LITURGI NATAL AMA, INA HKBP

LITURGI I : Ama, Ina Weyk I (Keluarga: Suami, Istri)

Prolog: Debata sitompa saluhut dohot na marsuru AnakNa na sasada i.
1. Amang...............................
Manatap ma hita tu ginjang tu sangkap hatuaon ni Debata sitolusada i. Ianggo di mula ni panompaon i, mansai solhot do ompunta si Adam dohot si Hawa tu Debata
sitompa nasida, songon jonok ni sada ianakkon tahe tu amana dohot tu inana.

2. Inang....................................
Manghatai do Debata tu nasida songon i nang nasida tu Debata dibagasan parsaoran na rosu situtu, jala ndada i tahe, tung singkop do dilehon Debata nasa natau
hangoluan nasida di tonga ni porlak eden i.

3. Amang.......................................
Alai dung madabu nasida tu dosa, gabe martabuni ma nasida alani biarna mida Debata, jala ndang be marhaposan tu Debata nasida. lam tamba ma dosa ni jolma i,
jadi lam holang ma hita jolma sian Debata sahat ro di na sirang situtu.

4. Inang.............................................
Tarboan-boan rohana ma jolma i mangulahon lomolomona sandiri, so mardonganhon Debata, tutu adong dope pamotoan di nasida na adong Debata, alai ndang
ditanda nasida be Debata. Gabe biar dohot tahutan ni roha nama manggohi roha nasida.

5. Amang..................................................
Alai asi do roha ni Debata manatap angka bangso na lilu jala na tangkang i, ai na tinompana jala angka anakonna do nasida. jadi ditahi ma dalan laho manogu jolma
na madabu tu godung dosa hamagoan i asa mardomu muse jolma i tu Debata.

6. Inang.........................
Ala holong ni roha ni Debat tu portibi on, gabe dilehon do AnakNa na sasada i manaon haleaon dohot hamatean asa malua jala mangolu jolma natinompaNa i.
Didok Ama i ma tu Anak i, “Ale Anaha, nunga jumpang tingki parasirohaon dibahen i asa gabe martua nasida marhite sian Ho”.
7. Amang.....................................
Alus ni Jesus: “Na olo Ahu ale amang, sian sandok rohangku, pasauthon lomo ni rohaM, rohaM sambing ma guru. Na gabe pangoloi do Ibana paima mate, pola
tung mate tarsilang Ibana laho humongkop jolma pardosa i.
8. Inang..............................................
Alai asa boi saor Ibana tu jolma pardosa i, jala asa unang mate jolma i dibahen hasongkalanNa i, dirumari ma diriNa jala disolukkon ma rupa ni jolma. Gabe patar
ma Debata na so dung ni ida ni mata marthite haroro ni Jesus ni na mardaging jolma.
 9. Amang.............................................
Martanda do na uli jala marpanghorhon do na denggan. Di na tubu Tuhan Jesus di sude horong do adong pangkorhonna. Barita halalas ni roha doi mambahen nasida
barani laho marnida dohot mandapothon Tuhan i songon na binahen ni angka parmahan i. Nda songon i ma patut di angka halak na porsea?

10. Inang...............................................
Tanda ni na uli dohot pangkorhon ni na denggan i, ndang holan barani marnida dohot manjumpangi, alai dohot do haradeon marsomba dohot mamaritahon, ndag
holan manonton na masa i, alai margogo do nasida mamuji Debata. Nda songon i ma patut di hita uaeng?

LITURGI II : Ama, Ina Weyk 2 (Keluarga: Suami, Istri)

Prolog : Anak ni Debata ro tu portibion paluahon manisia sian dosa.

1. Amang ............
Alai songon nambur i ditorusi sondang ni mata ni ari, songon i do Jesus, nang pe lea idaon alai ditorusi haDebataon sandok diriNa. Dibahen i, Ibana do Tuhan jala
Ibana do rajanta, Ibana do Raja Sipardame, Ibana do Raja ni sandok portibi on.

2. Inang ..................
Na ro ma Rajam tumopot Ho, na lambok do rohaNa. Marhite hata i do dipaboa taringot tu hita ruhut ni harajaonNa. Ai songon on do pandokna: dirajai sigomgomi
bangso do anak somangna jala na uli basa do digoar angka na sangap nasida.
3. Amang ........................
Alai unang ma songoni ianggo di hamu, na sumangap di hamu, i ma gabe naposo ni donganna, jala na manguluhon manang angka pangarajai, suman ma tu
pangoloi.

4. Inang..............................
Tarida do lambok ni rohaNai, di nabinurina i pat ni angka siseanNa, jadi alani ido dipatimbo Ibana tu langit ni langitan, jala dibasabasahon tu Ibana goar na
sumurung asa nasa goar. Ingko songon i ma parrohaon na jumpang di angka na ginomgomanNa.
5. Amang.............................
Laos songoni do nang angka na benget manaon insak-insak ala goar ni Tuhan i, i ma dalan tu hasangapon situtu. Dibahen i, unang ma targasip hita mida haleaon ni
Jesus i, alai rade ma rohanta manjangkon Ibana.

6. Inang............................
Aha domambahen targasip halak mida Jesus? hametmetonNa i do na songon batu partuktuhan di torop halak na mangdok: Margoar do Ibana Anak ni Debata, hape
na tubu sian boruboru do Ibana, Raja Ibana didok, hape gari halanguluna soada dibahen pogosna.
 7. Amang...........................
Margoar do Ibana mual hangoluan, hape mate di hau pinarsilang do Ibana songon sada halak parjahat. Tutu ma na nidok ni Apostel Paulus: Pargasipan do Jesus na
tarsilang i di halak Jahudi jala haotoon di halak Gorik. Tupa do torop nang sian hita na hea targasip mida Jesus i.

