MINGGU KELUARGA HKBP RESSORT ADIANNANGKA

MINGGU I NDUNG TRINITATIS, 6 JUNI 2021

Tema : Unang Mangaleai Tondi Parbadia!
Jangan Menghujat Roh Kudus

01. Pangaradeon diri – SL Marende – BE 464 “Huboan Ma Diringku” (ruas martangiang)

02. Joujou Tu Parsaoran na badia (L-iturgis, S-ude, H-uria, SL=Song Leader)
L: Horas! Syalom, jala dame ma di hita saluhutna.
H: Horas! Syalom!
L: Marlas ni roha do hita di ari on, di Minggu Keluarga na tapatupa ganup bulan. Na
denggan situtu do mamuji Debata mangendehon goarNa i. Mamaritahon asi ni
rohaNa nang dohot hasintonganNa. Di Minggu parjolo ndung Trinitatis sadari on,
nunga patar denggan basaNa marmudumudu hita, ai nunga disagihon pasupasuNa.
Antong, tapasangap ma Jahowa ala sude denggan ni basaNa, taendehon ma:
“Sangap di Debata Ama” – BE 648 : 1-2
1. Sangap di Debata Ama, sangap di AnakNa I, Nang di Tondi Porbadia Debata na
songkal I, Haleluya puji Tuhan salelenglelengna i. (Jongjong)
2. Puji Raja siparholong Sipalua jolma I, Na patauhon hita bongot tu harajaonNa I.
Haleluya puji Tuhan Raja na tarsilang i.
03. Votum – Introitus – Tangiang:
L: Marhitehite Goar ni Debata Ama, AnakNa Tuhan Jesus Kristus dohot Tondi
Parbadia. Amen. Songon on ninna Tuhan Jahowa: Ianggo halak partigor i mangolu
do binahen ni parsihohot na marhaporseaon; alai anggo di halak parjahat ndang
adong hasonangan.. Haleluya!
S: (Mangendehon) Puji Tuhan Haleluya 3x. Haleluya, Haleluya.
L: Ale Tuhan Debata, jala Amanami! Sai urupi ma hami, asa unang magopo hubahen
hami silehonlehonMu na denggan i, uju ro pasupasuM tu hami. Ramoti hami, asa
unang marpos ni roha hami tu arta na di hasiangan on. Lehon dihami haporseaon
asa dohot hami parjambar di siteanon ni angka na porsea di Ho marhitehite Tuhan
Jesus Kristus, Tuhannami.
S: Amen (Hundul)
04. Koor – Ende Patik – BE 559 : 1 – 2 “Debata Na Songkal”
L: Nuaeng di hamu Huria na badia ro di sude situan na torop. Debata do mual ni las ni
roha, dame dohot haluaon. Ibana do haroroan ni pasupasu di ngolunta, antong sian
unduk dohot serep ni rohanta taihuthon ma Ibana, jala tatangihon PatikNa. Laos
taendehon ma: Debata na songkal …
1. Debata na songkal Sitolu sada, Di sogot ni ari hupuji GoarMi. Debata na songkal
Siparasi roha, Si Tolu sada, Na badia i.
2. Debata na songkal, surusuruanMu. Saluhut marsomba pasahat tumpalMi. Angka na
badia ro tu adopanMu. Mamuji-muji salelengna i. Amen
05. Patik ni Debata
 L: Huria ni Tuhanta, tatangihon ma Patik ni Debata di minggu sadari on, ima Patik V – X ….
L: I ma Patik ni Debata na gabe sipeoponta pardalanan ni ngolunta. Antong, rap
mangido gogo ma hita laho mangulahonsa!
S: Ale Tuhan Debata, sai pargogoi ma hami laho mangulahon na hombar tu PatikMi.
Amen.
06. Koor - Ende Manopoti Dosa BE 182:1-2 “Haholongon Na Badia”
L: Hamu na niasian ni Tuhan Parasiroha i. Halak sirimasan hian do hita ala dosa i, alai
nunga ditogu hita tu ampuanNa. Nunga dipapos jala dipatau rohanta manjalo
hasesaan ni dosanta. Tapaunduk ma rohanta mangarsakhon dosanta...
1. Tu joloM O Debatangku sai use do rohangkon. Sai pasiat tangiangku dohot
iluilungkon. (Jongjong)
2. Husolsoli do rohangku na gok dosa i tongtong. Ai godang ariaringku na hubahen
ambolong.
