ACARA KEBAKTIAN PARNINGOTAN

ARI HANANAEK NI TUHAN JESUS KRISTUS

Kamis, 18 Mei 2023 DI GKI SUMUT BATUBINUMBUN
Turpuk: “”
U: Uluan ( Siboan Minggu) R: Ruas M: Malim (Imam)

1. Pangaradeon (Jou-Jou tu Parsombaon)

U : Hamuna angka dongan sahaporseaon! Na marpungu do hita sadari on
manghalashon parningotan hananaek ni Tuhan Jesus tu banua ginjang. Na
manaek do Ibana laho hundul di siamun ni Debata AmaNa paradehon inganan di
hita halak na porsea. Na mulak do Tuhanta i tu haroroanNa hian dung dipasidung
ulaonNa di portibi on patupahon haluaon di hita halak na porsea. Na ro do Ibana
muse mangalap hita laho manean hangoluan na manongtong na pinaradeNa i.
Antong! Tapahibul ma rohanta marsaor dohot Ibana. Tasombahon ma ende
pujipujianta marhite na taendehon. Marende ma hita!
Marende . B.E. 99 O ulubalang na Gogo BL. 206
1. O ulubalang na gogo Songon sadari on do Ho manaek tu hasangapon
Naung sidung do ulaonMi Na ringkot patupaonMi Humophop hajolmaon
Sabam, tongam do Ho muli tu na uli Marhabangsa Disiamun ni Jahowa
3. O Jesus Ho do ulu ni Luhutna na porsea i RuasMu anggo hami
Ho hangoluannami on Ho hasonangannami on Ho hagogoonnami.
Suru, togu Rohanami, asa hami mangalehon Tu Ho nasa hasangapon.
2. Votum + Tabe
U: Huria na hinaholongan dibagasan Jesus Kristus,na marpungu do hita nuaeng
dibagas Joro on patupahon parsombaonta sadarion ima Pesta Parningotan ari
Hananaek ni Tuhan Jesus Kristus, hombar tu na tarsurat i. Masuk ma hita pap ma
hita mangauhon jala tahatindangkon: Ianggo pangurupion di hita, holan dibagasan
goar ni Jahowa na manopa langit dohot tano on. Asi ni roha na sian debata Ama,
dohot holong na sian AnakNa, Tuhan Jesus Kristus mengaramoti hita saluhutna.
Amen

3. Introitus / jamita patujolo

U: Hata ni Debata nagabe jamita patujolo dibagasan parsaoranta, dienet do sian
Lukas 24:50-53:
R: Jadi ditogihon Ibana ma nasida ruar tungkan Betania, dung i dipaherbang ma
tanganna mamasumasu nasida.
U: Jadi di na mamasumasu nasida Ibana, sirang ma Ibana sian nasida jala
tarhindat tu ginjang.
R: Dung i disomba nasida ma Ibana jala mulak tu huta Jerusalem, marlas ni roha
situtu.
U: Jadi tongtong ma nasida di joro i mamujimuji Debata.

1. Merende Be no. 101 Taiti Gogo Ihut Tu Ho BL. 27

1
1. Taiti gogo ihut tu Ho Palungun rohanami
Tu surgo i ingananMi O Jesus Tuhannami.
2. Togu tongtong ma hami on Di dalanMi tu surgo .
Anggo so i oloanMi Sai saut do hami mago

