Jeremia 31:35-37 Patujolo Huria ni Tuhanta na hinaholongan! Hea do ra hita hita manaon na hansit nang pe ndang sian lomo ni rohanta masa na songoni. Boha do hita mangalapati parngoluan molo taadopi na hansit, dangol, parir, lungun dohot bernit manang porsuk? Molo leleng tingkina masa na songoni di parngoluonta, tagamon boi do pe hita hinsat manang hehe? Ise do na tahirim ro lalho patupahon haluaonta? Tu ise ma hita mangalualu asa boi malua sian pardangolan i? molo sungkunsungkun on ma nuaeng tapasahat tu bangso Juda na tongon tarbuang di Babel, aha ma naeng dohononta? Nunga tung leleng nasida ditaban bangso Babel, diboan sian Jerusalem ala naung talu di parporangan. Ndada hola i lengse do luhut haulion ni huta sion dohot bagas joro pinauli ni Raja Salomo. Asa ndada holan na amrsak nasida siala na masa I dohot do nang na maila situtu mili diingot hatongamon ni Jerusalem nasailaon. Marragam do nang pangari mangion na tubu di roha nang pingkiran nasida. Boasa ma masa na songon i? didia do Debata umbahen dipasombu sude masa i? Hatorangan Turpuk Dipasahat panurirang Jeremia ma tu nasida dia sibahenon ni Jahowa. Masa pe habungan i ndada ala huaso manang hagogoon ni parangan sian Babel. Tartaban nasida ndada ala hagaleon ni bangso Juda alai na dipangke Jahowa do Raja Nebukadnesar papatu nasida dalan maminsang hajahaton pinatupa ni bangso Juda. Ndang be marlomo ni roha Debata di pambahenan ni angka partogi na papeol uhum dohot mangarupa angka na pgos. Ala ndang hombar tu patik dohot uhum Debata be mangolu bangso i, diuhum ma nasida. Alau, ndang dipasombu Jahowa nasida marsingkor salelengna di Babel i, ai na jonok nama tingkina togihonon ni Jahowa nasida mulak tu songon naung binahenNa na jolo tu ompunasida ruar sian tano pahatobanon di Misir. Andorang so dapot tingki binuhulNa i, ingkon parjolo dope nasida manjalo parpadanan na imbaru. Patik dohot uhum ni Jahowa I pe ndang be di harotas disurathon alai dibagasan atate nasida. Asa jolo marhaimbaruon do bangso i asa boanonna mulak tu bonapasogit laho mangingani tano pinarbagabaga I songon nasailaonna i. debata do na manurathon patik I dohot na manuanhon parpadanan tu nasida be, ndang be marhite naposo pinillit Jahowa. Ido padan na imbaru na dipasahat di Jeremia tu bangso na tarbuang. Asa boi dohonon, ndada holan apulapul na pinasahat ni panurirang i, alai nunga adong disi hatongtongon (jaminan) paboa hot do Jahowa Debata ni bangso i. Pandohohan parjolo turpuk on tung tangkas mangondolhon hadirion ni Jahowa na hot di hadirionNa laho mangatur nasa na amsa di atas tanon on. Songon dia Ibana mangelehon mataniari gabe panondang arian dohot aturan tu bulan nang bintang gabe panondang borngin, songon i do Ibana hot mangatur pardakanan ni ngolu ni bangso i. Sada aturan na hot do parbinsar mataniari laho manondango tano on di arianna songon i bulan dohot angka bintang manondangi haholomon dobodarina. Tudosan taringot tu hasatiaon ni Jahowa do dipasahat si Jeremia laho paposhon roha ni bangso I asa unang sai margudompong, lomos manang boahaton nasida. Diuduti do pandohan I mandok “Ibana na manggunsang laut gabe marhasak angka galumbangna”. Boi tapatorang pandohan on tu parsorion ni bangso i. molo pe tongon sai hira na so adong be na tuk mangondihon nasida siala hagogon ni Babel na mambebeb parngoluan nasida, ndang I dope na humogo. Ai aha ma hagogoon ni raja Babel mambahen galumbang