07. Tangiang Manopoti Dosa / Bagabaga: (L-Liturgis, H-Huria, A-Ama, I-Ina, G-Gen. Muda)
L: Hamu angka haholongan, didok Hata ni Debata di 1 Yohanes 1:9 “Molo tatopoti
angka dosanta, haposan do Ibana jala bonar, manesa dosanta jala paiashon hita
sian nasa hageduhon.
H: Ro do au marsomba tu joloM ale Debata. Patedekhon arsak ni roha nang tondingku
mangkirim di hasesaan ni dosangku. Masihol situtu do ahu mida holongMu dohot
asiMi. Sai unang tulak ahu, sai sesa ma sude dosangku.
L: Nuaeng ma hita mangadop tu Tuhanta sumombahon jala mangelekhon hasesaan ni
dosanta.
H: Pogos do au jala mardangol, alai Tuhan i do sumarihon au. Di hametmeton-ki
diparrohahon Debata sude ngolungku. Diboto Debata do na ringkot di ngolungku.
Asa sude na masa i hubahen ma pasangaphon Debata.
L: Marpanatap do Jahowa tu pardangolanta. Ganup ari do ditopot Ibana hita di ulaon,
uju mamolus godang parmaraan, parsahitan dohot hasusaan. Torop na maol
mangalului karejo, alai lam togu do haporseaonta mangasahon Ibana, ai
sarihononNa do sude na ringkot di hita.
A: Di nasa hahurangannami, paltak do asi ni rohaNa. Pasupasu ni Jahowa do mamba-
hen mamora, jala ndang mardongan hangaluton dibahen. Sude do hami angka
Ama loja mangalului pangabahan, patamba ngolu-ngolu, di keluarga alani sian
nasa rohanta ma tadok mauliate, ai dipatuk do bohalta jala ndang hurangan hita di
pasupasuNa.
I: Di sude ngolu na maol jala na bernit i, dilehon do tu hami angka Ina Tondi
hagogoon, Tondi haholongon dohot Tondi Pangarajaion diri, ndada tondi
hatahuton. marsabam niroha ma hita, tahaposi ma panarihononNa, jala unang ma
hita mardosa ala ni sipanganon dohot parabiton. Tadok do: Aha ma inumonnami?
Dia ma uang singkola ni anakkonnami? Alai nang pe songon i, tapareahi ma
Harajaon ni Debata marhite ulaon na dumenggan, asa dapotan uli dohot
pasupasuNa hita.
 G: Uju mangan hita jala marabit na saksak, jotjot do ro sibolis i mangunjuni hami
angka Naposo. Alai dijou Debata do hami marnida jala mandai denggan basaNa.
Tapatuduhon parange nadenggan di ngoluntaon, angka naposo namarhapantunon
ma hita dijolo ni saluhut jolma, tanda ni naung sahat tu hita luhut habasaonNa. Ai
tu ganup hita, disagihon do na tau hangoluanta. Sian nasa rohanta, tapatupa ma
na dumenggan tu HarajaonNa, marhite i tambahononNa ma angka ondeng tu hita.
L: Pardengganbasa jala Parasiroha do Jahowa. Nunga dipasae Tuhanta sude utang di
dosanta. Ibana ma gabe hasonanganta dohot las ni rohanta. I ma bohalta
patulushon lomo ni rohaNa. Di bagasan unduk dohot serep ni roha taongkuhon ma
dosanta diadopanNa. (Musik mangendehon saayat BE 683 “Di adopanMu
Jesus”)
L: Ale Tuhan, mauliate ma di Ho, Anak ni Debata Siporsan dosanami. Nunga dilehon
Ho asi ni roham, i ma hasesaan ni dosanami. Antong sai pargogoi ma hami
mangulahon lomo ni rohaM, asa pantun, tigor jala daulat hami marpangalaho di
GoarMu.
S: (Mangendehon) Di adopanMu Jesus marsomba au huhut tungki, lao manopoti
dosangki di adopanMu Jesus.
L: Tajalo ma Hata ni Debata gabe ojahan ni las ni rohanta: Ise be mangaluhon angka
na pinillit ni Debata do na mamintori. Ise do na mandabu uhum hamagoan? Kristus
Jesus do naung mate; alai ndada holan i, naung mulak mangolu do, jala di siamun
ni Debata do Ibana mangondihon hita. Hasangapon ma di Debata na di banua
ginjang.