2. A. manopoti dosa
U: Hamu angka dongan sahaporseaon, di Ari Parningotan Hananaek ni Tuhanta
Jesus Kristus sadari on, denggan do molo tapaunduk rohanta laho marningot
angka pambahenanta na sailaon. Godang do angka dosa na tabahen,
marhitehite pingkiran, panghataion dohot marhitehite pambahenanta
maradophon Tuhanta Debata, dohot tu donganta jolma. Na manaek do
Tuhanta tu harajaonna laho mangondihon hita tu Ama i. Na hundul do Ibana di
siamun ni Debata Ama, laho manguhumi halak pardosa. Nasa na porsea di
Ibana, na mangongkuhon angka dosana dapotan hasesaan ni dosa, jala nasa
na porsea di Ibana hona uhum. Alani i, di na jongjong hita nuaeng di adopan
ni Debata taboan be ma angka dosanta jala ta pangidoma hasesaan ni dosa
sian Ibana.
(Ganup pribadi martangiang nahohom)
U: Ale Tuhan Debata Amanami na di banua ginjang! Ho do na patupahon
hasesaan ni dosa di hami halak na dangol on marhite Anak haholongan ni
rohaM naung manaek tu banua ginjang mangondihon hami jolma pardosa.
R: Ale Tuhan! Tung balga do holongMu di hami, ndang tarasam hami marhite
sere dohot perak. Nuaeng rodo hami di adopanMu manopoti sude dosa nami
na godang i, asi ma rohaM di hami. Ramun situtu do ngolu nami alani parulan
nami na so ture. Songon ama, ina, ianakhon hami di ruma tangga, sipata
ndang Ho be hubahen hami ojahan dohot sitiruon – nunga jumotjotan hami
marojahan tu gogo, hamaloon dohot pingkiran nami sandiri. Di angka
hamaolon na huadopi hami- jotjotan pingkiran hupangasahon hami, di angka
na mangalului ngolu-ngolu- jotjotan hamaloon hupangasahon hami. Ale
Tuhan, disaluhut angka dosa na hu ulahon hami mangido ma hami tu Ho.
U: Asi ma rohaM di hami, angka na mangarsakhon dosanami. Nuaeng pe nunga
ro hami tu adopanMu. Sai rap dohot Ho ma hami, jala hami ma di Ho.
R: Molo ro hami nuaeng tu adopanMu Tuhan! Tangihon ma pangi-doannami, sai
patinggil ma pinggolMu tumangihon soara dohot hoihoinami. Nunga marroha
pamuation Ho mida hami jolma pardosa on. Tangihon ma tangiangnami na
tedek di adopanMu na badia i.

B. Marende : B.E. No. 98 Naung manaek do Ho BL. 59

1. Naung manaek do Ho Lao tu surgo do Ale Jesus Rajanami,
Ho do ihuthononnami Ho partogi i Lao tu surgo i.
2. Maol do dalan on Togu hami on Asa tung malua hami
Sian angka musunami Na di tano on Togu hami on
3. Barita hasesaan ni Dosa.

2
U: Hamuna angka dongan na hinaholongan ni Tuhan Jesus naung manaek tu
banua ginjang i: Tajangkon jala tahangoluhon ma baga-baga ni Debata taringot tu
hasesaan ni dosanta: “Molo tung adong manang ise na mardosa, adong do
pangondianta di Ama i, i ma Tuhanta Jesus Kristus na tigor roha i. Jala Ibana do
Pardengganan taringot tu dosanta, alai ndada holan taringot tu dosanta, dohot do
taringot tu dosa ni portibi on”. (1 Johennes 2:1b-2)

R: Marende B.E No.99 O ULUBALANG NA GOGO BL. 206

4. Sai taiti rohanami on Urupi hami on tongtong Mangalo dosanami
Paias rohanami be Parangenami baen ture Nang pangkataionnami.
Tompa roha Na imbaru asa haru monang hami Maralohon dosanami.
5. Pabulus langkanami be Patigor dalannami pe Lao tu banuaginjang
O Jesus tatap hami on Na so tarbaen di tano on Mardame manang sonang
Sonang, monang Di lambungMu bahenonMu hami sogot Dung tu surgo hami
bongot.

4. Tudu-tudu Ngolu na Imbaru

U: Tabegema hata ni Debata na gabe tudu-tudu Ngolu naimbaru dibagasan
mingguntaon, natotong paingothon hita dinamangulahon hataNa i dibagasan
ngolunnta di ari nanaeng ro, di enet do sian Yesaya 55:6-7 :Sai lulu i hamu
ma Jahowa, binsan tarbahen dope jumpang ibana; jou hamu ma ibana, binsan
jonok dope ibana. Sai ditadingkon halak parjahat i ma dalanna, jala jolma
pargeduk i, angka sangkapna, sai mulak ma ibana tu Jahowa, asa
marpangulahi rohana mida ibana; dohot tu Debatanta, ai buas do rohana
manalesei.

