PARTORDING NI PARMINGGUON

DI MINGGU IV DUNG EPIPHANIAS

MBO: Mameakhon Batu Ojahan
dohot
Jubileum 150 taon HKBP Simangumban

Ev. Job 12 : 13 - 25 Ep. 1 Korint 1 : 26 - 31

TOPIK :

DEBATA HAROROAN NI GOGO DOHOT BISUK

HURIA KRISTEN BATAK PROTESTAN

MINGGU, 29 JANUARI 2023

I. PANGARADEON
Pukul 08.30 – 09.00 : Tinagam hasasahat ni Ephorus / rombongan dohot sude
undangan di bagas na tinontuhon panitia.
Pukul 09.00 – 09.30 : Parhobasan dohot Persiapan prosesi
Pukul 09.30 – 10.00 : Prosesi niuluhon ni Ephorus HKBP sian inganan
parhobasan tu Gareja rap dohot angka Pandita,
Parhalado HKBP Simangumban.
1. Pengalungan Bunga tu Ompui Ephorus HKBP.
2. Pemberian Bunga Pangku kepada Ompu Boru.
3. Penandatanganan Prasasti.

II. MAMONGOTI GAREJA

Ephorus dohot Rombongan, Undangan dohot situan natorop masuk tu Gareja
laos ihut Musik mangendehon “Huria na huhaholongi hami” (songon tanda ni
las ni roha ni sude ruas mamuji Debata naung mangaramoti pardalan ni HKBP
Simangumban, boi marjubileum 150 taon dohot MBO) di tingki rombongan
prosesi masuk tu Gareja sahat tu na hundul di inganan naung pinarade ni Panitia.
Dung hundul sude barisan prosesi,
Huria Mangendehon BE. No. 651:1 “Huria na huhaholongi hami”
♫♪♫
Huria na huhaholongi hami na pinajongjong ni Tuhanta i. Tung na so
lupa sian rohanami, huria i dohot ruasna i. Di nasa hasusaan
tongtong do i manahan. Manggogo pe angka galumbang i,
Tuhanta do na pademakhon i. Martua do na hot di Tuhan i.

III. PARMINGGUON
1. Pangaradeon tu parmingguon.
U: Huria ni Tuhanta! Di bagasan serep dohot unduk ni roha tu Debata,
tahalashon ma parsaoranta di tongatonga ni bagas joroNa on.
H: Hupuji hami ma Ho Tuhan, ai denggan ni basaM sambing do na
padomuhon hami, umbahen na boi hami marsaor di bagas joroM na
Badia i.

1
U: Endehon hamu ma Ibana, palu hamu ma parhinaloan umpuji Ibana,
marnonangi ma hamu taringot tu halongangan angka na binahenNa i
sudena.
H: Hupuji hami ma Ho Tuhan, ai denggan ni basaM sambing do na
padomuhon hami, umbahen na boi hami marsaor di bagas joroM na
Badia i.
U: Di bagasan serep dohot unduk ni roha tu Debata, tahalashon do
parsaoranta di bagas joroNa dohot angka donganta na rap manghalashon
Jubileum 150 taon dohot Mameakhon Batu Ojahan ni HKBP
Simangumban on.
H: Hupuji hami ma Ho Tuhan, ai denggan ni basaM sambing do na
padomuhon hami, umbahen na boi hami marsaor di bagas joroM na
Badia i.
U: Marolopolop jala marlas ni roha ma hita marsomba tu Debata, tahobasi ma
rohanta marsaor tumangihon HataNa, ro be ma hita mardongan las ni roha
mamuji Ibana. Marende ma hita!