S: Amen. (Hundul)
L: Hamu angka haholongan, huria ni Tuhanta. Tajangkon ma ibana jala tahangoluhon
ma HataNa. Tapatuduhon ma naung taolophon hasesaan ni dosanta, marhite na
marsitutu hita marpadan tu dirinta mandok: Las Rohangku Situtu...
08. Ende Olopolop – BE 190 : 1 – 2 “Las Rohangku Situtu”
1. Las rohangku situtu mida Jesus na lulu. Manjalahi hajolmaon Ai Ibana paluahon.
Jolma manisia i Sian hamagoan i. (Hundul)
2. Las rohangku situtu Mida Jesus na burju. Patupahon hangoluan Di au na di
hamagoan. Tung saluhut dosangki Do disesa Jesus i.
09. Epistel: 1 Musa 3 : 1 – 7 (Responsoria)
L: Hamuna angka dongan sahaporseaon. Nuaeng tajaha ma Hata ni Debata turpuk
Epistel di Minggunta sadari on, i ma na tarsurat di 1 Musa 3 : 1 – 7 …..
H: (Manjaha Responsoria)
L: I ma sahatna. Martua do angka na tumangihon Hata ni Debata jala na umpeopsa.
S: Amen.
10. Ende Haporseaon – BE 747 : 1 + 4 Sai Hunangkohi Dolok I
L: Huria na hinaholongan. Nunga tajaha Hata ni Debata, Epistel na mangurupi jala na
manogunogu hita di minggu on. Nunga ro hita tu Jesus di bagasan las ni roha,
 tahangoluhon ma HataNa. Sude ma hita patuduhon las ni rohanta. Tuhan Debata
do mual ni pasupasu sihatindangkononta. Mardongan serep ni roha: Tasomba
tongtong...
1. Sai hunangohi dalan I dalan na marmulia I, On do tongtong tangiangki, Tuhan
patongtong langkangki. Sai togu-togu au Tuhan baen lam solhot tu lambungMi.
Tu ingananMu na tongam sai lam patongtong langkangki. (Jongjong)
4. Naeng au marngolu na sintong dao sian ruhut tano on, HuriaMi naung monang I
managam au disurgo I, Sai togutogu ………
11. Manghatindangkon Haporseaon:
L: Tahatindangkon ma haporseaonta i rap dohot donganta sahaporseaon di sandok
portibi on, rap ma hita mandok:
S: Ahu porsea ...! Amen! (Hundul)
12. Koor
14. Ende Jamita – BE 543 : 1 – 2 “Buni Bingkas Ni Holong”
L: Tarjou do hita patuduhon haporseaonta di hagogoon ni Debata marhite anakNa
Tuhan Jesus Kristus disiala ni tapataridahon ma I dingolu siganup ari, rosu situtu
ma tabahen paralealeon, jala tutu ma hita masipatariparan dame dohot holong asa
tangkas tajalo pasupasu sihamauliatehononta.Tajangkon ma Hata ni Jahowa
marhite ende Buni Bingkas Ni Holong ...
1. Buni bingkas ni holong ni Tuhanta i di au. Ditobus dohot mudar i pardosa songon
au. Alai on do na huboto : Ditiop Jesus gomos tanganku, Tondingku do di
ramoti. Ro di haroroNa i.
2. Buni umbaen boi malum au dihorhon Debata. Dibaen na huhaposi ho di dolok
Golgata. Alai on do na huboto :…..
15. Jamita: Markus 3 : 20 – 35
16. Marende BE 697 : 1 …. “Molo Ho Do Huihothon” (Pelean Ia / Ib & II)
L: Hamu na hinaholongan, nunga tabege Hata ni Debata na gabe hangoluanta. Sian
las ni rohanta tapasahat ma pelean paduahon tu Harajaon ni Debata...
1. Molo Ho do huihuthon dame sonang rohangki. Sai horas jala martua nasa
hinophopMi. Ho tongtong ihuthonongku, Jesus na palua au. Ho sambing do
oloanhu ala nii martua au.
2. Na rade do au manaon, mangasahon padanMi, Molo ho na manggogoihon talu
haholomon i. Ho tongtong ihuthonongku ……… - musik -
3. Hupelehon ma diringku mangihuthon lomoMi, Ndada be na olo salpu na manggohi
rohangki. Ho tongtong ihuthonongku ………
4. Marparange na badia ma au diadopanMi, Sai patau ma au tiruan, songon
pinangidoMi. Ho tongtong ihuthonongku ……… - musik -
18. Tangiang Pelean dohot Pasupasu