ACARA NATAL UMUM BORNGIN NA BADIA

DI HKBP PALEMBANG RESORT PALEMBANG

SABTU, TANGGAL 24 DESEMBER 2016
----------------------------------------------------------
THEMA : NUNGA TUBU DI HITA SADA POSOPOSO

1. PANGARADEON
A. Sude parhobas marpungu di ruang Konsistori
B. Prosesi : ( manghuling giringgiring --- dung sahat di altar digalahi paragenda ma lilin
natal)
1. Siboan Lilin Natal : Galak
2. Pemimpin Liturgis/Paragenda
3. Parjamita
4. Sude Parhalado
C. Mardalan barisan prosesi:
Di tingki mardalan barisan prosesi Song leader mangendehon BE. HKBP No.616:1 Uli na i
di borgin na badia
Uli na i di borgin na badia humirdophirdop do bintang disi.
Di borgin i do tubu Sipalua di panggagatan di Betlehem i.
Portibi on dangol gok haholomon marnida sondang ni Tuhanta i.
Uli na i marende do suruan di borngin i do tubu Kristus i
Di borngin i do tubu Kristus i.
II. JOUJOU TU PARSOMBAON
U : Huria na hinalongan ni Tuhan Jesus Kristus. Tama hita marlas ni roha huhut mandok
mauliate tu Debata, Amanta Pardengganbasa i naung manjou hita sian bagas dohot ingananta be
marhitehite Tondi Parbadia, bongot tu Bagas Joro na Badia on. Di ombas on na marlas ni roha do
hita marningot hatutubu ni Tuhanta Jesus. Marhitehite hatutubuNa nunga digohi Debata sangkap
hatuaon dohot bagabagaNa tu bangsoNa, dohot tu portibi on. Andorang so tamulai pesta
parningotan hatutubu ni Jesus bodari on, atas goar ni sude Parhalado HKBP Palembang
hupasahat hami ma tabe dohot SELAMAT HARI NATAL ma di hamu saluhutna. Singkop
ma di hamu asi ni roha dohot pasupasu ni Tuhanta.
H: Selamat Natal, dame na binoan ni Jesus Sipalua i ma nang di hamu.
U : Oloi hamu ma Jahowa marhitehite las ni roha, ro be ma hamu tu joloNa marhitehite
olopolop. Bongoti hamu ma angka bahalna marhitehite hamauluateon, angka alamanNa
marhitehite pujipujian, mauliate ma rohamuna tu Ibana , puji hamu ma goarNa. Dibagasan las ni
roha dohot olopolop tapungka ma parningotan hatutubu ni Tuhanta Jesus, marhite na
mangendehon BE. No. 57 : 1 3. (di tingki marende huria mulak ma angka Parhalado tu
ingananna be!)
01. Marende Huria No. 57 : 1 3. Nunga Jumpang Muse
Nunga jumpang muse ari pesta i, hatutubu ni Tuhanta Jesus i
 Tuat do Ibana sian surgo i mebat tu hita on
Hasangapon di Debata dame, dame ma di jolma
Las ni roha ni Debata hajolmaon muse.

Beta ale dongan tu Betlehem i, itasomba ma Dakdanak na disi

Na tinongos ni parasi roha i, Debata Ama i
Hasangapon di Debata, dame, dame ma di jolma
Las ni roha ni Debata, hajolmaon muse. (jongjong)

Somba nami ma di Ho na tubu on, Ho siboan dame tu portibi on

Sai pasaorhon ma tu rohanami on dameMi o Jesus
Hasangapon di Debata dame, dame ma di jolma
Las ni roha ni Debata hajolmaon muse.