2. Marende BE No. 17 : 1 - 3 “RAJA NA TUMIMBUL” BL. 210

♫♪♫
Raja na tumimbul sigomgomi hami, jalo ma pujiannami. Denggan ni
basaM do pangoluhon hami, atik pe mardosa hami. Sai apoi pargogoi hami
mangendehon sangapMi o Tuhan.
♫♪♫
Sai dipuji langit jadijadianMu, saluhut pambahenanMu. Parsinondang
bolon na marpamongguri, Ho o Tuhan do dipuji. Bulan i bintang pe Ho do
pinujina, dohot sinondangna.
(Musik)
♫♪♫
(Jongjong) Dohot do tondingku tungkap di adopan ni habangsaMi o
Tuhan. Nang sude donganhu nasa na marhosa, pujionna do Jahowa. Sai
tongtong na sintong holan Debatanta do sipujionta.

3. VOTUM – INTROITUS – TANGIANG

U : Marhitehite Goar ni Debata Ama, dohot Goar ni anakNa Tuhan Jesus Kristus,
dohot Goar ni Tondi Parbadia na tumompa langit dohot tano on. Amen. Sai
pabotohononMu do tu ahu dalan hangoluan, gok do las ni roha di adopan ni
bohiM, angka hasudungan ni roha do di siamunMu saleleng ni lelengna.
Haleluya!
H : (Mangendehon): Haleluya, Haleluya, Haleluya
2
 U : Martangiang ma hita! Ale Tuhan Jesus Kristus, Ho do panondang na
sintong, na manondangi ganup jolma na di portibi on! Sondanghon ma bohiM
tu hami jala parbadiai ma rohanami, asa hutanda hami dalan hangoluan
marhite sian i. Sai rajai ma hami, asa unang manimbil hami sian dalan na
sintong i. Ale Tuhan Jahowa, patongtong ma rohanami marhaporseaon tu Ho
marhitehite Tondi Parbadia! Amen. ( Hundul )
4. Marende BE No. 72 : 4 “HEHE MA HAMU PARBEGU” BL 84
♫♪♫
Jesus sondang ni tondingku, na patiur sasude. Sai palua ma rohangku sian
dosa sasude. Taiti dohot rohangkon tu na tiur i tongtong.

5. P A T I K :
U : Tangihon hamu ma Patik ni Debata na tarsurat di Mateus 11 : 29! “Jangkon
hamu ma augangKu, marguru ma hamu tu Ahu, ai na lambok do Ahu jala na
serep marroha, asa dapotan hasonangan tondimuna.” I do sahatna.
Antong, rap mangido gogo ma hita tu Debata.
H : Ale Tuhan Debata sai pargogoi ma hami mangulahon na hombar tu
patikMi. Amen.

6. Marende BE No. 481 : 1 - 2 “GODANG DOPE” BL 325.

♫♪♫
Godang dope siguruhononMi asa tudos ho dohot Tuhanmi. Sai tong na
hurang hatigoranmi, so tuk dope haporseaonmi. Dirim sambing dihaholongi
ho, donganmu laos dihalupahon ho.
(Jongjong)
♫♪♫
Tuhanta Jesus tiruanmu do, na holong roha di au nang di ho. Ai diseahon
do diriNa i singkatta lao tu hamatean i. Ndang na dialang holong roha i, ai
naeng di hita hangoluan i.

7. TANGIANG MANOPOTI DOSA DOHOT BAGABAGA:

U : Tatopoti ma dosanta, martangiang ma hita: Ale Amanami jala Debatanami, na
di banua ginjang, Pargogo na so hatudosan! Pardengganbasa do Ho, jala ro di
salelenglelengna do asi ni rohaM. Sai marpamuati ma rohaM di
hajahatonnami, jala sai unang be ingot angka dosanami. Ai jotjot do hami
mardosa maradophon Ho, jala jotjot do husungguli hami rimasMu marhite
sian pangalaosionnami, di hataM. Ale Tuhan Jahowa, sai unang paingotingot
pangalaosionnami, unang alang asi ni rohaM, sai urupi ma hami, Ho ale
Tuhan Debata hatuaonnami, palua hami, jala sesa dosanami, ala ni AnakMu,
Tuhan Jesus Kristus, Tuhannami. Amen.