R: Marende BE.541. Logu.373 : Na mulak Jesus i.

1. Na mulak Jesus i di dihasangapon i.
Mangalap nabadia i tu hasonangan i.
Hutundalhon ma, na dipudingki.
Jesus ma haposanki di haroroNa i.
2. So tung na tading au di haroroNa i,
So tung ditiop rohangkon na olo sega i!
Hutundalhon ma, na dipudingki.
Jesus ma haposanki di haroroNa i.
6. Hugolom mudar ni Tuhanku Jesus i.
Ai i do haporusanki di haroroanNa i.
Hutundalhon ma…
5. Tangiang pangondian (Uluan)

6. Pasahtaton pelean

3
 a. Majaha hata ni Debata (Malim)
Ruas nahinaholongan dibagasan goarni Tuhanta Jesus Kristus, sangonari dilehon
do tu hita tinggki laho pasahatton peleanta tu Debata. Alai jumolo ma tabege hata ni
Debata nagabe ojahan di hita napasahatton pelean tu Debata. Ima dienet sian
Heber 13:15-16; Marhitehite Ibana ma tapelehon tongtong tu Debata pelean
pujipujian, i ma parbue ni bibir, angka na marhatopothon Goarna. Alai unang ma
lupa hamu, mambahen na denggan dohot mangulahon asi ni roha; ai dihalomohon
Debata do angka pelean na songon i.

b. Merende be.522 logu.359 : Surgo I Sambulonta Do I. BL. 359

1. surgo i sambulonta do i, ndang adong be siaeon disi,
Na mamuji tongtong na disi, pinaluani Tuhanta i.
Surgo i, surgo i, ndang adong be siaeon disi,
Surgo i, surgo i, surgo i, Ndang adong be siaeon disi.
2. Na marloksa naung sahat tusi, tu inganan na sai denggan i. Aut naung ro
domu ma au dohot i, gok las ni rohangku disi. Surgo i, surgo i……..
3. Na mangkirim rohangku dison, paima sahat tusi nang au on. Taiti au, ale
Tuhan tusi, asa rap dohot Ho au disi. Surgo i, surgo i……..

c. Tangiang pasahatton pelean (Malim)

7. Manjaha hatani Debata dohot Jamita

a. Majaha hata ni Debata
M: Hata ni debata nanaeng sibegeonta dibagasan mingguta sadarion, dienetdo sian
Ulaon ni Apostel 1: 1-11; Nunga sidung nian hubahen, ale Teopilus, barita na
parjolo i, taringot tu saluhut ulaon dohot poda na pinungka ni Jesus,
R: sahat ro di ari hahihinsatna, dung jolo dipatihi Ibana marhitehite Tondi Parbadia
angka apostel na pinillitna i.
M: Dung salpu haporsuhon na tinaonna i, dipatandaphon do dirina mangolu tu nasida
marhitehite lan tanda, i ma na pinataridahonna dirina tu nasida leleng ni opatpulu
ari, dohot mangkatahon taringot tu harajaon ni Debata.
R: Jadi di na domu Ibana dohot nasida, dipatihi ma, na so jadi meret nasida sian
Jerusalem, so jolo dipaima bagabaga ni Ama i, na binegemuna i sian Ahu, ninna.
M: Ai aek do dididihon si Johannes i; alai Tondi Parbadia do didihononhon tu hamu,
ndang pola piga ari nari!
R: Laos disungkun angka na pungu i ma Ibana, angka ninna ma: Pajongjongonmu
ma saonari, ale Tuhan, Harajaon i di Israel?
M: Alai ninna ma mandok nasida: Ndang ro di hamu i, umboto taonna manang
ombasna; na binuhul ni Ama i guru di huasona sambing.
R: Alai jaloonmuna do hagogoon ni Tondi Parbadia na songgop tu hamu, gabe
sitindangingku ma hamu di Jerusalem dohot di sandok Judea dohot di Samaria,
sahat ro di ujung ni tano on.

