I. PARHOBASON: 1. Partangiangan on ni uluhon ni Ama manang Ina. 2. Diaturhon ma na mamboanhon tangiang pangondianan 3. Diparade hian ma inganan ni pelean. III. PARMINGGUON: (U = Uluan; K = Keluarga) 1. Marende BE No. 2 : 1 – 2 “NAENG PUJIONKU HO, JAHOWA BL.113 1. Naeng pujionku ho Jahowa, ai ho do Debata na tutu i. Sai suru Tondi Parbadia tu au, asa hupuji goarMi. Marhitehite Jesus anakMi, asa lomo rohaM di endengki. 2. Togihon ma au tu anakMu asa tu ho ditogu au muse. TondiM pasaorhon tu tondingku manogu au di dalan na ture. Asa tongtong gok dame rohangki huhut girgir mamuji goarMi. 2. TANGIANG PAMUHAI: U : Luluhon ahu, ale Debata, jala pabadahon badangku dompak bangso na so daulat roha K : Sai palua ma ahu sian baoa siulahon sipaotooto dohot hajengkelon! U : Ai Ho do Debata haroroan ni hagogoonku. K : Tongos ma hatiuronMu dohot hatigoranMu, angka na manogu ahu. U : pataru ahu tu dolok ni habadiaonMu dohot tu ingananMu. Halelluya! K : (Mangendehon): Haleluya, Haleluya, Haleluya U : Martangiang ma hita! Ale Tuhan Debata, Amanami na di banua ginjang, Parasi roha na sumurung! Na mandok mauliate ma hami tu Ho sian nasa rohanami, ala dilehon Ho AnakMu na sasada i tu hamatean humophop hami, asa unang mago na porsea di Ibana, alai asa hangoluan na saleleng ni lelengna di hami. Tatap ma hami, ale Amanami di bagasan AnakMu Jesus Kristus, ai dibagasan pardangolan do hami ala ni sahit hinorhon ni Covid 19 na mangarongrong portibi on. Asi rohaM di hami, padao ma sahit i sian saluhutna hami. Sai paeleng ma pinggolmu tu hami, hapogani paluahon hami; sai Ho ma gabe dolok batu partanobatoan di hami, gabe huta na gonting laho pangoluhon hami di bagasan Goar ni AnakMu Tuhan Jesus Kristus, Tuhannami. Amen. 3. Marende BE No. 169:1 “HO SIPANGOLU AU” BL.224 1. Ho sipangolu au, sai topot ma au on. Sai unang mandaodao. Ho sian rohangkon. Ro Sipangolu ro tibu. Baen ma au anakMu tutu. Dohot mudarMi buri au ias songon hapas ma au. Ias tutu, ias tutu, dohot mudarMi buri au. Ias songon hapas ma au 4. EPISTEL: SEPANIA 2: 1- 3 U : Tajaha ma Epistel di Minggunta sadarion ima na tarsurat di SEPANIA 2: 1- 3 Dijaha ma marsingkatsoring Ima sahatna. Martua ma angka na tumangihon Hata ni Debata jala na umpeopsa.Amen. 5. Marende BE No. 174 : 1 “TOROP DOPE” BL. 184 1. Torop do pe na siat i Di hasampuran rea, I pe hamu pardosa i Sai olo ma porsea Ai Debata manjou hamu Tu hasonangan situtu, Hamu, hamu Dijou Debatamu. 6. SORI NI NGOLU DOHOT MANOPOTI DOSA: U : Ragat do angka na masa na taadopi di bagasan parngoluan on, jala di tingki on toho do hita mangadopi sada sahit ala ni virus corona na mambahen godang na marmatean. Mabiar hita jala humasusa pingkiranta ala ni i. Antong dibagasan sada ni roha, rap ma hita mangido tu Tuhanta asa Ibana na mandongani dohot na mangaramoti hita. Ibana padaohon dohot na paujunghon parsahiton i asa dao sian tongatonganta. Hata ni Debata mandok di 1 Petrus 5: 7 “Tingganghon hamu ma nasa na hinolsohon ni rohamuna tu Ibana, ai di sarihon do hamu”.Antong, tatingganghon ma tu Ibana angka holso ni rohanta, ai Ibana do na sumarihon hita. K : (Mangendehon): BE No. 452: 1 “Na Ro Pandaoni Bolon I” BL. 303 Na ropandaoniboloni, i ma Tuhanta Jesus Didaoni na marsahiti, hisar dibahen Jesus. Ulini barita i, las niroha Bolon I, Sai dipujirohangki, Jesus, Jesus, Jesus. U : Martangiang ma hita:Ale Tuhan Debata, na sumarihon saluhut jolma nang sude na tinompaMi. Na ro do hami tu adopanMu mamboan holsonami tu adopanMu. Mansai torop do na gabe marsingkor jala mabiar siala ni sahit na ro tu luatnami. Asi ma rohaM di hami. Palua ma hami sian nasa sahit na ro mangarongrong hami.Godang do nang