PARTORDING NI PARMINGGUON

PESTA PARJOLO
PARNINGOTAN ARI HAHEHEON NI TUHAN JESUS

Ev. Jesaya 25 : 6 - 9 Ep. Markus 16 : 1 - 8

TOPIK :
MARLAS NI ROHA MIDA HATUAONNA I

HKBP Immanuel Metro Permata

MINGGU, 31 MARET 2024
01. Marende BE No. 96 : 1, 3 - 4 “Nunga Talu Hamatean”
 Nunga talu hamatean dibaen Tuhan Jesus i. Ai na hehe do Ibana songon
na nidokNa i. Haleluya, haleluya nunga hehe Jesus i. Haleluya, haleluya
nunga hehe Jesus i.
 Marlasroha be ma hita ala hehe Jesus i. Ai malua sude hita sian
hamagoan i. Haleluya, haleluya nunga hehe Jesus i. Haleluya, haleluya
nunga hehe Jesus i.
***Jongjong***
 Sai tapuji ma Tuhanta na marholongroha i. Tapasangap ma Ibana na
marasiroha i. Haleluya, haleluya nunga hehe Jesus i. Haleluya, haleluya
nunga hehe Jesus i.
02. Votum – Introitus – Tangiang :
U : Marhitehite Goar ni Debata Ama, dohot Goar ni AnakNa Tuhan Jesus
Kristus, dohot Goar ni Tondi Porbadia na tumompa langit dohot tano
on. Amen. Nunga hehe Tuhan i, nunga tutu hehe Ibana. Ari on do na
jinadihon ni Jahowa, marolopolop jala marlas ni roha ma hita disi.
Batu naung binolonghon ni pande bagas, i ma gabe batu parsuhi.
Pinamasa ni Jahowa do i, halongangan do i anggo di matanta.
Haleluya!
H : (Mangendehon): Haleluya, Haleluya, Haleluya!
U : Martangiang ma hita! Ale Tuhan Jesus Tuhannami! Na mandok
mauliate do hami tu Ho, ala ditaluhon Ho do dosa dohot hamatean
marhitehite hamamateMi, ala disondangi Ho tanomannami, asa
marpanghirimon na mangolu hami ala ni haheheonMi. Ndang pola be
mabiar hami mida hamatean, ai Ho do ulunami, ruasMu do hami.
Dipaunsat Ho do hami sian haholomon tu hatiuron, sian hamatean tu
hangoluan. Antong pargogoi ma hami mamuji dohot mangoloi Ho
ariari, pasangaphon Ho di bagasan haporseaon na mangolu, paima
sahat hami tu lambungMu. Amen. (hundul)
03. Marende BE No. 628 : 1, 3 ”Langit Nang Tano Tiur Sasude”
 Langit nang tano tiur sasude, dibaritahon tu hita ale
Naung hehe Jesus Siparmonang i: S’lamat ari Minggu.
 Molo porsea Ho di Jesus i, taruli ho di haheheon i
Di hatiuron salelelngna i: S’lamat ari Minggu.
04. Patik:
U : Tatangihon ma Patik ni Debata di minggunta sadari on, sian Roma 10
: 9 – 10 “Ai malua ma ho, molo diparhatopot pamanganmi Tuhan
Jesus i, huhut dihaporseai roham, naung dipahehe Debata Ibana sian
1
 angka na mate. Ai roha i do porsea, asa tu hatigoran; pamangan i do
mangkatindanghon, asa tu haluaon”. I do sahatna, Antong rap
mangido gogo ma hita sianTuhan Debata!
U+H : Ale Tuhan Debata, sai pargogoi ma hami mangulahon na hombar
tu PatikMi. Amen.
05. Marende BE No. 165 : 1 - 2 “Na Basa Do Roham Di Au”
 Na basa do rohaM di au o Jesus Tuhanki. Diihuthon Ho au tu na dao
mambuat rohangki.
***Jongjong***
 Pardosa na godang do au badia anggo Ho. Sai tu na roa do au lao sai tu
na jahat do.
06. Manopoti Dosa – Bagabaga Ni Debata:
U : Tatopoti ma dosanta di adopan ni Debata, martangiang ma hita!
Ale Tuhan Debata, Amanami na di banua ginjang! Ho do na
patupahon hasesaan ni dosa di hami halak na dangol on marhitehite
Anak haholongan ni rohaM. Sai asi ma rohaM di hami, angka na
mangarsakhon dosanami. Sai sahapi ma tu bagasan rohanami hasesaan
ni dosanami i. Lehon ma tu hami TondiM na badia i, asa unang
ganggu rohanami di asi ni rohaM, alai asa hot rohanami
marhaporseaon laho manggotaphon nasa dosa dohot roha portibi on,
asa hupasahat hami dirinami tu Ho, gabe pelean na mangolu jala na
badia marhitehite Tuhan Jesus Kristus Tuhannami. Amen.
