BAHAN SERMON JAMITA TU MINGGU SEXAGESIMA

04 FEBRUARI 2024 Di HKBP RESORT AJIBATA

Jesaya 40:21-31

DEBATA SALELENGLELENG NA DO JAHOWA

I. PATUJOLO
Debata mamillit bangsoNa jala patupahan parpadanan tu nasida asa gabe sada bangso na
bolon jala ramotan ni Debata do bangso i dohot angka pinomparna. Satia do Debata laho
mangaramoti saluhut angka bangso napinillitNai, alai bangso Israel suhar do pangalaho nasida
sian lomo ni roha ni Debata, di laosi nasida padanna rap dohot Debata dang satia be nasida
maradophon Debata. Umbahen gabe diuhum Debata nasida madabu tu habuangan Babel.
Tumatangis do nasida, mandele jala masihol do nasida sadihari ma boi mulak tu bonapasogit
nasida tano parpadanan ni Jahowa dohot ompunasida, tano napinarbagabaga. Ido umbahen, di
Yesaya 40 on, disuru Debata do panuringan Yesaya laho manungguli, paingothon, manosoi jala
paboahon asa unang mandele nasida alai asa hot marhaposan di gogo nang huaso ni Jahowa.
Marhite turpuk on dipapatar tu bangsoi huaso ni Debata na mangatasi nasa na adong, na
mangatasi huaso ni portibion. Di jou bangsoi asa porsea tu Debata ai haporseaon nasida do
napaluahon nasida sian habuangan Babel dohot mangalehon las ni roha nang panghirimon di
nasida.

