ACARA PARTANGIANGAN BONI

HKBP SILIMAPULUH RESSORT SARIBU JAWA

1. Pangaradeon
(Diboan ma boni na naeng sisaburhononhon tu jolo)

U : Huria na hinaholongan di bagasan Goar ni Tuhanta Jesus Kristus,

pungkaonta ma nuaeng partangiangan boni on, marhite na mandok mauliate tu
Debata, ala diloas dope hita marlas ni roha, boi hita mangolu, hipas mangula
angka ulaonta be, jala nuaeng di bagasan hahipason hita naeng manabur boni di
haumanta be. Antong tapahibul ma rohanta, asa di bagasan dame dohot las ni
roha hita martangiang dohot mamuji Goar ni Debatanta Pardenggan basa i,
Marende ma hita!

2. Marende BE. No. 575:1 “Puji ma Debata na songkal”

♫♪♫
Puji ma Debata na songkal, pasangap ma goarNa/puji ma angka rura
dohot lung/angka dolok na timbo, dohot hasak ni galumbang sude mamuji
Ho/Langit i na mansai hembang/bintang i na mansai torang/ombun i na
manasai saksak, pasangaphon Ho o Debata./Tung so olo tading au, laho
mamuji Ho Tuhan,/nasa gogo bahenonku, laho pasangaphon Ho./Ro di
ujung ni ngolungku, sai pujionku Ho.

3. Votum-Introitus-Tangiang

U : Marhitehite Goar ni Debata Ama, dohot Goar ni AnakNa Tuhan Jesus

Kristus, dohot Goar ni Tondi Parbadia, na tumompa langit dohot tano on.

H : Amen.

U : Sai ro di salelenglelengna ma hamuliaon ni Jahowa, marlas ni roha ma

Jahowa mida angka jadijadianNa.

H : Molo Ibana mamereng tano on, jadi humuntal ma, dijama angka dolok,
jadi martimus ma.
U : Endehononku ma Jahowa saleleng di ngolungku, umpalu parhinaloan ma
ahu umpuji Debatangku, saleleng adong dope ahu.

H : Sai dihalomohon rohana ma nian pingkiranku,

U : Ianggo ahu sai marlas ni roha do ahu mida Jahowa. Amen, Martangiang
ma hita: Ale Tuhan Debata, Amanami na di banua ginjang, sasada Ho do
Siparmahan na denggan roha. Na marpungu do nuaeng hami dison laho
pasahathon pangidoannami tu Ho. Huhaporseai hami do, Ho do Debata mula ni
nasa na adong, Sitompa nasa na adong jala na mambahen manjadi sude nasa na
niula. Nuaeng huboan hami ma boni on tu joloM, asa jumolo pasupasuonMu
andorang so husuan hami. Asi ma roham ale Debata, sai ramoti ma na huula
hami, asa dao sian angka bala, isara ni aek magodang, gulokgulok ni tano, alogo
manang ambolas, ro di manang aha pe tahe na tau manegai na huula hami. Sai
lehon ma udan dohot las ni ari di tingki halehetanna asa tung mansai denggan
tani hatubuan ni suansuanan na tau gabe hangoluannami. Sai paingot ma
rohanami, ia tung maruli pasupasu na sian Ho, asa hupatupa hami ma i tu na
marguna di hami jala tau sangap di GoarMu. Sai tangihon jala oloi ma
pangidoannami on, marhitehite Tuhan Jesus Kristus, Tuhannami, Amen.

4. Marende BE. No. 192 : 2-3 “O Tuhan Jesus, Raja”

♫♪♫
Tombak denggan do, hauma pe denggan do, na rumatarata i./Jesus
dumenggan, Jesus gumodang, Sibaen las ni rohanta i
♫♪♫
Bulan tiur do, bintang pe torang do, nang mataniari pe./
Jesus tumiur, Jesus tumorang, sumurung sian i sude.
5. Epistel: 5 Musa 11:13-17

U : Molo tung tinggil rohamuna manangihon tonangku, angka na hutonahon i

tu hamu sadari on, manghaholongi Jahowa, Debatamuna i, dohot mangoloi
Ibana sian nasa rohamuna dohot sian nasa ateatemuna.

H : Ahu mangalehon udan tu tanomuna di tingki halehetanna, udan di

bulan sipaha pitu dohot udan di bulan sipaha sada, asa tarpapungu ho emem
dohot anggurmu dohot miakmu

U : Ahu huhut patubuhon duhutduhut di ladangmu, hangoluan ni pinahanmum

asa mangan ho jala bosuran.
H : Dibahen i , ramoti hamu ma dirimuna, asa unang tarela rohamuna laos
marbalik hamu, jal adioloi hamu angka Deabata sileban, huhut marsomba
tusi.

U : Ido sahatna. Martua ma na tumangihon hata ni Deabata jala na umpeopsa.

6. Marende BE. No. 470:1-2 “Jesus, Ho nampuna au”

♫♪♫
Jesus Ho, nampuna au, sohot na adong di au./ gogo dohot hosangki, sahat
ma tu tanganMi.
♫♪♫
Sai rajai ma matangki, manangkasi dalanMi./ Sai patinggil pinggolhi,
tumangihon hataMi.

7. Jamita

8. TANGIANG : Parhalado (Ditangianghon parhalado ma boni na

binoan ni ruas huria.)
9. Marende BE No. 373 :1— ( P,Pelean )

♪ Mangula hita jolma Manabur boni i Alai anggo jadina Di Debata do i

Dilehon las ni ari Nang nambur udan pe Tongtong di panumpakNa
Marguru sasude Nasa ulibasa ro sian Debata
I pe Ibana puji ma Huhut haposi da.
♪ Sai sian Debatanta Do nasa na adong Nang rihit sangkamata
Nang laut,nang tano on Tinompa ni hataNa Do hau nang bulung i
Nang nasa parbuena Nang bungabunga i Nasa uli basa, d.u….
…………………………………….…..MUSIK..................................................
♪ Ibana jumadihon Panondang sasude Ibana do manjouhon
Alogo, ombun pe Na tau palas rohanta Hipas dagingta i
Tongtong rade bohalta Dibaen Tuhanta i Nasa ulibasa, d.u…

12. Responsoria
U : ( Tu sanggar ma amporik, tu lubang ma satua. Sinur ma na pinahan gabe na
niula, horas hita jolma ) Debata Jahowa parasiroha jala pardengganbasa
naung mangalehon hahipason tu hami gabe tarbahen hami mangula di ngolu
on. hataM do na mandok “Ndang tarula hamu agia aha, anggo so
 mardonganhon Ahu” I do na huingothami jala huhaporseaihami. Antong
tapangasahon ma Jahowa laho mandongani hita laho mangulahon ulaonta

H : Ale Tuhan, sai pangolu ma hataM dibagasan rohanami asa marurat jala tubu
I dirohanami na gabe paringgashon hami mangula angka ulaon di ngoluon.

U : Togu ma haporseaomu, ingot ma hata ni Debata na mandok “Na so ra

mangula unang ma ibana mangan” ima tiop, paringgas ma roham
mangula ulaonmu

H : Ale Tuhan, sai pangolu ma hataM dibagasan rohanami asa marurat jala tubu
I dirohanami na gabe paringgashon hami mangula angka ulaon di ngoluon.

U : Unang pangasahon gogo dohot pingkiranmu laho mangula siulanmuna, alai

pangasahon ma Debata na jumadihon saluhut na i. Martangiang ma hita.

U + H : Ale Amanami na di banua ginjang……………

U : Pasupasu

U + H : (Mangendehon) Amen… Amen…. Amen…