3
 Tabege ma bagabaga taringot tu hasesaan ni dosanta! Songon on do Hata
ni Tuhan Jesus: Ro ma hamu tu Ahu, hamu angka na loja jala na sorat,
hupasonang pe hamu. Buat hamu ma augangKu tu hamu, guruhon hamu ma
sian Ahu, ai na lambok do Ahu jala na serep marroha, asa dapotan hasonangan
tondimuna. Ai lambok do augangKu jala neang do dohot na hupaporsanhon.
Hasangapon ma di Debata na di ginjang!
U + H : Amen
(Hundul)
8. Marende BE HKBP No. 699: 1 + 4 “SINGKOP DO ASI NI ROHAM” BL
699.
♫♪♫
Singkop so asi ni rohaM tu au na dangol on. Na lilu ahu na hinan
nuaeng jumpang do.
♫♪♫
Hutiop bagabagaMi di pardalananhi. Ho Tuhan lombulombungki di
paraloan i.

9. E P I S T E L:
U : Tangihon hamu ma Hata ni Debata turpuk Epistel di Minggunta sadari on,
tarsurat di 1 Korint 1 : 26 – 31! Bereng hamu ma, angka dongan, panjouonNa
di hamu: Ndang piga hamu na bisuk mangihuthon sibuk, ndang piga na gogo,
ndang piga na sangap hian.
H : Alai na oto di roha ni portibi on dipillit Debata, laho pailahon angka na
bisuk; jala na gale di portibi on dipillit Debata, laho pailahon na gogo.
U : Angka na teuk di portibi on jala na marlea dipillit Debata: Tung sisoada i do,
asa soadahononNa naung jongjong hian,
H : Asa unang manenganenga agia ise jolma maradophon Debata.
U : Alai sian Ibana do umbahen na di bagasan Kristus Jesus hamu, ai Ibana do
gabe habisuhon di hita sian Debata dohot hatigoran dohot habadiaon dohot
haluaon.
H : Asa saut na tarsurat i: "Na naeng mamuji dirina, mangasahon Tuhan i
ma ibana mamuji!"
U : I do sahatna. Martua do angka na tumangihon Hata ni Debata jala na
umpeopsa. Amen.