02. VOTUM INTROITUS TANGIANG

U: Marhitehite Goar ni Debata Ama dohot Goar ni AnakNa Tuhan Jesus Kristus dohot Goar ni
Tondi Parbadia, na tumompa langit dohot tano on.
R : Amen
U: Nunga tubu di hita sada posoposo,dilehon tu hita sada Anak, pampe tu abaraNa do sogot
harajaon, jala bahenonna Goarna: Sipartahi halongangan, Ulubalang ni Debata Ama,
salelengnilelengna, Raja ni hadameon. Endehon hamu ma sada ende na imbaru di Jahowa,
endehon ma Jahowa, ale sandok tano on. Pajojor hamu ma di tongatonga ni angka sipelebegu
hamuliaonNa i. Marsomba ma hamu tu Jahowa marpahean na ma marhadohoan, angka hitir ma
hamu maradophon Ibana, ale isi ni sandok tano on. Haleluya!
R : (Mangendehon) Haleluya, haleluya, haleluya.
U : Martangiang ma hita: Ale Tuhan Debata Amanami na di Banuaginjang! Mandok mauliate do
hami tu Ho, ala ni godang ni asi dohot holong ni rohaM di hami; ai dibasabasahon Ho do
AnakMu na sasada i tu hami na di pardangolan on, asa malua hami marhitehite Ibana sian dosa
dohot hamatean salelengnilelengna. Hupangido hami tu Ho, sai sondangi ma rohanami na holom
i marhitehite Tondi Parbadia i. Angkup ni i sai parrohai ma hami, asa huboto hami mandok
mauliate tu Ho, asa tarapul situtu rohanami di hagogotan dohot di pangunjunan marhitehite
AnakMu, Tuhan Jesus Kristus, Tuhannami. Amen. (hundul)
03. Marende Huria No. 605 : 1 , 3. Las ma roham
Las ma roham Tuhanta ro, gumomgom sasude
Ungkap roham, jangkon Rajam, Marende ma sude, marende ma sude
Marende, marende ma sude.

Bura binaen ni dosa i, marujung ma disi

Ai nunga ro Mesias i, mamboan dame i
Mamboan dame i, mamboan, mamboan dame i.
04. PATIK : GALATIA 4 : 4 7.
U: Patik ni Debata dibagasan pesta Parningotan Hatutubu ni Tuhan Jesus bodari on ima na
tarsurat di Galatia 4 : 4 7. Tajaha ma marsorinsorin: Alai dung dapot gok ni tingkina, disuru
Debata ma Anakna, tubu sian boruboru, ginomgoman ni patik i;
R: asa ditobus angka na ginomgoman ni patik i, asa tajalo ruhut paramaon.
U: Alai ala anak hamu, disuru Debata do tubagasan rohanta Tondi ni Anakna i, na manjoujou:
Abba (ale Amang)!
U/R: Dibahen i, ndang be hatoban ho; tung anak do! Alai molo anak, laos panean do ho marhite
sian Debata!
U: Antong rap mangido gogo ma hita tu Debata mangulahon na hombar tu patik i!
U/R: Ale Tuhan Debata, sai pargogoi ma hami mangulahon na hombar tu patikMi. Amen.

05. Marende Huria No. 53 : 2 3.

Tu holong ni rohaNa hubonom rohangkon. Hulehon di Ibana sude na di au on.
Olo, olo, sude na di au on.