ni laut gabr marhasak? Parmaraan dohot hamagoan na bou dibahen I pe gutu di Jahowa do. Na marlapatan, ingkon pos situtu do roha ni bangso I di sangkap hatuaon ni Jahowa. Molo tapadomu ayat 36 lam tangkas ma taida songondia pangaturhonon ni Jahowa ni pardalanan nni ngoli ni bangso I, pola didok “tung sura mansohot angka aturan u maradophon Ahu, ninna Jahowa, mansadi ma dohot pinompar ni Israel, unang be targoar bangso di jolongKu salelenglelengna”. Aha lapatan ni? Ndang ala pambahenan ni bangso na hurang tama siala na patupa angka hageduhon dohot hajahaton gabe sumurut Jahowa sian padanNa. Ala sian mulana nunga dipillit Jahowa Juda gabe bangsoNa dohot hasianNa, hot do I ro disalelengna. Alai ndada hadirion ni bangso I songon na pinillit ni Jahowa gabe boi marlomolomo naisda mangulahon na maralo tu Patik ni Debata. Ingkon marhamubaon do bangso I asa unang hona rimas. Dipatangkas muse do pandohan di ayat 37 “songon do hata ni Jahowa: molo tung dapotan suhatan angka langit di ginjang, jala dapot dodoon angka ojahan ni tano on di toru, dohot ma Ahu mambolonghon sandok pinompar ni si Israel ala ni saluhut na binahen nasida, ninna Jahowa”. Ndang adong agia ise nab oi manihat timbo ni langit dohot mandodo bagas ni laut. Alai molo pe adong na b ou manuhat langit dohot mandodo laut ianggo Jahowa ndang tardodo manang ise. Unang ma adong jolam na mambahen lobi sian na bou patupaonNa hala unang ma dirina dibahen manuhat huaso ni Jahowa. Hot do uari ni Jahowa na manodo Israel gabe bangsoNa. Ndang ala pambahenan ni Israel gabe diparsoada hajongjongan nasida di adopan ni Jahowa. Pandohan on ma gabe suhatsuhat na patoulohon dipasahat Panurirang Jeremia tu bangso na tarbuang I, na pahothon pos ni rohanasida na ingkon do Ibana sandiri manguluhon bangso I mulak sian habuangan Babel. Hot do pangaturhon ni Jahowa di ari sogot di bangsoNa. Panimpuli Hamu dongan sahaporseaon, tu hita ma nuaeng hata ni Panurirang Jeremia on. Ndang tagamon s adong siprungkilhononta siala ragama na masa isara ala parhepengon na sai hurang, hahipason naung moru, gogo na lam sumurut dohot lan na asing. Taingot ma hata ni Jahowa, na hot do padanNa nang tu hita ruas ni huria na hinophopNa. Ndang adong na mambahen Jahowa maralang ni roha manghophop hita nang pe godang hahurangan dohot hagaleonta. Hombar tusi diama na igkon parangehononta sian jamita on di ngolunta siganup ari na mambahen hita sonang mandalani ari na naeng ro? 1. Tiop ma tongtong hat ani Tuhan I ai dio hatuaonta. Ndang tarurak jolma na marhaposan tu Jahowa. Ndang adong pangambati di hita pasahathon ngolunta tu Debata. 2. Porsea ma hita I padan ni Debata, lehononNa haluaon di angka naung tinobusNa dibagasan Kristus Jesus. 3. Jangkon ma apulapul dohot gogo sian Debata na hot mangaturhon haulion no parngoluonmu, Amen. Evangelium Mateus 21:1-11 “Idama Na Ro Ma Rajam Tumopot Ho” Patujolo Idama na ro ma Rajam manopot ho. Pandohan on nuga disuriranghon Panurirang Sakaria di na robi, paboa na ingkon ro ama Mesias di tongatonga nasida (Sak. 9:9). Jala dipasunggulhon ma I muse uju dipasahat Jesus toa tu angka siseaNa laho mangarade angka na rigkot sipatupaon nasida di na naeng di masuhi Jesus huta Jerusalem. Alani las situtu ma roha ni sude angka natorop I ai nunga patar naung sinuriranghon Panurirang Sakaria taringot tu habobongot ni Jesus tu huta Jerusalem. Hatorangan Turpuk Nunga patar be panurirangon i