Liturgi I

Hamuna Amanami dohot Inanami, maradu sude hita na pungu di son, Selamat Natal ma di hita
saluhutna. Asi ni roha na sian Jesus Kristus do naung sahat tu hita sahat tu sadari on.
Debata do na manompa langit dohot tano on ro di nasa pangisina. Bohado pandok ni natarsurat i,
taringot tu panompaon i? Marhite liturgi na parjolo on, begeonta ma panompaon ni Debata.

1. 1 Musa 1:1-2
Di mula ni mulana ditompa Debata langit dohot tano on.dungi tarulang ma tano i gabe
halongonan jala holom di atas lung i, dung i mangareap-reap ma Tondi ni Debata di atas ni
angka aek.

2. 1 Musa 1:3-4
Dungi mangkuling ma Debata ninna: Jadi ma ho na tiur! Jadi tiur ma tutu. Nunga denggan
na tiur i diida Debata, jadi dibahen Debata ma parsirangan ni na tiur sian na holom.

3. 1 Musa 1:5
Dungi digoar Debata ma na tiur i arian, goar ni na holom i borngin. Dungi bot ma ari,
torang ma ari muse, i ma ari parjolo.

4. 1 Musa 1:6
Dungi mangkuling muse ma Debata: Jadi ma ho hajangkajang diparsintongaan ni angka aek
bahen parsirangan ni aek tu aek.

5. 1 Musa 1:7
Jadi dipauli Debata ma hajangkajang i, asa disirang aek angka na di toru ni hajangkajang
sian aek angka na di ginjang ni hajangkajang i, gabe manjadi ma songon i.

6. 1 Musa 1:8
Dungi digoar Debata ma hajangkajang i langit. Dung i bot ma ari, torang ma ari muse, i ma
ari paduahon.

7. 1 Musa 1:9
Dungi ninna Debata ma: Marpungu ma hamu aek angka na di toru ni langit i tu sada
inganan, asa tarida na mahiang! Gabe manjadi ma songon i.
8. 1 Musa 1:10
Dungi digoar Debata ma na mahiang i tano, ia parpunguan ni angka aek, laut digoar. Jadi
nunga denggan diida Debata.

9. 1 Musa 1:11
Dungi ninna Debata ma: Dipantumburhon tano i ma duhutduhut dohot suansuanan, na
marparbuehon boni, hau angka na marparbuehon bonina di bagasan tudos tu mansamna be
di tano on, gabe manjadi ma songon i.

10.1 Musa 1:12-13

Jadi dipantubuhon tano i ma duhutduhut dohot suansuanan, na marparbuehon bonina di
bagasan, tudos tu mansamna. Dung i nunga denggan diida Debata. Jadi bot ma ari, torang
ma ari muse, i ma ari patoluhon.

11.1 Musa 1:14

Dungi mangkuling muse ma Debata: Jadi ma hamu angka panondang di hajangkajang ni
langit i, bahen parsirangan ni arian sian borngin, gabe tanda paboa titik ni padan dohot
angka ari dohot angka taon.

12.1 Musa 1:15

Jala gabe panondang angka i di hajangkajang ni langit i, asa dipatiur tano on; dung i
manjadi ma songon i.

13.1 Musa 1:16-17

Dung i dipauli Debata ma dua panondang angka na bolon, panondang na bolon, pangguruan
ni arian, dohot panondang na metmet, pangguruan ni borngin, ro di angka bintang. Dung i
dibahen Debata ma nasida tu hajangkajang ni langit i, asa disondangi tano on.

14.1 Musa 1:18-19

Jala manggomgomi arian dohot borngin, jala bahen parsirangan ni na tiur sian na holom.
Dung i nunga denggan diida Debata. Jadi bot ma ari, torang ma ari muse , i ma ari
paopathon.