II. HATORANGAN
Debata salelenglelengna do Jahowa, na marhuaso di sude na tinompanNa. Sian mula ni
panompaon i, nunga dipatuduhon Debata huasoNa, habalgaon dohot hamuliaoNa alai jolma na
parjolo ipe nunga diulahon pangalaosion tu hata ni Debata, jala hona uhum ni Debata. Songoni
do nang bangso Israel ala ni pangalaosion nasida do umbahen na tarbuang nasida tu Babel.
Kekecewaan ni Debata dipangalaho ni bangsoi pola didok “ di tanda jonggi do nampuna ibana
jala diboto halode panggagatan binaen ni tuanna. Alai anggo Israel ndang tumanda Ahu, jala
ndang marroha bangsongKu” ( 1:3). Turpuk on ima Debata patuduhon asi ni rohaNa tu
bangsoNa dohot habalgaonNa. Marhabangsa Ibana di atas ni liat portibion, jala doshon sihapor
angka pangisina i. Ibana pahembang angka langit songon dagangan na halus, dipahire nasida
songon abit undungundung bahen Inganan ( Ayat 22) diulahi Jahowa patandahon huasoNa asa
ditanda jolma i dirina diadopan ni Debata.
Holan marhite na marsigantung tu Jahowa do jolma i asa mangolu jala marguna, ndada
sian dirina sandiri. Dung tarbuang bangso Israel tu Babel, dihilala nasida ma parirna
diparhatoban. Dokdok ni sitaonon mambahen nasida mandele, sahat rodi na mangarajumi naung
di tinggalhon Debata nasida. Ditongatonga ni sitaonon i diarahon Debata bangsoi marhite
panurirang Yesaya merenungkan paboa gumogo do Debata sian sude huaso ni nasa
panggompgomi portibion asa gabe margogo bangsoi jala sumuang pos ni roha lumobi
happorseaon nasida. Laho manambai pos ni roha i didok :”Ipe nasida, disuburhon, ipe marurat
pangkal nasida di tano i, asa mangombus ibana dompak nasida, nunga malos gabe dihabangkon
habahabai nasida songon rapan rapan ( ayat 24). Ndang tarpatudos Debata tu manang aha na
adong diportibion (Ayat 25) balga ni huaso ni Debata na mambahen hita ingkon marpos roha
mulak tu Ibana jala marsitutu mangoloi hataNa ala Ibana do Jahowa Zebaot na parjolo dohot
naparpudi (44 : 6).
Pandohan ni si Jesaya di turpuk on dipatuduhon tu bangso Israel na so adong na buni di
Debata. Nang pe didok bangso Israel, “Buni do dalanku maradophon Jahowa; hape diboto jala
diida Debata do saluhut dalan nasida” (Ayat 27). Sunghunsunghun do roha nasida didia do
Debata? Diboto Debata do sude pardalanan ni ngolu ni bangso i, nang pe songon na buni di
pamerengan ni bangso Israel, hape ndang adong na buni di Debata. Dipaingot Debata bangso
Israel paboa Debata salelenglelengna do Ibana, Debata na manompa sandok portibion, ndang
adong Debata dunghon ni Ibana. Ndang mansohot huaso ni Debata ndang hadodoan
pingkiranNa, atik pe sai mangalo bangsoi, ndang lomo roha ni Debata mandao jolma i sian
Ibana. (Dari awal mulanya sampai tarakhir Tuhan berkuasa sebagai Allah yang tetap sama.)
Marhite Ayat 29-31 dipatuduhon ma, Debata mangapuli, manjanghon angka jolma na
gale. Taruli hagogoon na gale molo marposniroha jala marpanghirimon di Debata. Molo porsea
jala marpanghirimon di pangurupion ni Tuhan i margogo do halak na mananda hagaleonna. Apul
apul ni Debata do ayat on tu bangso Israel, paboahon na ro do ibana paluahon nasida molo olo
marhaposan tu Ibana, ai laho mangalehon gogo tu angka na loja jala mampargogoi angka na so
margellok do haroroNa. Di ayat 29 i didok sumuang do gogo di lehon Debata tu angka na loja,
molo loja jala sorat ingkon pasahaton do na masa i tu Debata, ingkon rap dohot Debata do hita
mandalani dalan na borat i. Manang diape na masa, arsak, las ni roha, sitaonon dohot
parungkilon na so jadi holan hita jolma mangadopisa.
Unang manolsoli di angka na masa alai ingkon olo manaili diangka naung salpu jala
mambaen parsiajaran i di angka naung tabolus. Idaontaonta ma disi songon dia Jahowa
mangantoi hita jala songon dia mangalusi joujounta marhite angka na masa. Pangalaho i do na
pinabotohon ni panurirang Jesaya di turpuk on, asa manang ise na marhaposan tu Jahowa maruli
hagogoon mardapot dapot, gabe marhabong ni lali manaek. Marlojongi nasida ndang olo loja,
mardalani ndang olo mandate (ayat 31). Marlipat ganda hagogoon ni jolma na marhaposan tu
Jahowa. Ndang hasudaan gogo manuhuk parngoluonna ai Debata do mandongani ibana. Pola
dipatudos jolma na marhaposan tu Jahowa dohot lali na habang na mansai timbo manatap sian
ginjang mangida dalan hangoluan. Asa parsaulian do jambar ni halak na pasahat ngoluna tu
adopan ni Debata. Ndang mabiar ibana mangadopi angka na masa ai Jahowa do haporusanna.

III. PANIMPULI
Debata do na marhuaso na manompa portibion nang pangisina, alani holong nang
huasona I sude ingkon mamuji dohot pasangap Ibana. Manang ise na manatap tu Debata
paluaonNa do sian hapariron, haporsuhon, jala toguon na mandalani ngoluna. Jolma na
paimahon Debata dang holan paimahon secara pasif, alai ta paima ma Ibana dibagasan
haporseaon, toguon na ma hita sahat tu hasonangan sogot. Jotjot do gale pamatangta ta on, alai
songon hata ni si Paulus di 2 Korint 12 : 10 “Dibahen i, sonang do huhilala dibahen angka
hagaleon, pangaleaion, hasosahan, pangaleleon, dohot hagogotan alani Kristus, ai jumpang gale
au, disi do au margogo”. Jala songon topic ni minggu Sexagesima “ Debata Salelengleleng na do
Jahowa” asa hot ma hita marhaporseaon tu Debata Jahowa. Ibana do na manontong mangarajai
parngoluonta, disuru Ibana AnakNa, Tuhan Jesus laho mangalehon na ringkot dingolunta
pasonanghon hita, manogu hita di angka sitaonon nang arsak ni roha. Diporsan Jesus do Uhum
hamatean huonghop hita sialani i manontong ma hita marhaporusan tu Jahowa. Margogo ma hita
ala ni Kristus, tapuji ma Ibana Debata na Manontong. Amen.