marhite habobongotNa tu huta Jerusalem jala na marsihundul di halode dipapatar Jesus do diriNa songon Raja Israel dohot Mesias na diparbagabaga i. nunga diboto Jesus na ingkon marujung nama ulaonNa di na di masuhi Ibana huta Jerusalem di hatihai ma pangaimpunan ni ulaonna songon Mesias. Las situtu ma roha ni natorop i ala nunga leleng i disuriranghon jala nunga tarpaima bangso i di hapapatar ni panurirangon i. Alani sude do natorop i mangolopolophon huhut mandok: “Hosianna di Anak ni Raja Daud, pinasupasu ma na ro marhitehite goar ni Tuhan i” (ayat 9). Saluhutna i dipatupa nasida laho patuduhon balga ni las i rohanasida i. Ndada holan alani panurirangon na pinasahat ni si Sakaria alai huhut do ala nunga tangkas diida nasida angka tanda halongangan na dipatupa Jesus. Alai ternyata hurang sintong do pangantusion ni torop halak Jahudi taringot tu panurirangon na dipasahat si Sakaria. Marasing do pangantusion nasida taringot tu Mesias. Dihirim roha nasida do naeng jongjong Jesus laho paojakhon hatimbulon dohot hamuliaon ni Israel sumuang muse songon di na robi i, ima songon na masa di harajaon ni si Daud. Dihirim nasida do Jesus jongjong gabe raja na marhuaso hala margogo manaluhon pamarenta Romawi. Sian hatorangan i boima idaonta andul jala marasing do pangantusion nasida na disusiranghon si Sakaria. Tutu Raja jala Mesias do Jesus, alai ndang harajaon portibi na naeng pajongjongonNa, Alani do umbahen na marsihundul di halode do Ibana mamongoti huta Jerusalem. Ai serep do rohaNa, jala ido dalan na dipillitt Jesus laho patigor pangantusion nasida taringot tu harajaon ni Mesias i, ima harajaon na gok hadameon. Disaluhut pangantusion na sala i gabe tarhirim ma torop sian bangso Jahudi laos gabe ditulak nasida ma Jesus. Ndang apala leleng sian hatiha diolopolophon nasida haroro ni Jesus, laos gabe direherehei nasida ma muse ibana. Andul situtu ma na masa i. Pamangan nasida do mamujimuji Jesus uju mamasuhi Jerusalem, alai laos pamangan nasida do muse na mangaleai Ibana huhut mansoadahon Ibana. Nasida do na mandok “pinasupasu ma na ro marhitehite goar ni Tuhan i” alai laos nasida do muse na mandok “parsilangkon ma!” Na boi masa do sisongoni ala ndang jongjong nasida songo sisean na rade manangihon jala marsiajar sian pangajarion ni Jesus dohot angka panurirang taringot tu haroro ni Mesias. Panimpuli Nunga tajaha Buku na Badia i (Bibel) jala nunga tatangihon angka jamita na patoranghon taringot tu ulaon ni Jesus di tongatonga ni portibi on. Naeng ma saluhutna i lam manosoi rohanta mamuji Ibana jala mangolopolophon Ibana. Naeng ma saluhutna i mangonjar rohanta tongtong manghatindanghon Ibana asa lam torop na mambege jala mamboto angka ulaonNa huhut lam torop na manghaporseai jala mangihuthon Ibana. Dipatau Tuhan ido hita mambege, marnida jala manghilalahon angka pambahenan ni Tuhan i di portibi on nang di ngolunta, naeng ma saluhutna i lam patogu haporseaonta tu Ibana. Alani pos ma rohanta, angka las ni roha nang angka arsak ni roha saluhutna i boi do dipangke Tuhan i laho mamasumasu hita. Antong naeng ma tongtong hita porsea tu Ibana saleleng hita mangolu. Manang aha pe na masa, naeng ma tongtong hita mangihuthon Ibana jala mamuji pasangap Tuhan i, Raja na ro manopot hita, na mangantusi saluhut parsorion ni ngolunta jala na marhuaso mangurupi hita manghamonanghon parungkilon na masa di ngolunta jala na mamasumasu hita. Amen.