10. RENUNGAN SITUASIONAL

U : Huria ni Tuhanta! Di bagasan unduk dohot ungkap ni roha, tama do
rimanganta jala pahusorhusoron ni rohanta pambahenan ni Debata
maradophon huriaNa. Nunga saratus lima pulu taon naung ojak HKBP
4
 Simangumban on. Molo tauji mangarimangrimangi pardalanan ni
hurianta, ndang tarpajojor hita marhitehite hata. Alai dohononta ma: ia
bolas pe mardalan jala patuduhon panghobasionna huria on sahat tu
sadari on, saluhut na i, ima ala asi dohot holong ni roha ni Debata
sambing do. Marragam do naung niulana, marsingkat sorin nang
pangula na olo mamelehon rohana laho patulushon nasa ulaon di
angka tingki na maubauba. Ragam angka pangalaho dohot partingkian
na binolus jala na niadopanna saleleng saratus lima pulu taon on.
Molo tatimbangi tupa dohononta ma: Godang na i angka hamaolon,
parsorion dohot parungkilon na binolus ni huriaNa. Alai taparhatopot
do paboa naung godang angka na uli na denggan na pinarbuehonna.
Antong molo diloas Debata hita mangolophon i sadari on tama ma
hita mangendehon :
H : (Mangendehon) BE No.753 “Dipardalanan Jesus di jololungku”
♫♪♫
Dipardalanan Jesus dijolongku holong ni tanganMi manogu au.
U : Tama do tapasahat hamauliateon ni rohanta tu Debata ala nunga
ditogihon Ibana angka halak Batak Kristen na maringanan di luat on
laho pajongjong huria. Nuaeng, nunga saratus lima pulu taon lelengna
naung jongjong huria on, jala dipatuduhon Debata do tu hita
marhitehite ulaonta sadari on i ma Pesta Jubileum dohot Mameakhon
Batu Ojahan ni huria on.
H :(Mangendehon)BE No.753 “Dipardalanan Jesus dingolungku”
♫♪♫
Nang di ngoluku Ho do sombaongku. Tung sonang mardalan
raphon Ho.
U : Tahalashon do tongtong haringgason ni angka parhalado na parjolo i,
na marhobas di huria on, na marsitutu mamaritahon Barita na Uli. Jala
ala ni asi ni roha ni Debata lam torop ma na manjalo Pandidion na
Badia, gabe lam torop angka na mangihuthon Kristus diluat on.
H :(Mangendehon)BE No.753 “Dipardalanan Jesus dingolungku”
♫♪♫
Dipardalanan Jesus di jolongku. Holong ni tanganMi manogu au.
Nang di ngoluku Ho do sombaongku. Tung sonang mardalan
5
 raphon Ho. Huboto do tangkas panoguonMu, diiringiring Ho do
langkangki. Sahat ro di ujung ni pardalanku togu ma au jonok tu
lambungMi.
U : Na marolopolop do hita sadari on. Nunga tajalo denggan basa
dohot asi ni roha ni Debata. Naeng ma tongtong rade rohanta
mangarangguthon asi ni rohaNa i. Anggiat i mangonjar ngolunta
lam marsitutu jala bulus mulaulaon, papatarhon panghobasion na
lam tu ampitna marhite ulaon Koinonia, Marturia dohot Diakonia.
Tapatupa ma i laho mangonjar hita borhat paimbaru diri, paimbaru
panghobasion dompak jolo. Songon na nidok di I Korint 15:58,
”Onpe, hamu angka donganku na hinaholongan, marsihohot jala so
mubauba ma hamu, jala lam sumurung ma tongtong di bagasan
ulaon ni Tuhan i, ai diboto hamu do: Ndang magopo halojaonmuna
di bagasan Tuhan i.”

11. Marende BE HKBP No. 471: 1 + 3 “HUPILLIT JESUS DONGANHI” BL

318.
♫♪♫
Hupilit Jesus donganhi lao mangoloi Ibana. Nang muruk pe torop disi
labangku do Ibana. Di Ho ngolungku ro diajalhu, Jesus di Ho au mate,
mangolu. Di Ho ngolungku ro diajalhu, Jesus di Ho au mate, mangolu.
(Jongjong)
♫♪♫
Rohangku baen ingananMi, patiur ma langkangku. Huhatindanghon ma disi
Ho Jesus palitongku. Di Ho ngolungku ro diajalhu, Jesus di Ho au, mate,
mangolu. Di Ho ngolungku ro diajalhu, Jesus di Ho au, mate, mangolu.

12. MANGHATINDANGHON HAPORSEAON:

U : Tahatindanghon ma haporseaonta i, songon na hinatindanghon ni donganta
sahaporseaon di sandok portibi on. Rap ma hita mandok:
H : Ahu Porsea di Debata Jahowa….. d.u.
(Hundul)

13. TINGTING
14. MANJAHA SEJARAH RINGKAS NI HURIA: PANITIA

6
15. Marende BE HKBP No. 232 : 1…“SIAN SUDE PARULIAN NA ARGA” B
L 116. (Pelean Ia, Ib).
♫♪♫
Sian sude parulian na arga, sada huboto, hutiop tongtong. Jesus Tuhanhu
Ho arta na arga na mangatasi sudena antong. Tangkup Tuhanmu tung tiop
hataNa, sai pangasahon ma bagabagaNa.
♫♪♫
Naeng ho pistar? Sai dapothon Tuhanmu, nasa na hurang sai boan tusi. Tu
pamodaiNa paunduk rohamu, asa tiur sasude bogasMi. Tangkup Tuhanmu tung
tiop hataNa, sai pangasahon ma bagabagaNa.
------Musik-------
♫♪♫
Naeng ho tigor?Pangasahon Tuhanmu, na tuminggalhon sangapNa sude.
Na gabe jolma pasaehon dosamu, golom ma, aithon panghophopNa i. Tangkup
Tuhanmu tung tiop hataNa, sai pangasahon ma bagabagaNa.
♫♪♫
Naeng ho mangolu salelenglelengna? Di Tuhan Jesus do jumpang ho i.
Nunga torang ditaluhon sibolis nang hamatean sigomgom sude. Tangkup
Tuhanmu tung tiop hataNa, sai pangasahon ma bagabagaNa.
------Musik-------
♫♪♫
Jesus Tuhanhu sai Ho huhaposi, pataridahon tu au holongMi. Pangidoanhu
tu Ho sai tangihon, basabasahon tu au ngoluMi. Asa di Ho au di harajaonMu,
lao patulushon pasauthon hataMu.

