Minggu : 19 April 2020

Nas : Psalm 42: 1 – 6

Thema : Mauas do Tondingku tu Debata

Patujolo

Angka ende sipodaon sian anak ni si Korah, ia angka anak ni si Korah on ima na umpalu angka uninguningan
dibagas joro ni Tuhan i. Didok do dibagasan buku psalm bindu 42 on taringot tu angka anak ni si Korah, jala na
patupahon sada ende si podaon sian anak ni si Korah on. Denggan jala uli situtu do ulaon ni anak si Korah on,
ai ido ulaon nasida songon sian horong ni Lewi, patupahon angka ende. Boasa sian na jolo adong angka ulaon
parende dohot angka parmusik ditonga bagas joro I, hira na ingkon ringkot hian angka parende on. Tasungkun
ma jo angka na ahli tusi, ala adong do malim na patupahon seremonial litugi di bagas joro i. Saotik na boi
pinbotohon taringot tusi andorang tapasahat tu ahlina, ra didok roha ala nga somal di Asia Timur dohot Asia
Barat angka ende dohot music. Dohot pangantusion ai na marende do nang angka surusuruan parbanua
ginjang i. Angka ende na patupa angka ni si Korah diturpuk on songon sada poda tu bangso Israel dohot angka
na umbegesa.

Hatorangan Nas

Didok parende on joujou ibana tu Debata “ Ale Debatangku “ taringot tu panghalungunhonna tu Debata.
Naeng ro parpsalm pajumpa dohot Debata dibagas joro I, ala Ibana do na dihalungunhon rohana sian na robi.
Debata do mula dohot mual ni nasa na adong, sai mauas do tondina naeng pajumpang dohot Debata diganup
tingki, marhite ro ibana tu bagas joro I mamuji nang pasangaphon Debata songon horong parende anak ni si
Korah on. Songoni nang angka bangso Israel asa sai manghalungunhon rohana pajumpang dohot Debata
siganup tingki, tung pe dang horong parende, ala bangso ni Debata do bangso Israel ingkon manghalungunhon
rohana asa ro tu bagas joro i. Didok anak ni si Kora asa pajumpang bohi tu Debata, sada allegori do on
patuduhon bagas joro ima dalan pajumpang bohi ni Debata. Debata maringan di bagas joro I, ro Ibana sian
banua ginjang mambahen inganan di bagas joro. Sada inganan na tung dao sian banua ginjang dibahen Ibana
dibagas joro I ingananna. Porlu do maniru ulaon sisongonon, unang adong holang na mansai dao sian nasida tu
Debata, asa ditiru nasida haaktifon ni Debata na pajonokhon dirina tu jolma manisia tu bangso Israel. Nunga
boha haatifon ni bangso I laho pajonokhon dirina tu Debata na gabe sungkunsungkun, asa ende ni anak si
Korah on manguji bangso I jala dipodai asa manghalungunhon dirina pajumpang dohot Debata. Sai bobonosan
do tondi ni parpsalm on molo so tu bagas joro ibana disiganup tingki I, hape angka bangso I sai losok laho tu
joro i. Dipodahon ibana do asa songon jonok ni Debata tu jolma I songon I ma bangso asa olo pajonokhon
dirina tu Ibana. Didok ibana Ziarah ala songon I do pardalanan dihasiangan on songon sada Ziarah na mardalan
dibagasan haporseaon, nunga dipatuduhon angka opung nasida I sian na jolo. Boha Ziarah pardalanan
haporseaon nasida rap dohot Debata sude angka pardalanan ompu nasida na jolo boi mardalanan dibagasan
hadengganon ala Debata ditongatonga nasida. On ma na gabe sipingkiran ni parpsalm on, tung boasa lupa
bangso I dipambahenan Debata tu ompu nasida najolo. Dipodai parpsalm ma bangso I ditingkion asa olo ber-
Ziarah haporseaon dijolo ni Debata, mardalanan arian nang borngin sai diingot nasida naeng pajumpang bohi
dohot Debata tu bagas manang inganan ni Debata.

Hahonaanna

Hata mauas ima hata na denggan laho mambohali partondionta, songon somalna dang adong hita na so uasan
Aek. Hata ni Tuhan I, songon Aek na tung dihaporluhon daging, dang denggan daging ta on molo so minum aek
hita siganup ari. Songoni nang jonok tu Debata ingkon dihaporluhon doi diparngoluonta, dang mangolu hita
sian dirinta sandiri ingkon mangolu hita ala dipangolu Debata do hita. Tu dia ma hita mangalului Debata, ai
nunga ro Debata sian ingananna di habadiaonnai tu tongatonga ni ngolunta. Ima asa taharinggashon ro
manghalungunhon Debata, laho borhat tu inganan ni Debata ima dibagas joro i. Sian Debata do hangoluan I,
ala Debata do hangoluan I ido na porlu sihalungunhon ni rohanta laho mangolu hita tingkion nang
haduan.Amen.