15.Dungi di ari palimahon ditompa Debatama angka dengke di bagasan aek, anka pidong na
marhabangan di atas tano on, dohot angka binatang na manginsiri dibagasan aek. Dungi
dipasu-pasu Debata ma nasida. Jadi bot ma ari, torang ma ari muse ima ari palimahon.
Dungi di ida Debata ma saluhutna nunga denggan.
Liturgi II
Di liturgi parjolo nangkin nunga tabege taringot panompaon ni Debata di langit dohot tano dohot
nasa isina. Molo taparrohahon pardalan ni panompaon i, adong pikiran evolusi dibagasanna,
lapatanna: ndang ditompa Debata angka i secara sekaligus. Alai martahap do dijadihon saluhutna
i. Dung ditompa Debata angka suansuanan dohot binatang ro di saluhut na manggulmit tahe di
tano i, dung i martahi ma Debata manompa jolma i.
Boasa parpudi jolma ditompa? I ma ala jolma i do tumpal ni nasa na tinompa. Tabege ma liturgi
na paduahon.

16.1 Musa 1:26

Dung i mangkuling muse ma Debata: Tole ma, itatompa ma jolma, tumiru rupanta, tudos tu
pangalahonta, asa dirajai dengke angka na di laut, dohot pidong angka na martonga-tonga
langit, dohot angka dorbia, ro di sandok tano on nang sude gulok-gulok, angka na manjirir
di atas tano on.

17.1 Musa 1:27

Jadi ditompa Debata ma jolma i tumiru rupana, rupana ditiruanhon Debata laho manompa
ibana, baoa dohot boru-boru nasida ditompa.

18.1 Musa 2:6-7

Alai martimpul ma uap sian tano on, gabe dibornohi sandok sisik ni tano on. Dung i
dijadihon Debata ma jolma i sian orbuk ni tano on jala diullushon tu bagasan bungbung ni
igungna hosa hangoluan i, gabe martondi na mangolu jolma i.

19.1 Musa 1:28

Dung i dipasu-pasu Debata ma nasida, ninna Debata ma tu nasida: Marpinompari ma hamu,
asa sopar hamu, jala gohi hamu sandok tano on, jala patunduk hamu: jala rajai hamu dengke
angka na di laut dohot pidong angka na martonga-tonga langit ro di sude binatang, angka na
manjirir di atas tano on.

20.1 Musa 1:29

Dung i ninna Debata ma: Boti ma i, nunga hulehon tu hamu nasa suansuanan na
marparbuehon boni di atas tano on, ro di sude hau angka namarparbue sisuanon, bahen
panganonmuna ma i.
21.1 Musa 5:1-2
On ma buku ni angka sundut ni si Adam, di ari panompaon ni Debata di si Adam, tudos tu
rupa ni Debata ibana ditompa. Baoa dohot boru-boru nasida ditompa, jala dipasu-pasu
nasida, jala dibahen goarnasida jolma, di ari panompaonnasida i.

22.Markus 10:6-8
Alai sian mulana i dope, dihatotompana i, baoa dohot boru-boru nasida dibahen. Alani i
tadingkonon ni baoa do amana dohot inana, patophon dirina tu niolina. Na gabe sada daging
do nasida na dua i; asa ndada dua be nasida, tung sada daging do.

23.Dungi dijadihon Debata ma jolmai sian orbuk ni tano i, marlapatan ma i na so boi tarsirang
daging ni jolma i sian tano, ala marhite sian tano i do mangan jala minum jolma i. Sian tano
do jolma i jala mulak tu tano do muse jolma i.

24.Alai sasintongna, ndada holan sian orbuk ni tano i jolma i. Debata do mangullushon hosa
hangoluan tu jolma i gabe martondi na mangolu ma jolma i. Asa sian hosa ni Debata do
tahe jolma i jala tondi ni Debata mangolu di jolma i.

25.Jolma i do tumpal ni nasa na tinompa, ala ditompa jolma i tumiru rupa jala tudos tu
pangalaho ni Debata. Dilean Debata do hasurungan tu jolma i maradophon angka jadi-
jadian na asing.
Liturgi III
Hamuna angka nahinaholongan di bagasan Jesus Kristus, denggan situtu do saluhut jadi-jadian i
ditompa Debata. Songoni do nang jolma i hombar tu lomo ni rohaNa do ditompa jala tudos tu
pangalahoNa do dijadihon. Sian mulana nunga dilean Debata tu jolma i, hak dohot tanggung
jawab. Saonari tabege ma taringot tu hak dohot tanggung jawab ni hita jolma.