8. Inang.................................
Ia nuaeng ndang be patar haroro ni Tuhan i songon na masa uju i, ndang tarida Ibana masuk tu bagasan roha. Alai ndada ulosta parduru on tanggalanta songon na
binahen ni halak uju i, alai ulosta parbagasan i do, i ma dosa na mangholipi hita maradophon Debata.

9. Amang...................................
Molo dung tatallihi angka pangalaho na roa i jala tatanggali ulos dosa i, jauhononta ma: Hosianna di Anak ni Raja Daud. Hosianna mandok: Urupi ma ahu ale
Tuhan, ai na gale do ahu, ndang tarpalua ahu diringku. Jala adong do Hosianna na paduahon di liturgi on, i ma Hosianna ma di ginjang. Ianggo pandohan on i ma
joujou ni angka surusuruan na sian banua ginjang na mangido pangurupion tu Tuhan i di hita.

10. Inang...................................
Mangihut tu Hosianna i do sude ende: pinasupasu ma na ro marhite goar ni Tuhan i. Holan halak na olo mangido pangurupion do na sintong mamestahon haroro ni
Tuhan i, jala holan i do na tangkas boi mangendehon pujipujian di Tuhan i. Antong taendehon ma mardongan las ni roha: “Pinasupasu ma na ro marhitehite goar ni
Tuhan i.

Liturgi III : Ama, Ina (Keluarga: Suami, Istri)

Prolog: Huaso Panompaon ni Debata godang do na manghatindanghon di ngoluna.

1. Amang......................................
Martanda do di huta Betlehem huta na metmet i, alai beha do Jerusalem huta na ribur i? Martanda jala marpangkorhon do nian, alai holan na longang do. Boasa
longang sambing nasida?

2. Inang..............................................
Tagamon ndang siat tu roha dohot pingkiran nasid, alai gabe ndang boi dihaporseai na uli i. Molo holan longang sambing do nda na somal doi? Alai ianggo na
manghaporseai, di ise ma i jumpang?

3. Amang.......................................
Martanda do na uli jala marpangkorhon do na denggan di halak na pistar na so sian Purba. Di na binereng nasida bintang na asing si parlangitan, pintor humalaput
jala puas pais do nasida manulingkiti aha na pinaboa ni bintang i. Laos disi do ro debata papatarhon na niluluan jala na jinalahan nasida.

4. Inang.............................................
Martanda do na uli jala marpangkorhon do tutu na denggan i di roha ni halak na mangantusi. Ndang holan hatana manolophon, manang holan langkana
mandapothon, alai tung dohot do sibahenonna.

5. Amang.............................................
Disomba angka parhapistaran ido Raja na imbaru tubu i, huhut dirungkari aangka na binoan nasida laho palehononna tu Jesus na tubu i. Ndada holan na naeng
mamboto dohot marnida na masa sambing nasida alai dohot fo mamelehon peleanna. Di hita na pungu on, aha ma sirungkaranta nuaeng laho pelehononta tu Jesus i?

6. Inang......................................
Rohangku, rohanta be ma tarungkari di adopan ni Jesus na tubu i. Ai ondo di dok endenta i: “Antong rohanami ma pelean nami dohot ngolunami mamuji Ho Tuhan
Sipalua i”.

7. Amang...........................................
Ngolu na manghirim do hita jala ngolu na mardalan di tano on. Dipangido Tuhanta do sian hita asa mangolu hita dibagasan haunduhon hohot pangoloion, ai
pangaloon dompak Debata i do dosa. Didok do: Antong oloi hamu ma Debata jala alo hamu ma sibolis i dungi maporus ma ibana sian hamu.

8. Inang..........................................
Hamu angka dongan tasulingkit ma rohanta nuaeng, nungan songon dia pangoloionta tu Tuhan i, alana didok do muse: Antong, sadarion di nabinegemuna hataNa,
unang ma papir hamu rohamuna songon nasida na tangkang i di ari pangunjunan di halongonan i, ai holan uhum do i.

9. Amang.............................................
Ngolu na manghirim i ma ngolu na dibagasan hasintongan dohot habadiaon. On do didok hata ni Debata: Harorangon i naeng ma pasidingonmuna. Alai pasomal-
somal ma dirim mangulahon hadaulaton. Hata on dipagomos ma muse di na nidok na: Ganup na manghirim di Ibana, diparbadiai ma dirina songon Ibana na badia i.
10. Inang........................................
Ia ngolu na manghirim, i ma ngolu na marungkil do na nidok na disi, ndang tarbahen so aeonta haporsuhon dohot angka ragam ni angka na maol saleleng di
portibion hita. Alai pos ma rohanta nunga dihamonangkon Jesus hita sahat tu sihirimon i. Ido umbahen disosohon Tuhanta marhite hataNa: “ Marlas ni roha ma
hamu manghirim, marbenget ni roha ma di haporsuhon, jugulhon hamu ma tangiang”.
LITURGI IV : Ama, Ina Weyk IV (Keluarga: Suami, Istri)
Prolog : Pangantusion taringot hatutubu ni Tuhanta siboan haholongon.
1. Amang................................................
Adong do na manghasiholi gabagaba, hariburon, maremare, ende ni angka parende, parabiton na imbaru, sipanganon na tabo. Nunga lam matoras Hurianta, patut
ma lam tang hita, naeng ma lam umbagas pangantusionta di lapatan ni Natal i.

