anggo jadina di Debata do i Dilehon las ni ari nang nambur udan pe Tongtong di panumpakNa marguru sasude. Nasa uli basa ro sian Debata. I pe Ibana puji ma Huhut haposi da Sai sian Debatanta Do nasa na adong Nang rihit sangkamata Nang laut,nang tano on, Tinompa ni hataNa Do hau nang bulung i Nang nasa parbuena Nang bungabunga i. Nasa uli basa, Nasa uli basa… Ibana jumadihon panondang sasude; Ibana do manjouhon alogo ombun pe. Na tau palas rohanta. Hipas dagingta i, tongtong rade bohalta dibaen Tuhanta i. Nasa uli basa ro sian Debata. I pe Ibana puji ma Huhut haposi da
10. TANGIANG PANUTUP-PASUPASU
III. Hata Huhuasi
Angka na Mariluilu laho Manabur,
Marolopolop do sogot laho Manggotil (Psalmen 126: 5)