26.Parjolo dilean Debata do hak tu jolma i asa marpinompari, maranak, marpahoppu jala asa
digohi portibi on huhut dirajai saluhut pangisina.

27.Dung i muse dijalo jolma i do huaso laho mangarajai angka dengke di laut dohot angka
pidong na martonga-tonga langit dohot sude angka binatang na manjirir di atas tano on.

28.1 Musa 2:8

Dung i dipungka Debata Jahowa ma sada porlak di Eden tartungkan habinsaran, jadi tu si
ma dibahen jolma na jonadihonna i.

29.1 Musa 2:15

Dung i ditogihon Debata Jahowa ma jolma i paojakkon ibana tu porlak Eden i, asa dipaula-
ula jala diramoti.

30.1 Musa 2:16

Dung i dipatik Debata Jahowa ma jolma i, ninna ma: Jadi do panganonmu sian nasa hau di
bagasan porlak on.

31.1 Musa 2:17

Alai anggo sian hau parbinotoan ni na denggan dohot na roa, ndang jadi panganonmu; ai
sadari dipangan ho sian i, sai na mate do ho.

32.Disada pihak dilean Debata do tu jolma i hak lao mandai dohot mamakke angka jadi-jadian
ni Debata, alai dipihak na asing, sekaligus dilean Debata tanggung jawab tu jolma i, i ma
asa diula jala diramoti angka na tinompa i.

33.Dilean Debata hak tu jolma i, marlapatan ma i asa bebas do jolma i maradophon angka na
tinompa i alai dilean Debata tanggung jawab tu jolma i, i ma asa tarihot do jolma i tu hata ni
Debata jala diulahon angka patik ni Debata.
Liturgi IV
Boasa mardosa jolma i??? Adong halak mandok, ala na diela si bolis do jolma i. Adong halak
muse mandok, aut sugari ndang adong sibolis ndang mardosa jolma i. Antong, ala ni sibolis do
gabe mardosa jolma i. Sintong do cara marpikkir sisongon i? Siala ni i, rap tapaihut-ihut ma jo
barita hadadabu ni jolma i tu dosa. Songon dia do gabe madabu jolma i tu dosa?

34.Jesus Kristus Sipalua i ma Anak ni Debata na sasada i, naung ro tu portibi on paluahon hita
jolma sian dosa dohot hamatean na jorbut i!

35.Dung dibereng Debata sude na tinompaNa i denggan jala singkop, dohot na mangarajaisa i
ma jolma. Jolma na ditompa Ibana tumiru rupaNa. Dilehon Ibana do patik tu jolma i, asa
marhite patik i adong biar ni jolma i tu Debata.

36.Alai ala disepelehon na tinompa i aturan manang patik na nidok ni Debata, di si ma gabe
sega parsaoran ni jolma naung denggan hian tu Debata. Gabe naeng dibahen jolma dos
otoritasna dohot Debata. Hape tung so sintong do na tinompa i laho mangarajai panompai,
alani i di dabu do uhum tu angka na melanggar patik ni Debata.

37.Ditompa Debata do jolma i tumiru rupaNa, rupa Na ditiruhon Debata laho manompa jolma,
lapatanna: hombar ma pangalaho ni jolma i tu lomo ni roha ni Debata. Jadi ndang pardosa
hian jolma na parjolo i, alai dioloi do hagiot ni dagingna, dioloi ibana sibolis, ujungna gabe
mardosa.

38.1 musa 3:1

Alai ulok do na umbisuk sian nasa na manggulmit di ladang, angka na jinadihon ni Debata
Jahowa, jadi didok ma mandok boru-boru i: Atehe tongon do didok Debata, na so jadi
panganonmuna sian saluhut hau angka na di porlak on?