2. Inang...................................................
Jadi ianggo apala na sumurung na binoan ni Pesta Natal i di hita, on do: ida ma na ro do rajam tumopot ho, na lambok do rohaNa jala na serep marroha. Ro Debata
dibagasan Jesus Kristus songon raja laho tumopot hita jolma na lea on.

3. Amang.....................................................
Ida ma, ninna laho manosoi hita, asa tung tapatonggor mata ni rohanta laho mamereng. Aha do siidaonta? Adong dua dipaboa di liturgi on.
1. Na ro do rajam tu portibion dibagasan halambohon, haserepon, hapogoson dohot haleaon.
2. Unang ma targasip hita mida haleaon ni Jesus i, alai rade ma rohanta manjangkon Ibana.

4. Inang........................................................
Songon Raja manang parhuaso ro mangebati rakyatna, songon i do habobongot ni Tuhan Jesus tu huta Jerusalem, ai Ibana do Raja ni bangso Israel dohot Raja ni
sandok portibi on.

5. Amang.............................................................
Songon i do Jesus ro do Ibana songon sada raja manopot parripe laho patulushon na sinurirangkon ni panurirang Zakarias dohot Maleaki. Di na nidokna: Ida ma na
ro do RajaM tumopot ho.

6. Inang...................................
Ndang songon raja ni portibion Jesus ro dibagasan huaso dohot harajaonna, alai rade do Ibana manadingkon sude hasangapon dohot hamoraonNa asa rap Ibana
dohot jolma na dipardangolan i laho paluahonsa.

7. Amang.......................................
Ianggo halak parroha portibion, ndang tagamon so parengkelanna haroro ni Jesus songon sada raja tu portibion jala dohononna: O ale Raja napogos, tung lea ma
haroroMi, ai tubu di bara ni pinahan do Ibana jala angka parmahan do paboahon hatutubuNa.

8. Inang.........................................
Alai ianggo angka parroha na tiur mamereng na masa i, dohononna do: ah, ...tahe tung na marmulia do habobongot ni Tuhan i. Ai adong do di Ibana hagogoon,
huaso dohot haDebata on na buni.

9. Amang.........................................
Suman tu bosi barani do haroro ni Jesus i, ai ndang adong hinauli ni rupana, manang hamuliaon na dapot idaon sian duru asa gabe sihalomohononton Ibana. I ma
angka na ro sian portibion. Na so manghaporseai Tuhan tai.

10. Inang.............................................
Hape ida ma disi sahat tona ni Jesus tu nampuna halode i, pintor dilehon do, so pola adong sungkun-sungkun dohot panjuaon, ala Jesus na martona i, i ma Raja
dohot Tuhan na manggomgomi sude portibi on nang pangisina pe.

Liturgi V : Ama, Ina Weyk V(Keluarga: Suami, Istri)

Prolog: Dibagabaga ni haroro ni Sipalua i patar tu portibi on.
1. Amang..........................................
Boto ma ale dongan, ia Jesus na ro tu portibi on, i do Raja na so marhabangsa, na so martumpal harajaon, na so marpahean tanda hasangapon, alai Raja ni saluhut
Raja do Ibana jala Tuhan ni nasa tuan. Ra dohononta do, boasa dibagasan haleaon Ibana ro? Biasa ditinggalhon hamuliaonNa? Alusna: Tung alani dosanta do.
2. Inang.................................................
Ai molo mamorsan dosa Jesus, ndang boi dibagasan hasangapon Ibana. Ndang boi rap manjungjung tumpal hasangapon dohot tumpal sungsang duri. Asa tung alani
haluaonta do umbahen na marhaleaon Ibana.
3. Amang.................................................
Sada muse aut sura ro Ibana dibagasan hasangaponNa magargar do tano on songon hau na buruk sinoro ni porhas, jadi songon dia ma bahenon ni jolma porsea di
tingki sisongon i? Ai tung na songkal jala marmulia do Ibana.
4. Inang.....................................................
Alai tarpatudos do haroro ni Jesus i tu nambur manogot ngerger do i jala lambok songgop tu suan-suanan na naeng, malos laho pangoluhonsa muse. Ai dihaholongi
jala dihongkop Debata do hita uju pardosa dope hita.

5. Amang.....................................................
Alani ganup jolma puji hamu ma Tuhan i. Unang lalap di haportibion. Ai Ibana do siboan haluaon tu ganup na mangihuthon Ibana di bagasan haporseaon dohot
hatigoran na paradehon na ringkot di hita.

6. Inang..................................
Mandok mauliate do ahu tu Debata ala dengan saluhut di palumehon Debata tu ahu, jala ndang hurangan. Di apuli do ahu di tingki marsak, dipaingot do ahu di
tingki marlas ni roha. Asa tontong mian di bagasan Ibana.

7. Amang........................
Holan si ingotongku, tontong di ngolungku hataNa na mandok: Sai marhaposan tu Jahowa ma ho sian nasa roham, jala ulahon na denggan, jala mangaradoti na
nidokNa.
 8. Inang............................
Hehe ma ho! Marsinondang ma ho! Ai na ro ma panondang mu, jala hamuliaon ni Jahowa binsar di atasmu. Binsar panondang na i ma marhamuliaon. Sahat nang tu
ganu na porsea i di Ibana.