Sai naeng haholonganhu Ho, ale Tuhanhi. Nang marsak, las rohangku ingkon lam ganda i
Olo, olo, ingkon lam ganda i.
06. LITURGI NATAL (U: Uluan; R/N: Remaja/NHKBP; A: Ama; I: Ina; S: Sude)
U : Dimulana i nunga adong Hata i, jala saor tu Debata do Hata i, jala Debata do Hata i. I ma na
saor tu Debata dimulana i. Saluhutna i marhite sian Hata i do, umbahen na manjadi; jala ndang
adong nanggo sada sian naung jadi i, na so marhite sian Ibana.
R/N: Dung i ro ma uju i parenta sian Kesar Augustus, ingkon suratan nasa jolma di
gomgomanna. Pamilangon parjolo ma i, uju digomgomi si Kirenius tano Siria.
U : Jadi borhat ma sasude, asa disurati, ganup tu bona ni pinasana.
A : Borhat ma nang si Josep, na sian Galilea, sian Nasaret, nangkok tu luat Judea, tu huta ni si
Daud, na margoar Betlehem, ala sian pomparan jala marga ni si Daud ibana, Pasurathon dirina
rap dohot si Maria, oroanna i, naung gabegabean.
I : Jadi di na disini nasida, gok ma ari ni hangoluanna. Ditubuhon ma anak buhabajuna,
diborhos ma, dipeakkon ma tu bagasan panggagatan, ala so adong inganan na asing di
parmianannasida.
U : Jadi adong ma marborngin di ladang na disini angka parmahan, mangingani pinahannasida.
A :Jadi didapothon sada surusuruan ma nasida, jala marsinondang ma sangap ni Tuhan i
humaliang nasida, gabe mabiar situtu ma.
U: Alai didok surusuruan i ma tu nasida: Unang mabiar hamu; ai barita halalas ni roha godang
do huboan tu hamuna, parsaulian ni sandok bangso i.
S : Ai naung tubu do di hamu saborngin on, di huta ni si Daud, Sipalua i, i ma Kristus, Tuhan i!
R/N: On ma partinandaan di hamu: Posoposo do dapotonmuna, na binorhos peak di
panggagatan.
I: Jala tompu ma adong dongan ni surusuruan i torop angka parangan parbanua ginjang, dipuji
nasida do Debata, mandok:
S : Hasangapon ma di Debata di ginjang, dame ma di tano on, di angka jolma halomoan i.
07. Marende Huria No. 598 : 2 3. Bege Ende ni Suruan
Kristus Raja sian surgo tuat tu portibi on
Tubu sian si Maria lao manobus hita on
Debata na so tarida gabe daging songon hita
Nunga raphon hita be Jesus i, Immanuel
Ende ni suruan i, sangap ma di Tuhan i.
---------- jongjong ---------
Jesus Raja Hadameon sondang hatigoran i
Panondang ni hangoluan di saluhut jolma i
Dirumari do diriNa lao manobus manisia
Asa unang mate be ala ni dosana be
Ende ni suruan i, sangap ma di Tuhan i.
08. MANOPOTI DOSA & BAGABAGA HASESAAN NI DOSA
U : Huria ni Tuhanta, jongjong do hita nuaeng di adopan ni Debata na Badia i, dibagasan unduk
dohot serep ni roha, tatopoti ma dosanta di jolo ni Debata. Jumolo ma hita martangiang na
hohom di bagasan rohanta be.
(Martangiang na hohom huhut diiringi organ BE. No. 182:1)
U: Ale Amanami na di banua ginjang, Parasiroha mida halak na dangol ! Na ro do hami pardosa
tu joloM, manopoti dosanami na godang i. na tarsolsol bagi do hami nuaeng, ala jotjot hubahen
hami sogo ni rohaM. Tama situtu do hona uhum hami ala ni i. Tung lambas ni rohaM sambing
do umbahen so mago hami. On pe asi ma rohaM di hami, sai unang uhumi hami; sai sesa ma
dosanami sudena, ala naung use mudar ni Anak haholongan ni rohaM di dolok Golgata.
R : Asima rohaM Tuhan, mida au pardosa on.
U : O Tuhan Jesus Kristus, huparhatopot hami do: Ho do Panondang na sintong i na mamboan
hatiuron tu portibi naung pinarhatoban ni dosa. Hape jotjot hami ndang marparange songon
angka anak hatiuron, ai dirajai hisaphisap ni daging ngolunami.
R : Ale Tuhan, asi ma rohaM mida au pardosa on!
U : O Tuhan Jesus, Debata naung gabe jolma! Huparhatopot hami, Ho do Sipalua na tuk
mambuat nasa holso dohot angka na pasorathon hami. Dialo Ho do angka na jungkat marroha na
pajolo gogo papudi uhum. Hape, hami pe jotjot mambahen na so uhum tu dongannami.
R : Ale Tuhan, asi ma rohaM mida au pardosa on!
U : Ale Tuhan, Ho do Sipartahi halongangan, Ulubalang ni Debata Ama, Raja ni hadameon.
Disuru Ho do hami songon angka anakhonMu mamboan dame ditongatonga ni ngolunami. Hape
ida ma, jotjot ndang boi hami mardame tu dirinami dohot tu dongannami. Masa do di
tongatonganami parsalisian, hosom dohot hamusuon. Ale Tuhan, asi ma rohaM di hami!
R : Ale Tuhan, asi ma rohaM di au pardosa on! ------- hohom satongkin -------
L : Tabege ma bagabaga ni Debata taringot tu hasesaan ni dosa ! Songon on do Hata ni Tuhan
Jahowa: Nunga pola hupasisi angka pangalaosim songon ombun, jala songon ombun manorop
angka dosam. Sai mulak ma ho tu Ahu, ai Ahu do Sipalua ho. Hasangapon ma di Debata na di
ginjang!
R : Amen. (hundul)
09. Marende Huria No. 52 : 1 2 Hatuaon Do
Hatuaon do las ni roha do hatutubu ni Jesus i
Mago do jolma ro ma Tuhanta, las be las be ma rohanta i (2X)