39.1 Musa 3:2-3

Dung i ninna boru-boru i ma mandok ulok i: Jadi do panganonnami sian parbue ni hau
aangka na di porlak on. Alai anggo sian parbue ni hau, na di parsintongaan ni porlak i didok
Debata do: Unang pangan hamu sian i, jala unang jama hamu, asa unang mate hamu.
40.1 Musa 3:4-5
Dung i ninna ulok i ma mandok boru-boru i: Ndang na tutu hamu mate. Ai diboto Debata
do, sadari dipangan hamu sian i, tonggor ma matamuna, gabe doshon Debata hamu umboto
na denggan dohot na roa.

41.1 Musa 3:6

Dung i sai dipanotnoti boru-boru i ma parbue ni hau i dibahen dengganna panganon jala pia
matana marnida, jala tau manunggul roha tu hapistaran hau i, jadi diputikkon sian parbuena
i jala dipangan, dilehon ma dohot tu sinondukna sian i, gabe dipangan.

42.1 Musa 3:7

Dung i tonggor ma matanasida na dua, diboto ma na marsaemara nasida, gabe disomoti ma
bulung ni hau ara bahen sabuknasida.

43.Sian angka na tarsurat i taboto do, mardosa pe jolma i ndada ala ni sibolis. Olo tutu, diela-
ela ulok i do jolma i alai sasintongna nang pe diela-ela si bolis i jolma i, anggo so dioloi
jolma i do ela-ela i, ndang saut jolma i mardosa. Mardosa pe jolma i, ala na dioloi jolma i
do si bolis.

44.Ai songon i do hape mula ni dosa i singkam mabarbar...? Malo ni ulok i hape paotootohon
boru-boru i! Pangansi do sibolis i, sai songon na burju hape gok sipaotooto, sitolon na tutu.
Diela hita be mangalaosi patik ni Debata, mambahen naso ture, mangago tondi daging pe.
Antong....dungo jala jaga be ma hita!

45.Sian mulana nunga dipasingot Debata jolma i asa unang dipangan manang dijama parbue ni
hau na di parsintongaan ni porlak i, alai dipangan do. Berarti na di langgar jolma i do patik
ni Debata. Antong dosa i ma ala ditadingkon jola i dalan ni Debata, jala diihuthon dalan ni
si bolis.

46.Alani i ndang porlu jolma i mangampini diri diadopan ni Debata. Jala ndang porlu jolma i
manalahon si bolis. Alai tumagon do manolsoli jolma di dosana jala olo mangido hasesaan
ni dosa tu Debata huhut olo mangulahon hamubaon ni roha.
Liturgi V
Dung madabu jolma i tu dosa, pintor adong do baga-baga ni Debata taringot tu haluaon. Dungi
ninna Debata ma tu ulok i: “Jala bahenonku ma parbadaanmu dohot baru-boru i, ro di pinomparna.
Ibana mangalisathon ulum, gabe pargutonmu tambihulna”.
Baga-baga na parjolo on ima patuduhon haluaon na pinatupa ni Kristus muse. Pinompar ni boru-
boru i mangalisathon ulu ni ulok i, ima manggombarhon Jesus Kristus naung manaluhon bisa ni
sibolis i. Marhite baga-baga on dijanjihon Debata do haluaon tu jolma i. Di liturgi palimahon on,
tabege ma manang piga ayat na manaringoti janji ni Debata tu jolma pardosa i.

47. 1 Musa 9:8-9

Dung i ninna Debata ma mandok si Noak dohot tu anakna angka na rap dohot ibana,
botima: Ida ma anggo Ahu, pahotonku ma padanhu tu hamu ro di pinomparmuna sogot.

48.1 Musa 9:10

Dohot tu nasa na marhosa na mangolu angka na rap dohot hamu, angka pidong, pinahan
dohot nasa binatang ni tano on, angka na rap dohot hamu, sian luhut angka na ruar sian
parau ro di sude pahanpahanan ni tano on.

