PARTORDING NI PARMINGGUON

DI MINGGU II DUNG EPHIPANIAS

 Ev: Johannes 1 : 43 – 51  Ep: 1 Samuel 3 : 1 - 10

TOPIK :
JESUS DO ANAK NI DEBATA JALA RAJA

HURIA KRISTEN BATAK PROTESTAN

MINGGU, 14 JANUARI 2024
1. Marende BE HKBP No. 71 : 1 - 3 O RAJA NA SUMURUNG (BL
156)
♫♪♫ O Raja na sumurung, o Jesus Tuhanki
Na so hea marujung, do harajaonMi
Pasangap ma goarMu, di hasiangan on
Paro harajaonMu, di atas tano on.
♫♪♫ Parroha sian purba, na ro sumomba Ho
Diboan siluana, lao pasangaphon Ho
Diida do bintangmu, na marsinondang i
Paboa nunga tubu, Ho Sipalua i
...musik...
♫♪♫ (Jongjong) Ho do marhasangapon, hian o Tuhanki
Alai di hamoraon, ndang ringkot rohaMi
Ndang ro Ho manjalahi, ugasan tano on
Na porsuk do ditaoni Ho di portibi on

2. VOTUM – INTROITUS – TANGIANG :

U: Marhitehite Goar ni Debata Ama, dohot Goar ni AnakNa Tuhan
Jesus Kristus, dohot Goar ni Tondi Parbadia na tumompa langit
dohot tano on. Amen. Jahowa do panondangi di ahu dohot
hatuaonhu, tung ise ma habiaranhu? Nang pe marhoronhoron
parangan angka na manungkum ahu, ndang dihabiari rohangku.
Sada do naung hupangidohon tu Jahowa, sai ido hulului: Naeng
mian ahu di bagasan Joro ni Jahowa saleleng mangolu ahu
paidaidahon hinadenggan ni Jahowa dohot manghalomohonsa.
Haposi ma Jahowa, pagomos jala patogu roham jala parhanalom
Jahowa. Haleluya !
H: (Mangendehon): BE. HKBP No. 852 : 1 HALELUYA HKBP
(3x) BL 852
♫♪♫ Haleluya, Haleluya, Haleluya.
U: Martangiang ma hita! Ale Tuhan Debata, Ama na marasiroha!
Hudok hami mauliate tu Ho, sian nasa rohanami, ala dijou Ho hami
sian haholomon tu hatiuron, marhitehite AnakMu Tuhan Jesus
Kristus. Sai rajai TondiM na badia i ma hami asa lam ganda
haporseaonnami, jala asa lam badia parangenami, unang
1
 marlindang binahen ni portibi on, asa sahat hami rap dohot angka
na porsea di GoarMu tu hangoluan na so ra suda, marhitehite Anak
haholongan ni rohaM, Tuhan Jesus Kristus, Tuhannami.
Amen. (Hundul)

3. Marende BE No. 391 : 1 - 2 SO TUNG DITULAK (BL 260)

♫♪♫ So tung ditulak rohami panjouon ni Tuhanta i
Di si do hangoluanmi, sadari on ma tangkup i
Sadari on, sadari on, paujung i, sadari on
Sadari on, sadari on, paujung i, sadari on.
♫♪♫ Diboto ho do umurmi? hatop do dapot ajalmi
Sadari on mangolu ho, hatop ma ho tu Jesus ro
Sadari on, sadari on, paujung i, sadari on
Sadari on, sadari on, paujung i, sadari on.

4. PATIK:
U: Tangihon hamu (Tatangihon) ma Patik ni Debata di minggu sadari
on, i ma Patik I – X.
Patik Parjolo. Ahu do Jahowa DebataM, ninna Debatanta. Ndang
jadi marangkup Ahu bahenonmu Debatam.
Patik Paduahon. Ndang jadi ganaonmu jala ndang jadi
sumanonmu manang aha na di banuaginjang dohot na di
banuatonga on ro di na di bagasan aek na di toru ni tano, ianggo
tung gabe sisombaon manang sioloan.
Patik Patoluhon. Ndang jadi dohonon goar ni Debata, ianggo so
ture dalanna. Ai hona uhumNa do sogot angka na marsineang di
goarNa.
Patik Paopathon. Ingot hamu ma pabadiahon ari minggu i! Di na
onom ari ma ula hamu nasa siulaonmu, alai anggo ari papituhon i,
ari paradianan ni Jahowa Debatam do i. Ndang jadi ho mangula
anggo di na sadari i, manang anakmu pe manang borum, manang
naposom lahilahi, manang naposom boruboru, ro di pinahanmu ro
di pangisi ni huta ni halak pe na mangebati hutam. Ai di na onom
ari do ditompa Debata langit dohot tano dohot laut dohot nasa
isina; dung i maradian do Ibana di ari papituhon i. Dibahen i do