dosa na huula hami maradophon dongannami nang maradophon Ho. Sesa ma dosanami, siala ni angka hagaleon dohot halembaonnami. Sai lam togutogu ma hami di dalan hasintonganMu asa jumpang las ni roha di bagasan Ho marhitehite ngolunami. Amen. U : Bagabaga ni Debata:Songon on do Hata ni Jahowa: Unang ho mabiar, ai Ahu do Siluluhon ho; nunga pola Hujou goarmu, Ahu nampuna ho. Hasangapon ma di Debata na di ginjang! K : Amen. 7. Marende BE No. 25 : 1 HATAMI, ALE TUHANKU BL. 181 1. HataMi, ale Tuhanku, arta na ummarga i, sai paian di rohangku, unang so hutiop i. Molo so be sitiopan hata na badia i, aha nama haojahan ni haporseaon i? 8. PATIK/PETUNJUK HIDUP BARU: PATIK I DOHOT LAPATANNA: Ahu do Jahowa Debatam! ninna Debatanta. Ndang jadi marungkap Ahu bahenonmu Debatam. Dia do lapatan ni i? On do: Ingkon umbiar rohanta jala humolong jala umpos mida Debata asa mida nasa na adong. U: Antong rap mangido gogo ma hita sian Tuhan Debata U+K: Ale Tuhan, sai pargogoi ma hami, mangulahon na hombar tu patik-Mi. Amin 9. Marende BE No. 223 : 1 “HUSOMBA HO TUHAN” BL. 244 1. Husomba Ho Tuhan tangihon au, SangkapMu ma tongtong pasaut tu au Lam ganda baenon ni i, holong ni rohangki, Sai lam gandai holong tu Ho 13. MANGHATINDANGHON HAPORSEAON: 14. Marende BE No. 30 : 1 - 2 “JESUS LEHON HATORANGAN” BL.135 1. Jesus lehon hatorangan Hapistaran Mangantusi hataMi Lehon mata na marnida Dohot roha na umboto dalanMi Asa tongtong maradophon BohiMi mardalan hami Asa digomgomi TondiMi ma hami. 15. RENUNGAN: 2 Petrus 1 : 1 – 9 (dimulai ma dohot tangiang,dungi dijaha turpuk) “HASINTONGAN NI DEBATA NA PALUAHON” Dongan Sahaporseaon dibagasan Goar ni Tuhanta Jesus Kristus! Debata ima Pargogo na so hatudosan, na marhuaso jala na so tarpatudos hita tu hagogoon, huaso, dohot harajaon ni portibion. Ibana do Raja di ginjang ni saluhut raja. Na gok asi ni roha dohot denggan basa do Ibana na tongtong mangalehon hangoluan dohot hadaulaton tu angka na porsea. Saluhutna sangkap ni Debata, sangkap na denggan do, ndada sangkap hamagoan. Jeremia 29:11 Ai nunga tangkas huboto sangkap angka na husangkapi taringot tu hamu, ninna Jahowa, sangkap hasonangan do tahe ndada tu hamagoan, asa Ahu mangalehon tu hamu ujung ni na hinalungunhonmuna. Debata na manjou jala na marsuru angka naposoNa marbarita nauli, tontu dilehon do hagogoon dohot hadaulaton i. Suang songon i pe angka halak Kristen na mangadopi ragam parungkilon, sitaonon nang parsorion di tongatonga ni portibion, ingkon marpos ni roha. Ala Debata do na marbagabagahon tu hita na porsea di Ibana asa mangolu di bagasan hasintongan ni Debata. Ima mangulahon angka na hombar tu hata dohot PatikNa i. Unang ma nian rohanta digohi hahisapon, na marlapatan pasintonghon saluhutna (menghalalkan segala cara) laho mandapot nasa na hombar tu sangkap ni rohanta, gabe ndang parduli hita angka na so sintong manang maralo tu aturan dohot uhum pe. Molo jumpang songon i, berarti ndang boi dope hita mangorom dirinta sian angka hagiot ni portibion. Dijouhon do hita asa mangharinggashon sian nasa gogo patupahon parange na denggan ima songon tanda parbue ni haporseaonta di Tuhan i. Ai didok do di Jakobus 2:17 Haporseaon i pe songon i do: Anggo so adong pangulaonna, naung mate do hadirionna. Angka dia ma parange na denggan i mangihuthon surat on? -Pangarajaion diri, ima sada sian parbue ni tondi, - Habengeton: halak na porsea ingkon tongtong do marbenget ni roha mangadopi angka na masa di bagasan ngoluna siapari, - Hadaulaton: ingkon pasomalsomalonta do mangolu dohot mangula di bagasan hadaulaton (hidup dalam peribadahan), dohot –Holong ni roha: On ma naumbalga songon tanggungjawab ni