9. Amang.................................
Mariaria situtu ma ho ale boru Sion, marolopolop ma ho ale boru Jerusalem. Ida ma na ro ma rajam tumopot ho, partigor ibana jala siparmonang; na serep do rohana
jala marsihunduldi halode dohot di anak ni halide inaina. I do na patar di hroro ni si Paluai tu portibion.

10. Inang.....................................
Tapuji ma na paluahon hita naung tubu, jala di tobus hita sian lusob ni hadosaon dohot hamatean. Dipasonang hita tu hangoluan na saleleng nileleng na ala hinorhon
ni holongNa i tu angka na porsea i.

LITURGI VI : Ama, Ina Weyk VI (Keluarga: Suami, Istri)

Prolog: Panondang hatiuron siboan lasniroha dohot haporseaon tu ngolunta di hatutubu ni Tuhanta.

1. Amang........................................
Didok Tuhan Jesus, hamu do panondang ni portibion, ndang so patar huta di atas dolok. Naeng ma songon i marsinondang palitomuna di jolo ni halak saluhutna asa
tung diida nasida pambahenan ni Amamuna na dibanua ginjang i.

2. Inang......................................
Ndang adong na mambahen palito na pinasang na i tu inganan na buni, manang tu toru ni ampang; tu parpalitoan i do dibahen, asa di ida na ro i sondangna i.

3. Amang............................................
Antong ingot ma songon dia na jinalom dohot na binegem; i ma radoti jala pauba roham. Dibahen i molo so tarsunggul ho, ro ma Ahu songon panangko; na so jadi
botoonmu sadiharina ahu ro manopot ho.

4. Inang.............................................
Lilin na marsinondang on do paingothon hita tu Anak ni jolma i, naung ro tu portibion laho paluahon hita. Alani sai marsinondang ma Ho ale jesus manggalahi roha
dohot pingkirannami laho marhobas di adopanMi.
 5. Amang..............................................
Sai tongtong do radotangku patikMi ro di salelengnilelengna sai mardalani ma au di halambason, ai huharingkoti do angka parentaM. Ai hurajumi angka sitaonon di
hasiangan on, hira soada do martimbangkon hasangapon sipapataron tu hita sogot. Ai malungun do nasa na tinompa i paimahon tingkina, asa dipapatar angka anak
ni Debata.

6. Inang..........................................
Sai hatahonongku do angka panindangionMu di jolo ni angka raja ndang hailahononku. Jala sai hupataretare do tangangku tu tonaMi, angka na huhaholongi, jala sai
pingkirpingkirangku do angka aturanMi.

7. Amang............................................
Ai dipapatar do disi hatigoran ni Debata, na sian haporseaon tu haporseaon, hombar na tarsurat hian: “Na mangolu do partigor i hinorhon ni haporseaonna.

8. Inang.................................................
Jadi lam hot ma, antong ghata panurirangon i di hami; jala tama marsitiopan tusi hamu, songon na tu palito na marsinondang di inganan na holom paima tarida
siulubalang ari i, jala binsar siboan hatiuron di bagas rohamuna.

9. Amang..........................................
Ndada ahu be na mangolu i nuaeng; Kristus do namangolu di bagasan ahu. Ia mangolu pe ahu nuaeng di bagasan daging mangolu marhitehite haporseaon ni Anak
ni Debata, na mangkaholongi ahu jala na mangalehon diriNa humokop ahu.

10. Inang..........................................
Torus do tarbege joujou ni Debata sahat tingkinta on, ai dipangido rohana do nuaeng saluhut jolma malua jala sahat mananda hasintongan i. Hagogok ni joujouNa
do hinarohon ni Tuhanta tubu tu portibion mardagingkon jolma. Antong ise be sian hita on na so marlas ni roha disi?

Liturgi VII : Ama, Ina Weyk VII (Keluarga: Suami, Istri)

Prolog: Holong ni roha na patar tu angka na porsea di adopan ni Debata
1. Amang................................................
Ai holong ni roha ni Debata tu AnakNa na sasadai, paluahon jolma pardosa sian haholomon tu hatiuron, paluahon angka na porsea. Gabe panondang hatiuron siboan
las ni roha dohot haholongon tu ganup manisia.
2. Inang..............................................
Asa ndang adong haluaon dibagasan manang ise na asing; ai ndang adong goar na asing di toru ni langit di lehon tu jolma, parhiteanta tu haluaon i. On pe haporseai
ma Tuhan Jesus, asa malua ho dohot isis ni bagasmi.
 3. Amang................................................
Oloi ma Tuhan i, ai mamboan haluaon do Ibana tu sude na manghaporsea Ibana. Jala tutu ma Jesus i mamelehon diriNa humongkop jolma pardosa asa malua
dibagasan na mangihuthon Tuhanta Sipalua i.
4. Inang,...............................................
Tutu ma i, gabe pangoloi ma hita dibagasan unduk dohot serep ni roha tu adopan ni Tuhan Sipalua i. Na mamboan hita tu hamonangan humongkop hita pardosa
on. Asa dapotan hangoluan na saleleng ni lelengna hitemarhite AnanakNa Tuhanta Jesus Kristus.

5. Amang...............................................
Ai songon on do holong di roha ni Debata di portibion, pola do anakNa sasada i di lehon, asa unang mago ganup na porsea di Ibana, asa hangoluan na
salelengnilelengna di Ibana. Ai ndang na disuru Debata Anakna i tu portibionn, asa uhumonna; naeng paluaonna portibion tahe umbahen na disuru.