16. J A M I T A: Job 12 : 13 – 25

17. Marende BE HKBP No. 288:1…“NA MARGURU DO LUHUTNA” BL 96

(Pelean II)

♫♪♫
Na marguru do luhutna di Jahowa Debatanta dohot panumpakNa i. Nasa
na marpos ni roha, na manghirim di Jahowa i do na martua.
♫♪♫
Na marmudu na sailaon au umbaen marhatuaon, Debatangku i tongtong. Na
ture manogu ahu mian do tongtong di ahu, dohot tu joloan on.
-----Musik-----
♫♪♫
Lan do dipasari jolma na so tau hasonanganna jala na so hot muse. Anggo
sangkap ni rohangku Debata naeng haposanhu, na manompa sasude.
♫♪♫
Pangkirimon do pasonang roha ni na marhaposan tu Jahowa Debata. Ai tu
asi ni rohaNa hupasahat do sudena. Sai dibaen do na tama.
-----Musik-----
♫♪♫
Debata do na umboto na ture di au na oto, na martingki do sude. Tung
Ibana ajaranhu ? Tagonan undukhononhu nasa sibaenonNa pe.

7
 ♫♪♫
Tingki ni ariaringku guru do di Debatangku, sai rohaNa ma na saut. Asal
sahat au tu surgo lao tusi do au manggogo songon batang aek tu laut.

18. MAMEAKHON BATU OJAHAN

(Uju marende, tu jolo ma Ompui Ephorus & Praeses. Sude ruas jongjong di
inganan na be, Uluan Huria, Ketua Panitia, sude Parhalado dohot Pandita
Ressort jongjong di jolo ni ruas mandompakhon Ompui Ephorus)
a. Marende : BE No. 184 : 1 “Aut na saribu hali ganda” (BL. 103)
Nunga tung jumpang au ojahan ni tondingki na mago i. Mudar ni Jesus
do manahan saleleng ni lelengna i. Nang mago pe portibi on tongtong do
hot ojahan on.
b. Patujolo:
Ephorus:
Huria ni Tuhanta, nuaeng sahat ma hita tu acara Mameakhon Batu Ojahan
ni Huria Kristen Batak Protestan Simangumban on. Ari on do na jinadihon
ni Jahowa, marolopolop jala marlas ni roha ma hita disi. Haleluya.
c. AGENDA:
1. Ephorus Manjaha Psalmen 122:1-9.
1. Ende hananangkok sian si Daud. Las do rohangku di angka na
mandok tu ahu: Beta hita manopot bagas ni Jahowa!
2. Nunga jongjong patnami di angka bahalmi, ale Jerusalem!
3. Ale Jerusalem, naung pinauli songon huta na tipak marrapitrapit
gabe sada.
4. Nangkok do tusi angka marga, angka marga ni Jahowa, bahen
panindangion di Israel, laho mamuji goar ni Jahowa.
5. Ai tusi do dipajongjong angka habangsa paruhuman, angka
habangsa di pinompar ni si Daud.
6. Sai pangido hamu ma hadameon di Jerusalem, sai mardohar ma
angka na mangkaholongi ho!
7. Sai masa ma hadameon di bagasan parikmu, hasonangan ma di
bagasan jabum angka na bolon!
8
8. Ala ni angka hahaanggingku dohot alealengku sai dohononku do:
Hadameon ma di bagasan ho.
9. Ala ni bagas ni Jahowa, Debatanta i, sai haringkothononku do na
denggan di ho.