2
 umbahen na dipasupasu Debata Jahowa ari paradianan i jala
diparbadiai.
Patik Palimahon : Ingkon pasangaphonmu do natorasmu asa martua
ho, jala leleng mangolu di tano na nilehon ni Jahowa Debatam di
ho.
Patik Paonomhon. Unang ho mamunu
Patik Papituhon. Unang ho mangalangkup
Patik Paualuhon. Unang ho manangko
Patik Pasiahon. Unang ho olo manghatindanghon hata na so tutu
maralohon dongan jolma.
Patik Pasampuluhon. Ndang jadi haliangan ni roham bagas ni
donganmu, ndang jadi haliangan ni roham dongan saripe ni
donganmu, manang naposona baoa manang naposona boruboru,
manang lombuna manang hodana, manang dia pe ugasan ni
donganmu.
Boha pandok ni Debata taringot tu patik na sampulu i ?
On do: Ahu do Jahowa Debatam, ninna Debatanta. Pargogo na so
hatudosan jala Parrimas. Siluluhon dosa ni amaama tu pinomparna,
ro di sundut patoluhon, ro di sundut paopathon, pinompar ni angka
na sogo roha di Ahu; Alai asi do rohangKu di angka na
marriburibu, angka na marholong ni roha di Ahu na so mangalaosi
PatikHi.
U: Ima sahatna. Antong, rap mangido gogo ma hita sian Tuhan
Debata!
U+H: Ale Tuhan Debata, sai pargogoi ma hami mangulahon na hombar tu
PatikMi. Amen
5. Marende BE No. 162 : 1 – 2 O DEBATA MANSAI BALGA (BL 27)
♫♪♫ O Debata, mansai balga huhut dokdok dosangku
Na so adong di tano on, na tau haporusanhu.
♫♪♫ (Jongjong) Tung sura lao au tu na dao mangalap hatuaon
Ndang dapot i di tano i, di nasa hajolmaon.

6. TANGIANG MANOPOTI DOSA :

3
 U: Tatopoti ma dosanta martangiang ma hita: Ale Tuhan Debata,
Amanami, Pargogo na so hatudosan, Parasiroha mida hami na
dangol on! Na ro do hami tu joloM manopoti dosanami na godang
i. Di bagasan hajahaton do hami tubu jala ndang adong haporseaon
di bagasan rohanami hian, saluhut do hami manimbil sian angka
dalanMu. Mansai godang do pangalaosionnami di PatikMu. Alai
ingot ma hami, ale Tuhan, ala ni denggan ni basaM dohot asi ni
rohaM. Sai unang paingotingot angka dosa ni haposoonnami dohot
pangalaosionnami; sai ingot ma hami hombar tu asi ni rohaM dohot
denggan ni basaM ala ni GoarMu. Ale Tuhan Jesus, marpamuati
ma rohaM di dosanami na godang i! Amen.
Tabege ma bagabaga taringot tu hasesaan ni dosa: Songon on
do Hata ni Jahowa: Unang ho mabiar, ai Ahu do Siluluhon ho;
nunga pola Hujou goarmu, Ahu nampuna ho. Hasangapon ma di
Debata na di ginjang!
U+H: Amen (Hundul)

7. Marende BE HKBP No. 392: 1 SAI PASIAT TUHAN JESUS (BL 261)
♫♪♫ Sai pasiat Tuhan Jesus tu bagasan rohami
Sai maimaima Jesus, bege panuktukNa i
Sai pasiat Tuhan Jesus, jangkon i tu rohami
Nunga tingki parasian, so tung jolo salpu i.