halak Kristen siihuthon Kristus. Ai nunga dilehon Jesus Kristus tiruan na balga di hita, asa mangulahon holong ni roha, maradophon Debata suang songon i maradophon donganta jolma doshon dirinta sandiri (Mat.22:37-39). Ndang loason ni Debata hita marlosok ni roha, alai marparbue do ala naung pinaluaNa i hita sian dosa (ay.8-9). Johannes 15:16 Ndada hamu mamillit Ahu; Ahu do mamillit hamu jala hupadiri hamu, asa laho hamu marparbue, jala asa mian parbuemuna i… Ngolu na marparbue na denggan do hape na pinangido ni Debata sian hita angka na porsea i. Ai nunga tung balga holong ni rohaNa dipatuduhon tu hita, di na mate Jesus laho manghohop hita jolma sian uhuman ni dosa. Tudos tu halak na mapitung ma hita didok si Petrus molo ndang boi taida denggan basa naung binasabasahon ni Debata tu hita, tudos naung mapitung ma haporseaonta disi. Hape adong do dua halak na mapitung dipamalum Jesus nasida jala gabe boi marnida, alani haporseaonnai do na pamalumhon nasida ujui. Unang ma nian marmata do hita, hape gabe mapitung di haporseaon, marbinege do hita hape gabe so tinggil tumangihon hata ni Debata. Jadi, talehon ma sandok pamatangta on laho mangulahon ulaon na pinangido ni Debata di bagasan ngolunta i. Topik Minggu Judika: “Hasintongan ni Debata na paluahon”, holan Debata na Sintong di saluhutna umbahen na tuk Ibana paluahon hita sian uhuman ni dosa. Molo jolma i ndang adong na sintong nanggo sada, alai na boi do hita mangulahon na denggan hombar tu patik ni Debata. Ai nunga dipalua hita, ndang hatoban ni dosa be hita. Alani, unang ma tapaloas dirinta gabe hatoban ni dosa manang sibolis i. Halak na porsea ingkon tongtong marbenget ni roha, mangarajai diri sian hahisapon ni portibion, tongtong satia di haporseaonna songon tanda naung dihamauliatehon ibana haluaon na jinalona sian Debata Parasiroha i. Jala dipangido tu hita taulahon paboahon na Ibana paluahon dohot patuduhon hasintongan di masa sahit manang virus covit 19 ima na mangaradoti. 1. “Phycal Distancing” Mangula di Bagasta be, Marsiajar di Bagasta be jala Beribadah di bagasta be. 2. Mangaradoti Haiason (Mencuci Tangan marhite Sabun Cuci Tangan/Handsanitizer, Mansohot jo na marsijalangan, dlna) Tongtong mangalului barita manang informasi terbaru marhite Pamarenta (Update Informasi). Mansai maol do laho paubahon hasomalan naung tadalani saleleng on. Alai demi keselamatan dirinta nang donganta humaliang. Rap ma hita mangulahon i asa wabah/epidemi Covid-19 boi hatop salpu di sandok portibi on. Amin (ditutup ma muse marhite tangiang) 16. Marende BE No. 476 : 1 “Ndada au guru di au 1. Ndada au guru di au be, Jesus do nampuna au. Las rohangku dung hubege, Jesus sipangol au. Ndang be au guru di au. Jesus na humophop au, Nampuna au. Tung saleleng au mangolu, Jesus do nampuan au. 17. PAPUNGU PELEAN/AYAT PELEAN : EPESUS 5 : 2 18. PANGUJUNGI: U : Tatangianghon ma peleanta: Ale Tuhan Debata Amanami, haroroan ni saluhut pasupasu na mauliutus, godang do hujalo hami sian asi ni rohaM. Mauliate ma di Ho, hupasahat hami ma nuaeng peleannami tu Ho, sai jalo ma i gabe pelean na hushus di di joloM. Pasupasu ma na niula ni tangannami jala ajari ma hami manghamuliatehon saluhutna i marhite parange nang pambahenannami. Ungkap rohanami asa sai ringgas hami pasahat pelean tu Ho hombar tu asi ni rohaM naung hujalo hami, marhite Kristus Jesus Tuhan nami. AMEN. K : (Mangendehon) BE No. 15 : 4 “Aut na Saribu hali ganda” BL. 103 Mauliate ma rohangku di Ho o Debata tongtong, Dibaen sude denggan basamu naung nilehonmu di au on, Ai dipatongon ho tongtong sude na ringkot di au U +K : (Rap Mandok): Tangiang Ale Amanami. (Rap Mangendehon): Amen 3x