Bagabaga ni Debata taringot tu hasesaan ni dosanta: Humophop
hita gabe dosa do Ibana na so tumanda dosa dibahen Debata, asa gabe
hatigoran ni Debata hita marhitehite Ibana. Hasangapon ma di Debata
na di ginjang!
H : Amen. (hundul)
07. Koor Ina
08. Marende BE No. 92 : 4 - 5 “Puji Ma Na Manaluhon”
 Uju i di na manogot, di na buha siang i. Mijur do surusuruan laho tu
tanomanMi. Dung diungkap batu i dipahundul ma ibana. Paboahon di na
ro ndang be di bagasan Ho.
 Tu tanoman si Maria paturehon bangkeMi. Tung beha ma di rohana dung
dibege hataMi? Dohot mangalusi i? Au pe idaonhu sogot Ho di
hasangaponMi ,Ho, o Jesus, Tuhanhi.
09. Epistel :
U : Tatangihon ma hata ni Debata di Minggunta sadari on, i ma na tarsurat
di Markus 16 : 1 - 8 : Asa dung salpu ari Sabbat i, dituhor si Maria
2
 Magdalena dohot si Maria ni si Jakobus rap dohot si Salome ma
ragamragam ni na hushus, laho mamiahi bangkeNa.
H : Jadi mansai sogot di ari parjolo dung Sabbat i, laho ma nasida tu
tanoman i, di na binsar mata ni ari.
U : Masipandohan do nasida: Ise ma manggulang batu i di hita sian baba
pintu ni tanoman i?
H : Mamereng dompak i nasida, diida ma naung digulang batu i, ai na
balga situtu do i.
U : Dibongoti nasida ma tanoman i, gabe diida ma dolidoli sahalak,
parulos na marlinanglinang, hundul tungkan siamun, jadi mabiar situtu
ma nasida.
H : Alai ninna do mandok nasida: “Unang ma hamu mabiar! Dilului
hamu do Jesus na sian Nasaret, naung diparsilanghon. Nunga hehe
Ibana; ndang dison Ibana! Ida hamu ma inganan hapeahanNa on.
U : Laho ma hamuna, paboa hamu ma tu angka siseanNa dohot tu si
Petrus: JoloananNa do hamu tu Galilea, disi ma idaonmuna Ibana,
songon naung didok hian tu hamu!
H : Dung i ruar ma nasida maporus sian tanoman i, laos angka dotdot do
nasida jala tarmali. Jadi ndang adong dipaboaboa nasida agia tu ise,
ai na tahuton do rohanasida.
U : I do sahatna. Martua do angka na tumangihon Hata ni Debata jala na
umpeopsa. Amen.
10. Koor Ina Hanna
11. Marende BE No. 93 : 3 – 4 ”Pesta Paska Hatuaon”
 Tuhan Jesus do na monang, Tuhan Jesus do pasuang. Las ni roha dame
pe, las ni roha dame pe. Dongan golom ma hataNa, na porsea di Ibana.
Ndang tarbahen mago be.
***Jongjong***
 Sai tapuji ma Tuhanta, na pabongot tu rohanta. Roha panghirimon i, roha
panghirimon i. Ia mate pe donganta, sogot ingkon idaonta
Saluhut di surgo i.
12. Manghatindanghon Haporseaon :
U : Tahatindangkon ma haporseaonta i, songon na hinatindanghon ni
donganta sahaporseaon di sandok portibi on. Rap ma hita mandok!
H : Ahu porsea di Debata Jahowa. . . (hundul)
13. Koor Ama
14. Koor Remaja Naposo
15. Tingting + Tangiang Pangondianon
3
16. Koor Sekolah Minggu
17. Koor Gabungan
18. Marende BE HKBP No. 627: 1… “Jesus Naung Hehe”
(Pelean Ia, Ib)
 Jesus naung hehe Haleluya; puji endehon Haleluya. Hamonangan ni
Tuhanta na manaluhon sibolis i. Las ma roham puji ma Tuhan i ala naung
talu hamatean i. Sesa dosanta, Haleluya mangolu Jesus, Haleluya.
 Di ari na patoluhon i, maloha do tanomanNa i. Jesus Raja hangoluan i, na
patundukhon sibolis i. Las ma roham puji ma Tuhan i ala naung talu
hamatean i. Sesa dosanta, Haleluya mangolu Jesus, Haleluya.
***Musik***
 Bege nidok ni suruan i, ida hamu ma ulosNa on. Ndang di tanoman be
Tuhan i, unang mabiar be hita on. Las ma roham puji ma Tuhan i ala
naung talu hamatean i. Sesa dosanta, Haleluya mangolu Jesus, Haleluya.