8. E P I S T E L:
U: Tangihon hamu (Tatangihon) ma Hata ni Debata turpuk Epistel di
Minggu sadari on, tarsurat di 1 Samuel 3 : 1 – 10.
Dung i uju si Samuel na bajar i marhalado di Jahowa, di jolo ni si
Eli, mahal ma di angka ari i hata ni Jahowa, jala ndang adong sadia
pangungkapon.
H: Dung i di na sadari modommodom ma si Eli di ingananna,
matana pe nunga mamungka rambon, ndang tarbahensa be
marnida.
U: Ndang dope mintop ianggo palito ni Debata, jala nunga modom ia
si Samuel di joro ni Jahowa, hajongjongan ni poti parpadanan ni
Debata.

4
 H: Jadi joujou ma Jahowa di si Samuel, gabe didok ibana ma:
“Ida ma, dison do ahu!”
U: Dung i marlojong ma ibana tu si Eli, jala ninna ma: “Ida ma, dison
do ahu, ai dijou ho do ahu.” Alai didok si Eli ma: “Ndang ahu
manjou ho, mulak ma ho mangulahi modom,” gabe laho ma ibana
jala modom.
H: Dung i diulahi Jahowa manjou si Samuel paduahalihon, gabe
hehe ma si Samuel jala laho mandapothon si Eli, jala didok ma:
“Ida ma, dison do ahu, ai dijou ho do ahu.” Dung i ninna si Eli
ma: “Ndang ahu manjou ho, ale anaha, mulak ma ho
mangulahi modom.”
U: Alai ndang dope ditanda si Samuel Jahowa, jala ndang dope
pinapatar tu ibana hata ni Jahowa.
H: Dung i diulahi Jahowa ma manjou si Samuel patoluhalihon,
gabe hehe ibana jala laho mandapothon si Eli, jala ninna ma:
“Ida ma, dison do ahu, ai dijou ho do ahu.” Jadi mamoto ma
roha ni si Eli, Jahowa do hape manjou dolidoli i.
U: Jadi ninna si Eli ma tu si Samuel: “Laho ma ho mangulahi modom;
molo tung joujou muse di ho, dohononmu ma: Manghuling ma Ho,
ale Jahowa, ai mananginangi do naposomon.” Dung i laho ma si
Samuel, jala diulahi modom di ingananna.
H: Dung i ro muse ma Jahowa, tindang disi jala joujou songon na
jolo: “O Samuel, Samuel!” Gabe didok si Samuel ma:
“Manghuling ma Ho, ai mananginangi do naposoMon.”
U: I do sahatna. Martua do angka na tumangihon Hata ni Debata jala
na umpeopsa. Amen.

9. Marende BE HKBP No. 730 : 1-2 SAI PATAU MA AU TUHAN

BL 730
♫♪♫ Sai patau ma diringku ale Tuhan,
papatarhon hinauliMi Tuhan
Suru ma TondiMi, saor tu rohangki,
lao papatar holongMu tu donganhi

♫♪♫ (Jongjong) Sai patau ma diringku ale Tuhan,

papatarhon hinauliMi Tuhan
5
 Suru ma TondiMi, saor tu rohangki
patariparhon basaM tu donganhi.

10. MANGHATINDANGHON HAPORSEAON:

U: Tahatindanghon ma haporseaonta i, songon na hinatindanghon ni
donganta sahaporseaon di sandok portibi on. Rap ma hita mandok:
H: Ahu Porsea di Debata Jahowa….. d.u. (Hundul)