2. Liturgi :
Liturgi I : Ompui Ephorus.
Dung i tarsunggul ma si Jakob sian na modom i, jadi didok ma:
Inganan ni Jahowa do on hape, so pamotoanhu. Jadi mabiar ma
ibana, ninna ma: na songkal situtu do inganan on, ndang tarbahen so
on bagas ni Debata, jala baba pintu ni langit. Dung i hehe ma si
Jakob sogot manogotna i dibuat ma batu pinarhalanguluna i, jala
dipajongjong baen partinandaan, jala diusehon miak tu ginjangna.
Dung i dibahen ma goar ni inganan i Betel ( bagas ni Debata ). Lus
do goar ni huta i ianggo na sai laon. Dung i marbagabaga ma si
Jakob ninna do: Molo didongani jala diramoti Debata ahu di dalan na
hudalani on, jala dilehon di ahu sagusagu dohot ulos
siparuloshononhon, jala marsonangsonang ahu mulak ditogihon tu
bagas ni Damang, sai Jahowa ma Debatangku. Jala batu na
hupajongjong on bahen partinandaan, i ma gabe bagas ni Debata,
jala sude na nilehonMu tu ahu parsampuluonku ma i tu Ho (1 Musa
28:16-22).
Tangiang:
Ale Amanami jala Debatanami na maringanan di banua ginjang.
Nang pe so hahaliangan langit ni langitan dohot tano on Ho, alai
tong do diparsinta rohaM joroM di tano on, inganan panjouon di
GoarMu na badia i. Ditangihon Ho do parhurajaon ni naposoM raja
Daud uju i, i ma na boi pajongjongon ni anakna raja Salomo bagas
joroM i. Songon panangihonMu di parhurajaon ni naposoM raja
Daud i, laos songon i ma tangihon elekeleknami on: Sai patulus ma

9
jongjong joroM di inganan on. Hupangido hami i di bagasan Goar ni
AnakMu Tuhan Jesus Kristus Tuhannami. Amen.
Liturgi II : Praeses HKBP Distrik II Silindung
Dibahen i songon on do hata ni Tuhan Jahowa: Ida ma, Ahu
paojakhon di Sion sada batu, batu na niuji, sada batu parsuhi na arga
bahen ojahan na hot; manang ise na porsea di Ibana, ndang tagamon
maporus. (Jesaya 28:16).
Tangiang:
Ale Tuhannami Tuhan Jesus Kristus, Anak ni Ama na mangolu jala
Pargogo na so hatudosan i. Ho do sillam ni hasangapon ni Ama i
dohot suman ni hadirionNa; Ho do batu parsuhi na marpili jala na
arga dohot ojahan na hot. Na mangido ma hami tu Ho: pahot ma batu
parsuhi na naeng peakhononnami di bagasan GoarMu na badia i.
Songon Ho Mula dohot Ujung ni nasa na adong, laos Ho ma na
mamulai, patorushon dohot na paujunghon ulaon on, na hupungka
hami tau hasangapon dohot hamuliaon di GoarMu na badia i.
Hupasahat hami pangidoannami on tu Ho ale Tuhannami, ai Ho do
Tuhan na mangolu jala na sintong, na mangarajai rap dohot Ama
dohot Tondi Parbadia, ro di saleleng ni lelengna. Amen.
Liturgi III : Kepala Biro Jemaat.
Asa ndada be angka paisolat manang panginsua hamu; angka dongan
saharajaon raphon angka na badia do, jala dongan sabagas ni Debata.
Ai dipauliuli do hamu di atas ojahan ni angka Apostel dohot
Panurirang; Jesus Kristus sandiri do batu parsuhi disi. Di bagasan
Ibana do martomu sandok bagas i jala lam ganda, gabe joro na badia
di bagasan Tuhan i. Di bagasan Ibana do nang hamu rap dipauliuli,
gabe parmianan ni Debata di bagasan Tondi i. (Epesus 2:19-22).
Tangiang:
Ale Tuhan Debata Amanami na di banua ginjang. Diparade Ho do
parmianan ni hamuliaonMu na hot sian punguan ni angka na badia i.
Lehon ma pangurupionMu dohot pasupasuM di na pajongjonghon
10
 bagas joroM on. Sai pauli ma nang hami songon angka batu na
mangolu gabe bagas partondion jala joro na hot, parmianan ni
hamuliaonMu. Hupangido hami i di bagasan Goar ni AnakMu Tuhan
Jesus Kristus Tuhannami. Amen.
d. Marende : BE No. 102 : 5 “O Tondi Parbadia i, bongoti” (BL.
206)
Ho batu mamak na togu, na tau ojahan situtu paojak rohanami tu Hata
Hasintongan i. Tung unang olo lilu be nang sada sian hami. Lehon roha na
tumogu, na umburju manggoari Jesus Kristus Tuhannami.