 Tabaritahon Tuhanta i, na hehe jala mangolu i. Singkop do
panghophoponNa i, di hita jolma pardosa i. Las ma roham puji ma Tuhan
i ala naung talu hamatean i. Sesa dosanta, Haleluya mangolu Jesus,
Haleluya.
19. Jamita: Jesaya 25 : 6 - 9
20. Marende BE HKBP No. 635 : 1. . . “Ro Ma Tuhan Jesus”
(Pelean II)
 Ro Tuhan Jesus Anak sasada, Parasiroha, Parholong i. Mate Ibana
humophop hita rumar tanoman i ai hehe Jesus i
Reff: Ala hehe Jesus ro do ari sogot. Mangolu au ndang mabiar au.
Huboto do sonang au raphon Jesus Sonang ma au ala naung hehe
Jesus i.
 Di paraloan, au dongananNa pos do rohangku di ngolungki.
PamonanganNa au anakhonNa ala naung monang jala hehe Tuhanhi
Reff: Ala hehe Jesus . . . . .
***Musik***
 Molo marujung muse ngolungku mansohot do nang sitaononki. Ai nunga
talu banua toru ditomu Jesus au na tinobusNa i
Reff: Ala hehe Jesus . . . . .
21. Pandidion Nabadia
Marende BE No. 146 : 1 – 2 PAIAN MA DI HAMI
 Jesus naeng tardidi do posoposo on.
Sai ro ma mangaligi huhut manjalo on.
***Jongjong ma Natoras***
4
 Diboan natorasna nasida be tuson.
Ai naeng pasahatonna tu Ho dakdanak on.
Martangiang:
Ale Amanami na di banua ginjang! Na ro do hami tu joloM mamboan
angka dakdanak on. Sai asi ma rohaM, jalo ma nasida gabe anakhonMu;
pasupasu jala pargogoi ma nasida mangeahi hangoluan sogot marhitehite
Tuhan Jesus Kristus. Amen!
Hata Sipaingot:
Antong hamu angka dongan, na mamboan dakdanak sididion, tangihon
hamu ma Hata ni Tuhan Jesus : Laho ma hamu tu liat portibi on, ninna
mandok angka siseanNa, podai hamu ma saluhut bangso, didi hamu ma
nasida tu bagasan Goar ni Debata Ama dohot Tondi parbadia, ajari hamu
ma nasida mangaradoti saluhut na hutonahon i tu hamu. Jala ingot ma, sai
dongananKu do hamu ganup ari rasirasa ro ajal ni hasiangan on. Manang
ise na porsea dohot nididi dapotan hangoluan, alai na so porsea hona
uhum sogot. Tangihon hamu ma dohot Hata na tarsurat di surat ni si
Markus: Adong ma angka na mamboan dakdanak tu Tuhan Jesus, asa
dijama; alai dipinsang angka siseanNa i ma na mamboan i. Jadi dung
diida Tuhan Jesus i, sogo ma rohaNa, didok ma: Loas hamu ma angka
dakdanak i ro tu Ahu, unang orai nasida, ai di angka sisongon i do
harajaon ni Debata. Na tutu do na hudok on tu hamu: Manang ise pe
anggo so songon dakdanak ibana manjalo Harajaon ni Debata, ndang
bongot ibana tusi. Dung i dihaol ma angka dakdanak i, diampehon ma
tanganNa tu nasida mamasumasu nasida.
Pandita : Hatindangkon hamu ma jolo haporseaonta i!
Natoras : Ahu porsea d.u…
Pandita : Antong alusi hamu ma hata na husungkunhon on :
1. Dipangido hamu nuaeng didion angka dakdanak on tu
bagasan ni na hinaporseaonmuna?
Alusna: Dipangido rohanami.
2. Beha, na olo do hamu mamodai anakhonmuna on, asa diboto
jala diihuthon nasida Hata ni Debata?
Alusna: Na olo do hami.
3. Na olo do hamu marsuru nasida tu gareja dohot tu parguruan
ni Huria Protestant, asa gabe ruas na mangolu nasida di
Tuhan Jesus Kristus?
Alusna: Na olo do hami.

5
 Pandidion : Antong tapasahat ma nasida tu Debata marhitehite pandidion na
badia i:
Ale si . . . ! Hudidi ma hoo tu bagasan Goar ni Debata Ama
dohot tu bagasan Goar ni AnakNa Tuhan Jesus Kristus, dohot tu
bagasan Goar ni Tondi Parbadia. Amen.
Diampehon Pandita i ma tanganna tu ulunasida huhut ma didok
: Sai diramoti Debata ma ho di habobongotmon tu bagasan
Harajaon ni Debata ro di saleleng ni lelengna.