6. Inang...........................................
Jala laos di dok do angka parbue ni Tondi i ma: Holong dohot las ni roha, dame dohot lambas ni roha, habasaron, habasaon, habasaon, haporseaon, halambohon
dohot hatomanon.

7. Amang......................................
Pinuji ma Debata, Ama ni Tuhanta Jesus Kristus, naung umpasupasuhon tu hita ragam ni pasupasu partondion sian banua ginjang, dibagasan Kristus.

8. Inang...................................
Ai sian asi ni roha do umbahen malua hamu, dalan haporseaon; jala ndanda binahenmuna, silehonlehon ni Debata do.

9. Amang....................................
Ai dilehon do tu hita tondi hagogoon, tondi haholongon, tondi pangarajaion diri, ndada tondi hatahuton. I ma barita Nauli na marhagogoon di angka na
manghangoluhon.

10. Inang...............................
Dibahen i tadapothon ma marroha na sintong, dibagasan hagogok ni haporseaon, dung diurasi rohanta, unang be disolsoli panggora ni roha i hita, jala dung diburi
dagingta dohot aek na ias i ma marhite panghophoponNa di hita marhite mudarNa na dusrus mamuri hita jolma.

Liturgi VIII : Ama, Ina Weyk VIII (Keluarga: Suami, Istri)

Prolog : Hatutubu ni Jesus Sipalua i. Na paluahon hita.

1. Amang....................................
Di na sadari tubu do pingkiran ni Kesar Agustus laho mamilangi torop ni na ginomgomanna laho pamasahon pajak manang balasting. Jadi dalan pasauthon
sangkapna i, ingkon sude do halak na masuk tu wilayah harajaonna laho masitopot bona pasogit manang huta ni ompuna be, asa disi disurathon bilanganna.

2. Inang.........................................
Nang si Josep dohot Si maria borhat do sian Nazaret na di luat Galilea laho nangkok tu Betlehem na di luat Judea, i ma huta ni ompunasida ala sian pomparan jala
marga ni si Daud do nasida.

3. Amang.......................................
Asa jumpang songon na sinurirangkon ni panurirang Mika na mandok: Alai ianggo ho Betlehem Efrata, mametmethu do ho nian ianggo tung pola jujuron tu angka
huta na marriburibu di Juda, hape sian ho do na gabe panggomgomi di Israel, jala angka haroronna sian na hinan sian angka na robi salelenglelengna.

4. Inang.......................................
Ia Betlehem huta ni Raja do i na jolo, jala na tarbarita situtu harajaonna, i ma: Raja Daud dohot Raja Salomo. Alai dilaonlaon ni ari, gabe huta na metmet do huta i
jala na lea. Dung mareak botari ro ma si Josep dohot si Maria, nunga mansai loja nasida, aneng mangulon ma nian.

5. Amang......................................
Hape sai dilului nasida do inganan oparbornginan, ndang adong. On do alus nampuna bagas i: ndang siat be di son, ndang adong inganan di hamu. Antong beha
nama? Gabe laho ma nasida tu bara ni pinahan. Oo... Betlehem, so diboto ho tamue na ro tu ho, i ma si Maria na gabegabean sian Tondi Porbadia, so diboto ho
Anak ni Debata na manggomgomi langit dohot tano on do na tinubuhononna i.

6. Inang................................
Sonang modom ma ho Betlehem, modom do Jerusalem, modom nang liat portibion, sonang modom do halak sude, holan dua na dungo dope. di tingki i gok ari
hangoluan ni si Maria, ditubuhon ma anak buhabajuna, dungi diborhos ma dipeakhon ma tu bagasan panggagatan i.

7. Amang...............................
Beha ma ulaning panghilalaan ni si Maria di tingki i? dao ibana sian huta na, holang sian angka sisolhotna, na patut hian nian adong disi laho paturehon ibana dohot
posoposos na tinubuhonna i. Tagamon lungun do ulaning rohana jala mandele? Alusna Ndang! Ai nunga diboto ibana hian, ia posoposo na tinubuhonna i, i ma
Tuhan pargogo na so hatudosan.

8. Inang.....................
Hita pe hamu angka dongan tama do laho rohanta tu panggagatan i, huhut mandok tu posoposo i: Tuhangku jala Debatangku! O... bagas na i angtong hamoraon
dohot hapistaran ni Debata, tung so hadododan jala hasigatan do angka sangkapNa, tung di bara ni pinahan ma Ho tubu asa tung dohot hami na lea on taruli di
hatutubuMi.

9. Amang.................................
Asa dung tubu jesus, masa ma olopolop di banua ginjang. Marlas ni roha jala marende do nang angka surusuruan ala olo Debata gabe jolma laho padomuhon jolma i
tu Debata. Naung sirang hian do hita pola marribu taon lelengna i ma sian dung madabu ompunta si Adam tu dosa i. On do soara ni ende ni Suruan i: “
Hasanganpon ma di Debata na di ginjang, dame ma di tano on, di angka jolma halomoan . nunga dipadame Jesus hita tu Debata jala gabe halomoanNa hita.

10. Inang......................................
Oo, ... balga ni halalas ni roha i, na so hatudosan jala na so hadodoan i. ai marlas ni roha do angka surusuruan i ala naung mardomu jolma dohot Debata parasi roha
i. beha ale angka dongan, nunga masa pesta las ni roha di banua ginjang ala naung ro Jesus tu portibion. antong tama do nang hita pe marlas ni roha laho
manjangkon Jesus Sipalua di bongot ni rohanta.