49.1 Musa 9:11

Pahotonku ma padanhu dohot hamu, paboa na so jadi be ripashonon ni aek na sumar nasa
na mardaging, huhut paboa na so masa be aek na sumar i mangaripashon tano on.

50.1 Musa 9:12

Dung i ninna Debata ma: On ma tanda ni padan na hubahen i tu hamu dohot tu nasa na
marhosa na mangolu, angka na rap dohot hamu ro di salelenglelengna.

51.1 Musa 12:1-2

Dung i ninna Jahowa ma mandok si Abram: Bungkas ma ho sian tano hagodanganmu dohot
sian hatubuanmu dohot sian bagas ni amam tu tano sipatuduhononku tu ho. Hubahen pe ho
gabe bangso na bolon, jala pasupasuonku ma ho, jala pabalgaonku goarmu, asa gabe
pasupasu ho.

52.1 Musa 12:3

Jala pasu-pasuonku angka na mamasumasu ho, jala toruanku angka na mamburai ho, jala
dapotan pasupasu marhitehite ho saluhut angka bangso ni tano on.
53.Psalmn 24:7-8
Patuginjang ma tohangmuna, hamu ale angka harbangan, patuginjang ma hamu, ale angka
pintu sian na robi, asa bongot Raja ni hamuliaon! Ise ulanging Raja ni hamuliaon i? I ma
Jahowa, na gogo jala Ulubalang, Jahowa Ulubalang di hamusuon.

54.Psalmn 24:9-10
Patuginjang ma tohangmuna, hamu ale angka harbangan, jala patuginjang ma hamu, ale
angka pintu sian na robi, asa bongot Raja ni hamuliaon i! I se ulaning Ibana, Raja ni
hamuliaon i? I ma Jahowa Zebaot, Ibana do Raja ni hamuliaon i. Sela.
Liturgi VI
Hamu angka nahinaholongan dibagasa Jesus Kristus. Haroro ni Jesus Kristus tu portibi on nunga
dibagasan tahi ni Debata Ama. Jala tahi ni Debata dipaboa marhite angka panurirang ni Israel.
Sian buku Padan Narobi boi do taboto songon dia padan ni Debata disurirangkon marhite angka
panurirang i. Namangihut on begeonta ma manang piga ayat sian barita ni Mesias i.

55.Yesaya 42:1-2
Ida ma naposongki na hutogu; na hupilliti hasudungan ni rohangku! Nunga huampehon
tondingku tu ibana: Tariashononna ma uhum tu angka bangso parbegu. Ndang joujou ibana
manang pangiaronna soarana, jala ndang patubegehononna soarana di alaman.

56.Yesaya 42:3
Arung naung marosahi, ndang laos ponggolhononna, jala sumbu na marnehetnehet i, ndang
laos intopanna, hombar tu hasintongan tariashononna uhum.

57.Yesaya 42:4
Ndang olo loja ibana manang mandate, paima di pahot uhum di tano on, jala angka pulo-
pulo manghalungunhon patikna.

58.Yesaya 62:1
Ala ni Sion ndang tarbahen ahu sip, jala ala ni Jerusalem ndang olo ahu pompoman, paima
binsar hatigoranna songon sondang ni mata ni ari, jala hatuaonna songon sulusulu na
marsigorgor.

59.Yesaya 62:2
Jadi idaon ni angka bangso parbegu ma hatigoranmu, jala saluhut angka raja hamuliaonmu,
jala ingkon margoarhon goar na imbaru ho,sipaboaon ni pamangan ni Jahowa.

60.Mika 5:1
Alai anggo ho ale Betlehem Eprata, mametmethu do ho nian anggo tung pola jujuron tu
angka huta na marribu-ribu di Juda; hape sian ho do haroroan ni na gabe panggomgomi di
Israel, jala angka haroroanna sian na nahinan, sian angka ari na robi salelenglelengna.