Martangiang:
Ale Tuhan Debata, Amanami marhitehite Tuhan Jesus Kristus
Tuhannami. Nunga hupasahat hami angka dakdanak on tu Ho, jala
dijangkon Ho do nasida gabe anakhonMu marhitehite pandidion na badia
i, asa masuk tu Hria ni halak Kristen nasida di tano on jala gabe panean
di hangoluan na saleleng ni lelengna. Asi ma rohaM dohot di angka
natoras ni dakdanak on. Sai pargogoi jala ajari ma nasida manogunogu
dakdanak on tu Ho. Asa rap nasida taruli di angka arta ni harajaonMu.
Marende BE No.146 : 6 PAIAN MA DI HAMI
 Asi rohaM o Tuhan di angka on sude.
Tu buku hangoluan surathon ma sude.
22. Tangiang Panutup :
U : Tatangianghon ma peleanta. Ale Debata, Amanami na di banua
ginjang,! Ho do haroroan ni saluhut silehonlehon na denggan dohot
nasa ulibasa na mauliutus. Hupasahat hami ma sian na nilehonMi tu
hami, peleannami tu Ho. Sai jalo ma i gabe uap na hushus di joloM.
Pasupasu ma i jala ramoti asa huparhaseang hami pelean on,
patimbulhon harajaonMu di tongatonga ni HuriaM dohot di portibi on.
Buhai ma roha nami marhitehite TondiM, asa lam hutanda hami
godang ni silehonlehonMi tu hami, asa lam girgir hami mandok
mauliate tu Ho, marhitehite Jesus Kristus Tuhannami. Amen.
H : (Mangendehon):
 Nasa nanilehonMi, tondi ro di pamatanghu
Hosa dohot gogongki, ro di saluhut artanghu
Hupasahat i tu Ho, na so unsatonhu do.
U : Ale Tuhan Debata Amanami jala Parasiroha. Mauliate ma rohanami,
jala pujionnami Ho, ala naung ditubuhon Ho hami paduahalihon sian
godang ni asi ni rohaM, tu panghirimon na mangolu marhitehite
haheheon ni Tuhan Jesus Kristus sian na mate. Nunga gabe Sipalua
jala Sipangolu AnakMi di hami, jala Ibana Tuhannami, Ibana
6
 Ulunami, siihuthononnami. Na marlas ni roha do hami nuaeng
marningot haheheonNa i. Nunga talu sibolis, talu hamatean, talu
banua toru. Ndang mabiar be hami mida hamatean, talu banua toru.
Ndang mabiar be mahi mida hamatean dohot soropna, ai nunga
monang Tuhannami. Ulubalang na gogo i. Ibana do manogihon hami
sian hamatean tu haheheon sogot. Ala ni i umbahen hupangido hami:
Sai asi ma rohaM, patogu ma haporseaonnami maniop Barita na Uli i,
asa unang ganggu rohanami di na hubolus hami hamatean i. Sai
sungguli ma rohanami dohot roha ni dongannami, asa rap hehe hami
sian parrohaon na buruk i, asa tarulahon hami parange na imbaru.
Sai pasupasu ma HuriaM dohot Parbarita na Uli, na mamaritahon
haheheon ni Tuhannami, asa lam tarsunggul angka na pedem roha jala
hehe sian dosana be. Sai papos ma rohanami manghaporsea i, naung
mardame jala mardomu hami tu Ho ala ni pardengganan na pinatupa
ni AnakMu. Sai pasabam jala pamalum ma rohanami. Tompa ma roha
na ias dohot tondi na marsihohot dibagasan hami, asa
tarhajongjonghon hami, naung pintor hami ala ni hatigoran na
pinatupa ni Tuhan Jesus Kristus.
Sai sungguli ma panghirimon na mangolu di hami, asa tarapul
rohanami marningot angka dongannami naung jumolo nialapMi, jala
asa tarapul rohanami manaon sitaonon di hasianagan on. Sai apuli ma
angka na matean, na dangol, na pogos, na so marama so marina, angka
na mabalu dohot angka na malungun tu banua ginjang marhitehite
haheheon ni Tuhan Jesus Kristus, Tuhannami. Amen
Ale Amanami na di banuaginjang! Sai pinarbadia ma GoarMu! Sai ro
ma harajaonMu! Sai saut ma lomo ni rohaM di banua tonga on songon
na di banua ginjang! Lehon ma tu hami sadari on hangoluan siapari!
Sesa ma dosanami songon panesanami di dosa ni dongan na mardosa
tu hami! Unang hami togihon tu pangunjunan! Palua ma hami sian
pangago!
H : (Mangendehon):
 Ai Ho do nampuna harajaon, dohot hagogoon
Ro di hasangapon, saleleng ni leleng na, Amen.
U : Tangiang Pasupasu
H : (Mangendehon) Amen, Amen, Amen.