Liturgi IX : Ama, Ina Weyk IX (Keluarga: Suami, Istri)

Prolog : Ragam pargoluan na niadopan ni hita HKBP laho mangulahon HataNa i.
1. Amang...................
Sapala mardalani, unang olat ni sigalangan. Sapala naung ditobus Debata, ba unang ma diparlangalangan. Alai gabe siulahon hata i ma hamu unang
pananginangi asa tutu hamu siihuthon Kristus.

2. Inang..........................
Tubu simarnalasuna, di dolok ni sibuluon. Sude antong na ni ulamuan tung dipasupasu Tuhan. Unang ma mabiar hamu molo tapangido manang aha marguru tu
lomo ni rohana tangihononna do hita jala dilehon tu hita angka na tapangido i saluhutna jala tongtong do hita dipasupasu Tuhan.

3. Amang.............................
Lubuk ni lobutua, di bahen halak panjalaan. Sahat ma hita saurmatua ai nungga malua hita sian angka parmaraan. Ai nunga holom hian hita alai tiru do anggo
nuaeng dibagasan Tuhan i, marparange ma hita songon anak hatiuron.

4. Inang................................
Bagot na madungdung ma tu pilopilo na marajar, sai salpu ma angka na lungun, sai ro ma angka najagar. Alai lumobi sian i dope, ai itahalashon do nang angka
haporsuhon, ala taboto dihorhon haporsuhon i do habengeton ni roha, jala dihorhon habengeton ni roha i do hatauon, jala hatauon i do manghorhon panghirimon.
 5. Amang...................................
Balintang ma pagabe, tumundalhon si tadoan. Arinta ma gabe, molo masipaolooloan. Mangasahon goar ni Tuhanta jesus, asa sahata hamu saluhutna, unang ma
adong parbolatan di hamu. Hot ma hamu binahen ni sada ni roha dohot sada pingkiran.
6. Inang.....................................
Ampapaga dolok, tu ampapaga ni Humbang. Ba hita do marsogot, laos hita do nang haduan. Alai patut do hita na margogo i manganju hagaleon ni angka na
hurang gogo, jala unang ma tahasiani disrinta. Ganup ma hita mambahen halomoan ni dongan, laho padenggahon jala pauliulihon.
7. Amang..........................
Sambil na tartondong, dapotsa papaluan. Asa denggan mardongan, unang masipamaluan. Ale angka dongan, molo tung tarsomong jolma mardosa, hamu angka
naung taruli di tondi ma patureturehon ibana marhitehite tondi na lambok; alai matahon dirim, sotung dohot tarunjun.

8. Inang............................
Tombak sulusulu parasaran ni haluang, jolma naporsea do hita so mohop mida uang. Ai tarsurat so: ai urat ni nasa hajahaton do roha na holongan di hepeng, i do
disangkapi na deba umbahen na lilu sian haporseaon i, gabe di aithon do godang na bernit tu dirina.

9. Amang......................................
Sibigo ambaroba rara hulinghulingna, agbe uli do parrupa na roa, asal ma sai lambok pangkulingna. Angkup ni i, ale angka dongan, pingkiri hamu ma nasa
parange na sintong, na daulat, na tigor, na bontor, na uli, na denggan begeon ro di sude na targoar haburjuon na tau pujipujian.

10. Inang.........................................
Bona ni aek uli di dolok ni sitopongan, sai tubu ma di hita angka na uli, lam martamba nang sinadongan. On do dipangido Debata, naeng ma lam sumurung holong
ni rohamuna, marurat di parbinotoan dohot di nasa panimbangon partondion, laho manangkasi na rumingkot i, asa polin hamu, so partuktuhan, sahat ro di ari ni
Kristus. Amen.

Liturgi X : Ama, Ina Weyk X (Keluarga: Suami, Istri)

Prolog : Las ni roha Mamestahon Hatutubu ni Jesus Kristus.

1. Amang.......................................
Halonganga bolon do barita hatutubuNa i, ai gabe patar Debata dibagasan daging marhite Jesus kristus. Gabe daging ma hata i, jala maringan di tongatonga ni hita
on. Gabe posoposo Anak ni Debata, peak di panggatan, dos songon jolma hian.

2. Inang..........................................
Ganup taon do ari hatutubu ni Tuhan ta i dipestahon saluhut halak Kristen di sandok portibion, ianggo ari hatutubu ni hita jolma manang beha pe sangapna, morana,
dohot timbul ni baritana, holan di ngoluna do i dipestahon.

3. Amang.....................................
I do tutu molo di hita jolma, alai ianggo ari hatutubu ni Jesus, saleleng ni lelengna do i dipestahon jala dihalashon angka na porsea i, jala ndada holan di tano on, alai
dohot do di banua ginjang.
4. Inang...........................................
asa dung tubu Jesus, masa ma olopolop di banua ginjang. Marlas ni roha do angka surusuruan ala olo Tuhan nasida gabe jolma, mardaging jala marmudar songon
jolma laho padomuhon jolma i tu Debata gabe sangap di goar ni Jahowa.