Hatuaon do las ni roha do hatutubu ni Jesus i

Domu do hita tu Debatanta, las be las be ma rohanta i (2X)
10. Epistel : TITUS 2 : 11 14.
U: Turpuk Epistel di Pesta Parningotan hatutubu ni Jesus di borngin on, tarsurat di Titus 2 : 11
14. Tajaha ma marsorinsorin. Ai nunga tarida asi ni roha ni Debata, sibahen haluaon ni
saluhut jolma.
R: Diajari do hita, asa tasoadahon roha na so daulat ro di angka hisaphisap tano on, asa
taparangehon hatomanon, hatigoran dohot hadaulaton, tagan di hasiangan on.
U: Laos diajari do hita, paipaimahon hatuaon na tahirim i dohot hapapatar ni hasangapon ni
Debata na balga i dohot Kristus Jesus, Sipalua i.
U/R: Ai dilehon do dirina humongkop hita, asa ditobus hita sian nasa hajahaton, asa urasonna di
dirina bangso, naung Ibana nampunasa, na olo mangkapadothon angka ulaon na denggan.
U: (I do sahatna). Martua do na tumangihon hata ni Debata jala na umpeopsa. Amen.
11. Marende Huria No. 59 : 1 2. O Jesuski Hupuji Ho
O Jesuski hupuji Ho, dibaen naung gabe jolma Ho.
Ditopot Ho do hami on, na dangol di portibi on.
Peak di panggagatan i do Anak ni Jahowa i.
Partohap di sibukta on do na pangolu hita on.