11. Tingting
12. Papungu Pelean huhut Marende BE HKBP No. 256 : 1… JESUS
KRISTUS I DO RAJA (BL 95) - Pelean Ia, Ib

♫♪♫ Jesus Kristus i do Raja pinabangkit ni AmaNa

Manggomgomi sasude, manggomgomi sasude.
Jala nasa hajolmaon tu Ibana do mar-Tuhan
Parhatopotonna be, parhatopotonna be.
♫♪♫ Angka surusuruanNa humaliang habangsaNa
Pasangaphon Raja i, pasangaphon Raja i
Na di ginjang marhuaso harajaonNa di tano
Mangoloi patikNa i, mangoloi patikNa i.
---musik---
♫♪♫ Debata do sasadasa holan Jesus do tudosNa
Anak tu AmaNa i, Anak tu AmaNa i
Na so meret habangsaNa so marujung do ngoluNa
Tongtong gomgomanNa i, tongtong gomgomanNa i.
♫♪♫ Holan Jesus patupahon na malua hajolmaon
Ala ni mudarNa i, ala ni mudarNa i
Nunga sahat hangoluan sai tongtong do partuaon
Dibagasan Jesus i, dibagasan Jesus i.
---musik---
♫♪♫ Hamu angka na mardosa nang hamu na ponjot hosa
Ala ni na porsuk i, ala ni na porsuk i
Sai pasahat rohamuna nang na hinolsohonmuna
Tu Tuhanta Jesus i, tu Tuhanta Jesus i.
6
 ♫♪♫ O hamuna na porsea nang na tigor i, na ria
Nang sude naung monang i, nang sude naung monang i
Tole ma hamu na torop, tole ma marolopolop
Puji ma Tuhanta i, puji ma Tuhanta i.
---musik---
♫♪♫ Dohot au pe di na rodop, naeng porsea, naeng marolop
Naeng mamuji Tuhanhi, naeng mamuji Tuhanhi
Jesus Kristus i do Raja, ingkon tunduk saluhutna
Mangoloi Rajanta i, mangoloi Rajanta i.

13. J A M I T A. Johannes 1 : 43 - 51
14. Papungu Pelean Huhut Marende BE. HKBP No. 697 : 1… MOLO HO
DO HUIHUTHON (BL 697) - Pelean II

♫♪♫ Molo Ho do huihuthon dame sonang rohangki

Sai horas jala martua nasa na hinophopMi.
Ho tongtong ihuthononku, Jesus na palua au
Ho sambing do oloanhu ala nii martua au.
♫♪♫ Na rade do au manaon, mangasahon padanMi
Molo ho na margogoihon talu haholomon i
Ho tongtong ihuthononku, Jesus na palua au.
Ho sambing do oloanhu ala nii martua au.
---musik---
♫♪♫ Hupelehon ma diringku mangihuthon lomoMi
Ndada be na olo salpu na manggohi rohangki
Ho tongtong ihuthononku, Jesus na palua au
Ho sambing do oloanhu ala nii martua au.
♫♪♫ Marparange na badia ma au diadopanMi
Sai patau ma au tiruan, songon pinangidoMi
Ho tongtong ihuthononku, Jesus na palua au
Ho sambing do oloanhu ala nii martua au.
15. Tangiang Pelean. (Jongjong)
U: Tatangianghon ma peleanta.

7
 Ale Debata, Amanami na di banua ginjang! Ho do haroroan ni
saluhut silehonlehon na denggan dohot nasa ulibasa na mauliutus.
Hupasahat hami ma sian na nilehonMi tu hami, peleannami tu Ho.
Sai jalo ma i gabe uap na hushus di joloM. Pasupasu ma i jala
ramoti asa huparhaseang hami pelean on, patimbulhon harajaonMu
di tongatonga ni huriaM dohot di portibi on. Buhai ma rohanami
marhitehite TondiM, asa lam hutanda hami godang ni
silehonlehonMi tu hami, asa lam girgir hami mandok mauliate tu
Ho, marhitehite Jesus Kristus Tuhannami. Amen.
H: (Mangendehon) BE. HKBP No. 204 : 2 “NDANG
TADINGHONONHU HO” BL 73
♫♪♫ Nasa na nilehonMi, tondi ro di pamatanghu
Hosa dohot gogongki, ro di saluhut artangku
Hupasahat i tu Ho, na so unsatonhu do.
U: Ale Amanami na di banua ginjang! Sai pinarbadia ma GoarMu! Sai
ro ma harajaonMu! Sai saut ma lomo ni rohaM di banua tonga on
songon na di banua ginjang! Lehon ma tu hami sadari on hangoluan
siapari! Sesa ma dosanami songon panesanami di dosa ni dongan
na mardosa tu hami! Unang hami togihon tu pangunjunan! Palua
ma hami sian pangago!
H: (Mangendehon): BE HKBP No. 841 : 1 “AI HO DO
NAMPUNA HARAJAON” BL 841
♫♪♫ Ai Ho do nampuna harajaon, dohot hagogoon
Ro di hasangapon, saleleng ni lelengna, Amen.
U: Tangiang Pasupasu
H: (Mangendehon) BE No. 845 : 1 AMEN, AMEN, AMEN (BL
845)
♫♪♫ Amen, Amen, Amen.