5. Amang.................................
Nunga sirang hian do hita sian Debata pola marribu taon lelenga, i ma sian dung madabu Jolma na parjolo i ai Adam dohot si Hawa tu dosa. Disok nasida do hata ni
eddenta: “hasangapon ma diginjang, dame ma di tano on, di angka jolma halomoan i”. patar ni holong na itu hita on na porsea.
6. Inang..................................
Nunga gabe halomoan ni Debata hajolmaon, nunga mardame jolma tu Debata. Asa masa ma nuaeng pangalaho na umbalga sian nasa na masa, i ma dipadao Debata
hita sian hamatean laho pabadiahon dohot pangoluhon jolma na mardosa i.

7. Amang.......................................
Mangulahi ma nuaeng marsangap Debata di tano on, ai tarbege ma angka ende ni surusuruan parangan Parbanua Ginjang i pasangaphon Debata man dok:
“Gasangapon ma di Debata na di ginjang” O... balga ni halalas ni roha i, na so hatudosan jala na so hadodoan i.

8. Inang..........................................................
Ai marlas ni roha do angka surusuruan i, ala naung mardomu jolm adohot Debata parasiroha i. beha ale angka dongan nunga masa pesta las ni roha di banua
bingjang ala naung ro Debata tu portibion, alani tama do nang hita pe marlas ni roha manjangkon Jesus Sipalua i. Nunga tubu Jesus i di hita ganup?

9. Amang....................................
Nunga tubu be Jesus i di ngolungku nang di ngolunta ganup na manghaporseai Ibana naung tubu i tu portibion mamboan haluaon. Gabe marlas ni roha, marolopolop
dohot mariaria mamuji Tuhanta siboan hadameon.
 10. Inang.........................................
Hot jala togu ma maringanan di hita naung sahat be tu hita haluaon i, gabe manghorhon pasupasu di hita saluhutna. Gabe hasangapon di Debata Ama, AnakNa Jesus
Kristus dohot di Tondi Parbadia na pasingkhophon saluhutna.

Liturgi XI Punguan Ina Kamis 5 Halak dan Punguan Ina Hanna 5 Halak
Liturgi Situasional: Panondang hatiuron i ma Jesus Kristus Tuhanta i, na mamanondangi hita saluhutna sada pujipujian tapasahat tu Tuhan i.
1. Ina Kamis: Inang..................................
Hamu angka amang, inang, nang di hamu anakkon nami, mauliate ma tadok Debata parhlong roha i, ala boi dope hita HuriaNa mamestahon ari hatutubu ni jesus Sipalua i, lumobi
ma hita ama dohot ina di Hurianta.

2. Ina Kamis: Inang...........................................

Hata na mansai arga jala na jotjot tadok di tingki ari Natal i ma: Selamat Hari Natal! Laos i do pasahaton nami tu hita : “SELAMAT ARI NATAL MA DI HITA “

3. Ina Kamis: Inang..........................................

Mansai arga do pandohan i, di dirinta nang di halak na asing, ala dipatuduhon i do las ni rohanta di halongangan bolon na binahen ni Debata laho paluahon hita sian huaso n dosa
sibolis dohot hamatean.
4. Ina Kamis: Inang..............................
Laos dipatuduhon pandohan i do muse sada pengakuan, paboa taparhatutu do na so boi be jolma naung madabu tu dosa i paluahon dirina sandiri. Ndang boi jala ndang mampu
Ilmu Pengetahuan dohot Teknologi paluahon jolma sian persolan na niadopanna.

5. Ina Kamis: Inang...............................

Antong ise do na tuk mangurupi jala mandongan i jolma na gale i? I ma holan Jesus Kristus Tuhan ta na ro tu portibi on, laho paluahon jolma sian dosa dohot hamatean.
6. Ina Hanna: Inang........................
Pinuji ma Tuhan i, Debata ni Israel, ala ditopot bangsona jala dipatupa haluaonna. Dipatindang do hita tu haluaon, di bagas ni si Daud naposona i. hombar tu na hinatahonna marhite
sian soara ni angka panurirangNa na badia i sian na robi.

7. Ina Hanna: Inang.......................

I ma haluaon ni angka musunta dohot sian tangan ni angka na manghosomi hita, laho mangasii angka na tahaholongi Amanta Debata marningot padanNa na badia i.
8. Ina Hanna: Inang............................
Pinuji ma Debata Ama ni Tuhanta Jesus Kristus, naung umpasupasuhon tu hita ragam ni pasupasu partondion sian banua ginjang, dibagasan Kristus. Ai dipillit do hita dibagasan
Ibana andorang so ojak dope tano on, asa badia hita jala sonang di adopanNa.

9. Ina Hanna: Inang.....................

Di todo hian do hita bahen anakNa, marhitehite Jesus Kristus, asa tu Iban mangihuthon halomoan ni rohaNa, asa tarpuji asi i rohana na marmulia i, naniasiholanNa tu hita dibagasan
holong ni roha.
10. Ina Hanna: inang...................
Bagas na i antong hamoraon, ahpistaran dohot parbinotoan ni Debata. Na so hasigatan do angka uhumNa jala na so habogasan do angka dalanna! Ai sian Ibana do saluhutna ro,
marhitehite Ibana jala marhapatean tu Ibana do sasudei! Di Ibana ma hasangapon saleleng ni lelengna. Amen.
Liturgi XII Punguan Ama (10 Halak)
Liturgi Situasional: Mansai maol situtu do roha ni jolma i mangulahon na denggan dohot mangaradoti uhum ni Debata.

1. Amang : Torop do halak na sai usouso, tung songon dia do bahenon laho mangulahon na denggan. Ia binahen na denggan, sipata suhar do na ro, ia niulahon
na denggan gabe sisogo do.