61.Zakaria 9:9
Mariaia situtu ma ho ale boru Sion, marolopolop ma ho ale boru Jerusalem! Ida ma, naro
ma rajam tumopot ho, partigor ibana jala siparmonang; na serep do rohana jala marsihundul
di halode dohot di anak ni halode inaina.
Liturgi VII
Di liturgi paonomhon nangkin nunga tapaihut-ihut panurirangon di haroro ni Mesias i. Di Padan
na Robi do disurathon angka barita panurirangon ni Mesias i. Alai anggo hagogokna, di Padan na
Imbaru do disaksihon. Lumobi di buku Evanggelium i tangkas do dibaritahon songon dia do
proses ni hatutubu ni Jesus Kristus Sipalua i. Antong tabege ma barita hatutubu ni Jesus Kristus
Sipalua marhite liturgi na papituhon on.

62.Matius 1:18
Ianggo hatutubu ni Jesus Kristus songon on do: Uju oroan ni si Josep i do pe inana, si Maria
i, gabe-gabean do ibana sian Tondi Parbadia, andorang so masipadonohan dope nasida.

63.Matius 1:19
Ala parroha na bonar si Josep, na mangoro si Maria, ndang adong rohana paurakkon nasida,
gabe ditahi rohana nama, naeng sirangkononna songon i.

64.Matius 1:20
Alai di na songon i dope tahi ni rohana, diida ma di nipina suru-suruan ni Tuhan i, na
mandok tu ibana: O Josep, anak ni si Daud, unang alang roham mangalap si Maria, gabe
donganmu saripe muse, ai na sian Tondi Parbadia do na naeng tubu di ibana.

65.Matius 1:21-22
Tumubuhan Anak ma ibana; Jesus do Goarna, bahenonmu, ai paluaonna do bangsona sian
angka dosanasida be. Masa pe sudena i, asa jumpang nahinatahon ni Tuhan i marhite sian
panurirangna na mandok:

66.Matius 1:23
Ida hamu ma, gabe-gabean do na marbaju i, tubuan Anank ma ibana; jala bahenon do
goarna Immanuel, lapatanna: Donganta ma Debata!

67.Lukas 2:1-3
Dungi ro ma ujui parenta sian Kesar Agustus, ingkon suratan nasa jolma di gomgomanna.
Pamilangan parjolo ma i, uju digomgomi si Kirenius tano Siria. Jadi borhat ma sasude, asa
disurati, ganup tu bona ni pinasana.
 68.Lukas 2:4-5
Borhat ma nang si Josep, na sian Galilea, sian Nasaret, nangkok tu luat Judea, tu huta ni si
Daud, na margoar Betlehem, ala sian pomparan jala marga ni si Daud ibana, pasurathon
dirina rap dohot si Maria, oroanna i, naung gabe-gabean.

69.Lukas 2:6-7
Jadi di na disini nasida, gok ma ari hangoluanna. Ditubuhon ma anak buhabajuna, diborhos
ma, dipeakkon ma tu bagasan panggagatan, ala so adong inganan na asing di
parmianannasida.

70.Lukas 2:14
Hasangapon ma di Debata di ginjang, dame ma di tano on, di angka jolma halomoan i.

71.Johanes 1:14
Gabe daging ma Hata i, jala maringan di tonga-tonga ni hita on, jadi huida hami ma
hasangaponna, i ma hasangapon ni Anak sasada na sian Ama i, gok asi ni roha dohot
hasintongan.

72.Johanes 3:16
Ai songon on do holong ni roha ni Debata di portibi on, pola do Anakna na sasada i dilehon,
asa unang mago ganup na porsea di Ibana, asa hangoluan na salelenglelengna di ibana.

Liturgi VIII
Nunga tubu Jesus, jala nunga ro Mesias sipalua i. Nunga ditonga-tonganta haluaon i, nunga
tabereng hamuliaon ni Debata. Songon dia do sikapta manjalo Sipalua i? Di liturgi parpudi on
begeonta ma manang na piga ayat na manggombarhon sikap ni jolma manjalo barita haroro ni
Mesias Sipalua i.

