TATA IBADAH

PARNINGOTAN ARI HAMAMATE NI TUHAN JESUS

Di HKBP SA - RESORT TEGAL REJO
Jumat, 07 April 2023
Topik: “Jesus Kristus Siboan Haluaon Salelenglelengna”

01. Joujou tu Parsombaon

U: Huria ni Tuhanta! Na marpungu do hita di gareja on, umbege joujou sian silang ni
Tuhan i. Na joujou do Tuhanta Jesus Kristus sian hau pinarsilang, manjou ahu dohot
ho, manjou saluhutna bangso di na dao nang na jonok pe. Asa taruli haluaon dohot
hangoluan angka na porsea di Ibana. Ala ni i tadapothon ma Ibana, taalusi ma
joujouNa i, joujou ni Jesus Tuhanta i sian panaononNa di hau Silang i. Ida ma. Ibana
na gantung di hau silang i, mangalehon hangoluanta dohot hasesaan ni dosanta.
Marhitehite parpunguan parningotan ari hamamate ni Tuhanta i, tauhirhon ma bagas
tu rohanta naung sae dosanta digarari Jesus, Tuhan jala Sipalua hita. Marende ma
hita !.

02. Marende BE. No. 84 : 1 + 3 “Aut na ginorga tu rohanghu” BL. 195

Aut na ginorga tu rohangku bohiM di na lao mate Ho! Aut na huingot, O Tuhanhu, tongtong
panghophopMi di au! Ai Ho do paluahon ahu, dosangku do pinorsanMi; Didaoni Ho
parsahitonhu; Martua au binahen nii! (Jongjong)
Mauliate ma rohangku di Ho, O Jesus Tuhanhi! Ho naeng tongtong haholonganhu marningot
denggan basaMi. Antong, sai tiop ma tanganhu manogu au tu lambungMi; Dijalo Ho do
tangianghu; Sai pos do rohangki disi.

03. Votum – Introitus – Tangiang :

U: Marhitehite Goar ni Debata Ama, dohot Goar ni AnakNa Tuhan Jesus Kristus, dohot
Goar ni Tondi Parbadia na tumompa langit dohot tano on. Amen. Sintua ni malim
sisongon i do tama di hita, na badia, na so jahat, na so marlindang, na so marbolat
sian angka pardosa, naung gabe tumimbo sian angka banua ginjang. Na so pola
ganup ari songon angka sintua ni malim i mamboan jumolo pelean taringot tu angka
dosana sandiri, dung i taringot tu dosa ni natorop i; ai sahali do i diulahon, di na
mamelehon diriNa Ibana. Haleluya!
H: (Mangendehon) “Haleluya, Haleluya, Haleluya!
U: Martangiang ma hita ! O Tuhan Jesus, Birubiru ni Debata, na mamorsan dosanami!
Na jongjong do hami di joloM, marningot Ho, na targantung i. Tangkas do huantusi
hami habebernit ni na tinaonMu di dolok Golgata. Tungki do hami marningot dosanami
na manghorhon hamamateMi. Asi ma rohaM, urupi ma hami, asa gabe upa ni
halojaonMu hami. Amen. (Hundul)
04. Marende BE. No. 88 : 1 + 4 ”Di surgo do alealenta” BL. 106
Jesushu naung manobus ahu, sai naeng haholonganhu Ho. Tu dolok Golgata Ho laho,
nionjar ni holongMu do. Hupuji nasa asiMi, alai gumodang holongMi.
Bagas uhirhon tu rohangku, panghophopMi humophop au; Tusi ma togu pingkiranhu, guru
di Ho sambing ma au. Hupuji nasa asiMi, alai gumodang holongMi.

05. Patik
U: Tangihon hamu ma Patik ni Debata di Parpunguan parningotan ari hamamate ni
Tuhan Jesus sadari on, i ma na tarasurat di Rom 6: 13: Jala unang ma pasahat hamu
angka ruasmuna tu dosa i, bahen sinjata ni hajahaton; tu Debata ma tahe pasahat
hamu dirimuna songon angka naung pinangolu sian na mate; songon i nang
ruasmuna, tu Debata ma i, bahen sinjata ni hatigoran! ” Rap mangido gogo ma hita tu
Debata laho mangulahon patikNa i!
S: Ale Tuhan Debata sai pargogoi ma hami mangulahon na hombar tu PatikMi.
Amin.

06. Marende BE. No. 83 : 2 – 3 “Na lao do birubiru i” BL. 214

Ianggo Birubiru i, i ma alealengku, Na paluahon tondingki, disuru Debatangku. Didok
mandok AnakNa i; "Sai topot ma pardosa i, naung sun tinoruanHu. Balga tutu do rimasHi,
alai tarbaen do mombun i hinorhon ni mudarMu." (Jongjong)
Na olo au ale Amang, sian sandok rohangku pasauthon lomo ni rohaM, rohaM sambing do
guru. O holong ni rohaNa i, tung aha do tudosanMi, na songon Ho margogo. Dilehon Debata
hape AnakNa lao manaon sude sitaonon ni na mago.