12. PERENUNGAN PAGALAK LILIN MANGHATINDANGHON HAPORSEAON

(U = Uluan; R = Ruast, Pj = Parjamita, S = Sude)
U :Nunga ro Tuhanta manopot bangsoNa jala mamboan haluaon. Haroro ni Debata manopot
jolma na di pardangolan, i do na tapestahon di borngin on. Alai haholomon do jotjot
manghuphupi tano on jala lam tu jorbutna do pangela ni sibolis i mangihoti torop jolma, disegai
do tondi, haporseaon dohot panghirimon di ari sogot. Lam torop na sega parrumatanggaon, lam
tois roha ni jolma tu hata ni Debata, lam manimbukbuk hajahaton, peredaran ni Narkoba nunga
tung mengancam sude hajolmaon. Sandok, tung dihaliangi parmaraan do ngolunta nuaeng. Molo
songon i, adong dope si hirim on na tau paposhon rohanta di parhusoran ni zaman na mubauba
on? Hamu angka donganhu, di pesta parningotan hatutubu ni Tuhan Jesus borngin on, tauji ma
pahusorhusorhon balga ni holong ni roha ni Tuhanta di ngolunta be.
R :Tung godang do tutu ale Tuhan, parungkilon na hubolus hami, topot ma tutu sandok
ngolunami asa sumuang las ni rohanami.
U:Lam godang pe angka parungkilon namasa di tongatonga ni parngoluonta, torop angka na
pengangguran, torop angka na ganggu jala biahaton mangadopi ngolu on, lam tamba bilangan ni
angka na pogos di arta lumobi di partondion, torop na mangadopi pardangolan na marragam, alai
boto hamu ma, ala ni i do umbahen na tuat Jesus sian banua ginjang sorang tu portibi on,
mambuat sude pardangolanta, asa disondangi sandok ngolunta. Antong manang songon dia pe
rumang ni parngoluon na niadopanmu nuaeng, marsak manang las roham, sai ungkap ma
tongtong roham asa sorang Ibana di bagasan ngolum.
R:Ale Tuhan Jesus, sorang ma Ho tu bagasan rohanami, sondangi ma ngolunami.
Song leader: (Mangendehon BE No.616 : 3 Ulina i di borngin na badia)
Uli na i sude marlas ni roha, ala naung songgop harajaonNa i
Huria i ria do ro marsomba, mamuji Raja na sun sangap i
Ibana do panondang hangoluan, Na mangalehon pangkirimon i
Uli na i marende do suruan di borngin i do tubu Kristus i
Di borngin i do tubu Kristus i.
Di tingki marende solo, ro ma Parjamita tu langgatan mangadop ruas,
Dungi ro ma muse sude parhalado huhut maniop lilinna be mangadop tu parjamita : jongjong
ma saluhutna ruas.
Galahan ni parjamita ma lilin na tiniop ni parhalado
Borhat ma parhalado manggalahi lilin ni ruas di ganup bangku,
Dung galak lilin sude, diintopi ma lampu jala dohonon ni parjamita ma:
Pj : Nunga galak be lilin di tongatonganta, ima hataridaan ni Panondang naung ro tu portibi on.
Jangkon ma sondang na sian Tuhanta i, las ma roham manjalosa. Ihut tusi disuru do hita gabe
siboan hatiuron di pardalanan ni ngolunta si ganup ari. Antong laho marningot naung ro
Panondang na bolon i, taendehon ma Sonang ni bornginna i
R: (Mangendehon BE No.54 Sonang ni bornginna i)
Sonang ni bornginna i uju ro Jesus i, sonang modom do halak sude
Holan dua na dungo dope, mangingani anakna Jesus Tuhanta i

Denggan ni bornginnai uju ro Jesus i, tu parmahan di Betlehem i

Dipaboa na di surgoi, nunga ro sipangolu Jesus Tuhantai.

Godang ni tua disi, di naro Jesus i, tung malua pardosa muse

Sian hamagoanna sude, ala ro Sipangolu Jesus Tuhanta i.
Pj :Hamuna angka dongan, las ma roham nunga saor be Tuhanta Jesus Sipalua i tu portibi on,
jangkon ma Ibana sian dibagasan las ni roha jala hatindanghon ma Ibana di ngolum.
R:Ido tutu, haluaon dohot las ni roha do diboan Tuhanta Jesus marhite hatutubuNa di Betlehem
i, alani i hobas ma hita manghatindangkon Jesus Sipalua i marhite gulmit ni ngolunta be.
U:Antong rap dohot donganta sahaporseaon di sandok portibi on tahatindangkon ma
haporseaonta i, rap ma hita mandok:
R: Ahu porsea ..du. (Hundul)
13. Tingting / Boaboa :
14. Marende Huria No. 602 : 1 Di Natal Na Parjolo i (P. Pelean IA IB)
Di natal na parjolo i, parmahan marbongin di ladang i
Tu si do ro suruan i, mandok nunga sorang Mesias i
Noel, Noel, Noel, Noel, tubu Raja ni Israel.

Binsar do sada bintang i, di Purba torang sinondangna i.