73.Lukas 2:15
Jala di na laho i angka suru-suruan i sian nasida dompak ginjang, masipadohonan ma angka
parmahan i: Beta ma hita tu Betlehem, taida ma na masa on, na pinabotohon ni Tuhan i tu
hita.

74.Lukas 2:16-17
Jadi hatop ma nasida laho tu si, gabe jumpangsa si Maria dohot si Josep dohot Posoposo i,
na peak di panggagatan i. Asa dung diida, dibaritahon nasida ma boaboa, naung dihatahon
tu nasida taringot tu Dakdanak i.

75.Lukas 2:18-19
Jadi sude na umbegesa, longang be do siala na hinatahon ni angka parmahan i tu nasida. Ia
si Maria, dipeop do hata i sudena jala dipahusorhusor dibagasan rohana.

76.Lukas 2:20
Mulak do angka parmahan i, dipasangan jala dipapujipuji do Debata ala ni sasude na binege
jala na niidanasida, songon naung hinatahon i tu nasida.

77.Mateus 2:1
Asa dung tubu Jesus di huta Betlehem, di luat Judea, uju hinarajahon ni si Herode, ro ma
angka parhapistaran sian purba tu huta Jerusalem.

78.Mateus 2:2-3
Angka ninna ma: Didia do Raja naimbaru tubu i? Naung huida hami do bintangna di tano
habinsaran; ala ni i ro do hami sumomba ibana! Alai disi dibege raja Herodes hata i,
tarsonggotma ibana, ro di sude pangisi ni huta Jerusalem.

79.Mateus 2:4
Dung i dipapungu ma angka sintua ni malim ro di sibotosurat ni bangso i, dipamanat ma tu
nasida huta hatubuan ni Kristus i.
80.Mateus 2:5-6
 Jadi didok nasida ma tu ibana: Huta Betlehem na di luat Judea do, ai songon on do pandok
ni panuringan i: Ia ho huta Betlehem, apala tung na ummetmet ho di tongatonga ni angka
huta na di luat Judea, ai ho dor huta haroroan ni Raja i, na marmahan Israel , bangsongki!

81.Mateus 2:7
Dung i marhusip ma si Herodes manjou angka parhapistaran i tu jolona, di sihirsihiri ma tu
nasida lelengna, dung tarida bintang i.

82.Mateus 2:8
Dung i disuru ma nasida tu huta Betlehem, ninna ma: Laho ma hamu, tangkas ma diori
hamu Dakdanak i! Ia dung jumpang, paboa hamu ma tu ahu, asa dohot au ro marsomba tu
Ibana.

83.Mateus 2:9-10
Asa dung dibege nasida hata ni raja i, laho ma nasida. Anggo bintang i, naung niida nasida
hian di tano habinsaran i, sai di ginjang nasida do muse, rasirasa sahat tingkos di ginjang ni
inganan ni Dakdanak i. Marnida bintang i, mansai las situtu ma rohanasida.

84.Mateus 2:11
Laos dibongoti ma bagas i, gabe diida ma dakdanak i dohot si Maria, inana i. Dung i
manungkap ma nasida marsomba tu dakdanak i, dirungkari ma arta na sida: sere, haminjon
dohot angka na angur, parsomba nasida tu Ibana.

Liturgi IX
Hatutubu ni Jesus Kristus ingkon do gabe lasniroha di sude jolma manisia, ingkon pujionta jala
pasangaponta do Ibana dohot roha na ias. Nasa puji-pujian ni rohanta, ta pasahat tu Tuhanta.

85.PaluaonMu ma nuaeng ale Raja naposomon dibagasan dame, songon na nidokMi, ai nunga
diida matangku haluaon na sian Ho i.

86.Nunga tutu songgop harajaon ni Debata di portibi on. Jala dijou do hita tongtong mangolu
dibagasan harajaonNa i. Harajaon ni Debata dang soal sipanganon manang siinumon, alai
hatigoran dohot hadameon dohot las ni roha dibagasan Tondi Parbadia.

87.Antong manat ma hamu mamereng, manangkasi parulanmuna, songon angka na marroha

ma, unang songon na hurang roha. Parhaseang hamu ma tingki.

