TATA IBADAH MAMASUHI RUMAH DINAS HKBP ANUGERAH PT JATIM

RESSORT BAGANSIAPIAPI DISTRIK XXX RIAU PESISIR

Minggu Advent IV, 18 Desember 2022

& Ev: Roma 1 : 1 - 7 & Ep: Jesaya 7 : 10 - 16

TOPIK MINGGU
“Tomu ma Ibana na pinarbaga ni Jahowa”
“Sambutlah Dia yang Dijanjikan Allah”

I. ACARA DI ALAMAN
Pendeta Ressort, Parhalado & Ruas ni Huria HKBP Anugerah PT Jatim nunga marpungu
di jolo ni bagas na naeng masuhan. Nunga dipersiaphon hian na marpardomuan tu ulaon
i (kunci ni jabu).

1. Marende BE No. 188: 1-2 “Jahowa Siparmahan Ahu” {Jongjong saluhutna

mangadophon bagas}
(1). Jahowa siparmahan Ahu, ndang hurang manang aha. Ai nasa jea dipadao do
sian dorbiana. Tongon dibaen na lomak i, laho pangoluhon tondingki. Dibaen asi
rohaNa

(2). Ditogu ahu tu na tio, aek mata hangoluan. Dibaen do tondingku sio, di dalan
hasonangan. Sabam rohangku do tongtong, saleleng ahu di tano on. Baen
sangap di goarNa

Pendeta : Sian asi dohot holong ni roha ni Jahowa do dipungka jala dipasidung
huriaNa pembangunan ni bagas on. Mauliate ma di Debata! Dipasupasu
Tuhan i ma saluhutna pangisi ni jabu on!

Huria : Bagas pangalapan tua, pasupasu jala hasonangan ma bagas on di huriaNa

tumpahan ni Debata marhitehite Jesus Kristus. Amen.

[1]
 2. Marende BE No. 186: 1, 3 “Jahowa do Haposanhi”
(1). Jahowa do haposanhi na mangapoi rohangku. Napatiur dalanhi, bulus dibaen
langkangku. Sonang tongtong rohangkinon binaen ni Debatangku. PatikNa do
lomongku
(3). Ndang dung dihalupahon Ho sude na holong roha. Di Ho, ai sai dapotsa do na tau
apulapulna. Tung sonang do dibahen Ho na sai tongtong porsea. Malua sian jea,

3. Mangungkap Bagas.
Panitia Bangunan : (Panitia bangunan pasahat kunci ni bagas tu amang
Pendeta). Hupasahat hami ma kunci ni bagas on tu hamu amang Pendeta nami.
Dipasupasu Tuhanta do hami saleleng na paulihon bagas on sahat tu na dimpos. Sai
dipasupasu Tuhan i ma sude pangisi ni bagas on dohot huriaNa.

Pendeta : (dung dijalo kunci sian panitia bangunan, mangungkap pintu huhut
didok ma) Huungkap ma bagas on marhitehite Goar ni Debata Ama, dohot Goar ni
AnakNa Tuhan Jesus Kristus, dohot Goar ni Tondi Parbadia. Amen!
(masuk tu bagas laos hundul be ma diinganan naung pinarade)

II. ACARA IBADAH DI JABU

1.Marende BE No. 197: 1 – 3 “Na Marmahani Hita”
1.Na marmahani hita Parholong roha i/ I ma Tuhanta Jesus silehon tua i/ Silehon tua i.
2.Ditatap pardangolan ni manisia i/ So ada hasonangan na lilu do sude/ Na lilu do sude.
3.Alai ro ma Ibana tu hasiangan on/ Manobus huriaNa humophop hita on/ Humophop
hita on.

2.Invocatio:
Liturgis : Marhitehite Goar ni Debata Ama, dohot Goar ni AnakNa Tuhan Jesus Kristus,
dohot Goar ni Tondi Parbadia, na tumompa langit dohot tano on.
Amen. Dengganan marhaporusan tu Jahowa, asa marhaposan tu jolma.
Dengganan marhaporusan tu Jahowa, asa marhaposan tu angka raja.

Huria : Nunga pola luhut angka parbegu mangkaliangi ahu, mangasahon goar ni Jahowa
tung rasiphononku do nasida. Nunga pola dihaliangi nasida ahu tuk humaliang,
mangasahon goar ni Jahowa tung rasiphononku do nasida.

[2]
Liturgis : Nunga pola dihaliangi nasida ahu, songon angka loba, mintop do nasida songon
api di buluduri, marhitehite goar ni Jahowa tung rasiphononku do nasida. Nunga
pola digogo ho manulakkon ahu, asa tinggang nian, hape Jahowa mangurupi ahu.