Tongtong tarida bintang i, arian nang borngin patar do i.
Noel, Noel, Noel, Noael, tubu Raja ni Israel.

Parroha sian Purba i lao borhat manjalahi Raja i.

Paihutihut bintang i, tu huta ni Raja na sorang i.
Noel, Noel, Noel, Noael, tubu Raja ni Israel.

BintangNa i na tiur i, mardalan do tu manabia i.

Di Betlehem mansohot i, di atas inganan ni Jesus i.
Noel, Noel, Noel, Noael, tubu Raja ni Israel.

Parroha sian Purba i lao bongot tu bagas ni Jesus i.

Disombahon tu Jesus i haminjon, mas, mir binoanna i.
Noel, Noel, Noel, Noael, tubu Raja ni Israel.

Antong marende hita on, di Raja ni langit nang tano on

Napaluahon hita on sian huaso ni portibi on
Noel, Noel, Noel, Noael, tubu Raja ni Israel.

15. Jamita : Jesaya 9 : 1 7.

16. Marende Huria No. 62 : 1 Halalas ni Roha Godang (P. Pelean II & IV)
Halalas ni roha godang nahubaritahon on,
Nunga tubu sipalua di hita jolma on
Hasangapon di Debata laos dame, dame, dame ma di jolma
Lomo ni roha ni Debata do hita jolma on.

Ai saborngin on do binsar bintang di naholom i

Sumondangi hagolapon nadirohanta i,
Hasangapon di Debata laos dame, dame, dame ma di jolma
Lomo ni roha ni Debata do hita jolma on. ------- music --------
 Sai sondangi ma rohangku ale Tuhan Jesus i
Asa dohot au maruli di hatutubuM i,
Hasangapon di Debata laos dame, dame, dame ma di jolma
Lomo ni roha ni Debata do hita jolma on.

Halalas ni roha godang sai songgopi rohangki

Asa dohot au ummalo mamuji goarm i,
Hasangapon di Debata laos dame, dame, dame ma di jolma
Lomo ni roha ni Debata do hita jolma on.

17. PARSURUON TU NGOLU SIGANUP ARI jongjong

Pdt: Nunga tahalashon hatutubu ni Jesus i. Andorang so mulak hita sian parpunguan on, tama do
hita marpadan tu Tuhan i, i ma padan mamaritahon barita haluaon i. Tatiru ma pambahen ni
angka parmahan i uju manjalo barita las ni roha i. Masibetabetaan do nasida laho marnida
halasan na balga i. Sai songon i ma hamu girgir masibetabetaan tu angka ulaon na denggan.
R: Dison do ahu Tuhan, sai patau ma au hobas tu angka ulaon na denggan.
Pdt: Dung dijalo nasida barita las ni roha i, borhat do angka parmahan i marsomba tu Jesus. Hita
pe tama do sombaonta Ibana marhite hata, parange dohot gulmit ni ngolunta. Marhite Pesta Natal
on tama do lam ringgas hita marsomba tu Ibana jala lam tapatimbul Ibana di rohanta :
R: Dipatimbul rohangku do Tuhan i, mariaia do tondingku mida Debata, Sipalua ahu.
Pdt: Dung disomba angka parmahan i Jesus na tubu i, dibaritahon nasida do saluhut naung niida
jala dibaritahon tu nasida. Jala sude na umbegesa longang be do siala na hinatahon ni angka
parmahan i. Hita pe tama do mamaritahon haluaon na binoan ni Jesus i, asa longang portibi on
ala panindangionta.
R: Tuhan, sai suru jala patau ma ahu mamaritahon goarMu dohot saluhut angka ulaon
habalgaon naung pinatupaM di ngolungku dohot tu sandok portibi on.
18. TANGIANG PELEAN ALE AMANAMI TANGIANG NATAL - PASUPASU
III. ULAON NA BADIA (Ida : AGENDA HKBP).
IV. ANGKA ENDE DI TINGKI MARULAON NA BADIA