e. Manjaha Surat Parpadanan (Pandita HKBP Ressort Simangumban)

(Dung sidung pandohan: “Na marpadan do hami di adopan ni Debata
dohot di jolo ni portibi on songon on;” rap ma na sahuria mandok):
1. Hot do hami marojahan jala marpangguruan tu
hasintongan dohot tu poda na sian hata ni Debata angka na
tarsurat di buku na di Batu Ojahan na hupeakhon hami on.
2. Ingkon tonahononnami, ajarhononnami, podahononnami
tu angka pinomparnami, ro di sundut na umposo sogot asa
hot nasida manghabiari Debata Ama Parasiroha i, dohot
manghaporseai Tuhan Jesus Kristus Sipalua i, marhite na
manjalo Tondi Parbadia i.
3. Ingkon tonahononnami na so jadi ramunan ni
pinomparnami Gareja on, jala ingkon tongtong do
jagahononnami habadiaon ni joro on.
4. Ingkon pinsangonnami do nasa halak na mambahen na so
jadi, mangaroai, na mangaramuni bagas Gareja on, songon
i dohot pekaranganna.
5. Marhite naung dipeakhon Batu Ojahan on sahat ma
parnampunaonna tu HKBP Hatopan, hombar tu aturan
dohot peraturan ni HKBP.

f. Marende sian BE No. 184 : 6 “Nunga Tung Jumpang Au Ojahan”

(BL. 103)
11
 (Tingki na marende, dipamasuk ma poti Batu Ojahan
tu inganan naung diparade hian)

Ojahan on do ingananhu saleleng au di tano on. Sai i ma

hangoluhononhu saleleng so tos hosangkon. Tongtong do sipujionki
Tuhanku Sipangolu i.

g. Mameakhon Batu Ojahan.