4
M: Jadi dung didok songon i, tarhinsat ma Ibana dipanotnoti nasida: Dung i diholipi
ombun i ma Ibana sian jolo ni matanasida.
R: Di na tinuluthon nasida dope Ibana na laho i tu ginjang, nunga jongjong di
lambungnasida dua halak parulos na marlinanglinang.
M: Angka na mandok: O hamu halak Galilea, aha ma sai jongjong hamu mamerengi
dompak ginjang? Anggo Jesus i, na tarhinsat sian lambungmuna tu banua
ginjang i, na ro do Ibana sogot, songon na niidamuna Ibana laho dompak banua
ginjang i. Amen. martua ma halak naumbege Hata ni Debata, na umpeopsa jala
namangulahon diabagasan ngolu singanup ari. Haleluya .
R: Mengendehon : Haleluya. Haleluya. Haleluya.

b. Jamita
U: Ayat jamita : Asa anggo Tuhan i, dung mangkatai Ibana dohot nasida, tarhinsat
ma tu banua ginjang, laho hundul tu siamun ni Debata. Alai laho do
anggo nasida manjamitahon barita na uli tu ganup luat; jala diurupi
Tuhan i ma nasida, dipahot ma jamita nasida marhitehite tanda
angka na mangihut i.
(Markus 16:19-20)
Turpuk ni Jamita: Jesus Kristus tarhinsat tu banua ginjang, Laho ma hamu tu
liat portibi on; jamitahon hamu ma barita na uli.
Tangiang dung simpul jamita (ditutup dohot tangiang ale amanami)
10. Marende BE. 518 : 1 “Marsinondang Dibaen”
1. Marsinondang di baen Jesus asi ni rohana i, jala hita do di suru, asa ta
paboa i. Tapagalak palintonta, tapatiur dalan i, ai torop do pe na lilu, sai
hatop ma mulak i.

4. Dongan sotung mintop lampu na ringkot tu dongan i, sotung mago angka

jolma di baen halembaonmi. Tapagalak palintonta, tapatiur dalan i, ai torop
do pe na lilu, sai hatop ma mulak i.
11. Manghatindangkon haporseaon
Ahu porsea di Debata Ama na sungogo, sitompa langit dohot tano., Ahu porsea
di Jesus Kristus, Anakna sasadai ima Tuhanta. Najinangkon sian tondi
porbadia tubu sian namarbaju si Maria. Namanaon nabernit di panguhuman ni si
Pontius Latus, diparsilangkon, mate jala ditanom, tuat tu banua toru. Nahehe
sian angka namate di ari patoluhon. Na manaek tu surgo, hundul disiamun ni
Debata Ama na sungogoi. Sian ima Ibana mulak songot manguhumi angka
namangolu dohot na mate. Ahu porsea di tondi porbadia. Adong sada huria
Kristen nabadia, jala hatopan parsaoran ni angka nabadia. Dihasesaan ni Dosa.
Di haheheon ni sibuk . dohot dihangoluan na manontong. Amen.