Huria : Jahowa do pargogongku dohot endengku, jadi gabe hatuaonku ibana. Soara ni
olopolop dohot hatuaon marsaringar di undungundung ni angka partigor:

Liturgis : Siamun ni Jahowa do sibahen hamonangan. Timbul situtu do siamun ni Jahowa,

siamun ni Jahowa do sibahen hamonangan.

Huria : Hasangapon ma di Ama i, di Anak dohot Tondi Parbadia; songon di mula ni

mulana, nuaeng, tongtong, sahat ro di salelengna.

Liturgis : Soara ni olopolop dohot hatuaon marsaringar di undungundung ni angka

partigor. Siamun ni Jahowa do sibahen hamonangan. Martangiang ma hita….
(dibagasan rohanta).

3.Marende BE No. 10 : 1 “Hupuji Hupasangap Ho”

Hupuji hupasangap Ho, Amang pardengganbasa/ Ai jadijadianMu do, sude angka na
masa/ Ditompa Ho do sasude, daginghu ro di tondi pe/ Pinuji ma goarMu.

4.Tangiang tu Namangingani bagas.

Liturgis : Tapuji ma Debata, ala dilehon do gogo tu huriaNa pajongjong bagas on
siinganan ni angka naposoNa gabe haborhatan mamaritahon barita nauli. Sai
dibagasan las ni roha dohot hadameon ma naposoNa ima inang Calon Diakones
Ananda br. Pajaitan mangingani bagas on laho manghobasi huriaNa dohot ruas ni
huria on.
Huria : Manongtong ma holong ni roha di dongan! Unang halanggushon hamu
partamueon; ai marhite sian i hea do ditamuei halak angka surusuruan, so
pamotoanna.
C.Diak : Ale Tuhan, asi ma roham di ahu!
Liturgis : Tapuji ma Debata, ala dilehon do gogo tu huriaNa pajongjong bagas on
siinganan ni angka naposoNa gabe haborhatan mamaritahon barita na uli.
Huria : Lehon sipaingot tu na bisuk, asa ganda dope bisukna; ajari halak partigor, asa
tamba parbinotoanna.
C.Diak : Ale Tuhan, asi ma roham di ahu!

[3]
Liturgis : Tapuji ma Debata, ala dilehon do gogona tu huriaNa pajongjong bagas on
siinganan ni angka naposoNa gabe haborhatan mamaritahon barita na uli.
Huria : Ai Jahowa, Debatam manogihon ho tu tano na denggan, tu tano na marbatang
aek, marmual dohot martao, angka na mabaor di rura dohot di dolok. Sada tano,
na so pola marhangaluton panganonmu rotim disi, jala ndang hurangan ho di
manang aha; sada tano batuna do bosi jala sian dolokdolokna tarhali ho tombaga.
Ia dung mangan ho jala bosuran, ingkon pujionmu di Jahowa, Debatam, ala ni
tano na denggan, naung nilehonna i tu ho.
C.Diak : Ale Tuhan, asi ma roham di ahu!
Liturgis : Tapuji ma Debata, ala dilehon do gogo tu huriaNa pajongjong bagas on
siinganan ni angka naposoNa gabe haborhatan mamaritahon barita na uli.
Huria : Mangaranap tu Ho do angka mata ni sasudena, jadi dilehon Ho tu nasida
sipanganonnasida di tingkina be. Dibungka Ho do tanganmu pasombu lomo ni
roha ni nasa na mangolu.
C.Diak : Ale Tuhan, asi ma roham di ahu!
Liturgis : Tapuji ma Debata, ala dilehon do gogo tu huriaNa pajongjong bagas on
siinganan ni angka naposoNa gabe haborhatan mamaritahon barita na uli.
Huria : Gumodang do las ni rohangku dilehon Ho, sian di nasida di hamamasa ni gotilon
eme dohot anggur na gabe situtu. Sonang do ahu hupapeak huhut mamintor nok;
ai sasada Ho do, ale Jahowa, pasonang ahu maringanan.
C.Diak : Ale Tuhan, asi ma roham di ahu!

5.Marende BE No. 467: 1 – 2 “Asi Ni Roham Hupuji”

(1.) Asi ni rohaM hupuji ala Ho manobus ahu. Dipaias Ho rohangku gabe soranganMu
ahu. IgananMu rohanami, TondiMi manggohi i. Pangke dohot ngolunami gabe
ulaulaMi.
(2). Sai ramoti ma rohangku asa boi gohanMu ahu. Sai mabaor ma pasupasu nang
marhite sian ahu. IngananMu rohanami, TondiMi manggohi i. Pangke dohot
ngolunami gabe ulaulaMi.

(Laos borhat ma tu inganan parmingguon naung diparade)

III. ACARA PARMINGGUON (tersendiri hombar acara minggu sadarion).

IV. Acara Dung Simpul Minggu.

[4]