07. Manopoti Dosa

U: Tatopoti ma dosanta tu adopan ni Debata, martangiang ma hita! Ale Tuhan
Debata, Pargogo na so hatudosan jala Amanami! Hujou hami do GoarMu na badia i,
ala na targogot hami marningot dosanami. Sai marasi ni roha ma Ho mida hami on:
O Tuhan Jesus Kristus, Anak ni Debata na gabe jolma ala ni hami, na mate jala na
hehe sian na mate, na manaek tu banua ginjang do Ho mangondihon hami! Asi rohaM
di hami, sai patongtong ma di hami roha hamauliateon tu Ho. O Tondi Parbadia,
pangapul di na marsak roha, pamalum ma saluhut na bernit, binahen ni dosanami!
Ro ma Ho mangingani hami, asa marlas ni roha hami mangulahon lomo ni rohaM. Ho
do parhitean ni nasa asi ni roha, sai unang tulak hami. Sai tangihon ma hami, Ho ale
Debata, Ama, Anak dohot Tondi Parbadia! Amen. Bagabaga ni Debata taringot tu
hasesaan ni dosa! Ala ni pangalaosionta do umbahen na tartullang Kristus, jala
binahen ni hajahatonta do Ibana mabugang. Ampe tu Ibana pinsangpinsang
parhitean ni hasonanganta, jala binahen ni bugangNa malum itahilala. Hasangapon
ma di Debata na di ginjang!
S: Amen (Hundul)
08. Marende BE. No. 426 : 1 – 2 “Tutu na mate Jesus i” BL. 286
Tutu na mate Jesus i humophop iba on? Durus di hau parsilang i mudarNa i tongon? Songon
i tutu, songon i tutu. Umbaen na mate Jesus i siala au do i.
Tutu na mate Jesus i siala dosangki? Na lao pasaehon utanghi dibaen holongNa i? Songon
i tutu, songon i tutu. Umbaen na mate Jesus i siala dosami.

09. Epistel:
U: Hata ni Debata turpuk Epistel di Parpunguan parningotan ari hamamate ni Tuhan
Jesus sadari on i ma na tarsurat di Psalmen 22: 18 – 25. Tajaha ma marsingkatsorin:
Habilangan ahu do sude holiholingku, martilla be do ianggo nasida mida ahu.
H: Dibagi nasida do angka uloshu, mandabu tondung do nasida taringot tu
bajubajungku.
U: Alai sai unang mandaodao ianggo Ho, ale Jahowa, parsigantunganhu, hapogani ma
mangurupi ahu.
H: Sai palua ma hosangku sian podang, sian sisilon ni biang hosangku na
tarpunjung.
U: Sai palua ma ahu sian baba ni babiat, jala alusi ahu maradophon tanduk ni angka
horbo jalang.
H: Sai jamitahononhu ma GoarMu tu angka hahaanggingku, jala pujionhu ma Ho
di tongatonga ni huria, na marluhut i.
U: Puji ma Jahowa, hamu ale angka na manghabiari Ibana, sude pinompar ni si Jakob
pasangaphon Ibana, jala sude pinompar ni Israel manghormat Ibana!
H: Ai ndang lea rohaNa manang marbiasbias mida pardangolan ni na dangol, jala
ndang ditabunihon bohiNa maradophon ibana, jala ditangihon do anggukna i tu
Ibana.
U: I do sahatna. Martua do angka na tumangihon Hata ni Debata jala na umpeopsa.
S: Amen.

10. Marende BE. No. 81 : 2 – 3 “Jesus mual ni ngolunghu” BL. 185

Haleaon, insakinsak, reherehe, tijur pe, Tali dohot pastappastap tung ditaonhon Ho sude,
Paluahon au na pogos sian tangan ni sibolis. Ala ni hupuji Ho tung marribu hali do.
(Jongjong)
Bugang sada tanggurungMu di na hona linsing i; Hamamalum ni buganghu na di rohangki
do i. Ho do gabe binuraan, au dapotan hangoluan. Ala ni hupuji Ho tung marribu hali do.

11. Manghatindanghon Haporseaon:

U: Tahatindanghon ma haporseaonta i, songon na hinantindanghon ni donganta
sahaporseaon di sandok portibi on. Rap ma hita mandok:
S: Ahu porsea ....d.u.... (Hundul)
12. K o o r :

13. Sunggulsunggul

14. K o o r :

15. Marende BE No. 78:1…“O, ulu na sap mudar" BL158 (Pel 1a+1b)
O ulu na sap mudar, binaen ni bugangMi, Na sian janggarjanggar sisunsang duri i! O ulu
hatongamon hian do tumpalMi; ditaon Ho haleaon: Ho naeng sombaonhi!
O bohi parsinondang, na sangap situtu, Beasa tung marlangan sap ijur hurumMu? Tung aha
ma alana, umbaen homur mataM? Na mintop do sondangna di na lao tos hosaM.
(Musik)
Au on tama, o Tuhan, manaon na tinaonMi; Dosangku do diporsan Ho na tarsilang i! Sai
tatap ale Tuhan, au na di joloMon, Huhut sai patuduhon basaM tu rohangkon!
Ai Ho do Siparmahan au pinarmahanMi; Sai Ho do haroroan ni hatuaonhi. Sai Ho do
haolhaolonhu marningot bugangMi; sai Ho do tioponhu marningot mudarMi.

16. Jamita : Heber 5 : 7 – 10

17. Marende BE. No. 622 : 1… “Mansai nalnal di angka partingkian" BL. 622 (Pel. II)
Mansai nalnal di angka partingkian sinondang ni silangMu Tuhanhi. Sian hatiuron na
marsinondang holongNa na so halompoan i. Sude na bangso do marpanghirimon tu
sondang ni asi ni roha i. Songon parluga na manghalungunhon parbinsar ni mata ni ari i.
SilangMu Kristus tanda ni holongMu pahisar tondi na magopu i. Mangalononghon sasude
dosangku, mabaor tu laut asi ni rohaMi. Naung tubu hami gabe na imbaru, na niurasan sian
dosa i. Ala mudarMu na niusehonMu di Golgata di hamamateMi.

18. Tangiang Pelean – Panutup – Ale Amanami - Pasupasu