2. Amang : E.... dongan. Mapingkirhu ma hamu disi. Sandok ulahon ma na denggan. Bege ma da: unang ihuthon na roa, na denggan i ma. Sian Debata do halak
mangulahon na denggan. Ia siula na roa ndang ndung di ida i Debata.

3. Amang : Toho do i, au pe hea do hubege barita: Dungi adong ma di huta Jope sahalak na porsea, na margoar Tabita (Dorkas), na sumurung mangulahon na
denggan dohot mambahen asi ni roha.

4. Amang : Imadah dongan tung maol do tutu mangulahon na denggan on, sipata lilu dibahen portibi on ngolu ni ganup jolma ala dao marsaor dohot Tuhanta i. Hape
Ibana manarihon ngolunta on saluhutna.

5. Amang : I do ate dongan. Alai, boasa ia ibana boi mangulahon na denggan, i ma tanda na dihabiari i ma Tuhanta Sipaluai. Hape hita ndang tarulahon patupa na
denggan songon Hata ni Tuhanta, sai olo do lipe pardalanan na taulahon.

6. Amang : Toho situtu do barita i dongan, jala di dok muse di na tarsurat i, alai hasangapon, hamuliaon dohot dame tu ganup na mangulahon na denggan, tu halak
Jahudi jumolo, dung i dohot tu halak Yunani.
7. Amang : Di dok Apostel Paulus do muse di suratna mandapothon halak Korint. Alai martangiang do hami tu Debata, asa unang diula hamu agia aha na roa, ndada
asa hami idaon na tau, naeng hamu mangulahon na denggan dipangido rohanami, nang pe songon na so tau hami idaon.
8. Amang : Ahu pe sai di hirim rohangku do mangulahon na denggan, ai ninna do na tarsurat i: Naeng ma mangulahon na denggan nasida, mamora di angka ulaon na
denggan, marroha na buas, jala na girgir marbasabasa.

9. Amang : Toho ma na nidok mi amang, on pe sai taulahon jala taarahon nang keluarganta tu tonga-tonga parsaorang na denggan dibagasan Tuhan i, i ma di
keluarganta, dihumaliang hita, di bangsonta on, lumobi di huria ni Tuhanta i.

10. Amang : Di baheni, angka na marhaporsuhon mangihuthon roha ni Debata dipasahat ma tondina tu panompa haposan I, marhitehite mangulahon na denggan. Angka
sisongoni do ramotan ni Tuhanta siboan Haluaon i.

Liturgi XIII Panitia Natal Tahun Keluarga (5 Halak Ama, 5 Halak Ina)
Liturgi Situasional: Padaohon ganup ulaon hosom ni roha di tonga-tonga ni Keluarga, di humaliang dohot di huria ni Tuhanta.
1. Amang...........................: Heeee... angka dongan, marNatal hita sonari lumobi di Tahun Keluarga asa mian hatutubu ni Jesus i di hita; tama do tahe molo
gabe hosom roha maradophon dongan? Boha do pandapotmu amang, patorang ma jolo asa hubege hami.

2. Amang..........................: Ima da, hape didok Tuhan Jesus: Ganup na hosom roha di Ahu hosom do nang rohana di Damang. Dao ma i sian hita angka na
porsea, lumobi hita na MarNatal on.

3. Amang...........................: Alai, boto hamu ma: Sibunu jolma do ganup na hosom roha di donganna, jala diboto hamu do, na so mian hangoluan
salelenglelengna di nasa sibunu jolma.

4. Amang..........................: I do tutu do i, sipasidingon do pangalaho ni angka parmihimmihim, parhata tundal, sihosomi Debata, angka na jungkat, siginjang
roha, sideak hata, parpingkiran na roa, na manoisi na torasna.

.
5. Amang..........................: Jala, laos songon i do pandok ni Apostel Paulus tu angka na ginjang roha. Rodihon ma angka na mora siginjang roha, unang
dihaposi hamoraon na so mian i. Alai, di haposi ma Debata na buas mangalehon tu hita saluhut sihalashononta. Jala, tatangihon ma jolo angka pandapot ni
angka Ina.

6. Inang..............................: Mauliate ma dah, sahat do tu hami angka ina on. pandapothu: Lam gumodang do asi ni roha dilehon Debata tu angka na
manghaholongi Ibana. Alani do didok: Di alo Debata do angka na jungkat marroha, alai dilehon do asi ni roha tu halak na serep marroha.
7. Inang.............................: Laos songon i ma tu angka na umposo, unduk ma hamu di angka na tumua sian hamu. Alai saluhutna ma hamu manolukhon
haserepon samahamu, ai di alo Debata do na ginjang marroha.

8. Inang.............................: Huparhatutu do na ni dok mi inang, marhaserepon, marlambok ni roha, taharinggashon jala tahaburjuhon ma na mangihuthon
Tuhanta si Palua i. Asa dapotan angka pasupasu hita on saluhutna.

9. Inang.............................: Olo Bahh, tarpasupasu ma hita na pinasahat ni Tuhanta i. Mandongan i hita, patiurhon sude pardalanan ni ngolunta saleleng di tano
on dope hita on. Taulahon be ma dongan.

10. Inang.............................: Denggan ma i, Laos on do dohonongku tu hamu angka dongan. Tahamuliatehon ma denggan basa ni Debata na mandongan i hita.
Tarpasupasu ma tutu hita sude rap dohot keluarganta ganup. Siolo Debata. Gabe las ni roha nang di jolo ni Jesus Kristus Sipalua i. Amen.