(Dipeakhon ma batu ojahan i mangihuthon na somal. Di tingki tangiang na
mangihut on tongkohon ni Ephorus ma tolu hali batu ojahan i. Tanda +:
Panongkohon)
EPHORUS:
Di bagasan haporseaon di Tuhan Jesus Kristus, pineakhon batu on gabe
ojahan. Di bagasan Goar ni + Ama, + Anak, dohot + Tondi Parbadia.
Anggiat ma mian tongtong dison: Haporseaon na sintong, biar mida
Jahowa dohot holong ni roha. Tau inganan partangiangan na
pinarbadiaan ma on, laho manjou dohot mamuji Goar ni Tuhanta Tuhan
Jesus Kristus, na mangolu jala na mangarajai rap dohot Ama i dohot
Tondi Parbadia, ro di saleleng ni lelengna. Amen
h. Marende : BE No. 233 : 6: “Turena i manodo Tuhan Jesus”BL.
241
Sai tong ma au ojak di gomgomanMu ale Parmahan na sun denggan i.
Anggiat tau au tu hasonanganMu pinaimbaru ni panghophopMi. Marlas
ni roha situtu au mangihuthon Siparmahan na burju.
i.Tangiang Batu Ojahan :
EPHORUS:
Ale Tuhan Debata, Amanami na sumurung, na marhabangsa di Banua
ginjang, nunga hupeakhon hami Batu Ojahan ni Gareja on di toru ni
langgatan on, songon sada partanda do i paboa, Ho sandiri do Ojahan ni
Haporseaonnami jala na marpadan do hami di joloM, paboa na
marsihohot do hami marhaporseaon tu Ho. Alani i, sai pahot ma
12
 haporseaonnami ganup tingki asa unang muramura mimbar
dipalindaklindak poda angka na marragam i, manang aha pe na masa, las
ni roha arsak pe, Ho tongtong hutiop hami. Sai sungguli ma hami, angka
na metmet, naposobulung, ro di angka na matua, asa lam hehe rohanami
mangoloi Ho. Sai HataMi ma sulusulu di patnami, jala hatiuron di
dalannami. Antong, sai hot ma Ojahan ni Haporseonnami be, di tingki on
nang tu angka na ro on. Amen.
j. Marende : BE No. 30 : 4 “Jesus lehon hatorangan” (BL. 135)
(Uju marende, mulak ma tu ingananna be Panitia, Parhalado, laos
marluhut ma angka Pandita tu siamun dohot hambirang ni Ephorus di
langgatan laho manutup parmingguon)
Sai tangihon, ale Tuhan molo martangiang hami be tu Ho. Pasupasu
marlobian, lehononMu tu na ro manopot Ho. Sai dongani nama hami
asa hot di parpadanan, mian hami sahat ro tu hasonangan.
19. Tangiang Pelean, Pasupasu :
U : Tatangianghon ma peleanta. Ale Debata, Amanami na di banua ginjang! Ho
do haroroan ni saluhut silehonlehon na denggan dohot nasa ulibasa na
mauliutus. Hupasahat hami ma sian na nilehonMi tu hami, peleannami tu Ho.
Sai jalo ma i gabe uap na hushus di joloM. Pasupasu ma i jala ramoti asa
huparhaseang hami pelean on, patimbulhon harajaonMu di tongatonga ni
huriaM dohot di portibi on. Buhai ma rohanami marhitehite TondiM, asa lam
hutanda hami godang ni silehonlehonMi tu hami, asa lam girgir hami mandok
mauliate tu Ho, marhitehite Jesus Kristus Tuhannami. Amen.
H : (Mangendehon) BE. HKBP No. 204 : 2 “NDANG TADINGHONONHU
HO” BL 73.
♫♪♫
Nasa na nilehonMi, tondi ro di pamatanghu, hosa dohot gogongki, ro di
saluhut artangku. Hupasahat i tu Ho, na so unsatonhu do.
U : Ale Amanami na di banua ginjang! Sai pinarbadia ma GoarMu! Sai ro ma
harajaonMu! Sai saut ma lomo ni rohaM di banua tonga on songon na di
banua ginjang! Lehon ma tu hami sadari on hangoluan siapari! Sesa ma
dosanami songon panesanami di dosa ni dongan na mardosa tu hami! Unang
hami togihon tu pangunjunan! Palua ma hami sian pangago!
H : (Mangendehon): BE HKBP No. 841 : 1 “AI HO DO NAMPUNA
HARAJAON” BL 841.

13
♫♪♫
Ai Ho do nampuna harajaon, dohot hagogoon, ro di hasangapon saleleng ni
lelengna. Amen.

U : Tangiang Pasupasu

H : (Mangendehon ) BE No. 845 : 1 “AMEN, AMEN, AMEN” BL 845

Amen, Amen, Amen.

IV. MARFOTO.
1. EPHORUS DOHOT PANGULA NA GOK TINGKI.
2. EPHORUS DOHOT PARHALADO RAP DOHOT PANITIA.
V. ACARA PESTA.

14