12. Marende BE No. 354 : 1 “Sai Tong Maimaima Do”

2. Sai tong maimaima do rohanta i di Jesus. Ibana haluaon do di angka naung
tinobus.

5
 Ro do muse Tuhanta i , mardongan hasangapon i.
Sai ro ma Ho o Jesus, sai ro ma Ho o Jesus.

13. Parsuruan Tu Ngolu Siganup Ari Dohot Pasu-Pasu

U: Hamu angka dongan sahaporseaon di bagasan Goar ni Tuhan Jesus Kristus.
Na marlas ni roha do hita sadari on mamestahon; Pesta Ari Parningotan di
Hananaek ni Tuhanta Jesus Kristus.
R: I do tutu, tama do marlas ni roha hita ala diloas Tuhanta dope hita sadari on,
laho manghalashon Pesta Ari Parningotan di Hananaek ni Tuhanta tu banua
ginjang.
U: Pesta na balga do parningotan sadari on di hita, ai marhite parningotan on
naeng tangkas jala hantus di hita, ia Tuhanta Jesus Kristus naung mate jala
hehe sian hamatean i, ndang hot di portibi on. Alai mulak do Ibana tu inganan
haroroanNa hian, i ma di banua ginjang, surgo na hot ro di salelenglelengna.
Nunga disi Ibana hundul di siamun ni Debata Jahowa AmaNa i.
R: Ulina i parningotan on, di hita. Antong dia ma nuaeng pardomuan ni i dohot hita
na mangolu di partingkian on?
U: Mansai godang do pardomuan ni Hananaek ni Tuhan Jesus i, tu ngolu ni angka
na porsea, alai apala na rumingkot, i ma nunga diparade Ibana inganan na hot
di hita di surgo hasonangan, sambulo ni tondinta. Tusi ma hita lam masihol, jala
unang tarlalap hita di ngolunta sinuaeng on, manang pogos pe hita so
mardihadiha, manang panangkarnangkar di hasiangan on, manang mamora,
paradongan huhut na sangap di hajolmaon, na hipas, na marsahit, manang na
beha pe ngolunta, ingkon tu Ibana do pasahatonta i luhutna. Antong, hobas ma
hita disi.
R: Hobas do rohanami mandapothon Ho Tuhan, sai pargogoi ma hami, unang
adong hami na lalap holan manarihon ngolu portibi on, so marningot hangoluan
sogot. Ale Tuhan, parade ma di hami hangoluan sogot i, asa parjambar hami di
upa ni panghophopMi.
U: Unang be ganggu rohanta, ai nunga dibagabagahon Tuhanta Jesus Kristus i, di
na nidokNa: Manang ise na tumangihon hatangKi jala na porsea di na marsuru
Ahu, nunga sahat ibana tu hangoluan na saleleng ni lelengna, ndang pola be
ibana tu paruhuman, nunga taripar ibana sian hamatean tu hangoluan.
R: Antong pos ma rohanta disi, sai na saut do tu hita nahinirim ni rohanta be.
U: Hamuna angka dongan! Nunga tahalashon hananaek ni Tuhan Jesus tu banua
ginjang! Ndang berengonta i sian parsirangan ni jolma dohot Ibana. Alai
hananaek ni Tuhan Jesus tu banua ginjang, i ma mula ni sada tingki na imbaru,
ai nunga diparade Tuhan Jesus inganan di hita di banua ginjang i. Ndang na
magopo hita tinggal di portibi on, dilehon Tuhan Jesus do na tau siulahononta:
Borhat mamaritahon Barita nauli tu saluhut na tinompa. Taulahon ma i
dibagasan las ni roha situtu tanda ni na tasomba Ibana di pardalanan ni
ngolunta.

6
R: I do tutu! Nunga dohot hita partohap di tugas na imbaru na nilehon ni Tuhan
Jesus, asa tung margogo hita mamaritahon Barita Nauli hangoluan i, tamulai ma
sian dirinta sandiri, keluarganta nang di parsaoran siganup ari di tonga-tonga ni
masyarakat pe.
U: Mulak ma hamu tumopot bagas dohot ulaon muna be. Pos ma rohamuna,
donganan ni Tuhan Jesus do hamu mangulahon lomo ni roha ni Debata
marhite-hite Tondi Parbadia. Sangonari mulak ma hita tu ingananta ganup
tajolo ma pasu-pasu sian Debata:
“ Sai didongani jala dipasu-pasu Tuhan Debata ma hamu.
Disondangi Tuhan Debata ma bohina tu hamu, Jala asima rohaNa.
Didompakkon Tuhan Debatama bohiNa tu hamu,
jala di pasaorhon ma dameNa tu tonditmuna be. Amen

R: Mengendehon: Amen, Amen, Amen