88.Psalmen 30:5
Puji ma Jahowa hamu angka na niasianna, jala endehon hamu ma barita ni habadiaonna i.

89.Psalmen 106:1
Mandok mauliate ma hamu di Jahowa, ai na basa do Ibana, ai ro di salelenglelengna do asi
ni rohana i.

90.Psalmen 47:7
Sai endehon hamu ma Debata! Sai endehon hamu ma Rajanta i! Endehon ma tutu.

91.Psalmen 103:1-2
Puji ma Jahowa ale tondingku, jala nasa rohangku dibagasan mamuji goarna na badia i. Puji
ma Jahowa ale tondingku, jala unang tung halupahon denggan ni basana sudena.

Liturgi X
92.Ida ma na jongjong do au di jolo ni pintu i manuktuhi, ia adong na tumangihon soarangKu
dohot mangungkap pintu i, bongot ma Ahu tu ibana, mangan ma Ahu rap dohot ibana, jala
ibana rap dohot Ahu.

93.Ahu do dalan i, dohot hasintongan dohot hangoluan. Ndang adong na sahat tu Ama i, ia so
marhite sian Ahu.

94.Roma 12: 12+15

Marlas ni roha ma hamu mangkirim! Marbenget ni roha ma dihaporsuhon! Jugulhon hamu
ma tangiang. Marlas ni roha ma hamu rap dohot angka na marlas ni roha, jala tangis ma
hamu rap dohot angka na tangis.

95.II Tesalonik 2:13

Alai na tama do hamitongtong mandok mauliate tu Debata marningot hamu,ale angka
dongan, na hinaholongan ni Tuhan i, ala dipillit Debata hamu sian mulana, asa saut hamu
malua, i ma marhite sian Tondi na pabadiahon dohot haporseaon di hasintongan.

96.Ulaon ni Apostel 24:16

Alani i do umbahen na huhaburjuhon, asa marroha na ias ahu tongtong maradophon Debata
nang maradophon jolma.

97.1 Petrus 3:8-9

Angkup ni i, saroha ma hamu saluhutna, sapangkilalaan, angka na marholong ni roha di
dongan, na marasi ni roha, na serep! Unang ma baloshon hamu na jat alo ni na jat,
panginsahion alo ni panginsahion, lam mamasumasu ma hamu, ai naeng teanonmuna do
pasupasu, umbahen na tarjou hamu.

98.I Tesalonika 5:23

Diparbadiai Debata pardame i ma hamu gabe sun denggan, jala diramoti ma tondimuna,
nang roha, nang daging, asa ias, so hasurahan di haroro ni Tuhanta Jesus Kristus.

99.Ulaon ni Apostel 17:24+26

Ia Debata na tumompa hasiangan on ro di saluhut isina, i ma Tuhan ni langit dohot tano,
ndang maringanan Ibana di angka joro na pinauli ni tangan. Sian sada jolma do dipatupa
Ibana saluhut bangso ni manisia, asa diingani liat sisik ni tano on, dibuhul hian do tingki ni
angka bangso i ro di parbalohan ni siinganannasida.

100. Ulaon ni Apostel 17:28-29

 Ai di bagasan Ibana do hita mangolu, manggulmit jala humosa, songon na ni dok ni deba
parendemuna: “Sabangso do hita dohot Ibana!” Antong, anggo sabangso hita dohot Debata,
unang ma dirimpu rohanta suman tu sere Debata, manang tu perak, manang tu batu na
pinandean jala piningkiran ni roha ni jolma.

101. 4 Musa 24:14-15

102. 4 Musa 24:16

103. Psalmn 107:1-2

104. Psalmn 107:3-4

105. Psalmn 107:6-7

106. Lukas 1:68-69

107. Lukas 1:78-79

108. 1 Timoteus 3:2

109. 1 Timoteus 3:8

110. Galatia 5:22

111. Galatia 6:7+9

112. Galatia 6:10

113. Epesus 4:1-3

114. Epesus 4:7+22